پەکەکە چقاس ژ یا خوە دکەڤە ئەوقاسی ھار دبە و ب ھەموو دەزگەھێن خوە یێن مەدیایێ ژ بۆ کو سەدەمەکی بۆ تێکچوونا خوە ببینە ئێریشێ پەدەکێ و بارزانیان دکە.
وەک گەلەک جارا، جاردن د مالپەرا لێکۆلینێ دە نڤیسەک ب ناڤێ فەرھاد شاھین ھاتیە نڤیساندن و ب کین و نەفرەت ئێریشێ پەدەکێ و بارزانیان دکە. گەلەک جاران ل سەر سەختەکاری و دەرەوێن مەدیایا پەکەکێ ھاتیە نڤیساندن و ھەروەھا ل با وان ئەخلاقەکێ سنۆردار تونەیە کو بێ شەرم و ب ھەزاران بێبەختی ھەلوەستا خوە یا د خزمەتا دژمنێن کوردستانێ دە بەردەوام دکن.
د نڤیسینا کو د لێکۆلینێ دە ھاتیە وەشاندن دە دبێژە: “تێ دیتن کو دەما ئەردۆگان گھیشت ئەنقەرەیێ، ھێزێن پەدەکێ ب ئاوایەکی دەفاکتۆ ل دژی پەکەکێ ھەلوەستەکێ شەری نیشان دان. لگەل ئارتێشا ترک یا داگیرکەر، کو ھێزێن خوە بەر ب ھەرێمێن گارێ، مەتینا و خاکورکێ ڤەدگوھەرینە برن و ھەول ددە دەرباسبوونا رێ ل گەریلا بگرە، دەم ب دەم لگەل گەریلایێن ئازادیا کوردستانێ ژی تێنە ھمبەرھەڤ.”
ئەڤ دەرەوە ئەڤە دەمەکە تێ دوبارەکرن. ژ خوە دەڤەرێن کو ئەو بەحس دکن ل باشوورێ کوردستانێ نە و دەولەتا ترک ب سەدەما پەکەکێ ھاتیە ھەرێمێ و دەولەت و پەکەکە ب ھەڤرە د ناڤا ھەماھەنگیەکی دە ھەول ددن ھێزا پێشمەرگەیان ل ھەرێمێ کێم بکن. پەکەکێ ل باکورێ کوردستانێ بۆستەک ئاخ ئازاد نەکریە. ل باشوور ب جھ بوونە و ل دژێ دەولەتبوونا کوردان تەڤدگەرن و وەک ھێزەکا ئارتێشا ئیراقێ د ناڤا چالاکیا دەیە. یێن کەتین پێشییا دەولەتا ترک و ئەو ئانین باشوورێ کوردستانێ پەکەکە ب خوەیە.
ژ ئالیەک دن ڤە دالقاندنا ئالایێ ترکیێ ل کەلھا ھەولێر رەخنە دکن و دبێژن کو “ئەم ڤێ ژ بیر ناکن”. گەرەک باش بێ زانین کو ھەر دەولەتەکێ رێبازەکا وان ھەیە کو ب وی ئاوایی پێشوازیا سەرۆککۆمارەکی بکن. ل فرانسا گەلەک جارا برجا ئەیفێل ب ئالایێ ھندەک وەلاتان ھاتیە رۆنیکرن و خەملاندن. ل دوبای ھەمان تشت تێ کرن، ل کوردستانێ ژی دەما سەرۆککۆمارەک سەردانێ دکە ئالا وان رەنگ ددە کەلھا ھەولێرێ. ژ بەری نھا ژی سەرۆککۆمارێ فرانسایێ و پاپا وەک سەرۆککۆمارێ ڤاتیکان سەردانا کوردستانێ کرنە و ئالا وان ژی رەنگ دایە کەلھا ھەولێرێ.
ژ بلی ڤێ کی بەحسا ئالایی بکە بلا پەکەکە بەحسێ نەکە. ھەموو رایادارێن پەکەکێ ئالایێ ترکان وەک نرخەکی خوە یێ ھەڤبەش دبینن. ژ رێبەرێ وان ئۆجالان ب خوە شانازییێ ب ڤی ئالایی دکە. نھا ژ بۆ خاپاندنا خەلکەکی ئەڤ گۆتن قەت نایێ فرۆتن. وان مەژیان د وەختێ خوە دە دەما ئالایێ کوردستانێ ل بالەفرخانەیا ستەنبول و ئەنقەرە ژی ھاتیە بلندکرن رەخنەیێن مەزن ل ئەردۆگان گرتن.
د بەردەوامیا نڤێسێ دە فەرھاد شاھین دبێژە: “ھەر چەند رایەدارێن پەدەکێ ب گۆتنا ‘ل گۆری پرۆتۆکۆلێ’ ھەول دان بەرتەکێن چێبووین ژ ھۆلێ راکن ژی، ئەڤ وێنە ژ بۆ پەدەکێ وێنەیێ وەستاندن و تەسلیمیەتێ یە. ما نە ئەو خایین-ھەڤکارێ مەزن ب ناڤێ مەسعوود بارزانی بوو، کو دگۆت “”ەم دخوازن وەک ھەرێما فەدەرال یا کوردستانێ ببن پارێزگەھەکا ترکیێ”؟ ما تەسلیمکارێن دن یێن ب ناڤێ مەسروور و نێچیرڤان دەستێن ئەردۆگان نەگرتن و خەتا “ئەم یێن تە نە، وەک کو تو دخوازی ب کار بینە” نەکشاندن؟ دەرەنگیا ھاکان فیدان ژی یا د ھەڤدیتنێ دە کو دەما ئەردۆگان د جڤینێ دە ب کامیرەیان ھات کشاندن ژی، نابێژە کو بارزانی بەرەڤاژی باوەریا گەل، ژ ئالیێ ترکان ڤە جددی نایێن گرتن و دێ پشتی کو بێن لێدان. ھەتا رادەیەکێ تێ بکارئانین؟”
ڤەکریە ئەو زھنیەتا کەسایەتەک وەک سەرۆک بارزانی ب “خیانەتێ” و نێچیرڤان و مەسروور بارزانی ب تەسلمیەتێ ئیتیھام دکە، ژ بەری ھەر تشتەکی ئەولێ خیانەتێ ب خوە و ملەتێ کورد دکە. ئەو ژ بۆ خیانەتا خوە ڤەشێرن قەھرەمانا ب خیانەتێ تومەتبار دکن.
نھا ئەڤ ئیدیعایا تێ کرن ب تەنێ دکارە ببە پێکەنوکەک ژ بۆ کەسایەتیێن سیاسی و کوردستانی. گەلۆ پەکەکە چ ژ پرۆتۆکۆلا فام دکە؟ ھەتا وەک ڤێ گاڤێ چەند رایادارێن پەکەکێ ب پرۆتۆکۆل سەردانا دەڤەرەکی کرنە یان ژی پێشوازیا ھندەکان کرنە ؟ یان ژی ھەڤدیتنەک کرنە؟ ئەو تەنێ پرۆتۆکۆلا سیخووریێ تێدگھن و ھەڤدیتنێن وان ب تەنێ لگەل دەزگەھێن ئیستخباراتێن وەلاتان و دەولەتا کوور دە ھەنە. ژ ئالیەک دن ب وژدان، گەلۆ کەسەکێ دیتیە کو ل دەرەکی سەرۆک مەسعوود بارزانی وەک د نڤیسێ دە تێ ئیدیعاکرن گۆتیە : “ئەم دخوازن وەک ھەرێما فەدەرال یا کوردستانێ ببن پارێزگەھەکا ترکیێ”… دەروا بکن لێ بەلێ بلا یێن ب لباسن بن.
گەلەک ئیتیھامێن بێ ئەخلاقی کرنە، لێ راستی دەما مرۆڤ ھەولددە بەرسڤا ڤان پیسەکان ژی بدە شەرم ژ خوە دکە.
لێ خالەک ھەیە کو دڤێت ب تایبەتی مەدیایا باشوورێ کوردستانێ ڤێ یەکێ ببینە. دەوەسا پرۆپاگاندەیا دەمیرتاش و تورک بکن، بلا راستیا خوە ببینن بەحسا وان تۆھمەتێن پەکەکێ بکن و ب ئاوایەکی بەرسڤا وان بدن. نە ھەما بچن بەر لنگێ کەسایەتێن دەمێ و مایکان درێژی بەر دەڤێ وان بکن. پەکەکە واجبێ خوە دکە، ئەرکا وان ئەوە کو رێ ل دەولەتبوونا کوردان بگرن و نرخێن کوردان یێن نەتەوی ژ ھۆلێ راکن و بدن ژ بیر کرن. ژ بۆ ڤێ ژی ئێریشێ پەدەکێ و بارزانیان دکن. لێ کوردێن دن تەڤی مەدیایا خوە چ دکن؟ ئەڤە پرسەکە کو پێدڤییە ھندەک ب ویژدانا خوە بەرسڤا وان بدن.
بلا کەسەک د دەربارێ پەکەکێ دە خوە نەخاپینە، پەکەکە تەھدیدا ھەری مەزنە ل سەر دەستکەفتیێن باشوورێ کوردستانێ.
پەکەکێ ل باکور جڤاتا کورد تەخریب کریە و ھەولددە وان لگەل دەولەتا ترک و کەمالیستان دەمج بکە.
پەکەکێ ل رۆژئاڤایێ کوردستانێ دەمۆگرافیا وەلات گوھەرت و عەرەب کرنە پرانی..
پەکەکە ل رۆژھلاتێ کوردستانێ سیخووریا رەژیما ئیرانێ دکە.
رۆژەڤاکورد
