پەکەکێ ب شاشى شرۆڤەیا مرۆڤێ كورد و پرسگرێکا كوردى كریه..
سمکۆ عەبدولعەزیزی
بەشا چارەمین: پەکەکێ دژاتیا تەڤ پارتیێن کوردان کر
د بەشا سێیەمین دە من باسی رێیێن شاش یێن پەکەکێ ژ بۆی ئیسبات کرنا خوە د ناڤا جڤاکا کوردی دە کر، من گۆت کو پەکەکێ دژاتیا تەڤ کەس و پارتیێن ولاتپارێز کر، لێ بەلێ، گه‌له‌ك برێزان ب خوەندنا گۆتارا من داخوازا دۆکومەنتان ژ من كرن، لۆما ژ بۆی رێزگرتنا ژ وان برێزان ئەزێ هه‌ول بدم هن میناكێن بەرچاڤ كو جهێ نیقاشێ نینه بێخم به‌ر چاڤێن وان، ژ بۆی کو ڤێ یەکێ ئیسبات بکم ژی دڤێ ئەڤ خال وەرن زانین:
هەر ژ دامەزراندنا خوە هەیانی نها، پەکەکە پارتیه‌ك نه‌ته‌وی نه‌بوویه.
پەکەکێ باوه‌رى ب فره پارتایه‌تیێ نه‌بوویه.
پەکەکێ ت جاران باوەری ب ئازادییا رادەربرینێ نه‌بوویه.
پەکەکە و عەڤدللا ب ت ئاوا نەکارینە هزرا جودا د ناڤا رەفێن خوە دە قه‌بوول بكن.
خالێن مە ل ژۆر باس کرین راستیەکە ئەشکەرە و زەلالە، تەڤی کو راستیەکە دیرۆکینە و ت گومان ل سەر تونەیە ژی، لێ بەلێ کۆلە و مریدێن پەکەکێ ب ت ئاوا ناخوازن باوەر بکن و ڤێ راستیێ نابینن، دەما کەسەک بێ و باسی ڤان کێماسیێن پەکەکێ بکە ژی، دەملدەست ب ئیخانەتێ و میت بوونێ تێ سووچبارکرن.
د سالا 1973ان دە دەولەتا ترک رێ ب خوەندکاران دا ژ خوە رە کۆمەلەیێن تایبەت ئاڤا بکن، ئەڤ بۆ سەدەم کو هژمارەک کۆمەلەیێن جودا جودا یێن خوەندکاران بێن دامەزراندن، د سالا 1974ان دە خوەندکارێن کورد ژی کۆمەلەیەک د ناڤا زانکۆیا ئەنقەرەیێ دە ب ناڤێ “هزرا کلتووری یا شۆرەشگێریا رۆژهلات” دامزراند، ئەڤ رێکخراو پڕ چالاک بوو، ب ئاوایەکی کو بوو جیهێ مەترسیێ ل سەر دەولەتا ترک، ژ بەر ڤێ یەکێ دەولەتا ترک دەست ب دامەزراندنا کۆمەلەیەکە خوەندکاران ب ناڤێ کۆمەلەیا خوەندنێن بالا یا دەمۆکرات کر، ئۆجالان، عەبدولرەحمان پۆلات، نەجاتی کایا، کەچەکە یۆگسلاڤی ب ناڤێ نادرە و کەسیرە یلدرم (فاتمە) کو هەڤژینا ئۆجالان بوو تەڤلی کۆمەلەیا خوەندکاران یا گرێدایی دەولەتێ بوون، و ل گۆر تەعلیماتێن ئیستیخباراتا ترکیێ تەڤگەریان. (پرتووکا دیرۆکا پەکەکێ، جەمیل بایک، رووپەلا 81) جەمیل بایک دبێژە، (ئۆجالان، کەسیرە، نادرە و نەجاتی کایا) سەرکێشیا ڤێ رێکخراوێ کر.
ب ئاوایەکێ گشتی ڤێ رێکخراوێ دو ئارمانج هەبوون:
دژایەتیکرن و لاوازکرنا رێکخراوا خوەندکارێن کورد.
بهێزکرنا هزرا چەپ.
ئەڤ تشتەکی پڕ نۆرمالە کو دەولەتا ترکیێ کارەکی ب ڤی ئاوا ل دژی کوردان ئەنجام بدە، ژ بەر کو هەر کەس هۆڤیتیا ترکیێ د دەرحەق کوردان دە ناس دکە و دزانە ترک دژمنەکی چقاس دل رەق و هۆڤە ل همبەر کوردان، لێ تشتا نە نۆرمال ئەڤە کو کەسێن هەری دیار یێن رۆل هەبوویی د مژارا ژناڤبرنا رێخستنا گرێدایی خوەندکارێن کورد پشترە بوون کەسێن ئاکتیف د دامەزراندنا پەکەکێ دە، ژ وان کەسان ژی دکارم باسی “عەڤدللا ئۆجالان، عەبدولرەحمان پۆلات کو مالا خوە کربوو جیهێ جڤینێن پەکەکێ، پیلۆت (نەجاتی کایا)، کەسیرە یلدرم ژنا ئۆجالان کو کەچا یەک ژ بەرپرسێن میتێ بوو.
دیسا نیزامەدین تاج ژی کو یەک ژ دامەزرینەرێن پەکەکێ یە دبێژە، د دەستپێکا کارێ مە یێ رێخستنێ دە ئەڤ سێ کەسە (نەجاتی کایا، کەسیرە و عەبدولرەحمان پۆلات) ئەندامێن میتا ترکیێ بوون.
کەسیرە یلدرم (فاتیمە) خەلکا دێرسمێ یە، بابێ وێ کەسەکی دەستهلاتدار بوو د ناڤا ئیستخباراتا ترکیێ دە و باپیرێ وێ ژی کەسەک بوو کو بەشداری سێدارەدانا شێخ سەعیدێ پیران بوو، ژ بەر ڤێ یەکێ گەلەک رەخنە ژ ئۆجالان تێن گرتن کو چما زەواج لگەل کەچەکا کو ئەو ب خۆ و مالباتا وێ هەمی ئەندامێن ئیستیخباراتا ترکیێ بوو پێک ئانیە و ئەو ئانیە ناڤا رێخستنێ دە. ئۆجالان د بەرسڤا ڤان رەخنەیان دە دگۆت، ئەم نوونەراتیا گەل دکن، کەسێن د ئیستیخباراتێ دە ژی کار دکن بەشەکن ژ گەل و پێویستە وانژی جیهێ خوە هەبە د ناڤا مە دە، ئەز دزانم کەسیرە ئەنداما ئیستیخباراتا ترکیێ بوو، جەمیل بایک د پرتووکا (دیرۆکا پەکەکێ) لاپەرە 10 دە دبێژە، ئۆجالان ب رێیا کەسیرێ و هەڤالێن وێ تەڤ ئالیکاریێن لۆجیستی و دارایی ژ دەولەتێ وەردگرتن.
پشترە دەولەت ترکیێ ب رێیا کەسێن ل ژۆر مە ب ناڤ کرین بریار ل سەر دامەزراندنا پارتیەکە “کوردی” دا، ژ بۆی ڤێ یەکێ ژی فەرمان دا عەڤدللا ئۆجالان و کەسێن دن یێن گرێدایی میتێ کو رێخستنەکە کوردی ب ناڤێ پەکەکێ دامەزرینن، بەلگەیا هەری بهێز ل سەر ڤێ یەکێ ژی کو پەکەکە چێکریا میتێ یە ئاخافتنا ئۆجالان ب خوە یە دەما دبێژە، “بۆ دەما 12 سالان من پەکەکە ب پەرە و ئالیکاریێن میتێ برێڤە بریە”.
