ئازاد حاجی مەحموود
پەکەکە ب وێ فکرێ دژی کو رێبەرتیا گەلێ کورد دکە و گەلێ کورد ل بەندا داخویانیێن وێیە، ژ خوە ناپرسە گەلۆ دبە کی ل بەندا داخویانیا من بە؟ ژ بەر کو ل چەند گەلیێن ھەرێما کوردستانێ کۆمارەکە خەیالی راگھاندیە، د ڤێ کۆمارێ دە کو بریاردەر و جەماوەر ئەو ب خوە نە، ب دەستهلاتەکە توند ڤان گەلی و دۆلان برێڤە دبە، هەر سال هەژمارەکە هەری زێدە یا زارۆکێن کورد، ل ناڤچە و هەرێمێن جودا جودا بەر ب کۆمارا خوە یا خەیالی درەڤینن، ل ور دکوژن و ژ مالباتێن وان رە دبێژن د شەر دە هاتنە کوشتن.
ب درێژاهیا 30 سالێن رابۆری، پەکەکە ل دژی ھەرێما کوردستانێ و سەرکرداتیا پارتیا دەمۆکراتا کوردستانێ (پەدەکێ) داخویانیا بەلاڤ دکە و ب وێ یەکێ تۆھمەتبار دکە کو لگەل ترکیێ ل ھەڤ کرنە. د داخویانیا خوەیا داوی دە دیسا ڤێ یەکێ دوبارە دکە، لێ گەر ھوون سەرۆکێن پەکەکێ یێن کو د خەیالێن خوە دە دژین ل ئالیەکێ دانن، خەلکێ کۆمارێن وێ یێن خەیالی ژی فێم دکن، ژ بلی کەسێن کو ب زۆرێ ئانینە و کۆلەیێن وان دو سێ کۆمارێن د دۆلێن کوردستانێ دە راگهاندی و کەسێن ل گۆر ئاخافتنا “دوژمنێ دوژمنێ من، دۆستێ منە” تەڤ دگەرن ت کەسەک دن ب داخویانیێن پەکەکێ باوەر ناکە، و کەسەک دن نکارە گوهداریا ڤان داخویانیان بکە.
نها دڤێ بپرسین، چما پەکەکە ل هەرێما کوردستانێ یە، ب چ حەق باس ل هەرێما کوردستانێ دکە و دەستوەردانێ د کاروبارێن وێ دە دکە؟ ژ بۆی بەرسڤا ڤێ پرسێ، هەر کەسەک پرتووکا دیرۆکا پەکەکێ یا جەمیل بایک بخوینە، بەرسڤ وێ ب دەست بکەڤە، ئەو پرتووک ژ تە رە دبێژە، چما خەلکێ دکوژن و لەشکەرێ ترکیێ کاشی هەرێما کوردستانێ دکن.
پەکەکە وسا دفکرە کو ئەڤ چەند گۆتنێن کو ئەڤ زێدەتری 30 سالن دبێژە ئاگاھیێن نوو نە، لێ ئەو قەسپێن کو رێڤەبرێن پەکەکێ دخوەن بەرکێن وان د بەریکا گەلێ کورد دە نە. پەکەکە پەیوەندیێن دیپلۆماتیکێن د ناڤبەرا ھەرێما کوردستانێ و ترکیێ دە وەک کارەکی سیخوریێ دبینە و ئێرشی پارتیا دەمۆکراتا کوردستانێ (پەدەکێ) دکە، لێ حکوومەتا ھەرێما کوردستانێ ئاژاندەیا خوە ھەیە و ل گۆر وێ ژی دۆستایەتی و پەیوەندیێن لگەل جیرانان خالەکە گرنگە، کو دڤێ کار ل سەر وەرە کرن، ژ بەر کو حکوومەت ئارامیا وەلات و ئاساییشا گەل ب ئەرکێ خوە دبینە، پەکەکە ژی تێ کار ل سەر تێکبرنا وێ ئارامیێ دکە.
د ڤان رۆژان دە کارەکە مەدیایی یا رۆژنامەیا خەبات، هات سەختەکرن و پڕ کار ل سەر ڤێ سەختەکرنێ هات کرن، داوی جار ژی پەکەکێ داخویانی دا و گۆت: “ئەو مژارا کو رۆژنامەیا خەبات باس کری، سیخورییە”، پرس ئەڤە، چما پەکەکە دبێژە نڤیسا خەباتێ؟ د ئەسلا خوە دە یەک پەیڤ ژی یا ڤێ رۆژنامەیێ نینە، بەلکو ئاخافتنێن “عەبدولکەریم وەیسی” فەرماندارێ بەرێ یێ پەکەکێ نە.
ئەو فەرماندەیێ بەرێ یێ پەکەکێ ل قەندیلێ، پشتی تێگھیشتنا سیاسەتا خەلەتا پەکەکێ، دەست ژ رێزێن وێ پارتیێ بەردای، د ھەڤپەیڤینەکێ دە لگەل باس نیوسێ کو پشترە ژ ئالیێ رۆژمانەیا خەبات ڤە ھات وەرگرتن و بەلاڤکرن، دبێژە: پەکەکە ب خیانەتا دەرڤە و ئالیکاریا دوژمنێن کورد و کوردستانێ، ئێریشی سەر هەرێما کوردستانێ دکە، دەما مە فێم کری ئەڤە خیانەتێ دکن، ئەم ژێ قوت بووین، لێ چ قوتبوونەک، هەیانی نها ژی پەکەکە ب رێیا هێزەکە سیخوری ل پەی وان کەسانە یێن کو ژێ قوت بووین و دخوازە وان تەرۆر بکە، ژ بەر کو نهێنیێن پەکەکێ پڕن، پەکەکە ب خوە سەدەمە کو ترکیە تێ ناڤا خاکا هەرێما کوردستانێ.”
پەکەکە کو داخویانیان ددە، چما ڤێ یەکێ ڤەدشێرە، فەرماندارەکی وێ یێ بەرێ ڤان تشتان دبێژە. ئارمانجا پەکەکێ ئەوە کو ناڤەرۆکا مژارێ ڤەشێرە، و تشتەکی دن بەرچاڤ بکە، ئەڤ ژی ب تەنێ ژ بۆی چێکرنا ئاژاوەگێریێ یە.
