سەرۆکێ شاخا دیاربەکرێ یا کۆمەلەیا مافێن مرۆڤ ئەرجان یلماز گۆت، د ھەفتیا ھەزاری دە ژی ل ھەر دەرێ یەک داخوازا وان ھەیە، ئەو ژی چارەنڤیسا کەسێن ھاتنە ونداکرن بهێت دیارکرن و بەرپرس بێن دادگەھکرن و سزادان.
دایکێن شەمیێ د ھەفتەیا ھەزاری دە، ل دیاربەکر و ستەنبۆلێ جارەکە دن داخوازا دیارکرنا چارەنڤیسا کەسووکارێن خوە کرن. سەرۆکێ شاخا دیاربەکرێ یا کۆمەلەیا مافێن مرۆڤ ئەرجان یلماز گۆت: “ئیرۆ سیھ سالی و ھەزار ھەفتەیا چالاکیا کەسووکارێن وندایان و پارێزڤانێن مافێن مرۆڤە. ھەزار ھەفتە، دایک و کەسووکارێن شەمیێ، ب بنچاڤکرنان، کریارێن خرابی و ئێشکەنجەیان و گەفان رە رووبروو مان. ل تو جارێ نەترسیان و خوە نەچەماندن. ئەڤ وێرەکیا وان بۆ ھەموو دژبەرەیێن جڤاکی دێ ببە نموونە.”
یلماز گۆت ژی: “ئەم ژ دیاربەکرێ چالاکیا دایکێن شەمیێ سلاڤ دکن. ھەستێن مە ل گەل وانە و ھەڤگرتنا مە ددۆمە. ئەم دبێژن بۆ مە ھەر دەڤەر مەیدانا گالاتاسارایە، ھەر دەڤەر جادەیا گولستان یا دیاربەکرێیە. ل ھەموو دەڤەران داخوازا مە یەکە، وندایێن مە بێن دیتن، بەرپرس بێن دادگەھکرن.”
دایکان سالا 1995 ل مەیدانا گالاتاسارای یا ستەنبۆلێ، ب ئارمانجا دیارکرنا چارەنڤیسا زارۆکێن خوە کو ژ ھێلا ھێزێن دەولەتێ ڤە ھاتنە رەڤاندن، دەست ب چالاکیێ کرن.
دایکان چالاکیا خوە ھەر ھەفتە رۆژا شەمیێ وەک روونشتن و داخویانیا رۆژنامەڤانیێ ئەنجام ددن و داخوازا دیارکرنا چارەنڤیسا کەسووکارێن خوە دکن.
ب سالان رێ نەھاتیە دایین، دایک و کەسووکارێن وندایان چالاکی ئەنجام بدن. لێ جیگرا سەرۆکێ فراکسیۆنا ئاک پارتیێ ئۆزلەم زەنگین گۆت، ڤێ ھەفتێ رێ ژ بۆ چالاکیێ تێ دایین.
