سمکۆ عەبدولعەزیزی

دیسا دبێژم، هشا شاش دبە سەدەما په‌یدابوونا ئارمانجا شاش و ئارمانجا شاش دبه‌ سەدەما په‌یدابوونا ره‌فتارین شاش.

پاش چەندین شۆرەشێن کو بارزانیان ل دژی داگیرکەرێن کوردستانێ پێک ئانین و ب قاسی هژمارا کەڤرێن چیایان جانگۆری پێشکێشی ئازادیا ڤی وەلاتی کرین، هزر د وێ یەکێ دە هات کرن پارتیەکە کوردی ل سەر بنگەهێن نەتەوی بێ دامەزراندن کو تەڤ تەخ و چینێن جڤاتا کوردستانێ د ناڤا خوە دە هەمبێز بکە، پشتی گەنگەشە و گوهداریکرنا هزرێن جودا جودا بریار هات دایین پارتیەک ب ناڤێ پارتیا دەمۆکراتا کوردستانێ بێ دامەزراندن، ئەڤ پارتی د رۆژا 16 تەباخا 1946 ب سەرۆکاتیا بارزانیێ نەمر هات دامەزراندن.

ب دەرباس بوونا دەمی 16ێ تەباخێ ل هەر چار پەرچەیێن کوردستانێ بوو رۆژەکا پیرۆز و جهێ خوە د ناڤا دلێ تەڤ کوردستانیان دە کر، دەما پەدەکێ بریارا شۆرەشا ئیلۆنێ ل باشوورێ کوردستانێ ل دژی داگیرکەران و ژ بۆی ئازادیا خاکا کوردستانێ ستەندی و د 11 ئیلۆنێ چریسکا ڤێ شۆرەشێ هلبووی، کوردستانیێن ل هەر چار پارچەیان تەڤلی ڤێ شۆرەشێ بوون و شۆرەش بسەرکەت، د ئەنجام دە بەیانناما 11ێ ئادارێ هاتە ئیمزە کرن، ب ئیمزەکرنا ڤێ رێکەفتنێ دەما 4 سالان کوردان حوکم ل خوە کر و ب ئاوایەکی خوەسەر هەرێمێن کوردی ب رێڤە برن، لێ ب رێکەفتنەکا ناڤدەولەتی و ب بەشداریا هەر چار دەولەتێن (ئیراق، ئیران، ترکیە و سووریێ) و پشتگرییا ولاتێن زلهێز یێن جیهانێ ئەڤ رێکەفتن د رۆژا 6 ئادارا 1975 هات هلوەشاندن و کورد راستی کارەساتەکا مەزن هاتن.

لێ پەدەکە راستی بێ ئۆمێدیێ نەهات، بەرەڤاژی دەملدەست جارەکا دن د سالا 1976 دە ب سەرپەرشتیا ئدریس و مەسعوود بارزانی دەست ب شۆرەشا گۆلانێ کر و د رۆژا 26ێ گۆلانا سالا 1976 دە یەکەم پێشمەرگە ب ناڤێ “سەید عەبدوللا حاج عمرانی” شەهید کەت.

 دبە کەسەک بپرسە، گەلۆ نڤێسەر دخوازە چ ببێژە؟!

ئارمانجا من ب ڤێ نڤیسێ نە ئەڤە کو ل سەر ڤان هەر دو شۆرەشێن مەزن بسەکنم و ب چەند سەرناڤان وان ڤەبێژم، ژ بەر کو ب دەهان پرتووک ژی تێری نڤیساندنا ل سەر ڤان دو شۆرەشێن مەزن ناکن.

لێ من دخوەست ل سەر دو رۆژێن گرنگ کو ئەو ژی 16ێ تەباخێ و 26ێ گۆلانێ نە سەرەنجا خوە بەرچاڤ بکم.

ئەڤ دو رۆژ د ناڤا گەلێ کورد دە بوونە دو رۆژێن پیرۆز و پڕ جاران هەڤرکیا 21ێ نەورۆزێ دکر.

پەکەکە و شەخسێ عەڤدللا ئۆجالان پڕ ژ ڤان دو رۆژان هێڕس دبوون، فکر د وێ یەکێ دە کر کو هن رۆژێن دن ل جەم کوردان پیرۆز بکن هەیا کو کورد ڤان دو رۆژان ژ بیر بکن، ژ بەر کو وان باش فێم دکر گەر ئەڤ دو رۆژانە ل جەم کوردان پڕ پیرۆزن بن، ئەو نکارن ئیدۆلۆژیا خوە یا سۆسیالیستی ل سەر گەلێ کورد بسەپینن، د ئەنجام دە پرۆگرامەک دانی و هەیا نها ل سەر وێ پرۆگراما خوە بەردەوامن، هن خالێن ڤێ پرۆگراما وان ژی ئەڤ بوون:

• هەموو چاپەمەنیا خوە سەفەربەر کر کە ئێریشی سەر پەدەکێ و بارزانیان بکن و ب رێیا دەرەوێن ژەهراوی و بێەخلاقیان دیرۆکا بارزانیان رەش بکن.

• رۆژەک ژ بۆی شەهیدێن خوە ئیلان کر، ئەڤ رۆژ 18ێ گۆلانێ بوو هەیا کو ببە جێهگرا 26ێ گۆلانێ، چما هەر دو رۆژ د هەما مەهـ دە و پڕ نێزی هەڤن؟ هەیا کو ب ئەجامدایینا چالاکیان د 18 گۆلانێ دە 26ێ گۆلانێ د بیردانکا گەلێ کورد دە نەهێلن و ئیمها بکن.

• پەکەکێ هەر وەها 15ێ تەباخێ وەکە رۆژا راگهاندنا شەرێ چەکدارێ ئیلان کر، ئەڤ ژی ب هەمان مەبەستا پێش نها هەیا کو ببە جێهگرا 16ێ تەباخێ بوو، هەر وەک چەوا رەژێما بەعسا ئیراقێ هن پارتیێن کارتۆنی ب ناڤێ پارتیا دەمۆکراتا کوردستانێ دامەزراندین و رۆژا 16ێ تەباخێ وەک رۆژا دامەزراندنا وان ژی دیار کری.

ب کورتاسی، ژ پەکەکێ رە دبێژم، تەڤ گویز د گرۆڤڕن لێ نە هەر تشێ گرۆڤڕ گویزە، لۆما ژی 18ێ گۆلانێ جیهێ 26ێ گۆلانێ ناگرە و 15ێ تەباخێ ژی جیهێ 16 تەباخێ ناگرە.