گرۆپێن چەکدارێن ئۆپۆزیسیۆنا سووریەیێ یێن لگەل ئارتێشا ترکیەیێ ھەرێما عەفرینێ داگیر کرنە، 15 وەلاتیێن کورد رەڤاندن.
رەوانگەھا سووری بۆ مافێن مرۆڤان (SOHR) بەلاڤ کر، گرۆپا ب ناڤێ “پۆلیسێن مەدەنی” 3 وەلاتی ژ گوندێ کۆرایێ سەر ب ناڤچەیا جندرێسێ ڤە رەڤاندن.
دا زانین ژی، ل گوندێ مەملا یێ ناڤچەیا راجۆ، وەلاتیەکی کو ژ لبنانێ ڤەگەریابوو، ژ ئالیێ گرۆپا چەکدار یا ب ناڤێ “پۆلیسێن لەشکەری” ڤە ھات رەڤاندن.
ل گۆری زانیاریێن رەوانگەھێ، رێبەندا ل گوندێ قەستەل جندۆیێ ل ناڤچەیا شەرا، 2 وەلاتی رەڤاندن، کو ژ ترکیەیێ ھاتبوون دەرسینۆرکرن.
رەوانگەھێ ئاماژە ب وێ ژی کر، د چارچۆڤەیا ئۆپەراسیۆنەکا بەرفرەھ یا گرۆپێن چەکداران ل ناڤچەیا راجۆ دە، 9 کەس ھاتن رەڤاندن.
رەوانگەھا سووری بۆ مافێن مرۆڤان دەستنیشان کر، پرانیا کەسێن ھاتنە رەڤاندن، ب “پێوەندیا ب رێڤەبەریا خوەسەر” ڤە تێن تۆمەتبارکرن و ھندەک ژ وان ل ھەمبەر فدیەیا 500 دۆلاران ھاتن بەردان.
زێدەتر ژ شەش سالان د سەر داگیرکرنا ھەرێما عەفرینێ ژ ئالیێ ئارتێشا ترکیێ و گرۆپێن چەکدار یێن سەر ب وێ ڤە دەرباس دبن و ھەتا نھا زێدەتر ژ 9 ھەزار کەسان ھاتنە رەڤاندن کو چارەنڤیسا ھەژمارەکە مەزن ژ وان نایێ زانین.
ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وان ب تۆمەتا “پێوەندیا ب رێڤەبەریا خوەسەر”ڤە تۆمەتبار دکن، وەلاتیان درەڤینن و ئەشکەنجە دکن، پەرە، فدیە و باجان ژ وان دستینن.
