بووبێ ئەسەر
ئەم کورد ملەتەکی وەھا نە کو زوو خوە و تشتان ژ بیر دکن. سەدەما ڤێ ژی ئەو کو ئەم دیرۆکا خوە باش نزانن. لۆما ھن ھێژایی ھەنە کو تەنێ ئەم سالێ جارەکێ پیرۆز دکن و دقەدە. ژ بەر ڤێیە ئەم تشت و ھێژاییا گەلێ مە ددە زانین، باش تێ ناگەهین. لەورا هەژاریا کوردان ژ ڤر دە دەستپێ دکە و ب ڤێ ژی ئەم گەلەک شاشیان دکن.
لۆما گەلەک جاران ئەم دەمێن خوە ب روورەشکرن یان ب پیرۆزکرنەکێ دەرباس دکن. ھن رۆژێن تایبەت کو ھەرکەس شەرمەزار یان پیرۆز دکن ئەم ژی وەھا دکن. ژ بەر کو ئەم د ناسینا دیرۆکا خوە دە لاوازن. یان ناڤارۆک و سەدەما وێ رۆژا پیرۆز یان وان رۆژێن خەراب نزانن. تەنێ بوویە عادەت کو ئەم ب گشتی سالێ جارەکێ رۆژا کو ھەرکەس وێ پیرۆز یان شەرمەزار دکە، ئەم ژی وێ دکن دا کو ل دو ھەڤال و ھۆگران نەمینن.
ھەگەر ئەم ناڤارۆک، ھەدەف و ئارمانجا شۆرەشا گولانێ بزانبن، ئەم دێ فێر ببن کو ڤێ شۆرەشێ ژ بۆنا مە کوردان چ ئانیە، چ دانیە، باوەری و ھەلوەستا کوردان ل سەر چ ئاساسی ھووناندیە.
ھەگەر مە ئەڤە زانیبا، ئەم دا پتر قیمەت و روومەتا شۆرەشا گولانێ گرین. ھەدەف و ئارمانجا وێ ژ بۆی خوە کن رێبەر. ئەم دا ل گۆر وێ رێبەرێ مەشین، ئانگۆ ئەم دا چینە سەر وێ بریارا ئەساسێ دەولەتبوونێ کو ژ بۆنا مە کوردان ئاڤێتبوو و ئەم دا رێیا تەکۆشەریا خوە بەردەوام کن.
ئەم باش دزانین و تێ دگەهن کو شۆرەشا ئیلۆنێ ترس و خۆفا داگیرکەران ژ سەر کوردان راکر. ڤێ شۆرەشێ گوھێن خەتمی یێن کوردان، ب تەقاندنا گولەیا ئەول ب ڤەکرن. چاڤێن کۆرە، رۆنکرن دا کو کورد ببینن، ببھیزن. ھەردو شۆرەشان کورد ب روح و جان کر. روحا بەرخوەدانێ ژ نوو ڤە چاوا گەش کر، ئەم دێ ب ھەڤرا فێر ببن. ب سایا ڤان ھەردو شۆرەشان کوردان ژ نوو دە های ل خوە، ل رەوشا خوە بوون. فێر بوون کو ھەتا کورد نەبن خوەدی دەولەتا خوە، دێ ھەر بندەست و کۆلەیێ داگیرکەران بە.
لەورا شۆرەشا ئیلۆنێ کورد ژ نوو دە زیندی کرن دا کو نەمرن. لێ شۆرەشا گولانێ چ کر؟ ئاھا یا گرینگ ژی ئەڤە. دڤێت ھەمی کورد ڤێ فێر ببن و بزانبن کو شۆرەشا گولانێ یا کو ب شۆرەشا ئیلۆنێ ڤە ھاتبوو خەملاندنێ، ژ بۆی مە کوردان ئەساسێ دەولەتبوونا دانا. ژ بەر کو د رێبازا پیرۆز دە خالا وێ یا سەرەکی ئەو بوو کو کوردان بکە خوەدی دەولەتا وان.
ل سەر ڤی ئەساسی ل گۆر ڤێ باوەریێ و ل سەر شۆپا دەستوور و بەرنامەیا رێبازا بارزانییێ نەمر، کوردان ژی کارێ دانینا دەولەتەکا کوردی دۆماندن. دۆماندن و ڤێ دۆماندنێ ھەتا سالا 1992 کو گاڤا ئەول یا دەولەتبوونێ بوو ئاڤێت.
ئەم کورد پشتی وێ گاڤێ، ل جیھانێ و د ناڤا خوە دە فێر بوون کو بێ دەولەتبوون چقاسی زەحمەتە و ھەبوونا دەولەتەکا کوردی ژی چقاسی خوەشە. رۆژا ڤێ یەکێ وەکە خالەکێ د رێبازێ دە جھێ خوە گرتی، ئێدی بارزانیان ب سەرپەرەشتیا خالێن ڤێ رێبازا پیرۆز تەکۆشینا خوە یا ژ بۆنا دەولەتەکا کوردستانێ دۆماندن.
پشتی د رێبازێ دە خالا دەولەتبوونێ جھێ خوە گرتی. ئەم وەکە کورد فێر بوون کو بێ دەولەتی چیە؟ چما ئەم کورد ژی دخوازن ببن خوەدی دەولەتا خوە. ژ بەر کو شۆرەشا گولانێ ئەو روح دا کوردان. ژ بەر کو بێ دەولەتی سێویتی یە. بێ دەولەتێ ستوخواریە، بێ دەولەتی مالوێرانی یە. بێ دەولەتی کۆلەتی یە. بێ دەولەتی مرنە. کۆچگرییە، ئاگرییە، ئامەدە، مەھابادە، قامشلۆیە و دێرسمە. ئەنفالە، ھەلەبچەیە، کۆچبەری ژ وەلاتێ خوە دوورکەتنە. ئەم ل باشوورێ کوردستانێ ژ سالا 1992 و ھەتا نھا ب سایا شۆرەشا ئیلۆن و گولانێ ب سەربلندی د بن سیوانا دەولەتا خوە دە دژین. مە ب چاڤێن خوە دیت و ب گوھێن خوە بھیست کو ئەڤ دەولەتا مە، چاوا خوەدی ل کوردێن ھەرچار پەرچێن کوردستانێ دەردکەڤە.
ژ بەر ڤێیە کو دڤێت ب ھەر ئاوایی و د ھەر واری دە ئەم ھەمی کورد کار بکن دا کو وێ بریارا دانینا ئەساسێ دەولەتێ یا شۆرەشا گولانێ ب زانینا رێبازێ، ب ھێز و قاوەتا پێشمەرگەیێن قەھرەمان، ب پشتگری و خوەدیلێدەرکەتاندنا گەل، ل گۆر فکر و رامانێن خوەدی تەجروبەیێن گرانبھا یا رێزدار مەسعوود بارزانی پێک بینن.
بریار، ئەساس و خەباتا وێ شۆرەشا دەلال، ئەو بوو کو کوردان بکە خوەدی دەولەت. ھەتا کو ئەم نەبن خوەدی دەولەت، ئەم دێ وەکە ملەت نکاربن ل سەر ئەردا خوە ب ئازادی بژین. ژ بۆنا ڤێ ژی دڤێت ئەم نە سالێ جارەکێ، ھەر گاڤ، د ژیانا خوە دە، ھەر تم روحا شۆرەشا گولانێ ب جی بکن دا کو بکاربن ھەموو ل گەل ھەڤ، دەولەتا خوە یا کورد و کوردستانی د قادا ناڤ نەتەوەیی دە ژی بدن قەبوول کرن. چ دەما مە ئەڤ پێک ئانی، ئاھا وێ دەمێ ئەم دێ ھێژایی و قیمەتا شۆرەشا گولانێ و رێبازا خوە بێتر ناس بکن و فێر ببن کو ئەڤ شۆرەشە ژ بۆنا چ بوو؟ ئەم دێ بزانبن کو ھەبوونا رێبازەکا وەھا گرینگ، ژ بۆنا چوو؟
ژ بەر ڤێیە کو دڤێت ھەر کوردەک خالێن رێبازا پیرۆز بخوینە و وێ باش بزانبە. د ژیانا خوە یا رۆژانە دە ب کار بینە دا کو سبە ئەم ببن خوەدی دەولەتا خوە یا سەربخوە. ژ بەر کو ھەتا ملەتەک نەبە سەربخوە، دێ دەست و لنگێ وی ملەتی ب زینجیرێن داگیرکەران تم گرێدایی بە.
