بووبێ ئەسەر
ئەم کورد تم بەحسا رێبازا بارزانی دکن. ژ ڤێ ژی ئەم فێم دکن کو رێبازەک ئانگۆ فەلسەفەیەکە ژ بۆنا ئازادی و سەرخوەبوونا کوردستانێ ژ لایێ بارزانیان ھاتیە ئامادە کرن. ب ئامادەکرنا ڤێ ژی ھەمی شۆرەش و بەرخوەدانێن ب سەرپرەشتیا بارزانیان پێک ھاتنە ل گۆر خالێن ڤێ رێبازێ ب رێڤە چوونە و دچن.
ئەو بارزانیێن کو ئەوقاسی ژ بۆنا مە کوردان تەکۆشین و بەرخوەدان دانە. ئەوقاسی شۆرەش کرنە. ئەو بارزانیێن کو ژ بۆنا مە کوردان رێبازەک ژ بۆنا ئازادی و سەرخوەبوونا کوردستانێ پێک ئانینە، کی نە؟ ھەلبەت پرانیا کوردان و جیھانێ دزانن کو ئەو کینە. لێ من دیسا خوەست ڤێ ژی ھندەکی ڤەکم.
ھوون یا راستی بخوازن کوردێن کو بارزانیان ناس نەکن نەمانە و پرانیا کوردان ژی وێ رێبازا پیرۆز دزانن و دناسن. کار و خەباتێن بارزانیان ژ بۆنا گەلێ خوە کرنە، ب زەلالی و ئەشکەرەیی تێن زانین. چ دەما بارزانی تێ ب ناڤکرن کار و خەباتێن ژ بۆنا ئازادیا کوردستانێ تێن بیرا کوردان. ھەر وەھا دەما مرۆڤ دبێژە کوردستان ژی یەکسەر بارزانی دکەڤن بیرا مە. ژ بەر کو د دیرۆکا بارزانیان دە سەرھلدان و بەرخوەدانا ژ بۆنا گەلێ کورد جھەکی تایبەت دگرە. ھەر وێ ئەڤ تایبەتی ھەتا کو جیھان ھەبە، دێ جھێ خوە د دلێ ھەر کوردەکی دە بپارێزە.
لەورا بارزانیان د دلێ پرانیا کوردان دە جھەکی خوەیێ پیرۆز و تایبەت ھەیە. ژ بەر ڤێیە داگیرکەرێن وەلاتێ مە تم خوەستنە کو وێ تایبەتمەندیێ ژ دلێ کوردان دەرخن. ژ بەر ڤێ بوو کو وان شەر و پەڤچوون ل ھەمبەر بارزانیان دکرن. گەلەک بارزانی و ب تایبەتی ژی کورد کوشتن. ھن ل سێدارێ خستن، ھن د زندانێن خوە دە رزاندن. و تالیا تالی ژی ب گشتی 8000 زلامێن بارزانیان ئەنفال کرن. لێ دژمنان و ھەڤالبەندێن وان چ جاران ژی نکاریبوون بارزانیان ژناڤ ببەن، تونە و بێدەنگ بکن.
ژ بەر تەکۆشین و بەرخوەدانا بارزانیان بوو کو وان د ھەر مالەکا کوردان دە ھێلنا خوە دانیبوون و د وێ ھێلینێ دە ژ بۆنا دۆز و مافێ کوردان، ژ بۆنا ئازادیا کودستانێ دەرسێن پەروەردەھیێ ددان گەلێ خوە، ھەڤال، ھۆگر و ئەندامێن خوە. کەسێن کو ئەو پەروەردەھی دگرتن، ب رووحیەتا خوەیا کوردستانی دحەسیان، دژیان و شەرێ ئازادیا گەلێ خوە بێ ترس ددان و ددن.
ژ بەر کو ئەو کەسێن ب رێبازێ مەزن ببن و ب وێ پەروەردەھیێ بێنە پەروەردەکرن، دێ ب ئەقلیەتا خوە، ب بیر و باوریێن کوردەواری مەزن ببن. ژ بۆنا ڤێیە کو بارزانیان تم ترس خستیە و دخە دلێ داگیرکەران. لۆما ژی بارزانی تم ژ داگیرکەران و ھەڤالبەندن وان رە بوو بوو خەتەر. ڤێ خەتەرێ ھەتا کو باشوورێ کوردستانێ ئازاد بوو بەردەوام کر.
پشتی ئازادیا باشوورێ کوردستانێ فێم کرن کو نکارن بارزانیان ژ ھۆلێ راکن. ب گۆتنەکا دن بارزانیێن کو ئەڤ سەد سالن ل دژ ھەر چار داگیرکەران شەرێ ھەبوون و نەبوونا کوردان ددان ب سەر کەتن. ژ بەر ڤێ بوو کو ئێدی داگیرکەران تاکتیکێن شەرێ خوە یێن ل ھەمبەر بارزانیان گوھەرین…
ئەم ڤەگەرن و پرسەکێ ژ خوە بکن و بێژن، بارزانی کی نە؟ بارزانی نە عەشیرەکە. ئەو ژ کۆنفەدەراسیۆنا حەفت عەشیران پێک ھاتیە و بارزان ب خوە ژی ناڤێ گوندەکییە. بارزانی و بنەمالا بارزانیان کو ژ تەریقەتا نەقشیبەندی بوون و سەرۆکاتیا دینی و نەتەوەیی کرنە. ژ بەر عەدالەت و وەکھەڤیا د ناڤا وان دە، عەشیرێن دن خوە دانە دۆرا وان و کۆنفەدراسیۆنەک چێکرنە. ئەو کۆنفەدەراسیۆن ب ناڤێ بارزانیان تێ زانین. ئاھا بارزانی ئەڤن.
لەورا ژی دەڤەرا بارزان ژ بۆنا بارزانیان و کوردان تم بوویە وەکە سیوانەکێ کو ھەمیان د بن وێ دە یەکیتیا خوە پێک ئانینە. ئەو دەڤەر بوویە وەکە کەلەھەکا کوردپەروەران کو تم نەرازیبوونا خوە ل دژی رەژیمێن ئیراقێ و ھەمی داگیرکەران دیار کرییە.
دەما کو مرۆڤ بالا خوە ددە دیرۆکێ، تێ دیتن کو داگیرکەرێن کوردستانێ یێن ھەر چار پەرچان تم ژی ل گەل ھەڤ و ب ھەڤرە خوەستنە ڤێ کۆنفەدەراسیۆنێ ئانگۆ بارزانیان ژ ھۆلێ راکن. ب تایبەتی سەدام خوەستبوو دەڤەرا بارزان بناڤ بکە و ھەموو بارزانیان ژی ژ ور دەرخە ئانگۆ ڤالا بکە. وان بکوژە، ئەنفال بکە ئانگۆ ب جینۆسایدەکێ وان تونە بکە.
داگیرکەران و ب تایبەتی سەدام باوەر دکرن کو دەما ئەو بارزانیان ژ ناڤ ببەن دێ تەکۆشینا گەلێ کورد ژی ب داوی ببە. د ڤێ نەرینا خوە دە ب حەق بوون. ژ بەر کو داخوازا بارزانیان و ب تایبەتی یا نەمر بارزانی ئەو بوو کو وەلاتێ خوە ژ بن دەستێ داگیرکەران ئازاد بکە. ژ بەر ڤێ ژی قەت نەسەکنی، تەسلیم نەبوو، ھەتا تالیا ژیانا خوە، ژ بۆنا گەلێ خوە، ژ بۆنا خەلکێ خوە، د ناڤا تەکۆشینا ژ بۆنا ئازادیا وەلاتێ خوە دە کار و خزمەتا گەلێ خوە کر. ب ڤێ ژی رێبازەک ژ بۆنا مە ئامادە کر. لۆما کورد ژی دبێژن رێبازا بارزانیێ نەمر.
سەدام ب ھێرسەکا مەزن خوەست بارزانیان بقەدینە. ژ بەر ڤێ وی د 31/7/1983 دە بریارا جینۆسایدا بارزانیا دا و 8000 زلامێن بارزانیا ژ ناڤا مالباتێن وان دەرخستن و بە ب جھەکی نە دیارڤە برن. لێ وی ب وێ کریارێ نە تەنێ 8000 بارزانی بناخ کرن. د ئەسلێ خوە دە ئەو گەلەک ھەشت ھەزار بوون. ژ بەر کو بارزانیان دزانیبوون کو دارا ئازادیێ ب خوینێ تێ ئاڤدان. ژ بەر وێ ژی شەرێ ھەبوون و نەبوونا کوردان ل گۆر وێ، بێ وەستان ل ھەمبەر ھەر چار داگیرکەران بێ ناڤبەر و راوەستاندن دۆماندن.
پێویستە ھەمی کورد ل گەل ھەڤ د دادگەھا ناڤنەتەوەیی دە ژ بۆنا ئەنفالکرنا ملەتێ کورد و بارزانیان وەکە بوویەرەکا جینۆساید د قادا ناڤنەتەوەیی دە بدن قەبوول کرن. کار و خەباتێ بکن. دژمن چقاسی ژ بارزانیان عاجز بوون، دڤێت ئەم ژی ئەوقاسی ژ وان و ژ وێ رێبازا پیرۆز یا بارزانیێ نەمر دانیە، حەز بکن. حەزکرنا بارزانیان تێ واتەیا خوەدی ل وەلاتێ خوە دەرکەتنێ.
لەورا بارزانیان باش فێم کربوون و دزانیبوون؛ بێ رێباز ملەت نکارە ئازاد ببە. ژ بۆنا ئازادی و سەرخوەبوونا کوردستانێ وان کورد کرن خوەدی رێبازەکێ. ئیرۆ کورد ل باشوورێ کوردستانێ فێقیێن وێ رێبازێ دخون…
