مەمەت میردینی

پەکەکە ب تەڤ رێخستن و پارتیێن سەر ب خوە ڤە ب ئاوایەکی بێ ئەخلاقە کو گەر کەسەک بخوازە د ناڤا رەفێن وان دە ببە بەرپرسیار، فەرماندار یانژی کەسەکی دیار، چ بخوازە چ نەخوزە دڤێت تەڤ ئالیێن ئەخلاقی یێن خوە ژ بیر بکە و ژ ئەخلاق دوور بکەڤە و دەرەوان ب بەردەوامی بکە. ژ بۆی ئیسباتا ڤێ یەکێ ژی هەر کەس دکارە ل چاپەمەنیا پەکەکێ بنێرە، هەر کو تو پێتر ل چاپەمەنیا پەکەکێ بنێری وێ پێتر هین ببی پەکەکە پارتیەکە دژە کوردە و دارێ د دەستێ دەولەتێن کۆلۆنیالیست دە یە ژ بۆی خاپاندنا کوردان و وەنداکرنا دەستکەفتیێن وان، رۆژ ناچە پەکەکە د چاپەمەنیا خوە دە دەرەو و بێئەخلاقیان نەکە، ئەڤ دەرەو و بێ ئەخلاقی چ ب ناڤێن نەدیار بێن کرن و نڤیساندن، چ ژی ب رێیا بەرپرسێن وێ یێن وەکە کالکان، قارایلان، بایک و هتد… یان ژی کەسەکی نەسالح یێ وەکە سالح مولسم بێن کرن و نڤیساندن. چ فەرقا خوە تونەیە.

ھەڤسەرۆکێ پارتیا یەکیتیا دەمۆکراتیک (پەیەدێ) سالح موسلم د سالڤەگەرا ئێرشا داگیرکەریێ یا 25 خزیرانێ دە کو ل سەر کۆبانێ ھاتە کرن ژ ئاژانسا ANFێ یا پەکەکێ رە ئاخڤی، ئەو د هەڤدیتنەکە ڤیدەئۆیی دە دەرکەت و 25 دەقیقەیان بێ سەکنین ئاخڤی، باس ل کەڤر و دار و چووچکن کۆبانیێ و رۆلا وان د رزگارکرنا کۆبانیێ دە کر، لێ بێی کو شەرم و فەدی بکە، بێی کو ئەخلاقێ کوردان ل بەر چاڤ بگرە پڕ ب روو قایمی رۆلا پێشمەرگەیێن کوردستانێ د رزگار کرنا کۆبانیێ دە ب ت ئاوا باس نەکر، ئەڤ نە جارا یەکەمە بەرپرسێن پەکەکێ دخوازن رۆلا پێشمەرگەیێن کوردستانێ د رزگارکرنا کۆبانیێ دە بڤەشێرن و خوە وەکە شێرێن مەیدانێ نیشان بدن، پێش نها ژی چەندین جاران ئەڤ یەک کریە، ژ بەر کو پەکەکێ تەڤ بەرپرس و کادرۆیێن خوە ئاگاهدار کرنە کو ب ت ئاوا نابە ب باشی باسی پێشمەرگەیێن کوردستانێ بکن، بەرەڤاژی ڤێ یەکێ وێ ب توندی وەرن سزادان.

ژ خوە بێی کو پێویستیا کوردان ب گۆتنێن بەرپرسێن پەکەکێ هەبە، ھەرکەسەک باش دزانە کو د ئازادکرنا کۆبانێ دە رۆلا پێشمەرگەیێن کوردستانێ رۆلەکە سەرەکە و هەری گرینگ بوو، ب ئاوایەکی کو مرۆڤ دکارە ببێژە گەر پێشمەرگەیێن کوردستانێ دەرباسی کۆبانیێ نەبووبان ب ت ئاوا کۆبانیێ ژ دەستێ داعشی رزگار نەدبوو. ھەروەھا ڤێ یەکێ ھێڤیا ژ بۆ دەستپێکرنەکا نووژەن و ھەڤکاریا ناڤبەرا رێخستنان دە ژی خۆرت کر. لێ سالحێ نەسالح و یێن وەکە وی ڤێ یەکێ ژ خوە و پارتیا خوە رە خەتەری دبینن، لۆما ب ڤی ئاوا ل دژی پێشمەرگەیان دسەکنن و رۆژانە د چاپەمەنیا خوە دە ئێریشی سەر پێشمەرگە دکن.

سالحێ نە سالح باسی “براتیا گەلان” کو د ئەساس دە مرۆڤ دکارە وەکە “خولامتیا کوردان ژ ترک، عەرەب و عەجەمان رە” ب ناڤ بکە، دکە، باسی دەمۆکراتیزەکرنا دەولەتێن داگیرکەر ژی دکە، لێ بەلێ ژ بۆی کو براتیا د نێڤبەرا کوردان دە چێنەبە و یا هەیی ژی وەرە هلوەشاندن باسی رۆلا پێشمەرگەیان د رزگارکرنا کۆبانیێ دە ناکە.

هایدی ئەم ل دیرۆکێ ڤەگەرن و ل بیرا خوە و سالح موسلم و تەڤ بەرپرسێن پەکەکێ یێن “نە سالح” بینن کا کۆبانیێ چەوا رزگار بوو و رۆلا پێشمەرگەیان د رزگارکرنا کۆبانیێ دە چ بوو. د 22 جۆتمەها 2014 دە ل سەر فەرمانا سەرۆک بارزانی ب پرۆژە بریارا هەژمار 28 بریار هات دایین کو پێشمەرگە ژ بۆی رزگارکرنا کۆبانیێ دەرباسی باکورێ کوردستانێ و پشترە کۆبانیێ ببن، د 28 جۆتمەها هەمان سال دە یەکەمین هێزا پێشمرگە کو ژ 150 پێشمەرگەیان پێک دهات ب چەکێن خوە یێن گران ڤە د ناڤا سینۆرێ دەولەتا داگیرکەرا ترکیێ دەرباسی رۆژئاڤا کوردستانێ بوون، ئەڤ یەکەم جار بوو کو هێزەکە کوردان ب ئاوایەکی فەرمی ل سەر ئاخا یەک ژ مەزنترین دوژمنێن کوردان رە دەرباسی پارچەیەکە دن ببە ژ بۆی ئالیکاریکرنا برایێن خوە، دەما پێشمرگە دەرباسی کۆبانیێ بووین ب تەنێ 20% یا کۆبانیێ د دەستێ شەرڤانان دە مابوو، داعشێ 80% یا ڤی باژارێ کوردان داگیر کربوو.

چوونا پێشمەرگەیان ژ ئالییەکێ ڤە بوو سەدەما بلندبوونا مۆرالا شەرڤانان و ژ ئالیەکێ دن ڤه‌ ب گهشتنا پێشمەرگەیان و چەکێن وان یێن گران هەر تشت هات گوهەرین، شه‌رڤان ژ رەوشا به‌رگریێ كه‌تن رەوشا ئێرش برنێ، پێشمەرگەیان وه‌ك هێزه‌كە پشته‌ڤانی دەست ب تۆپباران کرنا ناڤه‌ندێن ته‌رۆریستان کرن و د دەمەکە هه‌ری كێم دە، كارین چەتەیێن داعشێ پاشدە ببن و باژارێ كۆبانێ ژ کەتنێ بپارێزن.

 پێشمەرگەیێن ئازادیا کوردستانێ د دەما 25 رۆژان دا کارین 65% ژ خاکا باژارێ كۆبانێ ژ دەست داعشێ رزگار بکن، د دەما 45 رۆژان دا ژی پێتر ژ 85% ژ وێ رووبەرا د دەست تەرۆریستان دە رزگار كرن، ل داویێ ب بەرخوەدانەکە بێ هەمپا کو 7 مەهان دۆم کر پێشمەگەیان مۆهرا رزگاریێ ل باژار خست و ڤەگەرین کوردستانا ئازاد.

یا مە د دەربارا پێشمەرگەیێن کوردستانێ و رزگارکرنا کۆبانیێ ژ دەست داعشێ باس کری ب تەنێ دلۆپەکە ژ وێ بەحرا جانفیدایی و خەباتا ڤان لەهانگان ژ بۆی رزگارکرنا ڤی باژارێ رۆژئاڤا کوردستانێ کو نها بەرپرسێن پەکەکێ ب “باکور رۆژهەلاتێ سووریێ” ب ناڤ دکن، ئەنجام دایی.

ل داویێ ژ “سالح”ێ نەسالح رە دبێژین، گۆتنەکە کوردی هەیە کو دبێژە، “ب بێژینگێ رێ ل تیشکێن رۆژێ نایێ گرتن”، لۆما تو و پارتیا خوە ژی نکارن ب باسنەکرنا رۆلا پێشمەرگەیێن کوردستانێ د رزگارکرنا کۆبانیێ دە ڤێ راستی بنوخمینن و د مەژیکێ کوردان دە بدن ژبیرکرن.