بووبێ ئەسەر
کارێ بارزانیان ژ سالا 1900 و ڤردە ھەر ئەو بوویە کو وێ خەیالا کوردان یا دیتنا کوردستانەکا ئازاد و سەربخوە، بیننە جھ. د ڤێ رێیێ دە ب ھەزاران جانگۆری دانە و ھێ ژی ددن.
ب ئاوایەکی تەڤایی بارزانییان و ب تایبەتی سەرۆکێ کوردستانێ رێزدار مەسعوود بارزانی تەماما ژیانا خوە ژ بۆنا جێبەجێکرنا خالێن رێبازا پیرۆز تەرخان کرییە، دا کو کورد د کوردستانەکا ئازاد و سەربخوەدە بژین، کار و خزمەت کریە، کرنە و دکن.
رۆژا کو بارزانیان دەست ب تەکۆشینا ئازادیا وەلاتێ خوە ئانکو کوردستانا ھاتیە پارچەکرنێ کری و ھەتا نھا، کار و خەباتێن وان تەنێ بوویە خوەدی دەرکەتن ژ ئەردێ کوردستانێ و پاراستنا وێ.
بارزنیان بیر و باوەریا نەتەوەیی دایە گەلێ خوە و ژ بۆنا گەل ب ڤێ باوەریێ بکەملە، خوەدی ل خوە و ملەتێ خوە دەرکەڤە، ژ بۆنا وان رێبازەک ژی ئامادە کرنە. ژ بەر کو بیر و باوەریا بارزانییان تم ژی نەتەوەیی بوویە. وەھا فکرینە و ئەڤ فکر و رامان دایە ھەڤال و دۆستێن خوە. دایە ئەندامێن پارتیا خوە. و ئەڤ بوویە وەکە رێبازەکا بارزانیان.
چ دەمێ و ل کو دەرێ کوردان ئێش و ئەزیەت دیتبن، مالوێرانی و تالانی ھاتبە سەرێ وان، ھەتا ژ بارزانیان ھاتیە خوەستنە ب ئالیکاریا برایێ خوە ڤە رابە. ل کیژان دەڤەران کوردایەتی خورت بوویە تو دبینی کو ژ ور بێھن و ناڤێ بارزانیان تێ.
ل کیژان پارچێن کوردستانێ فرسەتەک ژ بۆنا کوردان ب دەست کەتبە، ئەم دبینن بارزانیان ژ بۆنا وێ فرسەتێ ب کاربینن ئانگۆ فرسەت ژ دەست نەچە چ ژ وان ھاتیە کرنە و دکن.
لەورا داگیرکەرێن مە باش دزانن کو یێن دێ کوردستانێ ئازاد و سەربخوە بکن تەنێ بارزانی نە. دژمن باش دزانن، چ دەما بارزانی ژ ھۆلێ رابە وێ دۆزا کورد و کوردستانێ ژی نەمینە.
ھەگەر ئەم دیرۆکا بارزانیان بخوینن ئەم دێ ب رەحەتی ببینن کو چما تم داگیرکەران ب ھەڤرە خوەستنە وان ژ ھۆلێ راکن. گەلەک سەدەمێن وێ ھەنە. سەدەما ھەری گرینگ ژی ئەوە کو بارزانیان ژ بۆنا کوردان رێبازەک دانینە و ئەڤ رێباز ژی نە ل گۆر بەرژەوەندیێن داگیرکەران بوویە.
پشتی تێکچوونا کۆمارا کوردستانێ ل مەھابادێ، بێدەنگیەک و ترسەکێ گرتبوو سەر ھەموو کوردان و پەرچێن دن. ما نە شۆرەشا ئیلۆنێ بوو کو کورد ژ نوودە ژ بێدەنگیی خلاس کرین، ژ خەوا مرنێ شیار کرین. ب سایا وێ گولەیا ئەول یا شۆرەشا ئیلۆنێ بوو کو ئێدی تەڤگەرا کوردان ل ھەر چار پارچان دە ژ نوو ڤە سەری ھلدا.
داگیرکەران نکاریبوون زۆرا بارزانیان ببن و وان ئانکو بارزانیان پشتی 1992 پارچەیەک ژ کوردستانێ ئازاد کرن و دیاری گەلێ خوە کرن. نھا ژی ئەو پارچا ئازادکری ئانکو باشوورێ کوردستانێ گاڤ ب گاڤ بەرب سەربخوەبوونە ڤە دھارە.
داگیرکەران دیتن کو وەھا نابە و نکارن بارزانییان ژ ھۆلێ راکن. لۆما وان خوەستن ژ کوردان ھندەک ھەڤالبەندێن خوە چێ بکن و ب سایا وان بارزانییان تێک ببن و کورد ژی نەبن خوەدیێ وەلاتێ خوە. لەورا چ دەما ژ دژمنان رە لازم بوویە ئەو کەسێن ھەڤالبەندێن خوە دەرخستنە و ب کار ئانینە و تینن. لێ ھەتا نھا د ڤێ رێیێ دە ب سەر نەکەتنە و سەر ناکەڤن ژی.
لۆما دبێژم؛ ھەتا کورد ڤێ باش فێم نەکن، ڤێ باش شرۆڤە نەکن، ڤێ باش نەبینن دێ تم شەر و پەڤچوون ژی د ناڤا کوردان دە پەیدا ببە. ژ بەر کو دارکێ فەسادیێ د دەستێ داگیرکەرێن مە دەیە. لەورا دێ بخوازن وی دارکی د ناڤا کوردان دە بگەرینن دا کو کورد نە ل ھەڤ بن.
گەلەک جاران ب دەستێ دژمنێن مە یێن ھار و خوینخار، کوردان ھەڤدو کوشتنە و د ناڤا وان دە شەر پەیدا بوویە. ڤی شەری زەرار دایە پارتی، رێخستن و دۆزا گەلێ کورد. لێ ل دژبەری ڤێ ژی بارزانییان تم یەکیتی و ھەڤکاریا کوردان پاراستنە و دپارێزن. ئەڤ ژی نە ل گۆر حەسابا داگیرکەرێن مە نە. ژ بەر ڤێیە تم ھەرچار داگیرکەرێن مە بوونە یەک دا کو بارزانییان ژ ھۆلێ راکە. لێ ب سەرنەکەتن و سەر ناکەڤن ژی…
ئارمانجا ب دەستێ داگیرکەران ناکۆکیێن دکەڤن ناڤا مە ئەوە کو کورد ئێدی وەکە کورد نەمینن و نەبن خوەدیێ وەلاتێ خوە و کوردستانەکا ئازاد و سەربخوە. ژ بەر ڤێیە کو تم دژمن ب دەستێن ھندەک کوردان دارکێ فەسادیێ د ناڤا کوردان دە ب کار ئانینە و تینن دا کو کورد نە ل ھەڤ بن. نەلھەڤبوونا کوردان د فایدێ داگیرکەران دەیە.
لێ دەما ئەم دیرۆکێ دخوینن، دبینن کو ئارمانجا بارزانیان و ب تایبەتی یا سەرۆکێ کوردستانێ رێزدار مەسعوود بارزانی ژی تم بەرەڤاژی ڤێیە. ژ بۆنا پاراستنا کوردان چ لازم بوویە ئەو کرییە و دکە. ژ بەر ڤێیە کو د ڤێ تەکۆشینا خوە یا د سەد سالان دە بارزانیان تم خوەستنە کورد ببن خوەدیێ کوردستانا خوە یا ئازاد و سەربخوە.
ژ بەر ڤێیە کو ھەلوەستا سەرۆکێ کوردستانێ یا رێزدار مەسعوود بارزانی تم ئەو بوویە کو کار و خەباتا وی ژ بۆنا رۆژەکێ بەری رۆژەکێ مزگینیا کوردستانا ئازاد و سەربخوە بدە گەلێ خوە. ژ بۆنا بارزانی ل گۆر باوەری و ئارمانجێن خوە ب سەر نەکەڤن تم داگیرکەران فەساد ژ کوردان رە پەیدەکرنە دا کو ناکۆکیان بێخە ناڤا وان.
لەورا راکرن یان تونەکرنا فەسادان نھا زەحمەتە. دەرمانێ وێ تەنێ د کوردستانەکا سەربخوە دەیە. پشتی راگھاندنا وێ ئێدی فەساد نامینن یان ژی نەشێن وەکە نھا تەڤبگەرن. ژ بەر کو ھەموو پلان و پرۆژەیێن وان یێن قرێژ دێ ئاشکەرا بن. ئاھا ترسا دژمن و فەسادێن وان یا نھا ژ بەر ڤێیە…
ئێدی کی/ێ چاوا ڤێ فێم دکن ئەو ب کێفا خوە نە. لێ دڤێت کورد ژ بیر نەکن سەرخوەبوونا کوردستانێ د رێ دەیە. و دێ سەرۆکێ کوردستانێ رێزدار مەسعوود بارزانی ڤێ مزگنیێ بدە گەلێ خوە. ژ بەر کو ئەو خوەدی ھەلوەستەکا راستەقینە و ل گۆر رێبازێ کارێ سەرخوەبوونا کوردستانێ ددۆمینە. ھەر وەھا جەنابێ سەرۆک یەک ژ بناگەیێن ڤێ رێبازا پیرۆزە کو دڤێت کورد ژ گۆتنا جەنابی وی دەرنەکەڤن. تێبنی و شیرەتێن وی گوھداری بکن.
