په‌كه‌كه ل پشت شه‌وتاندنا بازارێن دهۆك، هه‌ولێر و كه‌ركووكێ نه
وه‌زاره‌تا ناڤخوه یا ئیراقێ ئیرۆ ده‌سته‌سه‌ركرنا هه‌ژماره‌كه تاوانبارێن ده‌ست د شه‌واتێن بازارێن هه‌رێما باشوورێ كوردستانێ ده هه‌یی ئیلان كر و گۆت كو: «ئه‌ڤ بازار ژ هێلا ئه‌ندامێن په‌كه‌كێ ڤه هاتنه شه‌وتاندن».
بەردەڤکێ وەزارەتا ناڤخوە یا ئیراقێ و شانه‌یا ئه‌وله‌هیێ میقداد میری ئیرۆ رۆژا دوشەمێ 1/7/2024ێ د كۆنفه‌رانسه‌كه رۆژنامه‌ڤانی ده گۆت: «ئەو کەسێن کو ب تۆمەتا شەوتاندنا بازارێن هەولێر، دهۆک، كه‌ركووك و دەڤەرێن دن یێن هەرێما کوردستانێ هاتنە گرتن، ئەندامێن په‌كه‌كێ نه».
ده‌ستنیشان كر، سێ كه‌س هاتنه ده‌سته‌سه‌ر كرن، دو ژێ ئه‌ندامێن یه‌كه‌یا 70 و هه‌ر وها دژه ته‌رۆرا سلێمانیێ یێن سه‌ر ب یه‌نه‌كێ ڤه نه و گۆت: «وان ل قه‌ندیل و سلێمانیێ په‌روه‌رده دیتییه و پێوه‌ندی ب په‌كه‌كێ ڤه هه‌یه».
بەردەڤکێ وەزارەتا کارێن ناڤخوە یا ئیراقێ میقداد میری ئاماژە ب وان شەواتان دا و گۆت: «داویا 2023یان و دەستپێکا 2024ان ئاگر ب بازارێن کەرکووک، دهۆک و هەولێرێ کەت، ئەڤ یێك نیشانە بوون کو هنەک تۆرێن ترسناک ل پشت ڤان بوویەران هەنە».
وەزارەتا کارێن ناڤخوە یا ئیراقێ 3 تۆهمەتبارێن کو چاڤێن وان گرێدایی بوون ئانین پێشیا کامەرایان و میقداد میری گۆت: «ئه‌ڤ ئەندامێن کۆمەکه ترسناکن کو گرێدایی په‌كه‌كێ نە و ئه‌و ژ شه‌واتان به‌رپرسن».
ناڤێن دو ژ وان ووسایه:
- هۆنه‌ر فه‌خه‌رددین ئه‌حمه‌د – به‌رپه‌رسێ چالاكیێن ته‌رۆری یێن په‌كه‌كێ ل كوردستانێ كو كارمه‌ندێ یه‌كه‌یا 70 یه.
- محه‌مه‌د نه‌جات حه‌سه‌ن – ئه‌فسه‌ر ل دژه ته‌رۆرا سلێمانیێ سی تی جی كو ژ هێلا په‌كه‌كێ ڤه هاتیه په‌روه‌رده كرن.
توهمه‌تبار ل كو ده‌رێ هاتن گرتن
هەروه‌ها گۆت: ئۆپەراسیۆنا گرتنێ ب هەماهەنگیەکە بلند هاتیە ئەنجامدان، ژ بەر کو 2 تۆهمەتباران ل پارێزگەها کەرکووکێ و تۆمەتبارەک دن ژی ل پارێزگەها دیالایێ هاتنە گرتن».
میری د بەردەوامیا ئاخافتنا خوە دە وها گۆت: «پشتی شەواتێن ل کەرکووک، دهۆک و هەولێرێ ب سەرپەرەشتیا سەرۆکوەزیر محەمەد شه‌یاع سوودانی و وەزیرێ کارێن ناڤخوه عەبدولەمیر ئەل-شەممه‌ری تیمه‌ك هات ئاڤاکرن».
توهمه‌تباران شه‌وات ووسا چێدكر
وی گۆت ژی: «شه‌وات ب ئاوایەکی کو زەهمەتە وەرە دیتن هاتیه پێكرن ئه‌و ژی ب دانینا جوه‌ركی هەڤیری د سندۆقێن شیرینیێ دە کو راستەراست شه‌واتێ چێناكه، بەلکی پشتی ساعەتان ئه‌و هه‌ڤیر د شه‌وته و بوویه‌ر د قه‌ومه».
وی ئاماژە ب وێ یەکێ ژی کر کو «تیمێ کاری ئیشارەتێن تاوانێ ده‌ست بخه و ب ئۆپەراسیۆنەکێ، کەسێن کو تێدە بوون گرتن، و ئیفادەیێن وان یێن موکور هاتن تۆمار کرن».
وی بال کشاند کو «ماتەریالێن کیماوی د دەستێ وان دە هاتن دەستەسەرکرن كو وان پلان دكر هنه‌ك بازار و جیهێن دن ژی ب شه‌وتینن».
په‌كه‌كێ هه‌ده‌فكرنا خه‌تێن ڤەگوهەستنا ئەلەکتریکێ ل هەولێرێ و خه‌تا ڤه‌گوهه‌ستنا په‌ترۆلا جه‌یهانێ ژی پلان كربوو
ل گۆری ئیتیرافێن وان کەسان، وان «پیلان دکر کو هەر دو وەلاتێن جیرانێن ئیراقێ ژی بکن ئارمانج، هه‌ر وها خەتا ڤەگوهەستنا پەترۆلێ (جەیهانێ) ژی بکن ئارمانج».
بەردەڤکێ وەزارەتا ناڤخوە یا ئیراقێ و شانه‌یا ئه‌وله‌هیێ میقداد میری هەروها ئەشکەرە کر کو «وان پلان دکن کو بازارێن باژارێ سەدر، شۆرجە و دەڤەرێن دن بکن ئارمانج، هەروها وان دەڤەران و خەتێن ڤەگوهەستنا ئەلەکتریکێ ل هەولێرێ ژی بکن ئارمانج».
ئارمانج خسارگهاندنا نان و قووتێ خەلکێ یە
برێڤەبرێ گشتییێ دیوانا وەزارەتا کارێن ناڤخوە یا هەرێما کوردستانێ هێمن میرانی ل هەمان کۆنفەرانسێ ئاخڤی و گۆت: «ئارمانجا ڤان ئاگران تێکبرنا ئابۆریا خەلکێ و هه‌ر وها خسارگهاندنا نان و قووتێ خەلکێ یە، دخوازن ب ڤی ئاوایی پێوەندیێن خەلکێ و حکوومەتێ خەرا بکن و خەلکێ ژ حکوومەتێ عاجز بکن».
په‌كه‌كێ د خوه‌ست گورزەکی کوژەر ل ئابۆریا کوردستانێ بده
هێمن میرانی گۆت: «گومانبار ژ ئالیێ په‌كه‌كێ ڤە ل ترکیە، سووریە، قەندیل، کفری و سەنگەسەرێ هاتنە پەروەردەکرن و ئارمانجا وان ئەوە کو ئارامیا کوردستانێ و ئیراقێ تێک ببن، پلانێن وان یێن گەلەکی مەترسیدار هەبوون کو گورزەکی کوژەر ل ئابۆریا کوردستانێ بدن».
ژ 10 جۆتمه‌ها سالا 2023ان بوویه‌رێن شه‌واتێن بازاران ل هه‌رێما كوردستانێ ده‌ستپێكربوون، یه‌كه‌م جار شه‌واتا بازارێ تركمه‌نان ل كه‌ركووكێ ده‌ركه‌ت، پشتره ل سباتا 2024ێ شه‌واتا بازارێ له‌نگه یێ هه‌ولێرێ كو ب بازارێ ده‌ستێ دوویه‌م تێ ناسكرن چێبوو، پشتره سووكا چه‌لێ یا دهۆكێ كو سووكه‌كی هه‌ری ب ناڤ و ده‌نگ و پری قه‌له‌باغه هات شه‌وتاندن.
ئه‌ڤ رێزه شه‌واتێن ل باژارێن جودا یێن كوردستانێ ده‌ركه‌تی گۆمانه‌كی مه‌زن چێكرن، ئه‌ول به‌رپرسیارییا ته‌ڤاهییا ڤان شه‌واتان بۆ رێخستنا عه‌هدی مللی چوون، پشتره ده‌ركه‌ت هۆلێ كو په‌كه‌كه ئه‌نجامده‌رێ سه‌ره‌كه یێ ڤان بوویه‌رێن قرێژه.
هێژای گۆتنێ یه، پشتی چه‌ند رۆژان ب شه‌واتا بازارێ چه‌لێ یێ دهۆكێ، پێگه‌ها داركا مازی ژ چاڤكانیێن خوه هین بوو كو په‌كه‌كه ل پشت ڤێ شه‌واتێ و شه‌واتێن دن یێن بازارێن هه‌ولێر و كه‌ركووكێ یه:
گەلۆ رێخستنا ب ناڤێ عەھد-ی ملی بازارێ دوھۆکێ شەوتاند؟
