گەلۆ رێخستنا ب ناڤێ عەھد-ی ملی بازارێ دوھۆکێ شەوتاند؟
د 1 نیسانێ دە ل سووکا چەلێ کو یەک ژ کەڤنترین بازارێن دوھۆکێ یە، شەوات دەرکەت. شەواتا کو ب شەڤ دەمژمێر 03:43 دە ڤێکەتی بەلاڤی تەڤاھییا دکانێن سووکێ بوو. د ئەنجاما موداخەلەیا تیمێن بەرگریا شارستانی و خەلکێ دەڤەرێ شەوات ھات کۆنترۆلکرن، لێ 8 ژێ سڤیل 3 ژێ ئەفسەر 11 کەس ژ دووکێلێ ب باندۆر بوون.
رایەدارێن پۆلیسێن دوھۆکێ جھێ کو ئاگر پێ کەتیە کەشف کر و راگھاندن کو شەوات ژ بەر تەماسا ئەلەکتریکێ دەرکەتیە. ل گەل ڤێ ژی مالپەرەکێ کو خوە وەکە “تەشکیلاتا عەھدی ملی” ب ناڤ دکە ئەڤ شەوات وەکە چالاکییەکێ گرت سەر خوە.
مە ناڤێ تەشکیلاتا عەھد-ی ملی د دەما شەواتا سووکا لەنگە یا ھەولێرێ دە بھیست. مالپەرێ ب ئارگومانێن فاشیستێن ترک خوە پێناسە دکە، داخویاند کو وان سووکا لەنگە یا ھەولێرێ شەوتاندیە.
دارکا مازی وێ دەمێ ب ناڤێ تەشکیلاتا عەھدی ملی مالپەر لێکۆلین کر و دەستنیشان کر کو IP-ئادرەسا مالپەرێ ژ رۆژئاڤا ھاتیە بکارئانین. https://darkamazi.net/archives/1044217
دو شەواتێن ل کەرکووکێ ژی چێبووی رێخستنا عەھد-ی ملی ئیدیعا کربوو وان ئەنجام داینە، شەوات د دکانێن ترکمەنان دە چێ ببوو لێ سەدەمێن وان شەواتان ژی دیار بوون.
دەربارێ شەواتا سووکا لەنگە یا د 27 شباتێ دە کو عەھد-ی ملی گۆتبوو مە کریە، لێکۆلین ھات کرن و بەرپرسیار ھاتن گرتن. کەسێن کو ئاگر پێخستن 2 کارکەرێن کو ل سووکێ دخەبتین بوون. چرووسکێن لەحیمێ ژ بانی دادکەتن خوارێ و جل و بەرگ و پلاستیک شەوتین و کارکەر دەرەنگ ب ئاگری حەسیان و ژ جھێ شەواتێ رەڤیان. بوویەر د کامیرەیان دە ھاتبوو تۆمارکرن و ئەڤ کەسە ھێژ ژی گرتی نە. ئەشکەرە بوو کو د بوویەرێ دە چ سەدەمەکا سیاسی نینە.
نھا ژی تەشکیلاتا عەھدی ملی د ھەمان مالپەرێ دە داخویانیەکێ ددە و دبێژە، ئەم بوونە سەدەما شەواتا بازارێ دوھۆکێ. ھەر وھا د داخویانیا خوە دە ب پەیڤێن بێرێزیکرنا ب کوردان دخوازن کوردان ئازرینن. لێ د شەواتا دھۆکێ دە چ گومان ل سەر وێ یەکێ نینە کو شەوات ب ئەنقەست هاتبە پێخستن. خالا کو شەوات لێ دەرکەت ھات تەسبیتکرن.
ئەڤجا ھەر چقاس ئەڤ ھەموو سەدەم ئەشکەرە بن ژی، چما تەشکیلاتا نەناس ب ناڤێ عەهد-ی ملی دبێژە مە کرییە؟
دەما کو ئەم بوویەرێ د رەوشەکا رەئالیست دە ئانالیز بکن، شۆپا پەکەکێ د بن مالپەرا تەشکیلاتا عەهد-ی ملی دەردکەڤە. ب راستی ژی گۆتنێن دەرەو یێن ڤێ مالپەرێ ب پرانی ژ ئالیێ خەباتکارێن چاپەمەنیا پەکەکێ ڤە تێن بەلاڤکرن. ناڤنیشانا مالپەرێ ژی ژ رۆژئاڤا تێ برێڤەبرن. وسا دخویە کو ئەڤ مالپەر د چارچۆڤەیا سیاسەتا شەرێ تایبەتێ پەکەکێ ل سەر ھەرێما کوردستانێ ھاتیە بکارئانین.
ژ سالا 2014 ڤە کو پەکەکە ب فەرمی بوویە ئاموورەکێ ئاژاندەیا ئیرانێ ھەول ددە کو دەستھلاتا ئیراقێ و شیعەیێن سوورییێ وەکە دۆستێن کوردان دەستنیشان بکە. پەکەکە دخوازە تەنێ دەولەتا ترک وەکە کۆلۆنیالست نیشا کوردان بدە. د چارچۆڤەیا ڤێ یەکێ دە، ھەرتم داخویانی و نووچەیان ددن و پەسنێ رەژیما تەھران و بەغدایێ ددن. ل گۆری پەکەکێ ئیران، ئیراق و سورییە نە داگیرکەرن. لێ ئەڤ ھشمەندییا کو پەکەکە دخوازە چێبکە گەلەک مەترسیدارە.
خویایە کو دخوازن ڤان شەواتان ڤەگوھەرینن فرسەندەکێ و فەراسەتا کو ترکیە ئێریشی باشوور بکە بافرینن. ھەر وھا د 19 ئادارێ دە فەرماندارێ پەکەکێ موراد قارایلان د ھەڤپەیڤینا خوە یا لگەل تەلەڤیزیۆنا پەکەکێ داخویانیەک دا و گۆت: “پەدەکە پشتگریا ترکییێ دکە، لێ ترکییێ رێخستنەکا ب ناڤێ عەھد-ی ملی ئاڤا کر و ل ھەولێرێ بازارێ لەنگە شەوتاند”.
کین و ھێرسا فاشیستێن ترک ژ ھەرێما کوردستانێ راستییەکە، لێ رێخستنەکا وھا هەبوونا خوە نینە. موراد قارایلان رێخستنەکا کو تونەیە، چاوا ناس دکە؟ ژ بەر کو مالپەر ژ ئالیێ وان ڤە ھاتیە چێکرن و یەکینەیێن پەکەکێ یێن ل رۆژئاڤا تەنێ ژ بۆ چێکرنا ئاموورێن پرۆپاگاندایێ نووچەیێن شەواتێ چێدکن.
د دیرۆکا پەکەکێ دە رێخستنێن تاری و چالاکیێن تاری یێن ب ڤی رەنگی پڕن. میناک د سالا 2019 دە رێخستنا ب ناڤێ “چەکدارێن تۆلھلدانا ھەڤگرتی یا گەل” HBIM بەرپرسیاریا شەواتا دارستانێ یا ل باژارێ مووغلایێ گرتبوو سەر خوە. لێ پاشێ ھات ھینبوون کو دو زارۆکان ب تەسادوفی دارستان شەوتاندنە. پری جاران رێخستنا “زارۆکێن ئاگری”یێن پەکەکێ بەرپرسیاریا گەلەک شەواتان گرتبوون سەر خوە، لێ پەی رە سەدەمێن شەواتێ ھاتن دیارکرن. واتە د ڤی ئالی دە خاپاندنەکا پەکەکێ ھەیە.
ژ بەر ڤێ سەدەمێ راستە مرۆڤ بفکرە کو مالپەرا ب ناڤێ تەشکیلاتا عەھدی-ملی ژ ئالیێ پەکەکێ ڤە تێ برێڤەبرن و تەنێ ژ بۆ ئالۆزی و ئاژاوەگێریا ناڤخوەیی ئامووران دئافرینە.
