پێشمەرگەیان ئەو زالگەهێن لەشکەرێ ترکیێ ل سینۆرێ ئامیدیێ دانیبوون ژێ وەرگرتن

هێزێن پێشمەرگەیێن کوردستانێ زالگەهێن کو ئارتێشا ترکیێ ل قەزا ئامێدیێ یا سەر پاریزگەها دوهۆکێ ڤە دانیبوون، ژ دەست وان دەرخستن.

پشتی زێدەبوونا ئێریشێن لەشکەرێ ترکیێ ل سەر خال و بنگەهێن پەکەکێ د ناڤا هەرێما کوردستانێ دە، لڤ و تەڤگەرێن چەکدارێن پەکەکێ زێدەتر کەتن ناڤا گوند و باژارۆکێن هەرێمێن سینۆری، ژ بەر ڤێ یەکێ ژی لەشکەرێ ترکیێ ل هەرێمێن سینۆری یێن قەزا ئامیدیێ دو خالێن کۆنترۆلێ دانیبوون.

چاڤکانیێن پێگەها دارکا مازی ئەشکەرە کرن، پێشمەرگەیێن کوردستانێ ئەو دو زالگەهێن کو لەشکەرێ ترکیێ پێش نها ل سەر رێیا سەرەکە یا د نێڤبەرا گوندێ بلیزانێ و کانی بەلاڤەیێ یێن سەر ب قەزا ئامێدیێ ڤە دانیبوون د رۆژا 2/7/2024 دە ژ دەست لەشکەرێ ترکیێ دەرخستن و د نها دە پێشمەرگە ب خوە وان خالێن کۆنترۆلێ ب رێڤە دبە.

دانینا ڤان دو خالێن کۆنترۆلێ ژ ئالیێ لەشکەرێ ترکیێ ڤە د ناڤا ئاخا هەرێما کوردستانێ دە، نەرازیبوونا گەل ل پەی خوە ئانی و ئەڤ یەک بووبوو جیهێ دلگرانیا گەل ب تایبەتی گەلێ ولاتپارێزێ باژارێ دوهۆکێ.