سمکۆیێ عەبدولعەزیزی

بەشا دویەمین

د بەشکا دن یا هەڤپەیڤینا خوە یا ب رادیۆ دەنگێ گەل رە کو قارایلان د 29/6/2024 دە ئەجام دایی دە، ئەڤ کەسێ کو خوە وەکە عاقلدارێ سەربازی یێ پارتیا کارکەران ناس دکە، لێ د راستیا خوە دە ژ نەخوەشیا دۆن کیشۆت دنالە، دبێژە، “ت جیهەکێ کو گەریلا لێ هەبن لەشکەرێ ترکیێ نەکاریە بارەگەهێن خوە لێ ئاڤا بکە”، ئەڤ گۆتن تا رادەیەکی راستە، لێ فێلبازیەک تێ دە هەیە.

چەوا راستە؟! هەیا کو ب دروستی بەرسڤا ڤێ گۆتنێ بدم، پێویست دکە پرسەکێ بکم، پرس ژی وێ ئەڤ بە، گەلۆ گەریلا کییە و چەوا ژیان دکە و لڤ و تەڤگەرا وان چەوایە؟ بەرسڤ ژی ئەڤە، گەریلا ئەو کەسن یێن کو ب بەردەوامی د لڤ و تەڤگەرێ دە نە و نابە ل جیهەکی دیارکری ژیان بکن، نابە کۆما وان ژ 10 کەسان زیدەتر بە، چەکێ گران د دەستێ وان دە تونەیە، چەنتەیا وان مەتبەخا وانە، جهێ ب شەڤ لێ د نڤن پیویست دکە د بن ئەردێ دە یانژی ل کوژیێن تاری یێن شکەفتەکێ دە بە، نابە ب تو ئاوا ب رۆژ لڤ و تەڤگەرا وان هەبە، نابە ب شەڤ ئاگر پێ بخن، گەر ب رۆژ ژی ئاگر پێ خست نابە ئاگرێ وان دوکەل هەبە، ئارمانجا سەرەکە ژ هەبوونا گەریلایان نە شکاندنا لەشکەرێ دوژمنە، بەلکو ئارمانج لێخستنا هن دەربەیان ب لەشکەرێ دوژمنە.

پرسا دویەمین، گەلۆ لەشکەر چییە؟ لەشکەر کۆمەکا چەکدارێن پەروەردە دیتینە کو ل گۆر پرەنسیپێن زانستی و تەکنۆلۆژی تەڤ دگەرن و ئاموورێن جوربەجور و چەک و تەکنۆلۆژیا و وەساییتێن پشێکەتی هەیانی دگەهە فرۆکە و بالەفرێن لەشکەری ژی ل بەر دەستێ وان هەنە، بارەگا و هەر تشتێ وان هەیە، لەشکەری پێوسیتی ب جیهەک مەزن و ڤەکری هەیە و دکارە ل هەر جیهەکی بارەگایان ئاڤا بکە.

ئانکو شیوازێ لڤ و تەڤگەر و مانا گەریلایان و لەشکەران پڕ جودایە، ئیمکانیات و پۆتانسیەلا وان ژی پڕ جودایە. دەما لەشکەر ل جیهەکێ ئاکنجی دبە و بارەگەهان ئاڤا دکە، ب تایبەت د ڤێ سەردەمێ دە و ب هەبوونا ڤێ پێشکەتنا تەکنۆلۆژی یا نها، لەشکەر دکارە د بارەگەهێ کو ئاڤکری دە کۆنترۆلا ب دەهان کیلۆمەترۆیێن بازنەیی یێن دەردۆرا خوە ژی بکە.

مورادێ دۆن کیشۆت، کو خوە وەک پسپۆرەکی لەشکری ددە ناسکرن باش دزانە ل جیهێ کو لەشکەر لێ ب جی دبە و بارەگەهان ئاڤا دکە، دکارە دەردۆرا خوە ب دێژاهیا دەهان کیلۆمەترۆیێن بازنەیی کۆنترۆل بکە، و ب چەکێ پێشکەتی یێ د دەست خوە دە دکارە کۆن مشکان ل چەکدارێن وان بکە قەیسەری، چەندین میناکێن بەربچاڤ د ڤێ دەربارێ دە هەنە کو دۆن کیشۆتێ پەکەکێ ب چاڤێ سەرێ خوە دیتنە، باکورێ کوردستانێ باشترین میناکە، پاش کو لەشکەرێ ترکیێ هەرێمێن کو ب دەهان سالان د بن دەستهلاتا پەکەکێ و چەکدارێن وێ دە بوون کۆنترۆل کرین و بارەگەهێن لەشکری لێ ئاڤا کرین، ئەو جی بوون جیهێن گەشتیاری و گەلێ سڤیل ل وان هەرێمان مژوولی ڤیستەڤال و گەریانایە، هەر وەها بوونە جیهێن پیشەسازی و سەرمایەدارێن ترک ب دەهان کارگەهـ لێ دانینە.

بەلێ، ئەی دۆن کیشۆتێ پەکەکێ، تە و پارتیا خوە گەریلا گهاندن وێ ئاستێ کو هوون نکارن یەک هەفتی ل ت جیهەکێ بمینن، ب تایبەت ل باکورێ کوردستانێ کو هەر دەر وە تەسلیمی ترکیێ کریە، هوون نکارن ت بارەگەهەکی لەشکەری ل ت جهان ب تایبەتی ل باکورێ کوردستانێ ئاڤا بکن، لۆما ب ڤی ئاوا دپەیڤی، کەسکی سادە دکارە باوەر ژ ئاخافتنا تە بکە، لێ کەسەکی شەهرەزا و پسپۆر ب ئاخافتنا تە دکەنە و دزانە تو دخوازی گەل بخاپینی.

ئەز ژ دۆن کیشۆتێ پەکەکێ رە دبێژم، گەلۆ کی زەرەرمەندێ سەرەکە یە ژ بجیبوونا لەشکەرێ ترکیێ ل سەر خاکا باشوورێ کوردستانێ؟ گەریلا یانژی گەلێ سڤیل یێ باشوور؟

هوون باش دزانن هەبوونا وە یا نەقانوونی و نەئەخلاقی د ناڤا هەرێما کوردستانێ دە بوویە سەدەم کو لەشکەرێ ترکیێ وەرە و ل تاکە پەرچەیا ئازادا کوردستانێ ب جی ببە، گەلێ باشوور ژی زەرەرمەندێ سەرەکە یێ هەبوونا وە و لەشکەرێ ترکیێ یە د ناڤا باشوور دە.

 ل داویێ دخوازم ژ دۆن کیشۆتێ پەکەکێ رە ببێژم، هوون و ترکیە هەڤپشکن د داگیرکرنا خاکا ئازاد یا باشوورێ کوردستانێ دە، سووچا وە زێدەترە ژ سووچا دەولەتا ترکیێ د ڤێ داگیرکرنێ دە، ژ بەر کو هوون ب زمان و جل و بەرگێن کوردی بوونە داردەستێن دەولەتا ترک ژ بۆی داگیرکرنا باشوور، جەردەڤان، چەتە و خائینێن سەرەکە تو و پارتیا خوە نە، نە کەسەک کورد کو دەولەتا ترکیێ ب دارێ زۆرێ ئەو لەشکەر کریە و نها ب رێیا وی باشوور داگیر دکە.