مەمەت مێردینی
ئەڤ 45 سالن دەرەوەک قرێژ کو مالا کوردان خەراب کریە ژ داییک بوویە، د ڤان 45 سالان دە ئەڤ دەرەو بوو سەدەما کوشتنا ب هەزاران وەلاتپارێزان و ژناڤبرنا ب دەهان رێخستنێن کوردستانی و بوو سەدەما سەرەکە یا ژ هەڤ دوورکەتنا زێدەتر یا کوردان، ئەڤ دەرەو بوو سەدەم ئێدی هن ژ کوردان دۆست و دوژمنێن خوە ژ هەڤ جودا نەکن، بوو سەدەم نە ب تەنێ باکورێ کوردستانێ بەلکو پەرچەیێن دن ژی، د ناڤ دە تاکە پەرچەیا ئازاد یا کوردستانێ ژی بکەڤە د خەتەریا داگیرکرنێ دە ژ ئالیێ دەولەتا ترک ڤە، ناڤ و نیشانا ڤێ دەرەوێ ژی ب تەنێ پەکەکە بوو.
پەکەکە ژ دەما دامەزراندنا خوە د رۆژا 27/11/1978 دە هەیا نها بوویە بەلا سەرێ کورد و کوردستانێ، پێش دامەزراندنا پەکەکێ ل باکورێ کوردستانێ چ دەما ژ بۆنا ئازادی و سەرخوەبوونا وێ سەرھلدان، بەرخوەدان و شۆرەشا ژ بۆنا ئازادیێ پێک ھاتبە، ھن سەرۆک عەشیر و دەولەمەندێن کوردان تم جھێن خوە ل با داگیرکەران گرتبوون و ئالیکاریا وان کربوو دا کو بەرخوەدانا ژ بۆنا کوردستانەکە ئازاد و سەربخوە تێک ھەرە، لێ بەلێ پشترە پەکەکێ جیهێ ڤان سەرۆک عەشیرێن خایین یێن کوردان گرت، پەکەکێ خیانەتا کو ژ ئالیێ ڤان سەرۆک عەشیرێن کوردان دهات کرن ب ئاوایەک سیستەماتیک گوهەری و نها ئەو ب خوە د بن ناڤێ کوردایەتی و ولاتپارێزیێ دە دکە، تشتا کو ئەڤ سەرۆک عەشیرێن خایین نەدکارین پێک بینن ژی نها پەکەکە ژ دەولەتا داگیرکەرا ترک رە پێک تینە.
باندۆرا سەرۆک عەشیرێن خایین ب تەنێ ل سەر باکورێ کوردستانێ بوو، دەما شۆرەشەک یان بەرخوەدانەکا کوردان سەری هلدابا، ئەڤ خایین دا مل ب ملێ لەشکەرێ ترکیێ ئێریشی شۆرەشگەران بکن، ئەڤ تشتەکی ئەشکەرە و زەلال بوو، لۆما گەل دکاری خایینان ژ ولاتپارێزان جودا بکن، لێ بەلێ نها پەکەکێ هەر تشت تەڤلیهەڤ کریە، د بن ناڤێ کورد، کوردستان، بەرخوەدان، شەهید و هتد دە خیانەتێ دکە و رێ ل بەر دەولەتا دگیرکەرا ترکیێ خوەش دکە ژ بۆی زێدەتر داگیرکرنا کوردستانێ، پەکەکێ خوینا جوانێن کورد ژ بۆی ڤەشارتنا خیانەتا خوە ژ خوە رە کریە سەیوانەک.
پەکەکەیا کو وسا ددا خویاکرن ژ بۆی ئازادیا هەر چار پارچەیێن کوردستانێ هاتیە دامەزراندن، پشتی 6 سالان ژ دامەزراندنا خوە، د 15 تەباخێ دە دەست ب شەرێ چەکداری کر و ئەڤ شەر 40 سالن بەردەوامە. لێ شەرێ چەکداری یێ کو ل باکورێ کوردستانێ دەست پێ کربوو، ئێدی نە ل ورە، بەلکو ل رۆژئاڤایێ کوردستانێ و د ناڤا ھەرێما کوردستانێ دە بەلاڤ بوویە، ئارتێشا ترکیێ ژی ب ھنجەتا ڤی شەری دەستێوەردانێن خوەیێن ل دژی ڤان ھەر دو پەرچەیێن کوردستانێ رۆژ ب رۆژ زێدەتر دکە. ت جیهەک ل باکورێ کوردستانێ کو جیهێ دامەزراندنا پەکەکێ یە نها د دەستێ پەکەکێ دە نەمایە، گەریلایێن پەکەکێ ژ یەکینەیێن 2-3 کەسی زێدەتر نکارن د ناڤا باکورێ کوردستانێ دە تەڤ بگەرن، نە بارەگەهـ و نەژی هەرێمەک دیارکری ل باکورێ کوردستانێ نەما د دەستێ وێ دە بە، پەکەکەیا کو تەمسیلا خەتا خیانەتێ دکە، ب ڤێ یەکێ ژی رازی نەبوو، لەشکەرێ داگیرکەرێ ترکیێ کشاند ناڤا کووراهیا باشوور ژی، بێی کو بەرخوەدانێ بکە، ب تەنێ ب رێیا ب کوشتن دانا جوانێن کورد د تونەلان دە زیدەتری 45 کیلۆمەترۆیێن هەرێما کوردستانێ ژی تەسلیمی ترکیێ کرن.
شەرێ کو پێویست بوو ل باکورێ کوردستانێ هاتبا کرن نها ل باشوور تێ کرن، لێ بەلێ چ شەرەک؟ شەرەک ب شێور و تاکتیکی، هەر جیهێ کو ترکیە دخوازە داگیربکە پەکەکە بێی شەر تەسلیم دکە، پشترە هن ژ جوانێن کورد ددە کوشتن هەیا کو بکارە د چاپەمەنیا خوە دە پرۆپاگاندایا ولاتپارێزیێ بکە، بەلێ، ئەڤ دەرەوا 45 سالی بوویە بەلا سەرێ تەڤ کوردان ل هەر چار پارچەیان.
ب درێژاهیا دیرۆکا خوە پەکەکێ ت جاران ئیتیراف ب شکەستنێ نەکریە، تەڤی کو هەر تم دبێژە ئەڤ سال سالا سەرکەفتنێ یە، سالا زەفەرێ یە، لێ بەلێ زێدەتر راستی شکەستنێ تێ، زێدەتر خاکا پیرۆزا کوردستانێ تەسلیمی داگیرکەران دکە و زیدەتر خیانەتێ دکە، ب دێژاهیا دیرۆکا خوە پەکەکێ یەک سەرکەفتن ژی ب دەست نەخستیە، نە ب تەنێ یەک گوند یان باژار ژ دەست دەولەتا ترک رزگار نەکریە بەلکو ب سەدان گوند و باژارێن ئازاد یێن رۆژئاڤا و باشوورێ کوردستانێ ژی تەسلیمی ترکیێ کرنە، پەکەکەیا کو پێویست بوو نها شانازیێ ب ئازادکرنا کوردستانێ بکە، شانازیێ ب خوینا وان جوانێن کورد دکە یێن کو ب دەستێ لەشکەرێ ترکیێ د شەرەکی ب شێور دە ددە کوشتن.
د شەر دە پیڤەرێ سەرەکە ژ بۆی سەرکەتنێ پاراستنا ئەردێ د دەست دە و رزگار کرنا ئەردێ داگیرکری یە، لێ ل جەم پەکەکێ پیڤەرێ سەرەکە ب کوشتن دانا زێدەتر یا جوانێن کوردە، پەکەکە نەکاریە و نکارە ل ت جیهەکێ ل بەر خوە بدە، هەر دەر تەسلیمی دەولەتا ترکیێ کر، تەڤ باکور، عەفرین و سەرێکانیێ، و ب کووراهیا 45 کیلۆمەترۆیان ژی خاکا باشوورێ کوردستانێ تەسلیمی دەولەتا داگیرکەرا ترکیێ کر، لێ دیسا دبێژە ئەم بسەرکەتنە، ئەم ل بەر خوە ددن، پەدەکە سەدەما داگیرکرنا باشوورە و هتد…
ئێدی پێویستە گەلێ کورد ڤێ دەرەوا 45 سالی باش ناس بکن، بزانبن هەیانی ل دۆرا ڤێ دەرەوێ کۆم ببن ئەوێ نەکارن ت پێشکەتن و ئازدیێ ب دەست بخن، بەرەڤاژی دێ وەلاتێ وان ب تەمامی ژ دەست وان دەرکەڤە و دێ زێدەتر کۆلە و بندەست ببن، ب ئاوایەکی کو ئێدی نەکاربن د مالێن خوە دە ژی ب زمانێ کوردی بئاخڤن، لۆما ئەز بانگ ل رەوشەنبیر، هونەرمەند و زانایێن کوردان دکم ل خوە، گەل و ولاتێ خوە خوەدی دەرکەڤن و پەکەکەیا کو تەمسیلا خەتا خیانەتی ل هەر چار پارچەیێن کوردستانێ دکە، روو رەش و شەرمەزار بکن.
