بووبێ ئەسەر

شێخ عەبدولسەلام بارزانی یەکەم شێخە کو د دەم و دەورانا خوە دە داخوازا سەرخوەبوونا کوردستانێ کرییە. یەک ژ وان زانا، ژێھاتی و تێگھشتیێ دەمێ بوو کو وەکە فەیلەسۆفەکی کورد بوو. وی رەوشا کوردان و جیھانێ  باش زانیبوو و ل گۆر وێ بنگەهێ رێبازەک ئانکو فەلسەفەیەک ژ بۆنا کوردان دانی بوو.

ژ بەر کو ئەو د وێ زانەبوونێ دە بوو کو تو ملەت بێ رێباز ئانکو فەلسەفە، دێ نکاربن ئازادی و سەرخوەبوونا خوە ب دەست بخن. فەلسەفە وەکە زینجیرەکا نەتەوەیی یە کو ملەتێ خوە ب وێ گرێ ددە داکو ئەو فکر و رامانا نەتەوەیی د دل و روحا مرۆڤێن ملەتێ وی دە گەش و خورت بە.

شێخ عەبدولسەلام بارزانی باش دزانی کو کوردێن نەبنە نەتەوەیی نکارن ژ بۆنا نەتەوەیا خوە کار و خەباتێن بێ بەرژەوەند یێن سەخسی بکن. وی دزانی کو ئەڤە ژی گرێدایی رێبازەکێیە. لەورا ژ بۆنا دامەزراندن یان پێکانینا رێبازەکێ دەست ب خەباتێ دکە و بناغەیێ رێبازەکێ ژی ژ بۆنا کوردان داتینە. ب ڤێ ژی د دەم و دەورانا خوە دە گەلەک گوھەراندن و شۆرەشان ژی پێک ئانین.

شێخ عەبدولسەلام  بارزانی ژ بۆنا کوردان ئەساسێ رێبازێ دانا و ئەو ل سەر دەستێ شێخ محەمەد گەش بوو. شێخ ئەحمەد مامۆستەیەکی ڤێ رێبازێ بوو. بارزانیێ نەمر ئەو د ژیانێ دە ئانکو ب شۆرەشا ئیلۆن و گولانێ پێک ئانی. نەمر ئیدریس بارزانی ب پاراستنا خوە یا لەشکەری و دیپلۆماسی یا ل گۆر وێ دەمێ، خوەدیتی ل کوردستانێ کر کو ب تەمامی تێک نەچە. رێزدار مەسعوود بارزانی ژی ل گۆر ڤێ رێبازێ، باشوورێ کوردستانێ ب فکر و رامانێن ھزرا نەتەوەیی، ئازاد کر. رێزدار نێچیرڤان بارزانی ب دیپلۆماسیا خوە یا نھا و ھەڤدەم و رێزدار مەسروور بارزانی ب ئاڤادان و پاراستنا کوردستانێ رێباز نووژەن کرن و بەلاڤ دکن کو کورد وێ فێر ببن.

ژ بەر داخواز و تەکۆشینا عەبدولسەلام بارزانی داخوازەکە نەتەوەیی بوو، دەولەتا ئالی عۆسمان (ئۆسمانی) ئەو 110 سالان بەرێ ل موسوول دارڤە کر. وان باوەر دکرن کو ب دارڤەکرنا وی دێ ھزرا نەتەوەیی ژی، د ناڤا کوردان دە نەھێلن ئانکو نەمینە. لێ نەدزانی و فێر نەبوون کو تۆڤێ کو وی ئاڤێتبوو ئەردێ کوردستانێ دێ رۆژەکێ سەری ھلدە و وەلاتێ خوە ب ئازادیێ بخەملینە.

تۆڤێ شێخ عەبدولسەلام بارزانی ژ بۆنا مە کوردان چاندبوو، ئیرۆ بەری ددن و نەڤیێن وی ئانکو کورد فێقیێ وی تۆڤێ نەتەوەیی کو ھاتیبوون چاندنێ، دخون.

ھەگەر پارچەین کوردستانێ یێن نە ئازادکری ژی، ڤێ رێبازا پیرۆز بخوینن، ژ نێرین و دیتینن بارزانیێن کو کورد کرنە خوەدێ رێبازەکێ، دەرسا وەربگرن و ل سەر ئەساسێ وێ تەکۆشینا ئازادیا گەلێ خوە بدن، ئاھا وێ دەمێ کوردستانا مەزن و یەکگرتی ژی تێ ئاڤا کرن.

ھەگەر ئیرۆ ئەم وەکە کورد ھەبوونا خوە، ھێز و قاوەتا د قادا ناڤنەتەوەیی دە دبینن ب سایا ئازادیا پارچا ئازاد ئانکو باشوورێ کوردستانێ یا کو ل گۆر باوەری و ھێزا ڤێ رێبازا کو شێخ عەبدولسەلام ئەساسێ وێ دانی بوو، یە.

دڤێت ئەم کورد تەکۆشینا بارزانیان و دیرۆکا وان و یا گەلێ خوە باش فێر ببن دا کو ئەم بکاربن ب شێوەیەکێ زەلال و ب ھەلوەستەکێ نەتەوەیی تەکۆشینا پارچەیێن دن ژی ل گۆر باوەری و ھێزا ڤێ رێبازێ بدن دا کو بکاربن خوە ئازاد بکن.

ئەم وەکە کورد و ھەمی جیھان و ب تایبەتی داگیرکەرێن مە باش دزانین کو ھەر بارزانیەک بەردەوامیا رێبازا شێخ عەبدولسەلامە، وان ھەر یەکی ب خوە ژی رۆناهی ل بەر وێ رۆناهیا شێخ عەبدوسەلام دانای دانا کو شەڤرەشا وەلاتێ مە رۆژ ب رۆژ پێتر و گەشتر رۆنی ببە. ھەتا کو ئەز تو و ئەم نەشەوتین ئەم نکارین شەڤرەشا وەلاتێ خوە رۆنی بکن.

چاوا کو تێ گۆتن: “دارا ئازادیێ ب خوینێ تێ ئاڤدان”، ھەر وەھا شەڤرەشا وەلاتان ژی ب پێکەتنا چریسکەکێ دەستپێ دبە. ئەو چریسکا کو ھێدی ھێدی شەڤرەشا کو گرتبوو و گرتیە سەر ملەتێ مە ب دەستێ بارزانیان ھاتبوو پێخستن. رۆژێ چریسکەک ل بەر وێ چریسکێ پێ دکەڤە و وەلاتێ مە ژی ب سایا پێکەتنا وان چریسکان، شەڤرەشێ ل مە رۆنی دکە.

ئازادیا باشوورێ کوردستانێ ژی ب خوینا پێشمەرگەیێن قەھرەمان و ل سەر ئەساسێ ڤێ رێبازا پیرۆز ب سەرکەتیە. لەورا ل سەر مە ھەر کوردەکی ژی فەرزە کو خوەدیتیێ ل رێبازێ و ل قەھرەمانیا پێشمەرگەیان بکن و دەرکەڤن…