مەمەت مێردینی
د 20ێ تیرمەھا سالا 2022 دە ھێزێن دەولەتا ترک ئێرشەک ل سەر گوندێ پەرەخێ کو د ناڤا سینۆرێ ئیدارەیا سەربخوە یا زاخۆ دە یە کر و ئەنجامێن ڤێ ئێریشا ھووڤانە دەمکی درێژ هاتن نیقاشکرن. ژ هەر کەسی رە ئەشکەرە بوو کو ئێریش نە تەسادوفی بوو، بەلکو د چارچۆڤەیا ستراتەژیەکێ دا هاتبوو کرن، ژ بەر کو ترکیە ل رۆژھلاتا ناڤین پێکھاتەیا ھەری پاشڤەروو، نەتەوەپەرەست و فاشیستە، پۆلیتیکایەکە بەرفرەھ دشۆپینە و سەرپەرەشتییا فەرمانا دژە کورد دکە. لێ بەلێ پەکەکە جارەکە دن ل شوونا شەرمەزارکرنا دەولەتا ترک د ڤێ بوویەرێ دە هاتیە ڤێ مژارێ جارەکە دن وەکە مادەیەکی مەدیایی ل دژی پەدەکێ بکار بینە، پەکەکێ د چاپەمەنیا خوە دە ب سۆرانی ب ئاوایەکێ و ب کورمانجی ژی ب ئاوایەکێ دن نووچە ل سەر دویەمین سالڤەرگەرا ئێریشا پەرخێ نڤیساندیە، لێ بەلێ تشتا د هەر دو نڤیسان دە وەک هەڤ دژبەری و حەزا تاوانبارکرنا پەدەکێ یە ژ ئالیێ فەساد و بێبەختێن رۆژ نیوزێ.
هەر کەسی ب چاڤێ خوە دیت کو پەدەکێ د دەربارێ ئێریشا ل سەر هاڤینگەها پەرەخێ کو 9 گەشتیارێن عەرەب تێ دە هاتن کوشتن و هەژمارەک دن ژی بریندار بوون ب رێیا وەزارەتا دەرڤە یا ئیراقێ کو “فوئاد حوسێن” ب رێڤە دبە ھەلوەست و بەرتەکەک توند نیشانی ترکیەیێ دا. ل دژی دەولەتا ترکیا داگیرکەر، ئیراقێ گلی ل کۆنسەیا ئەولەکاریێ یا نەتەوێن یەکبوویی کر و ژ کۆنسەیێ داخواز کر کو ل سەر ئێرشا ھۆڤانەیا دەولەتا ترک جڤینەک ئاوارتە لدار بخە. ل سەر داخوازا فوئاد حوسێن وەکە وەزیرێ دەرڤە یێ ئیراقێ، کۆنسەیا ئەولەکاریێ یا نەتەوەیێن یەکبوویی د رۆژا 22یێ تیرمەھێ دە ب ئاوایەک ئاوارتە جڤیا و ئێرشا دەولەتا ترک ب توندی شەرمەزار کر، لێ پەکەکە د چاپەمەنیا خوە دە هەول ددە گەل بخاپینە، ژ بەر کو نها هاتیە و نڤیساندیە پەدەکێ رێ نەدا فوئاد حوسێن هەولێن خوە بەردەوام بکە، ئەڤ ژی دەرەوەک پڕ مەزنە، لێ پەکەکە خوە ژ ت دەرەوان نادە پاش، یا ژ پەکەکێ رە گرینگ ب تەنێ رەشکرن و دژاتیکرنا پەدەکێ یە، نە ت تشتەکی دن.
رۆژ نیوزا پەکەکێ د بەشا کورمانجی یا نووچەیا خوە یا دەرەو دە نڤیساند، “ل دژی کۆمکوژیا کو دەولەتا ترک ل سەر گەشتیارێن ئیراقێ کر، ل ھوندر و دەرڤەیێ ئیراقێ بەرتەکێن ئەو قاس توند و بھێز ھەبوون کو دەولەتا ترک نەچار بکە ژ ھەرێما کوردستانێ ڤەکشە لەورا کەتبوو بن زەختێن ھەری مەزن. دیسا وەکە ھەر جارێ پەدەکێ خوە خست بن باسکێ دەولتا ترک یا داگیرکەر و نەھشت بەرتەک بدۆمن و ھەر تشت د بەرژەوەندیێن دەولەتا ترک دە راوەستاند.” ل ڤر دەرەو و بێئەخلاقیا پەکەکێ و چاپەمەنیا وێ ب زەلالی تێ دیتن، ژ بەر کو وەکە پێش نها مە باس کری پەدەکێ ب رێیا فوئاد حوسێن هەلوەستا خوە د دەربارا ڤێ ئێریشێ دە ئەشکەرە کربوو، لێ پەکەکە ل هەر دەرێ ل فەرسەندەکی دگەرە کو ئێریشی سەر پەدەکێ بکە، ژ پەکەکێ و چاپەمەنیا وێ رە پیڤەرێن ئەخلاقی ت گرینگیا خوە تونەیە، یا ل جەم وان گرینگ ب تەنێ ئێریشکرنە سەر پەدەکێ یە، پەکەکێ ئەڤ یەک ژ خوە رە کریە ستراتەژی، ئەڤ ژی ژ نشکاڤە پەیدا نەبوویە، بەلکو ئەڤ ژ ئەنجاما وێ سۆزێ پەیدا بوویە یا کو رێبەرێ پەکەکێ ل ئیمرالیێ ب دەولەتا ترک دایی، رێبەرێ پەکەکێ د یەکەمین لێپرسینا خوە یا ل ئیمرالیێ دا پێشنیارەکێ بۆ فەرماندارێ ئارتێشا ترک «حه‌سه‌ن ئاتیلا ئووگور» دکە و وه‌ها دبێژە:
“نها گه‌ل نه‌فره‌تان ل «بارزانی – تاله‌بانی» دکه‌ن. ئەز باش دزانم، کو گەل په‌یوه‌ندییه‌كا ئاوارتە نیشا یێن مە «په‌كه‌كێ» ددەت. هەگەر هوون «ترک» پیچەکێ هاریكاریێ بده‌نه یێن مە دێ وان «بارزانی – تاله‌بانی» ژ مه‌یدانێ راكه‌ین و پشتی دەمەکێ كێم دێ ئەڤ جه‌ماوه‌ره ب تەمامی دێ بیته لاینگرێ مە «په‌كه‌كێ – ترکیێ». ئەڤه بوویەرەکا دیرۆکی یە، و ل گۆری من دڤێت ئەو «پلان» گه‌له‌ك ڤەشارتی بمینیت. ل ڤێرێ ب پیچەکا پشتگرییا وە «ترک» دێ هەر تشت چارەسەر ببیت، به‌رێ خوه بده‌نێ، ئەز نەبەحسا پاره‌ی و چەکان دکه‌م، تنێ هاریكاریێن بچووك ژ وە دخوازم. نە هەوجەیە کو هوون «ترک» ڤان بارزانییان، تالەبانییان ب هێز بکه‌ن. هێزا بارزانی و تالەبانی بچووک نەبینن، هێزێن مەزن ل پشت وان هەنە. هوون باوەر نەکه‌ن کو ئەو ئالیگرێن ترکیێ نە. گاڤا ئەم ب هەڤ را ب پرەنسیپ كار بكه‌ین ئەم «په‌كه‌كه – ترک» دێ ب سەر بکەڤین. ئەم ناهێلین ئەو نەفەسێ بستینن و ئەم دێ وان ب ترکیێ ڤە گرێ بده‌ین. ژ بۆ ڤێ ژی من «پلانا هەولێرێ» پێشنیار کر. دەرفەتێ بده‌نه مە کو ئەم ل گه‌ل هندەک ترکمەنان كار بكه‌ین، دێ ئەو وەک کووچکان ب وە ڤە هێنه گرێدان.” یا نها روو ددە ئەڤە، ئانکو جیبجیکرنا پلانا میتا ترکیەیێ ژ بۆی ژناڤبرنا پەدەکێ و باشوورێ کوردستانێ، لۆما ئەڤ قاس پەکەکە ب ئاوایەکی بێئەخلاق ئێریشی پەدەکێ دکە و دەرەوان ل سەر ڤەدهوونە.
چاپەمەنیا پەکەکێ ب تەنێ ب ڤێ دەرەوێ رازی نەبوو و خوەست ب هندەک دەرەوێن دن زێدەتر ئێریشی سەر پەدەکێ بکە و نڤێساند، “پەدەکێ د یەکەم هەولا رزگارکرنا دەولەتا ترک ژ کۆمکوژیا پەرەخێ فوئاد حوسێن بێ دەنگ کر، پێنگاڤا دویەمین ژی سەرەدانا سەرۆکێ حکوومەتا هەرێما کوردستانێ بۆ بەغدایێ بوو، یا د وێ دەمێ دە ھەری سەیر و بالکێش ئەو بوو کو، پشتی جڤینا مەسروور بارزانی و مستەفا کازمی خوەپێشاندانێن ئالیگرێن موقتەدا سەدر ل دژی حکوومەتا ئیراقێ دەستپێ کرن کو وان ب خوە ژی نە دزانین ب چ ئارمانجێ وان خوەپێشاندانان دکن. لێ پر زوو ئەشکەرە بوو کو ئەو خوەپێشاندانێن ئالیگرێن سەدر ل ھاوار چوویینا دەولەتا ترکە کو گەل، پارلەمەنتۆیێ و حکوومەتا ئیراقێ ب خوە ڤە مژوول کرن و پەردە برن سەر کۆمکوژیا دەولەتا ترکیا داگیرکەر ب ڤی ئاوایی ب سەر بوویەرا کۆمکوژیێ دە گرتن.” بەلێ، دەرەو و بێئەخلاقیێن پەکەکێ د دەرحەق پەدەکێ و بارزانیان دە ب داوی نابن، ئەو هەر تشتی وەک فەرسەند بکار تینن ژ بۆی ئێریشکرنە سەر پەدەکێ و بارزانیان، ژ بۆ ڤێ یەکێ خوە ژ ت بێئەخلاقیەکێ نادن پاش، گەر نا ھەر کەسێ مەژیێ وی ھەبە وێ تەقەز بزانبە تشتێن پەکەکە باس دکە ت ئەلەقەیا خوە ب ڤێ مژارێ ڤە تونەیە، ھەر ئەڤ مایە کو پەکەکە ژ بۆی پاراستنا دەولەتا ترک پەدەکێ وەکە سەدەما کۆمکوژیا دێرسمێ، کۆمکوژیا گەلیێ زیلان، ئەنفال و ھتد دەستنیشان بکە، ب راستی ژی پر ئەجێبە ھەیانی نھە پەکەکێ ئەڤ یەک نەکری.
د ناڤا جڤاکا عەرەبی دە هەر تشتێ خەراب روو بدە، سەدەم چ بە ژی بلا ببە، ئیستیخباراتا ئیسرائیلێ پێ تاوانبار دکن، پەکەکە ژی مینا وان دکە، هەر تشت ل کوردستانێ روو بدە، چ ببە بلا ببە تەقەز وێ پەدەکێ ئارمانج بکن و پەدەکێ تاوانبار بکن.
پەکەکێ د ڤێ نووچەیا خوە دە مینا هەر جار خوەستیە وسا نیشان بدە کو “پەدەکەیە هەرتم ئالیکاریا ترکیەیێ دکە، گەر پەدەکە نەبە دێ دەولەتا ترک ژناڤ بچە و دێ تشتەک ب ناڤێ ترکیە نەمینە”، پەکەکە ژ بۆی شەرێ خوە یێ سەختە یێ ب ترکیەیێ رە ژی پەدەکێ وەکە سەدەما سەرکەفتنا دەولەتا ترک دەستنیشان دکە، هەلبەت ئەڤ ژی ب تەنێ ژ بۆی خاپاندنا گرسەیا خوە و نوخماندنا پلان و شکەستنێن خوە یە، گەر نا ژ خوە پەدەکە ل عەفرین و سەرێ کانیێ نەبوو کو پەکەکێ ور تەسلیمی دەولەتا ترک کر، پەدەکە ل ت جیەکێ باکورێ کوردستانێ نەبوو کو پەکەکێ هەر دەر تەسلیمی دەولەتا داگیرکەرا ترکیەیێ کر، پەدەکە ل هەرێمێن سینۆری یێن باشوورێ کوردستانێ کو پەکەکە ب “هەرێمێن پاراستنا مەدیا” ب ناڤ دکە ژی نەبوو کو پەکەکێ هەر دەر تەسلیمی دەولەتا ترک کریە، پەدەکە ل ت جیەکێ نەبوویە کو نها دەولەتا ترک داگیر کریە، بەلکو پەکەکە هەبوو، پەکەکە هەیانی نها نەکاریە ت جیهەکێ بپارێزە، ب تەنێ کاریە خەتا خوە یا ئیخانەت، بێ ئەخلاقی و خولامتیا دەولەتا ترک ژ بۆی داگیرکرنا کوردستانێ بپارێزە، ت دەرەوەک نکارە روویێ رەش و خایین یێ پەکەکێ ڤەشێرە، ئێدی خەتا خیانەتێ کو پەکەکە و ئۆجالان تەمسیلا وێ دکن ژ هەر وەلاتپارێزەکی کورد رە ئەشکەرە و زەلال بوویە.
