بەرپرسیارێ ھەر دلۆپا خوینا کوردان یا کو ل بەھدینانێ تێ رژاندن پەکەکەیە
ئۆپەراسیۆنا کو دەولەتا ترک ل سەر ئەساسێ قانوون و پەیمانێن ناڤنەتەوەیی ل دژی پەکەکێ ل خاکا باشوورێ کوردستانێ دایە دەستپێکرن، ددۆمە. ب ڤان ئۆپەراسیۆنان سەرانسەری سینۆرێ باکور و باشوور بوو قادا شەر. گەلێ بەھدینان-برادۆست، بەرواری، نێروەیی، نھێلی، رێکانی، مزووری، ھەرکی، و مەسیحی یێن دەڤەرێ گاڤ ب گاڤ مەحکوومی ڤی شەری ھاتنە کرن. لێ تشتەکی ژ ڤان ھەموویان مەترسیدارتر ھەیە: ژ بۆ کو شەرێ د بن ناڤێ پەکەکێ و لەشکەرێ ترک دە تێ مەشاندن ببە شەرەکی ناڤخوەیی و نەفرەتا کوردان یا ناڤخوەیی، ب پرۆژەیا لەشکەری و جڤاکی کەتیە رۆژەڤێ. واتە دخوازن پێڤاژۆیا ب ناڤێ براکوژی د دیرۆکا کوردان دە دوبارە بکن، کو کوردان بکن ناڤا زڤرۆکەکێ دە و بخەنقینن. ئێش و برینین د ناڤا جڤاکا کورد دە ژ نوو ڤە ئەکتیف بکن.
یێن کو دبێژن “مە شەرێ کورد و کوردان حەرام کر” لگەل کەسێن کو دبێژن “شەرێ ل گەل پێشمەرگە نە براکوژییە” روو ب روو نە.
پەکەکە ئەڤ 3 سالن کو ب گۆتنا “شەرێ لگەل پەدەکێ نە شەرێ براکوژییە” د شەخسێ پەدەکێ دە بەھدینان-برادۆست و تەڤاھیا باشوورێ کوردستانێ کێشا ناڤا ئالۆزییەکا بێ مفا و زەرەرمەند دە. ل ئالیێ دن پەدەکە کو ھێزا مۆتۆرا تێکۆشینا ئازادییا باشوورێ کوردستانێیە و ھەموو سازیێن گرێدایی وێ ل پشت گۆتنا سەرۆک بارزانی یا “من شەرێ کورد و کوردان حەرام کر” رادوەستن. واتە پەکەکە براکوژیێ نۆرمال دکە، پەدەکە ژی ب سالانە کو ژ بۆ رێگریکرنا ل شەرێ کوردان، ھەول ددە خوە ژ ئاژاوەگیریێن ڤێ سیاسەتا قەلەشا پەکەکێ دوور بخە.
ھەلوەستا تەڤگەرا بارزانی یا ل ھەمبەر پەکەکێ
پەدەکێ ھەتا نھا نە ھەلوەستەکێ شەری ل دژی پەکەکێ نیشان دایە و نە ژی سیاسەتەکا دن یا ئاستەنگکرن و رێگریا ل پەکەکێ پێک ئانیە. ھەر وھا مافێ حکومەتا ھەرێمێ ھەیە ڤان تشتان بکە. ھەگەر تەڤگەرا بارزانی بخوازە دکارە ل دوھۆک و ھەولێرێ نڤێسینگەهێن پەکەکێ ڤەکری، زلام و ھتد.. د ناڤ چەند رۆژان دە دەستەسەر بکە. دکاری ل ھەرێمێن ناکۆک بنکەیێن پشکینینا دانە و پەکەکەیی نەکارن گاڤان باڤێژن. لێ وە نەکر، چ ئێریشەکا لەشکەری و سیاسی ل دژی پەکەکێ ژ تەڤگەرا بارزانی، پەدەکێ و پێشمەرگە چێنە بوویە.
دەست ژ شەرێ چەکداری بەردن، پەدەکە د مەدیایێ دە ژی بەرسڤا شەری نادە. چاڤکانی ئەشکەرە دکن کو تەنێ د سالا دەرباسبوویی دە نێزی 60 جوانێن کو ژ پەکەکێ دەرکەتنە و تەڤلی ھێزێن پێشمەرگە بوونە ھەنە. د ناڤ وان دە ب دەھان چیرۆک ھەنە، ژ ژنێن دوجانی ھەتا یێن کو نەھاتنە دەرمانکرن، لێ پەدەکێ نەخوەستییە رۆژەکێ ژی بەحسا وان بکە. گەلەک دەرفەتێن پەدەکێ ھەبوون کو ل دژی نووچەیێن سەختە یێن پەکەکێ دەرکەڤە و دەرفەتا ئاخفتنێ بدە ڤان ڤەقەتییان، پەدەکە دکاری دیرۆکا پەکەکێ یا رەش بکە مژارا کانالێن راگهاندنێ. لێ پەدەکێ ئەڤ یەک ژی نەکر. واتە ژ ئالیێ پەدەکێ ڤە چ ئێریش ل سەر پەکەکێ نینە.
بەرپرسیارێ ھەر دلۆپا خوینا کو ل باشوور تێ رژاندن پەکەکەیە
ھەلوەستا پەدەکێ یا ل ھەمبەری پەکەکێ ل گۆری پرەنسیبا رەدکرنا شەرێ براکوژی یا سەرۆک بارزانییە. پەکەکە ب ئەرکێ دەستپێکرنا شەرێ ناڤخوەیی ڤە دلسۆزە. ئەڤ تێ وێ واتەیێ کو پەدەکە ئێریشی پەکەکێ ناکە و بەرپرسیارێ ھەر دلۆپا خوینا کو تێ رژاندن پەکەکەیە. ئەم ڤێ پێڤاژۆیێ ب کورتاسی بیربنن:
بەرپرسیارێ ھەر دلۆپا خوینا پێشمەرگەیان پەکەکەیە: هێزێن پێشمەرگە ھێزێن رەوا یێن ھەموو باشوورێ کوردستانێ نە. یەکانە ھێزا رەوایا دیرۆکی، یاسایی یە کو ژ حەفتەنینێ دەست پێ دکە ل تەڤاھیا خەتا بەرواری ژۆری، بارزان، برادۆست، خاخورکێ و خنێرە خوەدی مافە. ئەڤ مافێ پێشمەرگە ژ ئالیێ پەکەکێ ڤە ھاتیە دەستەسەرکرن. پەکەکێ ھەرێمێن کو دەست دانابوو سەر ژ بۆ ھێزێن چەکدارێن ترک هێلان. نھا ژی پەکەکە دخوازە بەرگرییا پێشمەرگە ژ بۆ پاراستنا خەلکێ سڤیل یێ ھەرێمێ ب نووچەیێن دەرەو سەختە بکە و پەدەکێ وەکە سەبەبێ بنکەتنا خوە دەستنیشان بکە. ئەگەر پێشمەرگە خواستبا، دکاری مۆتۆرسیکلەتێن گەریلا و کنجێن نیڤ-سڤیلێن کو ھەر رۆژ ل سەر رێیان پێ دگەرن بگرن، لێ نەکرن.
و ھێزێن پێشمەرگە ژی دبێژن: “تشتا کو سەرۆک بارزانی دبێژە حەرامە، حەرامە، ئەم چ جاران نابینە ئێرشکارێن یەکەم، ھەلوەستا مە جھێ خوەپاراستنێ یە، لێ کی ئێرشی مە بکە، دێ بەرسڤا مە ژی ھەبە” وێ دەمێ ئەڤ راستی دەردکەڤە ھۆلێ رێڤەبەرێن پەکەکێ بەسێ ھۆزات، قاراسوو، کالکان، بایک و موراد قارایلان کو دبێژن “شەرێ ل دژی پەدەکێ نە براکوژییە” ژ ھەر دلۆپا خوینا کو تێ رژاندن بەرپرسیارن. بلا خەلکێ کورد ڤێ راستییێ باش ببینە و بزانە.
بەرپرسیارێ ھەر دلۆپەکا خوینا کو ل باژاران بێ رژاندن پەکەکەیە: ئەڤ نە جارا یەکێیە کو پەکەکە ل سەر ترومبێلێن بەرپرسێن پێشمەرگە بۆمبەیا داتینە. ھەری داوی ل گەرمییان پەکەکێ بۆمبەیەک دانی بوو ناڤا ترومبێلا بەرپرسەکێ پێشمەرگە. کوشتنا غازی سالح ئالیخان ژ ئالیێ پەکەکێ ڤە ژ بۆ مەزنێن دەڤەرا بەرواریا گەف بوو. ھەر وھا کوشتنا محەمەد میرزا ژی ژ بۆ سندی و خەلکێ زاخۆیێ گەف بوو.
ل گۆری ئاگاھیێن کو نھا ھاتنە بدەستخستن، پەکەکێ پلانێن سوویقەست، بۆمبەکرن، پووچکرن و ئێریشێن ب بالافرێن بێ مرۆڤ ل باژاران چێکرنە. ژ بۆ ڤێ چەندێ هندەک ژ جوانێن باشوور پەروەردە کرنە، ھندەک ڤەقەتییایێن ژ بۆ پەکەکێ کار دکن و ژ خەلکێ باکورێ کوردستانێ، رۆژئاڤا و ئێزدییان پێک تێن و نێزی پەکەکێ نە ژی پەروەردە کرینە. ئەڤ کەسانە ئەرکدارکرنە کو وێستگەهێن کارەبێ، بۆرییێن ئاڤێ، خوارنگەھ و ھتد ل ھندەک جھان ژ ناڤ ببەن.
پەکەکە بەرپرسێ رژاندنا خوینا گەریلایانە: پەکەکە ژ مەھا گولانێ و ڤر ڤە ھەر رۆژ د ئۆپەراسیۆنا کو ل باشوورێ کوردستانێ تێ کرن دە ونداھییان ددە. ھەر چقاسی ئەشکەرە نەکە ژی لێ رۆژانە ل گارە، زاپ، مەتینا و خاخوورکێ ھەری کێم گەریلایەک ژیانا خوە ژ دەست ددە. چما؟ ئارمانجا پەکەکێ یا سیاسی پاراستنا سینۆرێن لۆزانێ ل رۆژھلاتا ناڤین و دەمۆکراتیککرنا دەولەتا کۆلۆنیالیستە. خالا کو ئەڤ سەد سالن کۆلۆنیالیست ھەول ددن کوردان بینن سەر وێ خەتێ ژی ئەڤە. ژ بەر ڤێ یەکێ جوان دمرن؟
تشتێ خەلەت نە تەنێ ئارمانجا پەکەکێ یە، ستراتەژیا وێ یا شەری ژی خەلەتە. ژیانا گەریلایان تەنێ ژ بۆ کشاندنا ڤیدیۆیان ژ بۆ تەلەڤیزیۆنێن پرۆپاگاندا-ناڤەندا وەکە ئاموورەکێ ریکلامێ تێ بکارئانین. پەکەکە دزانە کو ئەو گەریلایێن د تونێلان دە دێ هێن کوشتن لێ ب ئیسرار ڤێ یەکێ دکە. ھەر وھا گەریلایێن کو ھەول ددن ژ رێخستنێ دەربکەڤن ژی دەما تێن جوداکرن تێنە کوشتن. بەرپرسیارێ دلۆپا خوینا ھەر گەریڵایەکی کو ژ بۆ ڤێ ئارمانجا قرێژ و ستراتەژی یا لەشکەری یا شاش مەحکوومی مرنێ تێکرن دیسا پەکەکەیە.
پەکەکە ژ مرنا ھەر سڤیلەکێ ل قادا شەر بەرپرسیارە: دەما کو پەکەکە د شەر دە دەربەیەکێ ددانە، گاڤ ب گاڤ دکەڤە ناڤا سڤیلان دە. ژ بەر ڤان پەڤچوونان ھەتا نھا ب دەھان گوند ھاتنە ڤالاکرن. تراڤمایا شەری د زارۆک و ژنان دە پەیدا دبە. پەکەکە ل دەردۆرا گوندان سەنگەران دکۆلە، جل و بەرگێن سڤیلان ل خوە دکە و د ھوندرێ گوندان دە تەلەفۆن و جیھازان ب کار تینە و دبە سەدەم کو گوند وەرن بۆردۆمان کرن.
ھەر وھا ل ھەرێمێ کەسێن کو لگەل پەکەکێ تێکلیێن بازرگانیێ چێدکن، ب ترومبێلێن پەکەکێ ژ بۆی وان کری خزمەتا وان دکن، د ناڤا گوندان دە کەسێن مالێن خوە ب بھاکی بلند ددن پەکەکێ ژی ھەنە. ئەڤ کەس نە لایەنگرێن پەکەکێ نە بەلکو تەنێ بازرگانیێ دکن. راستە، 90 ژ سەدێ کەسێن د ئێریشێن ھێزێن ترک دە ژیانا خوە ژ دەست دانە ئەڤ کەسەنە. یان پەکەکە د ناڤا سڤیلاندا بوویە یان ژی سڤیل چوونە بنکەیێن پەکەکێ. پەکەکە ژ رژاندنا خوینا وان بەرپرسیارە. پەکەکە ژ کوشتنا ھەموو سڤیلێن دەڤەرێن شەری بەرپسیارە.
بەرپرسیارێ ژینگەھ و ئیکۆلۆژییا وێرانکری ژی پەکەکەیە: د شەرێ بەھدینان یێ ناڤبەرا پەکەکێ و چەکدارێن ترک دە نە تەنێ مرۆڤ دمرن، دار، گیا، چووچک، حەیوانێن کۆڤی و یێن کەدی ژی دمرن، کو ژ بۆ سیستەما ئیکۆلۆژیک پێویستن. ب ھەزاران دار بوون خوەلی، ب ھەزاران دۆنەم گیا ھاتن شەوتاندن، باخ و باخچە وێران بوون. ئەڤە ب تەنێ زەرارێ ناگەهینیتە ئابۆریا گوندیێن ل ور دژین و ئیکۆلۆژییا کوردستانێ، ب گشتی زەرارێ ددە سیستەما ئیکۆلۆژیک یا د ناڤا خوەزایا کوردستانێ دە. ھەموو بونەوەرێن کوردستانێ و سیستەما ژینگەها کوردستانێ بوویە قوربانیا ڤی شەرێ قرێژ یێ پەکەکێ.
ئەرکا پەکەکەێ ئەوە کو باشوور ل ھەمبەر کۆلۆنیالیستان بخە تەنگاسیێ
دڤێت رایا گشتی یا کورد بزانە کو ئیسرارا پەکەکێ یا د شەر و رژاندنا خوینا کوردان دە ب کاراکتەرێ دیرۆکی یێ پەکەکێ و رۆلا وێ یا د لیستکا ھەرێمی یا دەھ سالێن داوی دە گرێدایی یە. ھەموو ھەولدانێن پەدەکێ ژ بۆ نەھشتنا شەری ل ھەرێمێ ژ ئالییێ پەکەکێ ڤە پاشدە تێن ڤەگەراندن.
ئەرکا داوی یا پەکەکێ ئەوە کو ل باشوورێ کوردستانێ، یەکانە ئاخا فەرمی یا ل سەر روویێ ئەردی کو کورد تێ دە خوەدی ستاتوویا فەرمی نە، ب زمانێ خوە دخوینن و سروودا خوە دقیرن و د بن ئالا خوە دژین، بکێشە ناڤا شەرێ ناڤخوەیی دە و ڤێ ھەرێما ئازاد بکە جھێ پێشبرکیا ترکییێ، ئیراقێ و ھێزێن د دن یێن ھەرێمی. ڤێ دەستکەفتا پیرۆزا ل باشوور ھەیی ب داوی بکە. ژ بەر ڤێ رۆلا نەباشا کو پەکەکێ گێرایە، د چارەکا یەکەما سەدسالا 21 دە کورد ل ھەمبەری کۆلۆنیالیستان د پاشڤەچوونێ دە نە. بەرپرسیارێ ڤێ سیاسەتا کو زرارێ ددە کوردان پەکەکەیە. پەکەکە بوویە بووم و ئارمانج دکە کو پەپووک ل کوردستانێ بخوینە. کوردستانا ئازاد کاڤل بکە. لۆما ژی پەکەکە بەرپرسێ ھەر دلۆپەکا خوینێ یە کو ل باشوور دهێتە رژاندن.
