پەیمانا لۆزانێ کو د 23 تیرمەها 1923 دە هاتبوو ئیمزە کرن پەرچەکرنا ئاخا کوردستانێ و دەستهلاتداری و داگیرکەریا فارس، ترک و عەرەبان ل سەر کوردان مەشرووع کر، د ناڤا ڤان 101 سالان دە کورد ب قەتلیعام، بەرنامەیا ئاسمیلاسیۆنێ و تێکدانا دەمۆگرافیێ رە روو ب روو مان. ئەڤ ب گشتی ژی ژ بۆی پێشیگرتنا ل نەتەوەبوونا کوردان بوو، ب هەزاران مرۆڤ مرن، جیلێ کوردان د ناڤا ددانێن داگیرکەریێ دە هات بەرچقاندن، بیردانکەکا پڕ ژ ئێشێ ژ کوردان رە هشت، لێ بەلێ دیسا ژی داخوازیا ئازادیا کوردان و خوەبرێڤەبرنێ نەکاریبوون خەلاس بکن، هندەک کەس هاتن تەسلیمگرتن یان ژی تەسلیم بوون، لێ بەلێ داخوازا قەدەرا لۆزانێ پەرچەکرن هەر زندی ما.
دەولەتێن داگیرکەر ئەڤ سەکنا کوردان یا ل دژی لۆزانێ دیتن و خوەستن کو شعوورا خوە برێڤەبرنێ تونە بکن، ژ بەر ڤێ یەکێ ژی پرۆژەیێن سیاسی و جڤاکی پێشخستن، یەک ژ ڤان پرۆژەیان ژی ئەڤ بوو کو کوردان د ناڤا ئایدۆلۆژیا چەپگر و ئوممەتێ دە تەسلیم بگرن، ئەڤ هەر دو فکرە ژی پێتژ ناسنامەیا کوردینی، ناسنامەیێن دن ددان پێش و هەمان دەمێ تەکۆشینەکا نەتەوی یا کوردان ژ خوە رە وەک دوژمن دیت، هەگەر هوون بەرێ خوە بدن چار پەرچێن کوردستانێ ژی هوونێ ڤی جوورەیێ سیاسەتا جووربەجوور ل سەر عەلەویان و یارسانان و هتد ببینن. ئارمانج ژی ئەڤ بوو کو کورد ناسنامەیەکا هەڤگرتی یا نەتەوی چێنەکن، هەگەر ئەم ب ڤی ئاوا بەرێ خوە بدەن دیرۆکا کوردان ئەمێ ببینن کو رۆلا پەکەکێ د ناڤا ڤێ سیاسەتێ دە گەلەکی گرنگە.
عەڤدللا ئۆجالان و پەکەکە کو ب شیعارا کوردستانا سەربخوە و هەڤگرتی دەرکەتبوون سەر دیکا سیاسەتێ، پشتی ڤەگەرا عەڤدللا ئۆجالان یا ژ بۆی ترکیێ د 15 شۆباتا 1999 دە زڤراندنەکا یوتێرن ژ خوە رە چێکرن، ئۆجالان هێژان د بالەفرێ دە بوو دەما گۆت، دایکا من ترکە و دخوازم خزمەتا دەولەتا ترک بکم، ئەڤ گۆتن بوو بنگەهەک ژ بۆی پارێزنامەیا وی کو ژ 5 بەشان پێک تێ، گۆتنا ئۆجالان کو دگۆ ئەز دخوازم خزمەتا دەولەتا ترک بکم بوو مەبدەئەکی ئەساسی ژ هەموو پارێزنامەیا وی رە، یانی دەولەتەکە داگیرکەر پیرۆز دیت و ل همبەر وێ خوە چەماند.
پارێزنامەیا ئۆجالان یا کو ل ئیمرالیێ نڤیساندی ب تێگەهێن ئانارشیست، ئەکۆلۆژیک، پۆستمۆدەرن و ئاپۆلتیک هاتیە خەملاندن. ژ بەر وێ یەکێ ژی ئەو رەوشەنبیر، نڤیسکار و خوەندەکارێن کورد کو ئالیێ هشمەندیێ دە زێدە ژێهاتی نینن ژ بۆی وان گەلەکی بالکێش هات. لێ بەلێ، ئەو کەسێن کو واتەیێن راست یێن تێگەهان دزانن و د خوەندنا دیرۆکێ دە گەلەکی زیرەکن باش دزانن کو پارێزنامەیێن ئۆجالان نیزاما لۆزانێ کو هاتی مەحکوومکرن دخەملینە و ب سۆزەکا نوو جارەکە دن پێشکێشی کوردان دکە.
نە تەنێ پارێزنامەیا وی، هەلوەستا وی یا د مەحکەمێ دە وەرچەرخانەکا نوو د پەکەکێ دە چێکر، ئەمێ بکاربن ببینن کو پەکەکە چەوا بوویە ئاموورێ مەشرووعکرنا لۆزانێ، ژ بەر کو ئۆجالان د تەڤاهی پارێزنامەیا خوە دە ئانیە زمان ئەو ل دژی گوهەرینا سینۆرێن رۆژهەلاتا ناڤین و دەولەتێن داگیرکەرە، و دبێژە کو دەولەت خرابیا هەری مەزنە و سووند دخوە ئەمێ داخوازا دەولەتەکی نەکن، ئۆجالان د تێگەها مۆدەرنیتەیا دەمۆکراتیک و نەتەوا دەمۆکراتیک دە خوەست کوردان بتەوزینە. ئۆجالان ئەو کوردێن کو هێشتان هەبوونا وان ل گەلەک جیهان نەهاتبوو قەبوولکرن و داگیرکەر دخوازن هەر رۆژ د بن پۆستالا خوە دە وان بپەرچقینن و هەر رۆژ دەنگێ تانک و تۆپ و فیشەکان دبهیسن، ئەرکا مۆدەرنیتەیا دەمۆکراتیک وەکە جەنەتا ل سەر روویێ ئەردێ ب وان دا نیشاندان.
سالا دەرباسبوویی ل ئامەدێ، هنەک کەسان خوەست تەجرووبەیەکا جڤاکی چێبکن، وێنەیێ قازی محەمەد نیشانێ خەلکێ دان، کەسێ ئەو ناس نەکر، ئەڤ گرسەیا پەکەکێ کو نکارە ب زمانێ خوە باخڤە، دیرۆکا خوە یا بەرێ نزانە هەلبەت قازی محەمەد ناس ناکە، وسا دفکرە کو بەرخوەدان پارادیگمایەکا وسایە کو دکارە پارادیگمایا دونیایێ خەلاس بکە و وەها دفکرە هەر کەس ب پارادیگمایا وان حەسوودە، هەمان گرسە دەما ئالا کوردستانێ دبینن دبێژە ئەڤ سەمبۆلەکی پاشڤەروویە، و دەما تو ژێ رە دبێژی دەولەتا کوردی، دبێژن نەتەوەپەرستی نەخوەشییە، کو نکارە ملەتێ خوە رزگار بکە و پەرگالەکا ئازاد ژ کوردان رە ئاڤا بکە، وسا دفکرە کو پارادیگمایا وان دێ دونیایێ خەلاس بکە.
یەکەمجارە کورد د دیرۆکا خوە دە ب بێشعووریەکا ب ڤی ئاوا رە روو ب روو دمینە. خەلکێ باکورێ کوردستانێ پشتی ب دەهان قەتلیعامان ژی دەردکەت سەر دیکی و دگۆ، بژی کوردستان بمرە کۆلەدار. و ئەڤ شیعار شیعارەکە راستەقینە بوو، یێ کو پەرگالا لۆزانێ پەرچە بکە ژی ئەڤ شیعار بوو، لێ بەلێ نها کوردێن باکور ژ دەرڤەی شیعارا “بژی سەرۆک ئاپۆ، بژی براتیا گەلان” ت شیعارەکە دن نزانن. ئەڤ بێشعوری دەولەتا ترک ئاڤا نەکر، ئەڤ بێشعووری بەرهەما پەکەکێ یە و کورد ب ڤێ ئایدۆلۆژیا پەکەکێ ڤە ژ ئازادیا حەقیقی، ژ ئازادیا ئاخێ دوور دکەڤن.
ژ بەر ڤێ یەکێ ژی ئەڤ گۆتنێن کو پەکەکە ل دژی لۆزان دبێژە راست نینە، پەکەکە ل دژی لۆزانێ نەراوەستیایە، پەکەکە د ناڤا پەرگالا لۆزانێ حیمایەتا پەرگالا لۆزانێ دکە، ئەو کەسێن کو د 101ەمین سالڤەرگەرا لۆزانێ دە دخوازن پەرگالا لۆزانێ هلوەشە، دڤێت ببینە کو پارادیگمایا ئۆجالان یا دەمۆکراتیک، ئەکۆلۆژیک و ئازادیا جنسی بوویە چاڤکانیەک ژ بۆی خۆرتکرنا پەرگالا لۆزانێ، ژ بەر ڤێ یەکێ پێویستی هەیە کو ئەڤ پارادیگمایا پاراستنا لۆزانێ بهێت تەشهیرکرن.
