بووبێ ئەسەر
مە گەلەک جاران گۆتیە و نڤیسیە. گەلەک جانک و جامێران ژی ژ ڤێ کێم نەمانە کو دێ رۆژەکێ بارزانیێن تەکۆشەر و حەژێکەرێن گەلێ خوە، کوردستانا سەربخوە راگھینن.
لێ گۆتن و نڤیسێن وەھا ب دلێ داگیرکەر و نۆکەرێن وان نینە. ژ بەر کو ئازادی و سەرخوەبوونا کوردستانێ، دێ نانێ نۆکەران و رەوشا ئابۆری یا داگیرکەران تێک ببە و بکەڤن رەوشەکا کو ھەتا دەمەکێ درێژ ب سەرخوەڤە نەهێن.
ھەر وەھا ھەمی داگیرکەر و نۆکەرێن وان ڤێ یەکێ دزانن. لەورا تم ل گەل ھەڤ و ب ھەڤرا ژ بۆنا گەلێ کورد رۆناھیێ نەبینە و تم د تاریێ دە بژی، ب ھەڤرا کار دکن. چریسکەک ژ بۆنا ئازادی و سەرخوەبوونا کوردستانێ ل کیژان پەرچی پێکەڤە ھەر چار داگیرکەر ل گەل نۆکەر ئانکو کرێگرتیێن خوە ب ھەڤرا ئێریش دکن دا کو وێ چریسکێ ڤەمرینن. نھا ژی ب نۆکەرێن خوە ئانکو رێخستنا کو ژ کوردان و یا داگیرکەرانە، ئێدی کارێن خوە دکن. کورد دبێژن: “ژ کەتۆ ب من کەتۆ”.
ژ رۆژا داگیرکەران رۆناھی ل مە کریە تاری. وەلاتێ مە د ناڤبەرا خوە دە پارچە کرن. ئەم ل سەر ئەردێ مە کرینە پەنابەر. ئاھا ژ وێ رۆژێ دە و ھەتا نھا بارزانیان ژی ل ھەمبەر ڤێ داگیرکەریێ خوە نەچەماند. تەکۆشینا ئازادیا کوردستانێ ل گۆر دەستوور و بەرنامەیا رێبازا پیرۆز، دانە و ددن. ھەگەر نە ژ خوەفرۆش و خاینێن ناڤا مە بانە، نھا زوودە کوردستانا سەربخوە ھاتبوویا راگھاندنێ.
دەما بارزانیان دەست ب شەرێ ئازادی و سەرخوەبوونا کوردستانێ کرن، یەکەم بریارا وان ئەو بوو کو کورد ل سەر ئەردێ خوە ببنە دەستھلات. ھەر وەھا بریار دان کو چ دەستھلاتێن بیانی ل سەر سەرێ کوردان قەبوول ناکن. ژ بەر کو ئەڤ ژی خالەکا رێبازا پیرۆز بوو. ھەموو تەکۆشینا بارزانیان ل گۆر ڤێ دەستپێکر و ھێژ ژی ددۆمە.
نھا کار و خەباتێن بارزانیان و ب تایبەتی یا سەرۆک مەسعوود بارزانی ئەوە کو د قادا ناڤنەتەوەیی دە کوردستانەکا سەربخوە بدە قەبوولکرنێ. ژ بەر کو راگھاندنا وەلاتەکی سەربخوە ژی نە وەھا رەحەتە. گەلەک سەرئێشی و ئالۆزیێن وێ ژی ھەنە. لێ پرانیا کوردان ڤێ فێم ناکن. لۆما ھندەک ب نیەتێن پاقژ و هندەک ژی ب ھەلوەستێن قرێژ تم ڤێ یەکێ تینن زمان کو چما سەرۆک بارزانی سەرخوەبوونێ راناگھینە؟
نھا ژ بۆنا خەرابی، مالوێرانیێ و نەراگھاندنا دەولەتا کوردی یا سەربخوە، ئێدی داگیرکەرێن مە راستە راست موداخەلە یان دەستدرێژاهیی ل سەر باشوورێ کوردستانێ ناکن. چ دکن؟ ل سەر دەستێ ھندەک پارتیێن کو وان ل سەر ناڤێ کوردان دامەزراندنە کارێ خوە ب وان پێک تینن. ل سەر دەستێ پارتیا خوە یا ب ناڤ کورد، لێ د بەرژەوەندیا داگیرکەران دەیە، مالوێرانیێ و خەرابیێن پیس ل باشوورێ کوردستانێ ددن کرنێ. سەدەما ڤێ ژی ئەوە کو چقاسی نەئارامی ل ور ھەبە سەرخوەبوون ژی دێ ئەوقاسی دەرەنگ بکەڤە.
لێ چ دبە بلا ببە، کوردێن کو ئیرۆ خەباتا بارزانیان یا ژ بۆنا کوردستانەکا سەربخوە دکن، نەبینن و پشتگریێ لێ نەکن، دڤێت مرۆڤ ڤێ فێر ببە کو ئەو کەسانە ناخوازن کورد ببن خوەدی دەولەتا خوە.
بارزانیان چاوا دەست ب شەری چەکداری یێ ژ بۆنا ئازادی و سەرخوەبوونا کوردستانێ کرن، ئیرۆ ژی ب دیپلۆماسیا خوە، ب دان و ستەندنێن خوەیێن دەمۆکراتیک، ب ھەلوەست و کریارێن خوە، ل گۆر رێبازا پیرۆز، ژ بۆنا کوردستانا دەلال د قادا ناڤنەتەوەیی ب فەرمی وەکە دەولەتەکا سەربخوە بێ قەبوولکرنێ، کار دکن.
ئەڤە زێدەتری سەد سالانە کو بارزانی قەت رانەوەستیانە و راناوەستن ھەتا کو کوردستانا سەربخوە رانەگھینن. لۆما ژی نھا ژ نوو دە سەرۆکێ ھەرێما کوردسانێ رێزدار نێچیرڤان بارزانی و سەرۆکوەزیرێ ھەرێما کوردستانێ رێزدار مەسروور بارزانی کەتنە ناڤا دانوستەندنێن لگەل وەلاتێن ئەورۆپی و ئامەریکایێ و ب تایبەتی ئینگلیستانێ. تێکلیێن لگەل ئینگلیزان گرینگن. رازیکرنا وێ ژ بۆنا کوردستانەکا سەربخوە، گەلەک پێویستە.
ژ بەر کو ئیرۆ شەرت و مەجالێ راگھاندنا دەولەتەکا سەربخوە د دەستێ وان دەولەتان دەیە. ھەتا ئەو ڤێ قەبوول نەکن کەس نکارە دەولەتەکا سەربخوە راگھینە. لێ چ بکم ھندەک کورد ناخوازن ڤێ فێم بکن.
راگھاندنا کوردستانەکا سەربخوە دێ بیتە تێکچوونا داگیرکەر و کرێگرتیێن وان. لۆما ژی ھەتا ژ وان بێ و تێ، ب ھەڤرا ناھێلن کو کوردستان ببە سەربخوە. لێ دێ سەرۆک بارزانی ب ھەلوەستا خوە یا نەتەوەیی، رۆژەکێ ڤێ مزگنیێ بدە گەلێ کورد.
ژ بۆی ڤێ رۆژا پیرۆز پیچەک مایە. دڤێت ئەم کورد نھا ب سەبر بن، بێھن فرەھ بن، ئالیکاری و پشتگریا بارزانیان بکن و رێبازا پیرۆز د ھەر چار پەرچێن کوردستانێ دە خورت بکن دا کو گەلێ کورد ژ کۆلەتیێ خلاس ببە…
بارزانیان چاوا ب چەکی دەست ب شەرێ ئازادی و سەرخەبوونا کوردستانێ کرن، نھا ژی ل گۆر وێ بیر و باوەریا نەتەوەیی، ل سەر خەتا رێبازا بارزانیێ نەمر، کارێ دیپلۆماسیا ناڤنەتەوەیی دکن دا کو کوردستانا سەربخوە، ل سەر دەستێ سەرۆک مەسعوود بارزانی بێ راگھاندن.
