په‌كه‌كه خوە ئامادە دکە د رۆژێن پێش دە ئێرشی هێزێن پێشمەرگە بکە و ژ بۆ ڤێ ژی نها د مەدیایا خوە دە بنگەهێ ڤان ئێریشان چێدکە.
ل گۆری ئاگاهیێن كو داركا مازی ژ چاڤكانیێن خوه یێن تایبه‌ت گرتنه، په‌كه‌كه ژ بۆی پێكئانینا هنه‌ك ئێریشان ل سه‌ر هێزێن پێشمه‌رگه ل هه‌رێمێن نێزی قادێن شه‌ر ل ده‌ردوورا ئامێدیێ، گاره، مه‌تینایێ و خاكوركێ كه‌تیه ناڤا ئاماده‌كارییان ده و د مه‌دیایا خوه ده ده‌ست ئاڤێتییه چێكرنا بنگه‌هه‌كێ بۆ ڤان ئێریشان.
په‌كه‌كێ ئه‌ڤ چه‌ند رۆژن د مه‌دیایێ ده ئێریشا ل سه‌ر هێزا پێشمه‌رگه‌ی ده‌ست پێ كریه و ئیدیعا دكه كو «پێشمه‌رگه ئاماده‌كاریا كۆمپلۆیێ ل سه‌ر ته‌ڤگه‌را ئازادیێ» ئانگو چه‌كدارێن رێخستنێ دكه.
ئاماده‌كارییا ئێریشا ل سه‌ر پێشمه‌رگه ده‌ستپێكریه
د چار سالێن ده‌رباسبوویی ده په‌كه‌كێ ب ده‌هان جاران ئێریشا هێزێن پێشمه‌رگه كریه، ل كانی ماسێ، چه‌مانكێ و سه‌رێ ئامێدیێ، پێتری 10 پێشمه‌رگه‌یان شه‌هید كرنه.
هه‌ر وها ب ته‌رزێ ته‌رۆریستان ژی ته‌ڤگه‌ریا و ئێریشا كرن، شه‌هیدكرنا برێڤه‌برێ ده‌ریێ سینۆر یێ سه‌رزێری غازی سالح ئالیخان د ناڤا زارۆیێن وی و د ناڤا مالا وی ده، میناكا هه‌ری زه‌لاله.
ته‌رۆرا په‌كه‌كێ یا ل همبه‌ری هێزا پێشمه‌رگه و كادرۆیێن په‌ده‌كێ ل ڤر ب داوی نه‌بوو، رێخستنێ ل سه‌ر شۆپا «داعش و قاعیده» ژی بۆمبه خستن ترومبێلێن به‌رپرسێن پێشمه‌رگه‌هان، ھەری داوی ل گەرمیانێ بۆمبەیەک دانی بوو ناڤا ترومبێلا بەرپرسەکی پێشمەرگە دا. ھەر وھا شه‌هیدكرنا ئه‌فسه‌رێ خانه‌نه‌نشین یێ ئه‌نجومه‌نا ئاساییشا هه‌رێما كوردستانێ محەمەد میرزا ب رییا ته‌قاندنا ترومبێلا وی، چالاكیه‌كه دن بوو ژ چالاكیێن ته‌رۆریستی یێن وێ رێخستنا كو ناڤێ ته‌ڤگه‌را ئازادیێ ل خوه كری.
بنه‌سازیێ به‌ریا ئێریشێ ب چه‌ند رۆژان چێدكه
چاڤكانیێن داركا مازی ئاشكه‌ره كرن، د چار سالێن ده‌رباسبوویی ده، هه‌ر جارا په‌كه‌كێ ئێریشه‌ك كربه سه‌ر هێزا پێشمه‌رگه، به‌ریا ئێریشێ ب چه‌ند رۆژان بنه‌سازیه‌ك بۆ وێ ئێریشێ چێكریه، په‌كه‌كه ڤێ بنه‌سازیێ ب پارڤه‌كرنا ده‌ره‌و و نووچه‌یێن بێ بنگه‌هـ د مه‌دیایێ ده چێدكه، وه‌كه هه‌وله‌كێ بۆ ره‌واكرنا ڤان چالاكیێن خوه یێن ب گومان.
د ڤێ ده‌ربارێ ده دوهـ رۆژا شه‌می 27\7\2024ێ مه‌دیایا په‌كه‌كێ هنه‌ك وێنه‌یێن پێشمه‌رگه‌ی و پاسه‌وانێن سینۆر یێن ئیراقێ پارڤه‌كرنه كو ئه‌و وێنه یێن زڤستانا ده‌رباسبوویی نه وه‌ختا پاسه‌وانێن سینۆر هه‌ولا دانینا نوقته‌یێن خوه ل هه‌رێمێ دكر، په‌كه‌كێ ل سه‌ر وێنه‌یان نڤیساندیه «په‌ده‌كه ئاماده‌كاریا كۆمپلۆیێ دكه»، و ووسا پێده چوویه: «په‌ده‌كه ل هەرێما بەهدینانێ ل پەی کۆمپلۆیانە. د پێڤاژۆیا پێشیا مە دە دبە کو هنەک کۆمپلۆگەر ل هەرێمێ ئێریشێن بۆمبەیی بکن و ڤێ یەکێ بخن ستویێ تەڤگەرا ئازادیێ».
هێزا پێشمه‌رگه چما ناكه‌ڤه خه‌فكا په‌كه‌كێ ده
هێزا پێشمه‌رگه تم هه‌ول دایه نه‌به ئالیه‌ك د شه‌رێ ب گومان یێ په‌كه‌كێ و ئارتێشا ترك ده، ته‌ڤی هه‌موو هه‌ولدانێن په‌كه‌كێ یێن كشاندنا پێشمه‌رگه‌هان بۆ ناڤا لیستكا خوه و ته‌ڤی هه‌موو ئێریشێن په‌كه‌كێ یێن كو بوونه سه‌ده‌ما شه‌هیدكرنا پێشمه‌رگه‌هان، لێ هێزا پێشمه‌رگه نه‌كه‌ت ڤێ خه‌فكێ یا كو ب سالانه په‌كه‌كه تێكۆشینێ ژ بۆی دكه.
پێشمه‌رگه‌هان د سالا ده‌رباسبوویی 2023ان ده ل خەتا مەتینا – ئامێدیێ – گارێ ل نێزی هه‌رێمێن گه‌ریلا ته‌ڤگه‌را خوه خورت كرن، ئارمانج ژ وان ته‌ڤگه‌ران پێشیێ گرتنا ل ئارتێشا ترك و نێزیبوونا شه‌ر ژ گوند و باژاران بوو. مه‌دیایا په‌كه‌كێ وێنه‌یێن ته‌ڤگه‌را پێشمه‌رگه‌هان پشتی ب ده‌هان جارێن مۆنتاژێ پارڤه كرن و ل سه‌ر دنڤیساند كو پێشمه‌رگه ئالیكاریا ده‌وله‌تا ترك دكه.
هه‌لوه‌ستا هێزێن پێشمه‌رگه ژ شه‌رێ په‌كه‌كێ یه‌كه و نابه دو: هێزا پێشمه‌رگه فه‌رمانا سه‌رۆك بارزانی یا «شه‌رێ براكوژیێ حه‌رامه» ئه‌ساس دگره، ل سه‌ر ڤێ بنگه‌هێ ژی ت جاری نه‌بوویه ئێریشكارێ یه‌كه‌م و تم خوه ژ ئێریشێن په‌كه‌كێ پاراستیه، لێ د هه‌مان ده‌مێ ده دبێژه: «كی ئێریشی مه بكه، ئه‌مێ به‌رسڤ بدن».
په‌كه‌كه دبێژه: شه‌رێ ل دژی په‌ده‌كێ نه شه‌رێ براكوژیێ یه!!
ل همبه‌ری ڤێ هه‌لوه‌ستا پێشمه‌رگه‌ی و حكوومه‌تا باشوورێ كوردستانێ، په‌كه‌كه ئه‌ڤ 3 سالن دبێژه: «شه‌رێ ل دژی په‌ده‌كێ نه شه‌رێ براكوژیێ یه»!!.
په‌كه‌كێ دوهـ رۆژا شه‌می 27 تیرمه‌ها 2023ێ گۆتیه كو «د پێڤاژۆیا پێشیا مە دە دبە کو هنەک کۆمپلۆگەر ل هەرێمێ ئێریشێن بۆمبەیی بکن و ڤێ یەکێ بخن ستویێ تەڤگەرا ئازادیێ. ب ڤی ئاوایی پۆزسیۆنا تەڤگەرێ لەواز بکن و بەرێ رەفلێکسا گەل ژ خوە دوور بخن و بدن سەر تەڤگەرا ئازادیێ».
په‌كه‌كه دێ ئێریشێن بۆمبه‌یی ل دژی پێشمه‌رگه و سڤیلان بكه
ئه‌ڤ گۆتنا په‌كه‌كێ دهێته وێ واته‌یێ كو رۆژێن پێش مه په‌كه‌كه دێ هنه‌ك ئێریشێن بۆمبه‌یی بكه و پشتره هێزێن پێشمه‌رگه پێ ته‌وانبار بكه. ده‌ره‌وێن كو نها ژی ئه‌و د مه‌دیایا خوه ده پار ڤه‌دكه، ئاماده‌كاریا ڤێ یه‌كێ یه.
د به‌شه‌كا دن یا ڤێ نووچه‌یا ده‌ره‌و یا په‌كه‌كێ ده هاتیه گۆتن: «په‌ده‌كێ و ده‌وله‌تا ترك ل هه‌ولێرێ جڤینه‌ك ڤه‌شارتی پێكئانیه و د وێ جڤینێ ده نه‌خشه‌یا ته‌ڤگه‌را داگیركه‌ریێ ب تایبه‌تی ل خاكوركێ هاتیه چێكرن».
هه‌ر چه‌ند كو ئه‌ڤ نه‌جارا یه‌كێ یه په‌كه‌كه ده‌ره‌وان ده‌ربارێ پێشمه‌رگه، په‌ده‌كێ و حكوومه‌تا باشوور پارڤه‌دكه، لێبه‌لێ هه‌گه‌ر ڤێ گۆتنا په‌كه‌كێ یا ته‌ڤگه‌را هه‌ڤپارا په‌ده‌كێ و تركیێ ل خاكوركێ واته‌یه‌ك هه‌به، ته‌نێ ئه‌ڤه كو ئه‌ڤ ئێریشێن موحته‌مه‌ل یێن كو په‌كه‌كه ئاماده‌كارییا وان دكه، دێ به‌شه‌ك ژێ ل ده‌ڤه‌را خاكوركێ بن.
په‌كه‌كه ژ بۆی ڤه‌شارتنا پاشڤه‌كشینا خوه ئه‌ڤ پلان چێكریه
ده‌وله‌تا ترك قۆناغه‌كه دن ژ ئۆپه‌راسیۆنا په‌نجه به‌ری مه‌هه‌كێ ل باشوورێ كوردستانێ تایبه‌ت ده‌ردوورا پارێزگه‌ها دهۆكێ ل دژی په‌كه‌كێ دا یه ده‌ستپێكرن، رۆژانه گوندێن دهۆكێ دكه‌ڤن به‌ر ئێریشان ئاقار، ره‌ز و باغ شه‌وتینه و زراره‌كه مه‌زن چێبوویه. په‌كه‌كه ب ئاوایه‌كی سیستماتیك ته‌ڤگه‌را چه‌كدارێن خوه خستیه دۆربه‌را گوندان، ئه‌و دخوازه ئه‌ڤ گوند ببن قادێن شه‌ر و بێن ڤالا كرن، په‌كه‌كه ب ڤی ئاوایی خزمه‌تا ده‌وله‌تا ترك دكه و ووسا خاكا باشوور ب ده‌ست تركیێ ڤه به‌رده.
په‌كه‌كه ژ بۆی ڤه‌شارتنا ڤێ شریكاتییا خوه یا ب ده‌وله‌تا ترك ره، رابوویه ده‌ست ئاڤێتیه چێكرنا ده‌ره‌و و توهمه‌تان بۆ هێزا پێشمه‌رگه، ئه‌و دخوازه ژ گه‌ل ره ببێژه ڤا یێ كو ئالیكارییا داگیركه‌ران دكه، په‌ده‌كه یه نه ئه‌من، ئێریشێن بۆمبه‌یی یێن موحته‌مه‌ل ژی به‌شه‌كا ڤێ پیلانا په‌كه‌كێ یه.
