سمکۆ عەبدولعەزیزی
پەکەکە پارتیەکە کو ب دەرەوان هاتیە ئاڤاکرن، هەر د رۆژا دامەزراندنا خوە دە هەیانی نها بوویە کارگەها بەرهەمئانینا دەرەوان، ب رێیا دەرەوێن خوە گەلێ کورد دخاپینە، دەرەوا پەکەکێ یا یەکەمین ژی ئەڤ بوو کو خوە وەکە پارتیەکە نەتەوی دایە ناساندن، لێ د راستیا خوە دە پارتیەکە مارکسی بوو، ب ڤێ دەروێ رۆژ ب رۆژ خوە و گەلێ کورد بەر ب ئاقارەکی نەدیار ڤە دکشینە.
پەکەکێ کادرۆیێن خوە ب ئاوایەکی پەروەردە کرنە کو ب ت ئاوا راستی ژ دەڤێ وان دەرنەکەڤە.
پەرگالەکە ب ناڤێ پرا ئاسنی د ناڤا پارتیا خوە دە ئاڤا کریە، ئەڤ پەرگال ژ پارتیا چەپ یا سۆڤیەتێ وەرگرتیە کو پاش شەرێ جیهانی یێ دویەمین د ناڤا خوە دە پەیرەو کربوو، ب تایبەت پشتی هاتنا ستالین بۆ سەر دەستهلاتێ.
ئەڤ سیستەمە ل سۆڤیەتێ وسا ئاڤا کربوو کو نابە ت کەس وەرە ناڤا سۆڤیەتێ دە ئەگەر کۆمۆنیست نەبە، یانژی دڤێت ببە کۆمۆنیست، شێوازێ خواندنا د خوەندنگەهان دە، چاپەمەنی، هزر کرن و گۆتنان و هتد… پێویست بوو ل گۆر هزر و بۆچوونێن مارکس بوونایە، هەر هزر و نەرینەکە دن ل جیهانێ کو ژ دەرڤەیی تێگەها کۆمۆنیستیەتێ بووبایە وەکە پاشڤەرووتی دحەسباند، پارتیا کۆمۆنیستا سۆڤیەتێ وسا کادرۆیێن خوە پەروەردە کربوون دەما باران ل مۆسکۆیێ دباری پێویست دکر تەڤ کۆمۆنیستێن جیهانێ شەمسییێ ل هنداڤی سەرێ خوە هلگرن، خوە ئەگەر ل وی ولاتی پلەیا گەرماهیێ 50 پلە بوویا.
د پرۆژەیا پرا ئاسنین دە، یەکیتیا سۆڤیەتێ گهاندبوو وێ ئاستێ کو رێ نەددا وەلاتیێ سۆڤیەت هایا وی ژ دەرڤەی سۆڤیەتێ هەبە، یانی ژ وەلاتیێن سۆڤیەتێ رە ووسا دابوو خوەیاکرن مارکسیەت یەکانە رێیا رزگاریا تەخا بندەستە.
دەما مرۆڤ ل دیرۆکا پەکەکێ ژی دنێرە، خویا دبە پەرگالا پرا ئاسنین یا سۆڤیەتێ ب ئاوایەکی توندتر د ناڤا ڤێ پارتیێ دە هەیە.
یەک ژ خالێن سەرەکە یێن ڤی پەرگالێ هەڤووکا پاشڤەروویە، د ڤێ پەرگالێ دە هەر کەسەکی کو فکرا کۆمۆنیست نەپەژرینە وەکە کەسەکی پاشڤەروو دهات پێناسە کرن، ل سەر ڤێ ئەساسێ د دەما دەستهلاتداریا ستالین دە هەژمارا وان کەسێن هاتینە کوشتن و سێدارەدان و زندانکرن د ناڤا سۆڤیەتێ دە زێدەتر بوون ژ قوربانیێن سۆڤیەتێ د شەرێ جیهانی یێ دویەمین دە، ب هەمان ئاوایی وەلاتپاریزێن ب دەستێ پەکەکێ هاتینە شەهیدکرن و وەنداکرن ژ وان وەلاتپارێزێن ب دەستێ دژمن هاتینە شەهیدکرن پێترن، ژ خوە عەڤدللا ئۆجالان ب خوە ژی دانپێدانێ ب ڤێ یەکێ دکە.
ل یەکیتیا سۆڤیەتێ تەڤ کەسێن ژ دەرڤەیی چارچۆڤەیا کۆمۆنیستیەتێ دە دفکرین وەکە خایین دهاتن ناساندن و دەستهلاتا سۆڤیەتێ ئەڤ هزرێن جودا ژ رەهوریشال ڤە دئانین دەر.
پەکەکێ ژی هەمان پەرگال ل سەر گەلێ کورد ب گشتی و ب تایبەتی د ناڤا پارتیا خوە دە بکار ئانی، ل جەم پەکەکێ کەسێن نەتەوی ب تەنێ ئەو کەسن یێن د ناڤا پەکەکێ دە دخەبتن و بەیعەتێ ب رێبەرێ وان ئانکو عەڤدللا ئۆجالان بدن.
کەسێن د ناڤا پەکەکێ دە دخەبتن پێویست دکە ئەڤ شەرت و مەرج ل جەم وان هەبن، “عەڤدللا وەکە خوەدا ناس بکن، پرتووکێن ئۆجالان وەکە پرتووکێن پیرۆز ناس بکن، کەسێن کو عەڤدللا ئۆجالان پەسنا وان ددە و بەرپرساتیێ ژ وان رە ددە وەکە خەلیفە ناس بکن، هەر کەسێ ڤان شەرت و مەرجان جیبجی نەکە وەکە خایین تێ ناسکرن و چارەنڤیسا خایینان ژی بێ گومان دێ کوشتن و وەنداکرن بە.
تێگەها ئازادیا رادەربرینێ ل جەم تەڤگەرا ستالین ئەڤە کو کۆمۆنیستیەت پیرۆز کریە و کاپیتالیزم وەکە کەڤنەشۆپی دایە ناسکرن، ئانکو تو ئەوقاس ئازادی کو ژ ڤێ چارچۆڤەیێ دەرنەکەڤی، هەمان تشت ل جەم پەکەکێ ژی هەیە، ژ دەرڤەی وێ یا کو پەکەکە پەسەند دکە هەر تشت و فکرەک دن وەکە پاشڤەرووتی تێ پێناسەکرن.
دبە هندەک کەس ببێژن هوون ڤان ئاخافتنان ل سەر چ بەلگە و دیکۆمەنت دبێژن؟ لۆما ئەز داخوازێ ژ خوەندەڤانان دکم، بلا لەکۆلین بکن کا هەر ژ رۆژا دامەزراندنا پەکەکێ هەیانی نها کو ب سەدان سازیێن راگهاندن و چاپەمەنیێ هەنە، دێ یەک میناک ژی ببینن کو جارەکی ب تەنێ ژی پەکەکە رەخنە کربە یانژی گۆتنەکا ئۆجالان رەخنە کربە، یانژی شیرۆڤەیەکە جودا ژ شیرۆڤەیا پەکەکێ و عەڤدللا ئۆجالان بۆ هەر تشتەکی هەبە، بێی گۆمان، ناا.
رەخنە و خوە رەخنەکرن تێگەهەکە کو کۆمۆنیستان پڕ بکارئانیە، لێ ل سەر دەما دەستهلاتداریا ستالین ئەڤ پەیڤ ب تەنێ وەکە پەیڤ ما، ناڤەرۆکا خوە گوهەری، ب تەنێ بوو رەخنەدایینا کاپیتالیزمێ و پەسندایینا کۆمۆنیستیەتێ، خوە رەخنە کرن ژی ب تەنێ ل وێ دەمێ دروست بوو کو کەسەک ژ چارچۆڤەیا هزرێن کۆمۆنیست دەرکەڤە، پەکەکە ژی ب تەمامی ڤێ یەکێ دکە، دیرۆکا پەکەکێ ڤێ یەکێ ئیسپات دکە.
ئانکو ب کورتی و ب کوردی، تێگەها ڤان هەڤووکان ل جەم پەکەکێ ئەڤە:
ئازادی: ئاپۆ خوەدایێ کوردایە، سەرۆک و رێبەرێن دن یێن کوردان تەڤ پاشڤەروو و دیڤەلانکێن کۆلۆنیالیستانە.
دەمۆکراسی: ب تەنێ پەکەکە نوونەراتیا تەڤگەرا کوردی دکە، پارتیێن دن یێن کوردان یان پێویستە دیڤەلانکێن پەکەکێ بن یانژی دڤێ د قادا سیاسی دە نەمینن.
رەخنە و خوە رەخنەکرن: دڤێت تو ب هەر ئاوایی ل دژی هەر هزر و فکرەکە جودا ژ هزر و فکرێن رێبەرێ وان بسەکنی، هەر کەسێ کو رێبەرێ وان رەخنە دکە پێویست دکە یان خوە رەخنە بکە یانژی وەرە کوشتن.
