ئەڤە دەمەک درێژە ل سەر رەوشا باشوورێ کوردستانێ و شەرێ ئارتێشا ترک و چەکدارێن پەکەکێ تێ گۆتوبێژ کرن. گەلەک کەسایەتێن سیاسی ڤێ پرسێ ل سەر مەدیا جڤاکی گۆتوبێژ دکن و ھەرکەسەک ل گۆر خوە، لێ مخابن پرانی ھندەک نرخاندنێن ژ راستیێ دوور دکن و ھەولد دن بەرێ رایا گشتی بدن بایەکی کو چ بەرژەوەندیا وێ ژ بۆی تەڤگەرا ئازادخوازا کورد تونەیە.
گەلەک ب زانەبوون ڤێ یەکێ وەک پرسگرێکەکی د ناڤبەرا دو ئالیان دە گۆتوبێژ دکن. لێ د راستیێ دە پرسگرێک نە د ناڤبەرا دو ئالیان دەیە. واتە نە د ناڤبەرا پەدەکێ و پەکەکێ دەیە. پرسگرێک د نەڤبەرا پەکەکێ و خەلکێ باشوورێ کوردستانێ دەیە، پرسگرێک د پێشەرۆژێ دە پێتر دێ هێت خویاکرن د ناڤبەرا پەکەکێ و حکوومەتا ئیراقێ دەیە ھەتا پرسگرێک ناڤبەرا پەکەکێ و ھەڤالبەندێن وێ ل باشوورێ کوردستانێ دەیە، پرسگرێک ناڤبەرا پەکەکێ و یەنەکێ دەیە.
ل باشوورێ کوردستانێ دەستھلاتەک ھەیە، حکوومەتەک و سەرۆکاتیا ھەرێمێ و پارلەمەنتۆیەک ھەیە.
پرسگرێک د ناڤبەرا پەکەکێ و دەستھلاتا کوردستانێ دەیە. ژ بەر کو، پەکەکە دەستھلاتا کوردستانێ ناس ناکە و رێزێ ل قانوون و بریارێن حکوومەتا کوردستانێ ناگرە. پەکەکە ھەول ددە پرسگرێکا خوە ب پرسگرێکا د ناڤبەرا خوە و پەدەکێ دە بدە نیشاندان، دا کو سەدەمەکی ژ بۆی تێکچوونا خوە ببینە.
نھا ل ڤێ دەرێ پرسەک دەردکەڤە ھۆلێ:
گەلۆ ئەو کەسایەتی، ئالیێن سیاسی یان ژی ھەر کی بە کو پەدەکێ د ڤێ دەربارێ دە تاوانبار دکن دێ ب جەسارەت و وێرەکی بکاربن بەرسڤا ڤان پرسان بدن ؟
پرس: پێوەندیا پەکەکێ لگەل دەزگەھێن دەولەتا ترک یا کوور ھەیە یان تونەیە؟
پرس: پێوەندیێن پەکەکێ ل گەل حکوومەتا ئیراقێ و ملیسێن حەشدا شەعبی ھەنە یان نا؟
پرس: پێوەندیێن پەکەکێ ل گەل رەژما ئیرانێ و دەزگەھێن وێ یێن ئیستخباراتێ ھەنە یان نا؟
پرس: پێوەندیێن پەکەکێ ل گەل رەژیما سووریێ ھەنە یان نا؟
پرس: پەکەکە رێخستیەکا کوردستانیە یان نا؟
پرس: پەکەکە ل گەل چەپێن کەمالیستێن ترک د ناڤ هەڤپەیمانیەکێ دەیە یان نا؟
ئەگەر ھەرکەسەک خوە ب راستی نیشتیمانپەروەر دبینە ب ئاوایەکی زەلال بەرسڤا ڤان پرسان بدە، دێ راستیا ھەیی ژی ببینە.
د ڤێ دەمێ دە، ھەرکەس دزانە کو دەولەتا ترک و پەکەکێ گەلەک ب زانەبوون ب ئارمانجا داگیرکرنا کوردستانێ شەرێ خوە یێ قرێژ بریە باشوورێ کوردستانێ. ژ بۆ رێخستنەک کو وەک پەکەکێ ب دەستێ خوە ب گۆتنا ئۆجالان”15 ھەزار جوان” د ناڤ خوە دە تەسفیە کربن” فەداکرنا ب دەھان جوانێن کورد ژ بۆ وان نە گرینگە. پەکەکە جوانێن کورد ب دەستێ ئارتێشا ترک ژ ھۆلێ رادکە.
پەکەکە ب ھەموو ھێزا خوە یا مەدیایێ، ب ھەموو دام و دەزگەھێن خوە شەرێ پەدەکێ دکە. رۆژانە مەدیایا پەکەکێ ب زمانێ بەرپرسێن پەکەکێ، پەدەکێ و بارزانیان ب خیانەتێ تاوانبار دکن. گەلەک پرۆپاگاندایێن دەرەو دکن و سەختەکاریان بەلاڤ دکن. باشە پەدەکە ل ھمبەر ڤێ یەکێ چ دکە. دەنگ ناکە و پەکەکێ د ڤێ دەربارێ دە موخاتەب ژی ناگرە. پەکەکە ژ بلی شەرێ مەدیایی، ل باشوورێ کوردستانێ دەست ب چالاکیێن تەرۆریستی دکە. ئێریشی دەزگەھان دکە، گەلەک دەڤەران دشەوتینە و ل گۆرا ئاقلێ خوە دێ پەدەکێ ب ڤان کریاران ژ ناڤ ببە.
ل ڤێ دەرێ پرس نە ھەلوەستا پەکەکێ یە. ھەلوەستا وان یا دژبەریا دەولەتبوونا کوردان ئەشکەرەیە و ڤەکری دبێژن ئەم رێ نادن کو ل باشوورێ کوردستانێ دەولەتەکا نەتەوی یا کوردا بێ ئاڤاکرن.
گەرەک ھەر کەسایەتەک نشتمانپەروەر ل ڤێ دەرێ نوقتەیەکی دەینە و راستیا ھەیی و شانۆیا ب دەستێ پەکەکێ تێ لەیزتن ببینە. ھەتا وەک ڤێ گاڤێ ھندەک ئاقلمەند(!) کو، ب تەمامی ژ راستیا کوردستانێ دوورن بەحسا وێ یەکێ دکن کو بلا پەدەکە و پەکەکە ل ھەڤ بجڤن و ل ھەڤوەرن، دا پرسگرێکا ھەیی چارەسەر بکن. ئەو مەژیێ کو ئیرۆ د ڤێ پێڤاژۆیێ دە بەحسا ڤێ دکە، ئەگەر پیچەکی دروتست بن، بلا ئەولێ بەحسا ھەلوەستا دژمناتییا پەکەکێ بکن، بەحسا راستیا ھەیی بکن، پشترە بەحسا جڤینا بکن. ھەروەھا ھندەک دەزگەھێن گرێدایی پەکەکێ و دیلێ سیاسەتا پەکەکێ ژی وەک کەنەکێ و دەمێ دبێژن: ئەم دخوازین لگەل پەدەکێ روونن لێ بەرسڤا مە نادن. تو رۆژانە کەسەکی ب خیانەتێ تاوانبار بکی و سیاسەتا پەکەکێ رێڤە ببی و رۆژانە د مەدیا پەکەکێ دە بارزانیان و پەدەکێ ب خیانەتێ تاوانبار بکی ب چ روویی تو دۆزا ھەڤدیتنا لگەل پەدەکێ دکی؟ پیچەکێ خوە ژ کۆلەتیا سیاسەتا پەکەکێ بدن ئالیەکی و ل ھمبەر پەدەکێ بێئەخلاقیێ نەکن کا پەدەکە ل گەل وە روودنە یان نا؟ نابە ھوون ل سەر رانێ خەلەکێ روونن و تلیا بێخن د چاڤێن وان دە.
گەلۆ ل رۆژئاڤایێ کوردستانێ پەدەکە ھەبوو کو دەڤەرێن وەک عەفرن، سەرێکانیێ و گرێ سپی رادەستی ئارتەشا ترک کرن؟ ئەڤ یەک ژ ئەرکا پەکەکێ یە.
تایبەتی ھندەک رەوشەنبر و سیاسەتمەدارێن باکورێ کوردستانێ، ناخوازن خوە نێزکی پرسگرێکا پەکەکێ بکن و ناخوازن پەکەکێ رەخنە بکن. ھەتا وەک ڤێ گاڤێ باوەریا ھندەک ئالیان ھەیە کو ل گەل پەکەکێ د ھندەک قادان دە ھەڤکاریێ ژی بکن.
ئیرۆ ئارمانجا پەکەکێ لاوازکرنا پەدەکێ یە. پەدەکە خوەدا نەکە تێک بچە، ھەرێما کوردستانا باشوور تێک دچە، پەدەکە تێکبچە دەستکەفتیێن نەتەوی ل کوردستانێ تێک دچن، پەدەکە تێک بچە خوەونا سەرخوەبوونا کوردستانێ تێک دچە.
جاردن رەخنەکرنا ھندەک کێماسیێن پەدەکێ تشتەکە، لێ پشتا خوە بدی سیاسەتا پەکەکێ و پەدەکێ رەخنە بکی دبە تشتەک دن. ئەگەر سیاسەتمەدار ڤێ یەکێ نەبینن دێ بکەڤن چالەکا خراب و لەوتی دە کو چ جاران ژێ نەیێن پاقژ کرن.
ل قادا ناڤنەتەوی بنێرن، سەرۆکێ ھەرێما کوردستانێ ل ھەر وەلاتەکی وەک سەرۆکێ دەولەتەکی تێ پێشوازی کرن، ئالا کوردستانێ ل پایتەختێ گەلەک وەلاتان تێ بلندکرن. کورد ژ ڤێ سایێ ژ ئیتھامێن تەرۆرێ تێنە شووشتن و دۆزا وان یا رەوا دکەڤا رۆژەڤا جھانێ دە. ھەر جارێ دەما وێنەیێ نێچیرڤان بارزانی ل تەنشتا سەرۆکێ وەلاتەکی دەردکەڤە وەک کورد مرۆڤ پێ سەربلندە. گەرەک ئەم وەک کورد ڤێ راستیێ ببینن و ل گۆرا وێ ژی تەڤبگەرن.
د بنگەھێ خوە دە پەکەکە شەرێ ڤێ غروور و سەربلندیا کوردان دکە. ئەڤجا ئەگەر ئەڤ راستیە نەیێ تێگھاندن، گەلەک زەحمەتی د تێگھاندنا کەسایەتان یا راستیێ دە ھەیە.
رۆژەڤا کورد
