بووبێ ئەسەر
دەما ئەم ل تەڤگەرا ئازادیخوازیا بارزانیان دنێرن، دخوینن و دبینن کو ژ بۆنا بەردەوامیا تەکۆشینا ئازادی و سەرخوەبوونا کوردستانێ تم د ناڤا ھەولدانان دە بوونە. ژ بۆنا کەدا وان، تەکۆشین، بەرخوەدان و سەرھلدانێن وان یێن ل ھەمبەر داگیرکەران تێک نەچن، تم ب حازری، ئارامی و ب ئاقلانە تەڤگەریا نە. ل گۆر ڤێ ژی رێبازا خوە دانینە.
د تەڤگەرێن ھەر چار پارچێن کوردستانێ دە چ کەس و رێخستنان وەکە بارزانیان دۆست و دژمنێ خوە ناسنەکرنە. لەورا ژی وان تم ل سەر ڤی ئەساسی ب ناسکرنا دۆست و دژمانێن خوە، کارێ خوە ھەتا نھا مەشاندنە و وێ ژ نھا و پێدە ژی بدۆمینن. دەما مرۆڤ خوەدی رێبازەکێ بە، دێ تەکۆشینا مرۆڤی ھەر بەردەوام بە، ھەتا مرۆڤ خوە بگەهینە ئارمانجا خوە. بارزانیان ژی وەھا بوو.
من خوەست بێژم کو دڤێت کورد ب تەڤگەر و پارتیێن خوە، ب دەھان جاران دیرۆکا بارزانیان بخوینن. ببینن چاوا وان ھەتا رۆژا ئیرۆ دەست ژ تەکۆشینا ئازادیا کوردستانێ بەرنەدانە. ببینن وان چاوا کورد ل باشوورێ کوردستانێ کرن خوەدی هەرێمەکا فەدەرال کو سبە ئەو دێ ببە دەولەتەکا سەربخوە ژی. ژ بەر کو دیرۆکا بارزانیان ل گۆر رێبازا وان دانیبوو، ھاتبوو و تێ مەشاندنێ.
دەما بارزانیان دەست ب شەرێ ئازادیا کوردستانێ کرن. ل سەر ئەساسێ کو بکاربن دۆست و دژمنان ژ ھەڤ ڤەقەتینن، بوو. ئەو ئەساس ژ بۆنا تەکۆشین، بەرخوەدان و سەرھلدانا وان تێک نەچە، بوو. ژ بەر ڤێ بوو کو رێبازا خوە دانین.
پشتی سالێن 1900 تەڤگەر و رێڤەبریا وان تم ب دو کەس و کەسایەتیان ھاتیە ب رێڤەبرنێ. ھەگەر ئەم دەما ھەردو عەبدولسەلامان حەساب نەکن. پشتی دەم و دەورانا وان ئێدی رێڤەبری یان پێشکێشیا بارزانیان یا ژ بۆنا ئازادی و سەرخوەبوونا وەلاتێ وان یێ بندەست، تم ب دو کەسایەتیان ھاتیە و تێ ب رێڤەبرنێ. د دەما خوە دە نەمران شێخ عەبدولسەلام و شێخ محەمەد بوون. دووڤرا شێخ ئەحمەد و مستەفا بارزانی بوون کو ژ بۆنا ئازادی و سەرخوەبوونا کوردستانێ تەڤگەر ب رێڤە دبرن.
د ناڤا وێ تەڤگەرێ دە وان ھەر کار و خەباتا کو رۆژەکێ ئەو کۆچ بکن دێ کی شوونا وان بگەرە دا کو تەڤگەر تێک نەچە. لۆما ژی ب حازری و ب زانینا بارزانیێ نەمر ھەر وی دو کەس دەستنیشان کربوون کو پشتی وی تەڤگەرێ ب رێڤە ببن.
ھەر وەھا ژی بوو و دو کەس، دو کەسایەتیێن کو دێ سبەرۆژێ شوونا وی گرن دەستنیشان کربوون. یەک ژ وان نەمر ئیدریس بارزانی و یێ دن ژی رێزدار مەسعوود بارزانی بوو. لەورا پشتی کۆچکرنا نەمر بارزانی، تەڤگەر و بەرخوەدانا ملەتێ کورد یا ب سەرپەرەشتیا بارزانیان نەسەکنی. ل خوە نە حەیرین و رێزدار مەسعوود بارزانی کرن سەرۆکێ پارتیێ و رێڤەبرێ تەڤگەرا ئازادیخواز. ژ بەر کو ئەڤ ژی خالەک ژ خالێن رێبازێ بوو.
لێ ھەر چقاسی رێزدار سەرۆک مەسعوود بارزانی ژی بوو، تم وی و نەمر ئیدریس بارزانی ل گەل ھەڤ و ب یەک بریارێ کارێ تەڤگەرا ئازادیخواز دمەشاندن. پشتی کۆچکرنا نەمر ئیدریس بارزانی. ئێدی بارێ گران مابوو ل سەر پشتا رێزدار مەسعوود بارزانی کو ئەو ژی کەسایەتیەکی خوەدی ھەلوەست و ب گۆتنێن خوە ھیمەکی رێبازا پیرۆز بوو.
ھەر بارزانیان حازری کرن کو پشتی رێزدار مەسعوود بارزانی ژی ڤالاھیا د تەڤگەرا ئازادیخواز و سەرخوەبوونخوازا گەلێ کورد دە نەبە، وان د ناڤا خوە دە ڤێ جارێ ژی رێزداران نێچیرڤان و مەسروور بارزانی حازر کرن کو پارتی و تەڤگەرا وان تێک نەچە.
ژ بەر کو بارزانیان دیرۆکا خوە و یا گەلێ کورد باش زانیبوون و دزانن کو چ دەما سەرۆکاتیا گەلێ کورد تێک چوویە، تەڤگەرا ئازادیخواز نەمایە. لۆما ژ بۆنا گەلێ کورد بێ سەرۆکاتی نەمینە و تەڤگەرێن وان تێک نەچە، وان ژ رۆژا ئەول دە ئەڤ یەکا دزانیبوون. ژ بەر ڤێ ئەڤ ژی کرن خالەکا رێبازێ. ل گۆر وێ ژی ب حازری کارێ خوە مەشاندنە و ددۆمینن.
لێ نھا ئەم بالا خوە ددنێ کو بارزانیان ھەر ئەڤ یەکە کرنە و دکن. لۆما ژی کەد، بەرخوەدان و سەرھلدانێن وان ب ئاڤێ دە نەچوون. ئەم ئیرۆ وەکە کورد ل باشوورێ کوردستانێ بوونە خوەدی هەرێمەکا کوردستانی یا فەدەرال.
بارزانی دزانن کو ژ بۆنا کوردستانەکا سەربخوە دێ دەم و وەخت زێدە بە. لۆما کارێن خوە یێن بکاربن ل دوو ھەردو رێزداران (نێچیرڤان و مەسروور) بدۆمینن ژ نھا دە حازریا خوە دکن. ژ بەر ڤێ ژی ژ نھا دە ئەو ھێژا ئیدریس نێچیرڤان بارزانی و ئارین مەسروور بارزانی، حازر دکن کو سبە کورد و پارتی بێ سەرۆک نەمینن.
گەلۆ د کیژان تەڤگەر و پارتیێن کوردستانێ دە ئەڤ سیستەم ھەیە؟ تونەیە. ژ بەر ڤێیە کو سەرھلدان و تەڤگەرێن پەرچێن دن ب سەر نەکەتنە. چ دەما سەرۆک و سەرۆکاتیا پارتیێن وان تێک چوویە، تەڤگەرا ئازادیخواز ژی نەھاتیە دۆماندن. ب کۆمکوژیێن مەزن داوی ل شۆرەشێ ھاتیە. لێ یا بارزانیان نە وەھا بوو. چ دەما تەڤگەر تێک چوویە، جارەکا دن و ب ھێزەکا مەزنتر و ساخلەمتر دیسا دەرکەتنە ھەمبەری داگیرکەرێن خوە.
