مەمەت مێردینی
کەسێن کو د ژیانا خوە دە قەت دەرەوان ناکن پڕ هندکن، د ئۆلێن ئەسمانی دە ژی هن جاران رێ ب دەرەوکرنێ هاتیە دایین، لێ ب مەرجەکی ئەو دەرەو ببە سەدەما پاراستنا ئۆلدارەکی ژ مرنێ و ت زرارا وێ دەرەوێ ژ بۆی کەس یان ئالیەک دن نەبە، ئانکو مرۆڤ دکارە ببێژە پڕ جاران کەس نەچار دبن دەرەوان بکن، لێ بەلێ کەس و ئالیێن هەرتم دەروان دکن و تشتا راست ژ دەڤێ وان دەرنەکەڤە ژی هەنە، پەکەکە ژی یەک ژ ڤان ئالیانە، رێڤەبەرێن پەکەکێ ب گشتی ب دەرەوان دەست ب ئاخافتنا خوە دکن، ڤێ ژی تێری پەکەکێ نەکر، نها پەکەکە ب رێیا هن کەسان کو وەکە رۆژنامەگەر یان هونەرمەند ددە ناسکرن دەرەوێن خوە زێدەتر دکە و دخوازە ب ڤی رەنگی تشتا شاش وەکە راستی و تشتا راستی ژی وەکە شاشتی ب گەل بدە باوەرکرن.
رێڤەبەریا پەکەکێ ھەر کەس و ئالیەکی تاوانبار دکە و ژ بۆ کو باندۆرەکە ھەستیار چێبکە نیقاشێن نوو دروست دکە. پرانیا جاران ڤان نیقاشان یان ب ناڤێن حەقیقی یێن رێڤەبەرێن خوە یان ژی ب ناڤێن نەحەقیقی د چاپەمەنیێ دە گەرم دکە، لێ د ڤان سالێن داویێ دە ئێدی تەڤ سینۆرێن ئەخلاقی دەرباس کرنە، د نها دە ل سەر ناڤێ هن جوانان کو وان وەکە هونەرمەند و رۆژنامەگەر ددە ناسکرن پێترین دەرەوان دکە، دەرەوێن ئەوقاس بێ ئەخلاقانە و قرێژ دکە کو کەسەکی مێژیێ وی هندک بە ژی نکارە باوەر بکە، لێ بەلێ پەکەکە ڤێ یەکێ ب ئاوایەکی رێکخستی دکە و مخابن هەیانی رادەیەکی ژی کاریە د ڤێ پرۆژەیا خوە دە سەرکەفتی بە.
پەکەکە د ڤان سالێن داوی دا ھەول ددە د ھەر بوویەرەکا ئیرۆیین و دیرۆکی دا پەدەکێ و بارزانیان و ھەرێما کوردستانێ سووچبار بکە، داکو خوە ژ بۆ ئێریشا ل دژی ھەرێما کوردستانێ و ھێزێن پێشمەرگە ئامادە بکە. د ڤی واری دا د ڤان سالێن داویێ دا د مەدیایا پەکەکێ دا ھۆڤیتیەکا مەزن یا نووچەیێن ساختە ھەیە. د دەمێن داوی دا رێڤەبەرێن پەکەکێ راستەراست ڤان درەوان تینن زمان، ژ بلی رێڤەبەرێن پەکەکێ نها پەکەکە هن کەسێن بێ نرخ ب پەرە کرێ گرتنە و دەرەوان ب وان ددە کرن، ئەڤ کەسانە یێن هەر چار پەرچەیێن کوردستانێ نە، دەرەو و بێئەخلاقیان د دەرحەق هەر کەس و ئالیەکی دکن، پەکەکە تێ نەبە.
تەڤی کو ئاخافتنێن ڤان کەسانە دەرەوێن ئەشکەرە نە، لێ ژ بەر کو هەر تم دوبارە دکن، بێی کو بەلگەیەک د دەستێ وان دە هەبە ب رێیا سۆسیال مەدیایێ ڤان دەرەوان ئیستیسمار دکن، کەسێن کو پەکەکە وەکە رۆژنامەگەر ددە ناسکرن، ل سەر ناڤێ کەسێن ژ ئەورۆپایێ و سازیێن ئیستیخباراتێ یێن دەولەتێن ئەورۆپایی و ئامەریکایێ دەرەوان سەرڤیس دکن و پارڤە دکن، بێی کو ت بەلگەیەکی نیشان بدن، ب تەنێ دبێژن، فلان کەسی یان فلان سازیا ئیستیخباراتی ئەڤ یەک د دەربارێ حکوومەتا هەرێما کوردستانێ، بارزانیان و هتد دە گۆتیە، بێی کو جارەکی یەک ژ ئالیگرێن پەکەکێ ژ وان بپرسە، گەلۆ بەلگەیا تە چیە؟ ئەڤ ئاخافتنا دەولەتێن ئەورۆپی یان ئامەریکایێ تە ل کۆ ئانی، ل کۆدەرێ هاتیە نڤێساندن؟ رۆژنامە، تەلەفزیۆن یان رۆژنامەگەرێ تو باس دکی ل کیژان وەلاتی کار دکن و چما تو ناڤەرۆکا نڤیسێن وان و لینکا مژارێ بەرچاڤ ناکی؟ بێ فکرین تەڤ دەرەوان باوەر دکن و دخوازن ب هەموویان ژی بدن باوەر کرن، هەر وەها بێ حوورمەتییەکە مەزن ب کەسێن باوەر نەکن، دکن، و وان وەکە کۆلە و کەسێن نەزان پێناسە دکن.
ت شک و گۆمان تونەیە کو راگەھاندنا پەکەکێ راگەھاندنەکە دژە کوردە. د راگەھاندنا پەکەکێ دە ت نرخێن کوردەواری د وارێ ئەخلاقی، مەبدەئی و نەتەوی دە تونە. مینا شەرفرۆشێن ل ستادیومان، بێ ئەدەب، بێ روومەت و ئێریشکارن. وندا بکن ئێرش دکن سەر بکەڤن ژی دیسا ئێرش دکن.
بەلێ، مەدیایا پەکەکێ ب راستی تەڤگەرەکا دژە کوردە. د ڤان دەمێن داوی دە بێھنا خیانەتا گەنی ژ ڤێ راگەھاندنێ دفرە. لۆما ژی ب تەنێ کەسێن نەزان، بێ حوورمەت و کرێگرتی د راگەهاندنا پەکەکێ دە جی دگرن و دخوازن ب بێ حوورمەتیکرن ب نرخێن کوردان، دەرەو و خیانەتا خوە و پارتیا خوە بڤەشێرن، لێ بەلێ ئێدی نەما کورد باوەر ژ دەرەو و ڤرەکێن پەکەکێ بکن، ئێدی هەر کەس دبینە و دزانە کا کی وەلاتپارێزە و ل سەر خەتەک نەتەوی دمەشە و کی ژی بوویە دارێ د دەستێ دەولەتێن داگیرکەر دە و بوویە پرەک ژ داگیرکەران رە ژ بۆی داگیرکرنا تەڤ پارچەیێن کوردستانێ، ب ئاخافتن و دەرەو و ئێریشێن ل سەر پەدەکێ و بارزانی ت کەس و ئالیەک نکارە خیانەتا ئۆجالان و پارتیا وی کو تەمسیلا خەتا خیانەتێ ل هەر چار پەرچەیێن کوردستانێ دکە بڤەشێرە.
