رێڤه‌به‌رێ په‌كه‌كێ دووران كالكان بانگ ل جوانێن كوردان دكه ل سه‌ر بنگه‌ها توندوتیژیێ خوه برێخستن بكن، ده‌ڤ ژ خوه‌ندنێ به‌ردن و رادیكال بن.
دووران كالكان د مه‌دیایا پارتیا خوه په‌كه‌كێ ده ئاخڤی و هن نرخاندن بۆ رۆژه‌ڤێ، په‌ڤچوونێن گه‌ل تركیێ، ئاكه‌پێ ده‌وله‌تا ئیراقێ و قووناغا پێش جوانێن كوردان ئه‌رك و مسیۆنا وان كر.
كالكان د به‌شه‌كا گۆتنێن خوه ده بانگ ل جوانێن كوردان كر كو ده‌ڤ ژ ریێن ئاشتی و چالاكیێن سڤیل به‌ردن و ل سه‌ر بنگه‌ها توندیێ خوه برێخستن بكن و گۆت: «هه‌لوه‌ستێن له‌واز و نه‌یینی و لیبرال رییا فاشیزما ئاكه‌پێ و جه‌هه‌پێ چێكریه، دڤێ جوانێن كوردان ئێدی توندوتیژیێ ئه‌ساس بگرن».
كریزا نه‌بوونا شه‌رڤانان و هه‌ولێن خاپاندنا جوانێن كوردان
رێخستنا په‌كه‌كێ ژ نیسانا ئیسال 2024ێ ڤه، ب سه‌دان كه‌چ و جوانێن كوردان ئاڤێتن به‌ر له‌شكه‌رێ هۆڤێ ترك و دان كوشتن، وه‌نداهیێن رێخستنێ ئه‌وقاسن كو د رۆژا مه یا ئیرۆ ده د كریزا نه‌بوونا شه‌رڤان ده روو ب روو مایه، لۆما ژی ره‌ڤاندنا زارۆكان ل رۆژئاڤا كوردستانێ زه‌حف چێبوویه. رێڤه‌به‌رێن په‌كه‌كێ یێن وه‌كه كارایلان، باییك و كالكان ژی ژ بۆی ڤه‌شارتنا ڤێ بنكه‌تنێ و ته‌وانا ب هه‌ده‌ر دانا خوینا ب سه‌دان ڤان جوانێن بێ گونه‌هـ د مه‌دیایێ دە ده‌ردكه‌ڤن و بانگ ل جوانێن كوردان دکن ببن کەسێن رادیکال و جاهل.
كالكان د نرخاندنێن خوه ده ووسا قالا رێخستنێ دكه هه‌ر وه‌كه كو ئه‌و سه‌ركه‌تنه و ئارتێشا ترك و ئۆپه‌راسیۆن په‌نجه تام تێكبریه، ئه‌و تم ب سلۆگان و دورووشمه‌یێن ده‌ره‌و دخوازه جوانێن كوردان بخاپینه و ووسا وان كێشی چیا و ناڤا رێخستنا خوه بكه.
كالكان ته‌ڤی ده‌ستنیشان كرنا رییا توندیێ وه‌كه نه‌خشه‌رێ، بانگی جوانێن كورد ل باكورێ وه‌لات دكه كو ده‌ڤ ژ خوه‌ندنێ به‌ردن و ژ وان ره دبێژه: «هوون ل دبستان و زانینگه‌هێن تركان ل چ دگه‌رن، هوون ل به‌ندێ نه ل ور چ ببینن، قه‌ی ما هوونێ بكارن وێ ببینن یا كو رێبه‌ر ئاپۆ نكاری ببینه».
ئه‌و قاس هه‌رن دبستانێ كو هوون بكارن بخوینن بنڤیسینن
كالكان ب ڤێ گۆتنا خوه ژ جوانێن كوردان ره دبێژه: ده‌ڤ ژ خوه‌ندنێ به‌ردن و كه‌رم بكن به‌رێ خوه بدن چیا و ته‌ڤلی رێخستنێ ببن، ژ بۆ كو هه‌وه یێك ب یێك وه‌كه به‌رخكان باڤێژن به‌ر ده‌ڤێ گورێ هار. كه‌ره‌م بكن ته‌ڤلی ببن ژ بۆ كو به‌رێ وه یێك ب یێك بدن مرنێ و د تۆنه‌له‌ێن به‌رخوه‌دانا ساخته و شه‌رێ بێ ئه‌نجام ده ب فه‌تسینن!
رێڤه‌به‌رێ په‌كه‌كێ دووران كالكان د به‌شه‌كا دن یا ئاخافتنا خوه ده هه‌ول دده جوانێن كوردان ب ناڤێ كوردستانا شێرین، به‌رخوه‌دان و تێكبرنا فاشیزمێ بخاپینه و ب زمانێ تركی ژ وان ره دبێژه: ته‌نێ ب رییا رێخستنا وه ل سه‌ر ئه‌ساسێ توندیێ هوونێ بكارن سه‌ربخوه بن و وه‌كه كورد بژین، ئه‌وقاس هه‌رن دبستانێ كو هوون بزانن بخوینن بنڤیسینن، د ڤێ قووناغێ ده پێویستیا مه ب ترساندن، ژناڤبرن و ته‌رۆركرنا دژمن هه‌یه.
جوانێن كوردان ل په‌ی پارتی و رێبه‌رێن خائین ناكه‌ڤن
رێخستنا په‌كه‌كێ و كالكان هه‌ول دده ب ئاوایه‌كی سیسته‌ماتیك جوانێن كوردان جاهل و نه‌زان بن، به‌رێ وان بكه‌ڤه ته‌وانێ، توندیێ و رادیكال بن، ب هه‌مان ئاوایێ ده‌وله‌تێن داگیركه‌ر ژ بۆ كو بكاربن وان ژ بۆی به‌رژه‌وه‌ندیێن خوه بكاربینن، ژبه‌ركو هه‌گه‌ر جوان خوه‌نده و رۆشه‌نبیر بن و چاند و دیرۆكا خوه باش بزانبن، ل په‌ی پارتیه‌كه خائین و رێبه‌رێ وێ یێ كو ب ده‌هان جاران گۆتی ئه‌ز ژ بۆی خزمه‌تكرنا ده‌وله‌تا ترك ئاماده‌مه، ناكه‌ڤن.
ب کورتاسی، داخوازا پەکەکێ هەمان داخوازا دەولەتێن داگیرکەرە ژ بۆی دوورخستنا جوانێن کورد ژ خوەندن و زانینێ، گەر نا د سەردەمەکە وەک نها دە یا کو ب خوەندن و زانینێ تێ کرن ب هەزاران جاهلێن وەکە کالکان نایێ کرن، ژ خوە یەک ژ سەدەمێن بندەستیا کوردان ئەڤە کو جاهل و رادیکالێن مینا کالکان ب ناڤێ کوردان تەڤ دگەرن.
