بووبێ ئەسەر
د ھندەک وەلاتێن ئازادکری دە، جارنا ھندەک کێشە ئانکو پرۆبلەم دەردکەڤن کو دەستھلات نکارە وێ چارەسەر بکە. لۆما ژ بۆنا چارەسەریێ ژی ئەو دەنگێ گەلێ خوە وەردگرن، کا ئەو چ دبێژن و چ دخوازن. ب ڤێ دەنگدانێ ئانکو ب رێیا رەفەراندوومێ پرۆبلەما ناڤ خوە دە چارەسەر دکن. ژ بەر ڤێیە کو رەفەراندووم رێیا چارەسەریا ھەری مەعقوول و دەمۆکراتیکە.
بارزانیان زێدەتری سەد سالانە کو ل ھەمبەر داگیرکەریا ھەر چار داگیرکەرێن کوردستانێ سەرێ خوە نەتەواندنە و ل ھەمبەر زلما وان بێ دەنگ نەمانە. ب تەکۆشین و بەرخوەدانا خوە ل گۆر رێبازا پیرۆز وان د سالا 1991 دە کوردستان ئازاد کر.
لێ وەکە تێ زانین کو ئاڤەدانیا وەلاتەکی ژ دەما شەرێ چەکداری زەحمەترە. بارزانی د ڤێ زانەبوونێ دە بوون. لۆما وان گاڤ ب گاڤ وەلاتێ خوە یێ ئازادکری ل گۆر خالێن رێبازا پیرۆز، ئاڤەدان کر و ھێژ ژی دکن. دام و دەزگەھێن خوە دامەزراندن دا کو رۆژەکێ کوردستان ببە دەوەلەتەکا سەربخوە یا کوردستانیان.
کار و خەباتێن بارزانیان، رابوون و روونشتنێن وان ھەموو ژ بۆنا کوردستانەکا سەربخوە بوویە. لێ وەکە تێ زانین کو د شەرت و مەرجێن ئیرۆ دە دامەزراندنا دەولەتەکا سەربخوە وەکە کوردستانا کو بوویە چار پەرچە، گەلەکی زەحمەتە.
بارزانی و ب تایبەتی سەرۆک مەسعوود بارزانی د ڤێ زانەبوونێ دە بوون کو دڤێت ئێدی گاڤێن بەر ب سەرخوەبوونێ هاتبانە ئاڤێتن. پێنگاڤا ڤێ یا ئەول ژی ئەنجامدانا رەفەراندوومەکێ بوو. داخواز ژ ڤێ ئەو بوو کو سەرۆک مەسعوود بارزانی فێر ببە، گەلۆ گەلێ وی چ دخوازە دا کو ل گۆر وێ گاڤێن خوە باڤێژە. کار و خەباتێن خوە ل گۆر وێ نووژەن بکە.
ب بریارا رەفەراندووما کو سەرۆک بارزانی دابوو، دژمنێ مە ل گەل نۆکەرێن خوەیێن کورد ژ نوودە ھار کر بوو. ژ بەر ڤێ بوو کو داگیرکەران ھەمی پرۆبلەمێن ناڤا خوە راکرن و ل دژ رەفەراندوومێ راوەستیان کو ئەو نەبە ئانکو نەیێ ئەنجامدان. لھەڤکرنا وان ل سەر ئاساسێ کو رەفاراندووما 25 ئیلۆنا 2017 پێک نەیێ. لێ ب سەرنەکەتن.
د بریاردانا رەفەراندوومێ دە ھات زانین و ئەشکەرە بوو کو ھندەک کورد و پارتیێن وان ژ داگیرکەران پێتر ل دژی رەفەراندووما ژ بۆنا کوردستانەکەاسەربخوە، راوەستیابوون. ژ بەر کو پشتی رەفەراندوومێ و راگھاندنا دەولەتەکا سەربخوە، جھێ وان د کوردستانێ دە نەدما.
خویایە پشتی دامەزراندنا کوردستانەکا سەربخوە ئێدی سیخور و جاشێن مەیێن کورد نەدکارین ل گۆر داخوازێن دژمن، ھەسپێن خوە ل سەر ئەردا ئازاد، بدن چارگاڤێ. ژ بەر ڤێ بوو کو ئەو ل دژی رەفەراندوومێ بوون…
دڤێت کوردێن دلسۆز ڤێ ببینن و ب ھەمی ھێز و قاواتا خوە ژ بۆنا رەفەراندووما گەلێ کورد، بکەڤە ژیانێ، ل گەل بارزانیان کار و خەباتێ بکن. ئەو ژی ب یەکرێزیا پارتیێن باشوورێ کوردستانێ، ل سەر ئەساسێ خەتا نەتەوەیی، دبە. ل ھەڤکرنا وان و ب یەک جێشا لەشکەری یا کوردستانێ، داخوازا سەرۆک بارزانی دێ پێک هێت. ھەتا کو ئەڤە چارەسەر نەبن یان نەکن، زەحمەتە کو سەرخوەبوون ئانکو بریارا رەفەراندوومێ بکەڤە ژیانێ و کورد ببن خوەدی کوردستانەکا سەربخوە.
بارزانیێن کو د ڤێ زانەبوونێ دە نە و ل گۆر رێبازا پیرۆز تەڤدگەرن، نھا ھەمی خەباتێن خوە کرنە ژ بۆنا یەکرێزیا پارتیێن باشوورێ کوردستانێ. ژ بەر کو خالەک ژ خالێن رێبازا پیرۆز ئەوە کو دڤێت کورد ل ھەڤ بکن. دڤێت د ناڤا وان دە یەک رێزی و پێکڤەژیان ھەبە. دڤێت کورد نە دژمنێ ھەڤ بن.
لێ ھندەک خێرنەخواز و ھندەک ژ پارتیێن کوردان کو ب دەستێ دژمنان ھاتنە دامەزراندن، ژ بۆنا کوردان بخاپینن تم دبێژن و گۆتبوون: “رەفەراندووم رێیا کوردستانا بارزانیان ڤەدکە. لۆما ئەم پشتگریێ نادن رەفەراندوومێ و ژ مە بهێت ئەم ناخوازن ئەو بهێتە ئەنجامدان ژی.”
لێ بارزانیان ب ھەلوەست، قەرار و ل گۆر رێبازا پیرۆز ژ بۆنا کو رەفەراندوومەکا وەھا پێک بێ، خەبات کربوون و ئەو پێک ئانین. پشتی پێکانینا وێ ژی، ھاتە فێم کرن کو کورد دەولەتا خوە یا سەربخوە دخوازن.
ھەگەر ملەتەک بێ دەولەت بە، ھەگەر دەولەتا خەلکەکێ تونەبە، ئەو ملەت، ئەو خەلک دێ تم سێوی بن. ژ بەر کو دەولەت بابە. کەسێن سێوی ژی ھەر دەم زلم لێ تێ. ژ بەر کو کەسێن سێوی بێ ھێزن، بێ قاوەت و بێ پشتگرن. ئاھا ھەمی خەباتا بارزانیانیان ل گۆر رێبازا پیرۆز ئەوە کو کوردان ژ ڤێ سێویتیێ رزگار بکە.
ما نە ئەڤە ب سەدان سالن کورد ژ بەر سێویبوونا خوە، ھاتیە و دهێتە قەتلکرن، ھاتیە و دهێتە ئەنفالکرن، ب بۆمبەیێن ژەھرێ تێنە کوشتن. ما نە ژ بەر ڤێ بێ دەولەتبوونێیە کو وەلاتێ مە کوردستانا شرین ھەر تێ وێرانکرن. ئاھا خەباتا بارزانیان ئەوە کو کوردان ژ ڤان وێرانیان خەلاس بکە، کار و خەبات کرنە و دکن.
دڤێت کورد ئێدی ژ ڤێ رەوشا نازک کو ئەم بەر ب سەرخوەبوونێ ڤە دچین، ھایدار بن. ب ئاقلمەندی تەڤبگەرن. ب چاڤێن خوە ببینن، ب گوھێن خوە ببھیزن و ل گۆر مەژیێ کوردەواری ژی تەڤ بگەرن کو دێ رێبازا پیرۆز، وان گەهینیتە مافێ وان یێ رەوا کو ئەو ژی کوردستانەکا سەربخوەیە…
مە ھەمیان دیت کو پشتی رەفەراندوومێ دژمن و پێگرتێن خوە، چاوا ب ھەڤرە و ل سەر ئەساسێ تونەکرنا کوردان و بارزانیان تەڤگەریان و دگەرن. مە بھیست کو چاوا گەف ل کوردان و ب تایبەتی ل سەرۆک بارزانی دکرن. لێ سەرۆک بارزانی ل گەل ھەمی گەفێن دژمن و پێگرتێن وان یێن کورد، رەفەراندووما سەرخوەبوونا کوردستانێ ئەنجامدا و کلیلکا دەریێ کوردستانەکا سەربخوە کرە بەریکا خوە دە. دەما وەختێ وێ ھات، دێ سەرۆک بارزانی، وی دەرگەهی ژ بۆنا کوردان ڤەکە.
ھەگەر کورد د رۆژا 25 ئیلۆنا 2017 دە نەبووبانە یەک، ب ئاوایەکی جەماوەری پشتگریا ھەبوونا خوە نەکربوونا، دا تونە بن. تونەبوونا باشوورێ کوردستانێ و بارزانیان ژی تێ واتەیا ئێدی کورد ژی دێ وەکە کورد نەمینن. ژ خوە داخوازا داگیرکەران و کرێگرتیێن وان ژی ئەڤە.
یەکەم جار بوو کو ب سەرپەرەشتیا سەرۆک بارزانی و ل گۆر خالا رێبازا پیرۆز، رەفەراندووما سەرخوەبوونا کوردستانێ هاتیە ئەنجامدان. دڤێت ئەڤ رۆژە ببە جەژنا کوردان یا ھەری مەزن. پێدڤیە کو د ڤێ رۆژێ دە ھەمی کوردێن جیھانێ ب گشتی وێ رۆژێ پیرۆز بکن. چاوا کو دەرکەتاندنا رۆژێ ژ شەفەقێ دیار دبە، سەرخوەبوونا کوردستانێ ژی ب رێیا ڤێ رەفەراندوومێ دێ پێک بێ. ژ بەر کو کوردستانەکا سەربخوە خالا ھەری گرینگ و پێویست یا رێبازێ یە.
