سمکۆ عەبدولعەزیزی
ئیرۆ من خوەست بزانبم ب مناسبەتا سالڤەگەرا 40ەمین یا 15ێ تەباخێ دێ پەکەکێ چ پەیام هەبە، لۆما من ل چاپەمەنیا پەکەکێ نێری، تشتا بالا من کشاندی داخویانیا دۆن کیشۆتێ پەکەکێ ئانکو موراد قارایلان بوو، ب راستی ژی ئەز ووسا دفکریم کو دێ ڤێ جارێ وەرە و ب وێرەکی ب سەدەما شکەستنێن پارتیا خوە و رادەستکرنا زێدەتر یا خاکا کوردستانێ ب دەستێ دەولەتا ترک داخوازا لێبۆرینێ ژ گەلێ کورد بکە.
د ڤان 40 سالێن پەکەکێ دەست ب خەباتا چەکداری کری دە، نە ب تەنێ نەکاریە باکورێ وەلات رزگار بکە، بەلکو باکور ل پشت خوە هشتیە و ب کووراهیا چل کیلۆمەتران ژ خاکا باشوورێ کوردستانێ ژی رادەستی دەولەتا داگیرکەرا ترک کریە. تەڤ خەباتا ڤێ پارتیێ بوویە کۆلاندنا هندەک تونەلان ل چیایێن کوردستانێ و خستنە ناڤا چەند جوانان د ڤان تونەلان دە ژ بۆی کو ب دەستێ لەشکەرێن ترک وەرن کوشتن و ئەوژی د چاپەمەنیێ دە بازارەکی سیاسی پێ بکن، ژ بەر کو پەکەکە ل سەر خوینا جوانێن کورد ژیان دکە، دەما خوینا جوانێن کورد نەیێ رشتن، پەکەکە ژی نامینە.
شکەستنێن یەک ل پەی یەک یێن چەکدارێن پەکەکێ موراد قارایلانێ دۆن کیشۆت ژی خستیە رەوشەکی کو وەکە کەسەک نەسیاسی و ل سەر جادەیان مەزن بوویی بئاخڤە و ئاخافتنێن نەلاییق بکە، ب ئاوایەکی کو قارایلان پارتیەکە سیاسی یا کورد “ئەنەکەسە” ب پارتیەکە بێ نامووس ب ناڤ کر، چما ووسا بناڤ کر؟ ژ بەر کو ب گۆتنا قارایلان هن جاران ئەڤ پارتی ب دەولەتا ترک رە جڤیایە! ل ڤڕ چەندین پرسێن بنگەهین سەر هل ددن، پرس ئەڤن:
گەلۆ چما ئەنەکەسە بێ نامووسە؟ گەر ژ بەر ڤێ یەکێ بە کو ب ترکیەیێ رە جڤیایە ئەرێ چما هوون ل شەنگالێ بوونە بەشەک ژ حەشدا سەعبی و مووچە و ئاموورێن لەشکەری ژ ئیراقێ دستینن، چما هوون بوونە رێگر ل هەمبەر ڤەگەرا دەستهلاتا حکوومەتا هەرێما کوردستانێ بۆ ڤی باژارێ کوردستانێ؟ گەلۆ ب راستی ژی چما هوون رێ نادن ئالا رەنگین، ئالا کوردستانێ ل شەنگالێ بێ دالقاندن؟ لێ ئالا ئیراقێ و ملیسێن حەشدا شەعبی ل هەر کۆچە و کۆلانەکا شەنگالێ بلندە؟ چما زێدەتر ژ 250 هەزار ژ شێنیێن شەنگالێ کۆچبەر بوونە و د کۆنان دە ژیان دکن و ژ ترسا زۆلم و ستەما وە نکارن ڤەگەرن وارێ خوە؟ چما هوون بەردەوام ل بەغدایێ ب ئالیێن شیعە یێن ئیراقی رە دجڤن و ل دژی حکوومەتا هەرێما کوردستانێ پلانان چێدکن؟ چما زێدەتری 500 گوندێن باشوور ب سەدەما شەرێ وە یێ سەختە هاتنە چۆلکرن؟ چما ب سەدەما دەستهلاتا وە یا ل رۆژئاڤا نها زێدەتری 500 هەزار کورد کۆچبەری باشوور بوونە؟ چما ژ بایک رە حەلالە نها ل ئیرانێ د ئۆتێلەکە 5 ستێر دە ژیان بکە؟ چما هوون بوونە پاسەوانێن سینۆرێ ئیرانێ و رێ نادن پارتیێن رۆژهلات بچن ور و چالاکیان لدار بخن؟ چما هوون پێشمەرگەیێن رۆژهلاتێ کوردستانێ رادەستی دەولەتا داگیرکەرا ئیرانێ دکن هەیا کو وەرن دارڤەکرن؟ چما هوون حکوومەتا هەرێما کوردستانێ ناس ناکن؟ چما عەرەب و سریانی ل رۆژئاڤایا د بن دەستهلاتا وە دە دکارن ببن چەکدار، لێ هوون رێ نادن پێشمەرگەیێن رۆژ ڤەگەرن رۆژئاڤا و رۆژئاڤا بپارێزن؟
گەلۆ ب راستی ژی چما دەما سالەکی سالح مووسلم وەک نوونەرێ وە ل ئەنقەرەیێ ژیان دکر، ب دەولەتا ترک رە د جڤیا لێ وە جارەکێ ژی ژێ رە نەگۆ بێ نامووس؟ چما هوون نابێژ نوونەرێن خوە یێن د پارلەمانتۆیا ترکیەیێ دە، بێ نامووس؟
چما پرانیا شارەدارییێن باکورێ کوردستانێ د دەستێ وە دە نە و شارەدارێن وە د بن ئالا ترکیەیێ و وێنەیێ ئاتاتورک دە دخەبتن و نابن بێ نامووس؟ چما ئیستیخباراتا ترکیەیێ تێ قەندیلێ و ب وە رە دجڤە، د جڤینێ دە ژی تام ب زمانێ ترکی دپەیڤن و هوون نابن بێ نامووس؟ چما هوون ژ هەر پارتیەکە سیاسی کو وەکە وە نەفکرە رە دبێژن خائین و بێ نامووس؟
رەغمی ڤێ یەکێ، ل داویا داخویانیا خوە دە تو بانگا یەکیتیا نەتەوی دکی، گەلۆ دێ چەوا ب پارتیەکێ رە کو هوون ب بێ نامووس ب ناڤ دکن رە یەکیتیا نەتەوی ساز بکن؟ هوون ژ ئالیەکێ ڤە ژ کەس و پارتیێن نە وەک وە دفکرن رە دبێژن خایین و بێ نامووس، ژ ئالیەک دن ڤە بانگا یەکیتیا نەتەوی ژ وان دکن؟ گەلۆ چەوا هوون دکارن ب بێ نامووس و خائینان رە یەکیتیا نەتەوی پێک بینن؟
