بووبێ ئەسەر
د ژیانا نەتەوەیان دە رۆژێن دیرۆکی و گرینگ ھەنە کو ملەت ب وان دژین و ب سایا سەرێ وان خوە ئازاد کرنە یان ژی دەمۆکراسیا ناڤا خوە خورتر کرنە.
د دیرۆکا گەلێ مە دە گەلەک رۆژێن وەھا ھەنە. د ھەر رۆژەکا کوردان دە سەرپێھاتی، کریار و بوویەرەک ھەیە. ھەگەر ئەم وەکە ملەت رۆژێن خوەیێن ب ئێش، دەرد و کول ب بیر بینن، دێ تەڤاھیا وەختێ مە بگرە.
لێ رۆژ ھەنە کو قەدەرا ملەتەکی، ئازادیا گەلەکی تینە. لۆما ژی رۆژێن وەھا دڤێت نەیێن ژ بیر کرن و ب تایبەتی دڤێت ب پیرۆزباھیێن مەزن و گران بێنە ب بیرئانین.
ژ بۆنا مە کوردان ژی رۆژا 16 تەباخێ گرینگە. دڤێت ئەم ڤێ گرینگیێ د ناڤا کوردان دە گەش بکن، بەلاڤ بکن دا کو کورد ژی ڤێ رۆژێ ب سەربلندی پیرۆز بکن.
پیرۆزکرنا ڤێ رۆژێ و ب بیرئانینا وێ، روحیەتەکا نوویا نەتەوەیی ددە کوردان دا کو ئەو ژی خوەدی ل وێ دەرکەڤە. ئەڤ رۆژا گرینگ ژ بۆنا مە کوردان رۆژا 16 تەباخێیە. د ڤێ رۆژێ دە بارزانیێن شەرێ ئازادیا کوردستانێ ددان، گھشتبوون وێ باوەریێ کو دڤێت ئێدی کورد ب رێخستنی ببن. ژ بۆنا ب رێخستکرنا وان ژی دڤێت ببن خوەدی پارتیەکێ کو بکاربە پرانیا کوردان ھەمبێز بکە.
ب ھەمبێزکرنا پرانیا کوردان شەر، پەڤچوون و سەرھلدانا کوردان ب قاوەت و ب ھێزتر دبە. ژ بەر کو بارزانیان دزانیبوون کو ل ھەمبەر شەرێ داگیرکەران دڤێت کورد ب ھێز و خوەدی قاوەت بن.
رێیا ڤێ و چارەسەریا وێ تەنھا د بن سیوانەکێ دە و ب یەکگرتنا کوردان دیتن. ژ بۆنا پێکانینا ڤێ ژی ب دامەزراندنا پارتیا دەمۆکراتا کوردستانێ پێک ئانین و مزگینی دانە گەلێ خوە کو ئێدی دێ ب سەرپەرەشتیا پەدەکێ شەر و تەکۆشین ھەتا ئازادی و سەرخەبوونێ بەردەوام بە.
لێ جھێ شانەزی و کێفخوەشیێ یە کو د عەینی رۆژێ دە کەسایەتیەکی کو دێ رۆژەکێ ببە سەرۆکێ ڤێ پارتیێ و رێبەرێ گەلێ کورد ژی ھاتە سەر دنێ. ئەو ژی سەرۆک مەسعوود بارزانی بوو. دبە کو جارا یەکێ بوو کورد بوونە خوەدی شانسەک وەھا کو ھم بوونە خوەدی پارتیەکا نەتەوەیی ھم ژی بۆنە خوەدی سەرۆکەکی کو ل گۆر پەروەردەیا رێبازێ ھاتیە سەر دنێ. ئەو ژی سەرۆک مەسعوود بارزانی بوو.
ئیرۆ 78 (16/8/1946—16/8/2024) سالیا دامەزراندنا پارتیا دەمۆکراتا کودستانێ و رۆژا ژ دایکبوونا سەرۆک بارزانییە. ب دامەزراندنا پارتیێ گاڤا ئەول یا ژ بۆنا کوردستانەک ئازاد و سەربخوە ھاتە ئاڤێتن و ئەساسێ دەولەتا کوردی ھاتە دانین. ئیرۆ بەرھەمێن وێ ل باشوورێ کوردستانێ یە.
ئەز 78 سالیا پارتیا دەمۆکراتا کوردستانی و رۆژا ژ دایکبوونا سەرۆک مەسعوود بارزانی پیرۆز دکم و دبێژم باش بوو کو تو ھەیی و تو هەر ھەبی سەرۆک بارزانی. ھەبوون و ل ژیانێبوونا تە ژ بۆنا مە کوردان شانسەکە.
جەنابێ تە ھیمەکی رێبازا پیرۆز، پێشمێرگەیەکی قەھرەمان و رێبەرەکی گەلێ خوەیە. ب ھەولدان و بەرخوەدانێن خوە، ب نەرین و دیتنێن خوە، جەنابێ وە ئەم کورد کرن خوەدی کوردستانەکە ئازاد. لێ یا گرینگ ئەوە کو جوانێن بارزانیان ب تایبەتی و گەلێ کورد ب گشتی، دڤێت خوەدی ل وان نەرین و دیتنێن وە دەرکەڤن. وان د ناڤا گەل دە بەلاڤ بکن. ژ بەر کو ئەو نەرین و دیتنێن وە پەرچاک ژ رێبازا پیرۆزە. رێباز ژی ب دەستوور و بەرنامەیێن خوە، کوردان بکە خوەدی وەلاتەکی سەربخوە، ھاتیە پێکانین.
ھەتا کو کورد خالێن د رێبازا پیرۆز دە ھاتنە دەستنیشانکرن باش فێر نەبن. ھەتا کو کورد قیمەت و روومەتا وە وەکە سەرۆکەکی نەتەوەیی نەگرن، خوەدی ل وان نەرینێن وە یێن ھێژا و نەتەوەیی دەرنەکەڤن، زەحمەتە کو ببن خوەدی کوردستانەکا سەربخوە.
ب ھێڤیا کو جەنابێ وە، رۆژەکێ مزگنیا کوردستانەکا سەربخوە ژی بدە مە کوردان. ژ جەنابێ وە رە ئەی سەرۆک بارازانی تەمەنەکی درێژ سحەتەکا باش دخوازم. سەرۆکەکی نەتەوەیی و حەزکرنا پرانیا گەلێ خوە گرتبە ئێدی ئەو نەمرە.
