بوبێ ئەسەر
ھەر نەتەوەیەک ب نەتەوەبوونا خوە ھەیە، ھەر ملەتەکە ل گۆر عادەت، تۆرە، دەستوور و رێبازا خوە ھەیە. ھەر نەتەوەیەک ل گۆر ئیمکان و ھەبوونێن خوە دژیت. ھەر نەتەوەیەک، ب سەرۆک و رێڤەبرن خوە وەلاتێ خوە ب رێڤە دبن. لۆما ژی دەولەت چێ دبن و ملەت ل گۆر دەولەتا خوە کارێ خوە دکە. کەسایەتیەکی ژ خوە رە دکن سەرۆک و ژێ حەز دکن. خوە ددن دۆر وی/ێ. ل دژی ستەم و نەحەقیێن دەرحەق وی/ێ تێنە کرن دەردکەڤن.
ژ رۆژا وەلاتێ مە پەرچە کرنە و ھەتا نھا ئەم وەکە کوردێن ھەر چار پەرچان لگەل سەرۆکەکی نەتەوەیی نەژیانە. دەما خەلکەک لگەل سەرۆکەکی نەتەوەیی نە ژیت، وی خەلکی، وی گەلی تم دێ کێماسی ھەبن و نەزانی دێ بتە بەلا سەرێ وان. ژ خوە یا دژمن ژی دخوازی ئەڤە. تم ژی ھەدەف و ئارمانجا وان ئەو بوویە کو کەسایەتیێن دکارن سەرۆکاتیا گەلێ خوە بکن، یا گرتنە ئاڤێتنە زیندانێن خوە یا کوتشتنە و ھندەک ژی تەسلیم گرتنە دا کو کورد تم بێ سەرۆکەکی نەتەوەیی بژین.
لەورا ژی دژمنێن مە ئانکو داگیرکەرێن مە، تم خوەستنە و ھەول دانە کو ئەم نەبن خوەدی سەرۆک یان شەخسیەتەکی نەتەوەیی دا کو تم بندەست بن. کەد و خەباتێن مە، جھد و ھێژاییێن مە، تم ببە پارا داگیرکەران. لەورا نھا داگیرکەر و پێگرتێن وان ب ھەمی ھێزا خوە ل دژ سەرۆک بارزانی نە کو وی بێ ئەرک بھێلن.
ژ بۆنا ئەم وەکە کورد ژ ڤێ بێ پار نەمینن. دڤێت ئەم خوە فێری ھەبوونا سەرۆکەکی کو ھەمی کوردان ھەمبێز بکە و ل سەر رێبازا پیرۆز ئەرکێ خوە بینە جھ، ببن. د شەرت و مەرجێن ئیرۆ دە ئەو ژی تەنھا سەرۆک مەسعوود بارزانییە. ژ بۆنا کو سەرۆک بارزانی ب ھێز و قاوەت بە، پێویستە کو پرانیا کوردان ژ وی رە ببن پشتگر، دا کو ئەو ژی کار و خەباتێ ژ بۆنا گەلێ خوە بکە.
ھەتا کو ملەتەک نەبە نەتەوەپەرەست و ل گۆر ھێژایی و دەلالیێن گەلێ خوە نەژی. دێ د ناڤا وی خەلکی و گەلی دە، ھنەک پەیدە ببن کو ژ بۆنا بەرژەوەندیا خوە، دکارن وەلاتێ خوە، پر ب رەحەتی بفرۆشن. د دیرۆکا مە کوردان دە ئەڤ پر ب زەلالی ھاتیە دیتن و ئەنجامدان.
چما ڤێ دبێژم؟
ژ بەر کو ئەم وەکە کورد د ڤێ دەما کامباخ دە ژ ھەبوونا سەرۆکەکی نەتەوەیی نە بێ پارن. لێ ھێ ژی ئەم وەکە ملەت ب تەمامی نەبوونە خوەدی فکرا نەتەوەیی، لۆما پرانیا کوردان نکارن نەتەوەیی بفکرن. دەما خەلکەک، ملەتەک نەبە نەتەوەپەرەست، د ناڤا وی خەلکی و گەلی دە پر ب رەحەتی ھنەک دکارن ژ بۆنا خوە، ژ بۆنا بەرژەوەندیێن خوەیێن شەخسی، ھەر تشتێ خەراب بینن سەرێ گەلێ خوە.
چ دەما ئەم ل دیرۆکا خوە، ل دیرۆکا کورد و کوردستانێ دنێرن، پر ب زەلالی دبینن کو ھنەک کوردان ژ بۆنا بەرژەوەندیێن خوەیێن شەخسی وەلاتێ خوە، برایێ خوە، سەرۆکێ خوە، ھەڤال و ھەڤالبەندێن خوە فرۆتنە. چما؟ ژ بەر کو نەبوو بوون نەتەوەپرەست.
ژ بۆنا ئەم خوە ژ ڤێ خلاس بکن، ژ بۆنا ئەم ڤێ خوەفرۆشیا خەراب ژ ناڤا خوە و گەلێ خوە راکن، دڤێت ئەم ژی وەکە نەتەوەیێن جیھانێ ببن خوەدی سەرۆکەکی نەتەوەیی یێ ب ھێز و قاوەت دا کو ئەو بکاربە گەلێ خوە ھەمبێز بکە. د قادا ناڤنەتەوەیی دە مافێ گەلێ خوە بپارێزە.
چ دەما ئەم کەسایەتیەکی/ە وەھا ژ ناڤ خوە دەرخن کو ل گۆر من ھەیە. ئەو ژی ئەوە کو ب کەسایەتیا خوە ل باکورێ کوردستانێ سێ شۆرەش پێک ئانی بوو. ئەو کەس بوو کو ژ بۆنا کۆبانێ نەکەڤە، پێشمەرگەیێن قەھرەمان بۆ ئالیکاریا برایێن خوە شاند بوون. ئەو کەس بوو کو ل گۆر ھێز و تاقاتا خوە، ل گۆر ئیمکان و ھەبوونێن خوە ب ئالیکارییا برایێن خوەیێن رۆژھلاتا کوردستانێ ڤە رابوو بوو و رادبە، ئاھا ئەو ژی رێزدار مەسعوود بارزانییە.
جەنابێ وی ھم بناغەیەکێ رێبازا پیرۆز و ھم ژی کەسایەتیەکی قەدربلندێ ناڤنەتەوەیی یە. چ دەما ئەم وەکە کورد ب گشتی خوە ل دۆر وی بجڤینن، ئەم دێ ب ڤێ یەکێ ھەم حیس و باوریێن نەتەوەیێ د ناڤا خوە دە ب ئەساسەکی ساخلەم دانن، ھم ژی ئەم دێ ئێدی وەکە ملەت ژ ھەڤ حەز بکن. خوەفرۆش و خاینێن ناڤا خوە ئەشکەرە بکن. ل وان وەھا بکن دا کو ئێدی ئەو ژی تشتێن خەراب ژ بۆنا گەل و برایێ خوە نەفکرن و نەکن.
کەسایەتیێن باش، مێرخاسێن دەلال و وێرەک د دیرۆکا گەلێ مە دە ھەبوون، لێ پرانیا وان یا سەرۆکێ عەشیرەتا خوە، یا ژی سەرۆکێ پارتی و رێخستنا خوە، یا ژی سەرۆکێ پارچا خوە ب تەنێ بوون. ھەلبەت پرانیا وان ژی نەتەوەیی فکریبوون، لێ شەرت و مەرجان ئەو وەکە سەرۆکێ پارچا خوە ھشتبوو.
تەنێ بارزانیێ مەزن و نەمر د ڤی واری دە گاڤێن ھێژا ئاڤێتبوو، ھێدی ھێدی گەلی وی، وەکە ملەتێ کورد، ب تەمامی نەبە ژی لێ ب پرانی ئەو ناس کربوون. رۆژ ب رۆژ حەزکرن و باوەریا وی د ناڤا گەلێ وی دە بەلاڤ دبوو. تام دەما وی بوو کو وەکە سەرۆکەکی نەتەوەیی کار بکە و دکر، نەخوەشیا پەنجەشیرێ (قانسەر) ئەو گرت و ئەو ژ ناڤا گەلێ وی بر.
ئەو بر لێ ئەو وەکە سەرۆکەکی نەتەوەیی د ناڤا گەلێ خوە دە ما. نەمر ب نەرین و دیتنێن خوە، ب دەستوور و بەرنامەیێن خوە و یا گرینگ ب رێبازا خوە، د دلێ پرانیا کوردان دە وەکە سەرۆکێ گەلێ کورد، جھێ خوە گرت. وی ژ بۆنا گەلێ خوە رێ و رێبازەکە نەتەوەیی دانیبوو، ئەو ھشت و چوو. لێ ب رێبازا خوە د ناڤا گەلێ خوە دە ھەر ما و دێ ھەر بمینە.
نھا ل گۆر رەوشا ئیرۆ د ناڤا مە کوردان دە سەرۆکەکی کو دکارە ب ڤێ رۆلێ رابە تەنھا رێزدار مەسعوود بارزانییە. ئەو ئەرکێ خوەیێ نەتەوەیی پێک تینە و ل گۆر وێ رێ و رێبازا بارزانیێ نەمر کارێ خوە دکە. لێ دڤێت ئەم کورد ژی ئەرکێ خوە پێک بینن دا کو وی وەکە سەرۆکێ خوەێ نەتەوەیی دەستنیشان و دیار بکن.
ھوون بالا خوە بدن داگیرکەران، ھەڤالبەندێن وان و ھەم خێرنەخوازێن گەلێ کورد، تم ژی ل ھەمبەر وی، ھەلوەستێن خوەیێن نەرازیبوونێ دانینە و داتینن. ژ بەر کو نایێ حەسابێ دژمن و داگیرکەران کو سەرۆکەکی نەتەوەیی یێ ب ھێز و قاوات یێ کوردان ھەبە.
ژ بەر کو داگیرکەر و ھەڤالبەندێن خوە باش دزانن کو چ دەما کورد بێ سەرۆک بمینن، دکارن ھەر تشتەکی خوە ژی وەندا بکن. لێ دژمن فێم ناکن و ھێژ ژی فێم نەکرنە کو ئێدی وەھا نابە. ژ بەر کو کورد ژی ئێدی بوونە خوەدی رێ و رێبازەکێ.
پێویستە کو ملەتێ کورد ب ئاوایەکی گشتی خوەدی ل رێزدار مەسعوود بارزانی دەرکەڤن. ھەلوەست و نەرینێن وی د ناڤا خوە دە بەلاڤ بکن. ل ھەمبەر دژمن و ھەڤالبەندێن وان، د ھەر واری و د ھەر حالی دە وی وەکە سەرۆکێ گەلێ کورد یێ نەتەوەیی بدن دیارکرن. ھەبوونا جەنابی وی ب سەرێ خوە ترس و خۆفا داگیرکەر و پێگرتێن وان زێدە دکە. ھەبوونا وی داگیرکەر و پێگرتێن وان عاجز دکە. ھەبوونا وی ژ بۆنا کوردان ھێز و قاوەتە. نەرین و دیتنە. ژ بەر کو ئەو بناغەیەکێ رێبازا پیرۆزە.
دڤێت ئەم کورد د ڤی واری دە بێ ھەلوەست نەمینن. ب ھەلوەستێن خوەیێن نەتەوەیی ئەم خوەدی ل سەرۆک مەسعوود بارزانی دەرکەڤن. ژ بەر کو ی ب سایا رەفەراندوومێ کلیلکا سەرخوەبوونا کوردستانێ خستە دەستێ خوە و گەلێ خوە، داگیرکەرێن مە ژێ عاجزن. پێکانینا رەفەراندووما ژ بۆنا کوردستانا سەربخوە، دیرۆکەک بوو کو رێزدار مەسعوود بارزانی پێک ئانی بوو.
خوەدی ل سەرۆک بارزانی دەرکەتاندن، ئەرکەکی نەتەوەیی یە. ژ بەر کو فکرا جەنابێ وی کوردستانەکا سەربخوەیە. بەرفرەھکرنا رێبازێ و خوەدی لێ دەرکەتاندنە.
