بووبێ ئەسەر
ھەگەر ئەم جارەکێ ل دیرۆکا جیھانێ بنێرن. ئەم دێ ببینن کو د ناڤا ھەر وەلات و نەتەوەیەکی دە ھندەک شەخس و شەخسیەت دەرکەتنە کو وەلات ب ناڤێ وان تێ ناسین. سەدەم ژ ڤێ ژی ئەوە کو کەسێن بوونە سەمبۆلا گەلێ خوە، ب کەد و خەباتێن خوە، ب مەژی و بیرەوەریا خوە، وەلاتێ خوە، گەھاندنە ئازادیا وی یان ژی دەمۆکراسیا ناڤخوەیی خورتر کرنە.
ھەلبەت د وەلاتێ مەیێ بندەست دە ژی گەلەک قەھرەمان و مێرخاس ھەبوون و تەکۆشینەکا بێ ھەمپا ل ھەمبەر داگیرکەران دابوون، لێ ب سەر نەکەتبوون. د شەرێ ئازادیا وەلاتێ خوە دە وەندا کربوون. پشتی وەنداکرنێ ل دوو خوە رێ و رێبازەک، دەستوور و بەرنامەیەکە کو یێن ل دوو وان، دێ چاوا تەکۆشینێ بدۆمینن پێک نە ئانیبوون. یان ژی ئەو ئیمکان و زانەبوون پەیدا نە بوو بوو . ژ بەر ڤێ ژی یێن سەرانسەرێ کوردستانێ و پشتی دابەشکرنا وێ د ناڤا چار داگیرکەران دە، ل سەر لنگان مابوون و کورد گەهاندین ئازادیا وان بارزانی بوون. ژ بەر کو ئەو خوەدی رێبازەکێ بوون.
دەما ئەم ل دیرۆکا کوردستانێ ب تەڤایی دنێرن، دبینن کو گەلەک سەرھلدان و بەرخوەدان پێکھاتبوون. ب تایبەتی ل باکورێ کوردستانێ پشتی دامەزراندنا کۆمارا ترکیێ، گەلەک بەرخوەدان و سەرھلدانێن کوردان ل ھەمبەر وێ کۆمارێ پێک ھاتن. شەر و پەڤچوونێن بێ ھەمپا دان، لێ ھەمیان وەندا کرن.
تێکچوونا کوردان یا مەزن ل دێرسمێ د سالا 1938 دە پێک ھات. ملەتێ مە ھاتە قەتلکرن، کۆچبەرکرن. ل سەرانسەرێ باکورێ کوردستانێ کوردی ھاتە قەدەغەکرن. ل کوردان وەھا کربوون کو چ کەسان نەما دوێریبوون بگۆتنا: “ئەم کوردن”. ئاگرەکی وەھا ل کوردستانێ پێ خستبوون کو ھەتا زنار و چیایێن کوردستانێ ژی دھاتن شەوتاندن.
فەرمانا ژ بۆنا تونەکرنا کوردان دابوون کو کورد نەمینن و چ کەس ئێدی نەبێژن، “ئەم کوردن”. دەولەتا ترک ب ھەمی ھێز و قاوەتا خوە، ل سەر سەرێ کوردان ئاگر پێخستبوو کو کورد نەمینن و د ناڤا وی ئاگری دە ببن خوەلی.
ل باشوورێ کوردستانێ ژی ل ھەمبەر داگیرکەر و دەستھلاتا ئیراقێ بارزانیان ب ھەمی ھێز و قاوەتا خوە تەکۆشینا ئازادیێ دان، لێ مخابن ل ھەمبەر داگیرکەر و ھێزا ئینگیلیزان ب سەرنەکەتن. ژ بۆنا گەلێ کورد ل باشوورێ کوردستانێ ب تەمامی تونە نەبن. بارزانیان ژ مەجبووری بەرێ خوە دانە ئیرانێ ئانگۆ رۆژھلاتێ کوردستانێ.
دەما بارزانیان دیتن کو تەڤگەرا ئازادیا کوردستانێ ب سەرپەرەشتیا پەدەکی و ب سەرۆکاتیا قازی محەمەد دەستپێ دکە. بارزانیێ نەمر ڤێ دبینە و ژ بۆنا ئالیکاری و پشتگریا برایێ خوە بکە. ھەڤدیتنەکێ ل گەل قازی دکە و بارزانی ئێدی وەکە ھێزا بارزانیان تەڤلی شۆرەشا ئازادیا کو سەرۆکاتیا وێ قازی محەمەد دکر، بوون.
کۆمارا کوردستانێ ل مەھابادێ ھاتە راگھاندن و نەمر بارزانیێ مەزن ب پێلەیا جەنەرالتیێ ھاتە خەلاتکرن.
لێ مخابن ڤێ ھەبوونا کوردان ئانگۆ کۆمارا کوردستانێ تەنێ سالەکێ ل بەر خوە دا و ل سەر دەستێ دەولەتێن ناڤنەتەوەیی تێک چوو. پشتی تێکچوونا ل ور، ئێدی دەستھلاتا فارسان ژی وەکە ترکان دەست ب قەتلکرنا کوردان و دارڤەکرنا سەرۆک و رێبەرێن وان کر.
بارزانیێ مەزن رەوش باش فێم کر کو ھەگەر خوە رادەستێ داگیرکەران بکە دێ ئێدی کورد نەمینن. لۆما ئەو ل گەل 512 پێشمەرگەیێن خوە ژ بۆنا نیژادا کورد ب تەمامی نەقەدە، بەرێ خوە دانە سۆڤیەتێ. ل ڤر چ ھاتە سەرێ وان کێم زێدە تێ زانین.
پشتی تێکچوونا کۆمارا کورد و دارڤەکرنا سەرۆکێ وێ پێشەوا قازی محەمەد، نە تەنێ داگیرکەرێن ئیرانێ، ھەر چار داگیرکەران ب ھەڤرە باوەری ب وێ یەکێ ئانین کو ئێدی کورد نەمان و یێن مابن ژی دێ نەما بکاربن دەنگێ خوە دەرخن و سەری ھلدن.
لێ بارزانیێ مەزن ئەڤ ھەوەس و کێفا داگیرکەران، ب ڤەگەرا خوەیا ژ سۆڤیەتێ و دەستپێکرنا شۆرەشا ئیلۆنێ، د قرکا وان دە ھشت و داگیرکەر ژ نوو دە کەتن ناڤا ترس و خۆفەکێ.
بارزانیێ مەزن ب شۆرەشا ئیلۆنێ کورد ژ نوو دە زیندی کرن و ب شۆرەشا گولانێ ژی ئەساسێ دەولەتبوونێ دانی کو رۆژەکێ کورد ل گۆر وێ ب تەکۆشین و بەرخوەدانا خوە دەولەتا خوە دامەزرینن. وەکە ھەبوونا ئیرۆ ل باشوورێ کوردستانێ.
ھەگەر نەمر بارزانیێ مەزن ل گۆر وێ بیرەوەریا خوە و ل گەل چەند پێشمەرگەیێن خوەیێن جوان نەچووبانا سۆڤیەتێ و ڤەنەگەریابانا، ھوون باوەر بکن نھا دا کورد وەکە ملەت ل سەر روویێ ڤێ دنیایێ تونەبانا. یێن بمانا ژی دا بێدەنگبانا کو ھەتا ئەو ژی بھاتانا تونەکرن.
ژ بۆنا ڤێیە کو کورد بارزانیێ مەزن وەکە “بابێ نەتەوەیا کورد” ب ناڤ دکن. ئەڤ تەسپیتەکە راست و دوروستە. دڤێت ئەم کورد ب ڤێ کێفخوەش و سەربلند بن دا کو بابێ نەتەوەیا خوە بارزانی د ھەر قادێ دە ب بیر بینن و ئەو رێبازا ژ بۆنا ئازادی و سەرخوەبوونا کوردان ئامادە کر بوو ب کار بینن. ژ بەر کو ھەبوون، ئازادی و سەرخەبوونا کوردان د وێ رێبازا بارزانیێ مەزن دە دەستنیشانکرییە.
ژ بەر ڤێیە کورد دبێژن: نەمر بارزانی نە تەنێ سەرۆک و رێبەرێ گەلێ کورد بوو. ئەو ب دەستوور، بەرنامە و رێبازا خوە بوویە بابێ نەتەوەیا کورد.
