بووبێ ئەسەر

رۆل و ئەرکێن سەرۆک و رێبەران ب کار و خەباتێن وان، ب نەرین و دیتنێن وان، ب ھەلوەست، کریار و ب خزمەتێن وان، تێنە ناسین و قەبوولکرن.

سەرۆک ئەو کەسن کو رێیا ئازادیێ و سەرخوەبوونا گەلێ خوە دە، خوە ژ چ فەدەکاریان نادن پاش و تم د ناڤا گەل و رێھەڤالێن خوە دە سەرپەرەشتیا ھەموو رێ و رێبازێن ئازادیا وەلاتێ خوە دکن.

سەرۆک و سەرۆکاتی ئەوە کو د تەکۆشینا وەلاتێ خوە دە خوەدی رێ و رێبازەکێ بن کو ل سەر خەتا نەتەوەیی ئازادیا گەلێ خوە ب دەست بخن. ھەلبەت بدەستخستنا ڤێ ژی نە وەھا ھێسان و رەحەتە کو ھەرکەس بکاربە سەرۆکاتیا گەلێ خوە بکە.

ژ بەر کو سەرۆکاتی وێرەکی، رێیا راست، خوەدی ھەلوەستا نەتەوەیی و ھەموو ژیانا خوە ژ بۆنا ئازادیا گەلێ خوە بکاربە فەدا بکەیە. سەرۆکاتی د ناڤا گەلێ خوە دە و ل گەل وی ژیانە.

ژ بەر ڤێیە کو ئەم کورد خوەدی شانسەکێ نە کو سەرۆکەکی وەکە رێزدار مەسعوود بارزانی ھەیە و ئەو وەکە سەرۆکێ کوردان تێ ناسین. ھەلبەت جەنابی وی ب کەد و خەباتا خوە، ب بەرخوەدان و تەکۆشەریا خوە، ب زانەبوون و دووربینیا خوە و ل گۆر دەستوور و بەرنامەیا رێبازا پیرۆز، خوە ب گەلێ خوە دایە قەبوولکرن. جەنابی وی ب ڤان زانینێن خوە ھەتا کو ھەبە، وێ ژ بۆنا گەلێ خوە کار و خەباتێ بکە، کرییە و دکە.

دەما کو ئەم دیرۆکا جەنابێ سەرۆک مەسعوود بارزانی دخوینن یان بخوینن، ئەم دێ بزانبن و فێر ببن کو تم جەنابی وی خوەستیە وەکە پێشمەرگەیەکی بژی. ژ بەر کو جەنابێ وی دزانە کو پێشمەرگایەتی مەرتەبەیەکا چقاسی بلند، پیرۆز و ھێژایە.

پێشمەرگە ئەو کەسێن کو جانێ خوە ژ بۆنا ئازادیا وەلاتێ خوە ددن و دبن جانگۆری. ب سالان کار و خەباتێ دکن دا کو وەلاتێ خوە ئازاد بکن دا کو خەلکێ وان ب سەربەستی بژین. پێشمەرگایەتی مەرتەبەیەکا وەھایە کو ھێژایی و قیمەتا وێ د سەر ھەر تشتەکی رەیە. ژ بەر ڤێ پیرۆزییا پێشمەرگەیانە کو سەرۆک مەسعوود بارزانی ژی تم دخوازی وەکە پێشمەرگەیەکی بژی.

لێ جارنا ژ بەر کار و خەباتێن وان، گەل و خەلکێ ژی ھندەک دیاریان، قەدر و قیمەتێ ددن وان کەسێن کو ژیانا خوە ژ بۆنا وان تارخان کرنە یان دکن.

ژ بەر کو سەرۆک بارزانی ژی ژ وان کەسانە کو پارتیا وی، گەلێ وی، خەلک و رێھەڤالێن وی ئەو وەکە سەرۆکێ خوە قەبوول کرنە، ئەڤە ژی وەکە خەلاتەکا گەلیە ژ بۆنا سەرۆک مەسعوود بارزانی.

ملەتێ وی ب سەرۆکاتیا وی ئەولەنە کو ئەڤ پێشکێشی جەنابێ وی کرنە. گەلێ وی دزانە کو ئەو چ جاران بەرژەوەندیا گەلێ خوە بنپێ ناکە و دێ د ژیانا وی دە بەری ھەر تشتی پاراستن و خوەدی لێدەرکەتاندنا گەلێ وی بە.

ژ بەر ڤێیە کو ئەز دبێژم: سەرۆک ئەوە کو تەمەنەکی د بەر ئازادیا وەلاتێ خوە دە ددە و ئازادیا وی دبینە، گەلەکی خوەشە. تشتەکی وەھا نابە قسمەتێ ھەر سەرۆکەکی. لێ رێزدار سەرۆک مەسعوود بارزانی ب تەکۆشینەکا دوور و درێژ، ب تەمەنەکی درێژ ئەڤ رۆژا خوەش دیت.

جەنابێ وی ب بەرخوەدانەکا بێ ھەمپا و ب باوەریەکا نەتەوەیی، ل گۆر رێبازا پیرۆز، ئیرۆ ئەو بەرھەمە ئانگۆ کوردستانا ئازاد دیاری گەلێ خوە کریە. یا ھەری خوەش ئەوە کو مرۆڤ پشتی ئازادیێ، کولیلکێن وەلاتێ خوە ب ئازادی بێھن بکە. د ناڤا خەلکێ خوە دە ب ئازادی و سەربەستی بگەرە، دەرد، ئێش و کێفخوەشیێن وان گوھداری و پارڤە بکە.

ئیرۆ ھەبوونا جەنابێ سەرۆک مەسعوود بارزانی ژ بۆنا مە کوردان شانسەکە مەزن و کێفخوەشیەکە بێ ھەمپایە. ھم جەنابی وی ب ڤێ کێفخوەشیێ دژیت ھەم ژی ملەتێ وی ژ بەر ھەبوونا وی شانازە.

سەرۆک مەسعوود بارزانی چاوا کو ژ زارۆکاتیا خوە دە ژ مەجبووری و ژ بۆنا ئازادیا گەلێ خوە دەست ئاڤێت چەکی و ل ھەمبەر دژمنێ گەلێ خوە شەر کر. ب سایا وی شەری ئیرۆ ئەم کورد کرن خوەدی، وەلاتەکی ئازاد.

ئیرۆ ژی جەنابێ سەرۆک مەسعوود بارزانی ب نڤیساندنا دیرۆکا گەلێ خوە، کوردان شیار و زانە دکە دا کو دیرۆکێ راست فێر ببن و بزانبن چ ئافات، تۆفان و بەرخوەدان ھاتنە دیتن و کرن.

سەرۆک مەسعوود بارزانی نە تەنێ ب شەرێ خوەیێ چەکداری ل ھەمبەر دژمن راوەستیا بوو. نھا ژی ب نڤیساندنا دیرۆکا گەلێ خوە، شەڤرەشا وی رۆھنی دکە. شاشی و دەرەوێن داگیرکەران کو دیرۆکا کوردان سەرۆبنی ھەڤ کربوون سەر راست دکە. ژ بەر کو جەنابێ وی دزانە کو ملەتێ دیرۆکا خوە نزانبە و ناسنەکە، زەحمەتە کو ئازادیا وی ب دەست بخە.

ئەم وەکە کورد ژی سپاسدارێ سەرۆکێ خوە مەسعوود بارزانی نە کو وی ب شەرێ چەکداری وەلاتێ خوە ئازاد کر و ب نڤیساندنا دیرۆکێ ژی وێ ئاڤادان دکە کو نڤشێن نوو، جوانێن وەلاتێ ئازاد دیرۆکا خوە ناس بکن…

ئیرۆ ئەم کورد خوەدی شانسەک مەزنێن کو ستوینەک ژ ستوینێن بنگەھین یێن رێبازا پیرۆز وەکە سەرۆک مەسعوود بارزانی د ژیانێ دە یە. ژ بۆنا مە دیرۆکا گەلێ خوە دنڤیسینە. د ھەر گۆتن و جڤینێن خوە دە ئاقلمەندیا کوردان دکە. ھەر وەھا جەنابێ وی، ئیرۆ د قادا ناڤنەتەوەیی دە وەکە سەرۆکەکی کوردان تێ پێناسەکرن، ناسکرن و حەزکرن…

تێبنی: ئەز سالڤەگەرا شۆرەشا ئیلۆنێ ل گەلێ کورد پیرۆز دکم. دبێژم: ھەگەر نە ئەو شۆرەش با دبوو کو ئیرۆ کورد ل سەر روویێ ڤێ جیھانێ نەمابانا. لێ ئیرۆ ئەم وەکە کورد ب سایا وێ ل باشوورێ کوردستانێ خوەدی دەولەتا خوە نە. خوەدی ل شۆرەشا ئیلۆنێ دەرکەتاندن ئەرکەکی نەتەوەیی یە.