مەمەت مێردینی
ئێریشێن ل سەر ستاتویا باشوورێ کوردستانێ و سازیێن فەرمی یێن یەکانە حکوومەتا کوردان، ئانکو حکوومەتا هەرێما کوردستانێ بەردەوام دکن، ئەڤ ئێریش خوە د چارچۆڤەیا ئێریشێن لەشکەری و مەدیایی دە دبینن، ئێریشێن لەشکەری ژ ئالیێ دەولەتێن کۆلۆنیالیست ڤە ب پالپشتیا مەدیایی یا هن رێخستنێن کرێ گرتی تێ مەشاندن، هن رێخستنێن کو خوە ب رێخستنێن کوردستانی ب ناڤ دکن ژ داگیرکەران زێدەتر ئێریشی ستاتویا هەرێما کوردستانێ دکن و دخوازن ب هەر رەنگەکی بە ڤێ ستاتویێ ژ ناڤ ببن، رێخستنا هەری پێشەنگ د ڤێ دەربارێ دە پەکەکە یە، پەکەکێ ت رێ نەمان کو ژ بۆی لاوازکرن، رەشکرن و ژناڤبرنا ستاتویا هەرێما کوردستانێ و مالباتا بارزانی کو ئەڤ زێدەتری 100 سالانە مۆهرا خوە ل دیرۆکا رزگاریخوازا کورد و کوردستانێ دایە، نەجەربینە، هەری داوی ژی د چارچۆڤەیا شەرێ تایبەت دە، رێخستنا پەکەکێ د مەدیایا خوە دە دەست ب چێکرنا بەرنامەیەکە نوو ب ناڤێ “دەستێن تاری” د کانالا خوە یا ب ناڤێ رۆناهی دە کریە.
ژ یەکەم خەلەکا ڤێ بەرنامەیێ مرۆڤ دکارە تەڤ خەلەکێن دن بینە بەرچاڤێن خوە، ئەڤ بەرنامە ب تەنێ ژ بۆی رەشکرنا حکوومەتا باشوور و سازیێن وێ یێن فەرمی هاتیە دروستکرن، تشتا کو دوژمنێن کوردان نکارن بکن، پەکەکە دکە، پەکەکە ب ئێریشکرنە سەر سازیێن ئەولەهیێ یێن باشوور ب تەنێ ئەرکا خوە جیبجی دکە، ئەو ئەرکا هەر ژ دامەزراندنا وێ هەیا نها د ژۆرێن تاری یێن دەولەتا کوور یا ترکیەیێ ژ بۆنا وان هاتیە دەستنیشانکرن، ئانکو ئەرکا پاراستنا داگیرکەریێ.
گەلۆ راستیا کەسێن هاتینە دەستەسەرکرن چییە و کینە؟
پەکەکێ ل رۆژئاڤا کوردستانێ 4 جوان کو بەرێ ژی د ناڤا رەفێن هێزێن سووریەیا دەمۆکراتیک دە بوون، پاش کو دەرباسی باشوور بوونە و جارەکە دن ڤەگەریانە رۆژئاڤا دەستەسەر کرنە و وان وەکە سیخورێن پاراستن و میتێ ددە ناساندن و بەرپرساتیا ئێریشێن ئاسیمانی یێن ترکیەیێ دخە ستوویێ وان. ئەڤ جوان هەر د ڤێ بەرنامەیێ دە ب دەڤێ خوە ئیتیرافێ دکن کو بەرێ د ناڤا رەفێن هەسەدێ دە بوون، پشترە ژ بەر هن پرسگرێکان ژ رۆژئاڤا دەرباسی باشوور بوونە، لێ ب ت ئاوا رێ ب وان نایێ دایین باسی وان پرسگرێکان بکن یێن کو بوویی سەدەم ئەو ژ هەسەدێ قوت ببن و دەرباسی باشوور ببن، ژ بەر کو ب ئەشکەرە کرنا راستیێ وێ بەرنامەیا وان تێک بچە.
جوانێن وەکە سیخور تێن نیشاندان د ئەسلا خوە دە پەروەردەیێن دەستێ پەکەکێ ب خوە نە، ب سالان د ناڤا رەفێن هەسەدێ دە مانە و پەروەردەیا سیاسی و لەشکەری دیتنە، نە دوورە کو هەر د زارۆکتیا خوە دە ژ ئالیێن چەتەیێن پەکەکێ “جوانێن شۆرەشگەر” ڤە هاتبن رەڤاندن و ب زۆرێ هاتبن چەکدار کرن لۆما ژ رۆژئاڤا رەڤیابن، ئەڤجا نیشاندانا وان وەکە سیخورێن کو “پاراستنێ” ژ میتێ رە چێکرنە ژ دەرەوەکە مەزن زێدەتر نە تشتەکە دنە، پەکەکە ژ ئالیەکێ دخوازە ب ڤێ بەرنامەیێ تۆلا خوە ژ وان جوانان هەلینە، ژ بەر کو ژ رۆژئاڤا دەرکەتنە و ئەرکێن خوە یێن لەشکری جیجبجی نەکرنە وان سزا بدە، لێ سزادانا هن جوانێن کورد ب ڤی ئاوایی تشتەکی پر بێ ئەخلاقانە یە، ژ ئالیەکی دن ژی دخوازە وان وەکە ئاموورەکی دن ژ بۆی رەشکرنا پەدەکێ و بارزانیان بکار بینە.
پەکەکە د ڤێ بەرنامەیێ دە پرسەکە پر ئەجێب دکە و هەبوونا سازییا خێرخوازی یا بارزانی ل عەفرینا داگیرکری ژی وەکە خیانەت نیشان ددە و دپرسە، “گەلۆ سازیا ب ناڤێ خێرخوازیا بارزانی ل عەفرینێ چ دکە؟” ژ خوە هەر کەس دزانە کا ئەڤ سازی ل عەفرینێ چ دکە، لێ ئەمێ جارەکە دن ل بیرا پەکەکێ بینن کا کەنگێ و چما ئەڤ سازی دەرباسی عەفرینێ بوویە.
هەر کەس دزانە کو د کارەسەتا ئەردھەژێ یا ل باکور و رۆژئاڤایێ کوردستانێ پێک ھاتبوو، دەزگەھێ خێرخوازی یێ بارزانی ژ بۆی هاریکاریا برایێن خوە دەرباسی باکور و رۆژئاڤایێ کوردستانێ بوو. ڤێ سازیا خێرخوازی کەسێن بریندار ژ بن کاڤلان دەرخستن، ئاڤ، نان، خوارن و پێداویستیێن پزیشکی و هتد.. گهاندن مالباتێن زرارمەند و ژ نوو دە ژیان دا گەلەکان، ئەڤ دیمەن هێژان د مەژیکێ هەر کوردەکی دە مانە، لێ پەکەکە وە دفکرە ب پرسەکە ب ڤی ئاوا دکارە ڤان تشتان د مەژیێ گەل دە شێلوو بکە و نەهێلە.
ل عەفرینا کو پەکەکێ ب ئیخانەت رادەستی دەولەتا ترک و ملیسێن سەر ب وێ ڤە کری، ژ بلی سازیا بارزانی ت سازیەکە دن تونە کو بکارە ئالیکاریا شێنیێن عەفرینێ بکە، ئەڤ ژی تشتەکە کو پڕ دچە زۆرا پەکەکێ، پەکەکە ل شوونا پرسێن ب ڤی ئاوا و چێکرنا دەرەوان بلا ل رێیەکێ بگەرە کو عەفرینێ رزگار بکە، تەڤی کو هەر کەس دزانە نە پەکەکە رێخستنەکە وسایە بکارە کارەکی وسا مەزن بکە و نەژی دخوازە بکە، ژ بەر کو پەکەکێ ب تەنێ دکارە وان کاران ئەنجام بدە یێن کو داگیرکەر ژ وان دخوازن، وەکە ئێریشکەرنە سەر پارتیێن وەلاتپاریز و رەشکرنا کەس و رێخستنێن نەتەوی یێن کوردان، کو ئەرکا پەکەکێ یا سەرەکە ژی هەر ئەڤە.
دیرۆکا گەلێ کورد پڕە ژ کەس، رێخستن و ئالیێن کو قاشۆ ژ بۆنا ئازادیا گەلێ کورد و وەلاتێ خوە ئانکو کوردستانێ تێدکۆشین، لێبەلێ ئەو کەس و رێخستن نها خوە د ناڤا زبلدانا دیرۆکێ دە دبینن، ژ بەر کو ب دەرەوان ت رێخستن نکارن هەیا داویێ خوە ل سەر لنگا بگرن، ژ بەختێ رەشێ کوردان پارتیا کو پێش 46 سالان ل باکور ب دەرەوان هاتیە دامەزراندن، ب دەرەوان ژیایە و هەیا نها ل سەر رێیا خوە بەردەوامە.
ئێریشێن ل سەر مالباتا بارزانی و سازیێن فەرمی یێن حکوومەتا هەرێما کوردستانێ د چارچۆڤەیا سۆزا عەڤدللا ئۆجالان ب دەولەتا ترک دایی تێن ئەنجامدایین
یێ کو نرخێن نەتەوی نەپاراستی و دای بەر بازارێ رێبەرێ پەکەکێ “عەڤدللا ئۆجالان” ب خوە یە، دەما هێژان د بالەفرێ دە ژ ئەکیبا میتێ رە گۆتی، “ل من نەخن، دایکا من ژی ترکە، رێ ب من بدن خزمەتا دەولەتا خوە ‘دەولەتا ترک’ بکم.”
عه‌بدوللا ئۆجالان د یەکەمین لێپرسینا خوە یا ل ئیمرالیێ دا ژی پێشنیارەکێ بۆ فەرماندارێ ئارتێشا ترک «حه‌سه‌ن ئاتیلا ئووگور» دکە و وه‌ها دبێژە:
«نها گه‌ل نه‌فره‌تان ل «بارزانی – تاله‌بانی» دکهن. ئەز باش دزانم، کو گەل په‌یوه‌ندییه‌كا ئاوارتە نیشا یێن مە «په‌كه‌كێ» ددە. هەگەر هوون «ترک» هنەکێ ئالیکاریێ بده‌نه یێن مە دێ وان «بارزانی – تاله‌بانی» ژ مه‌یدانێ راكین و پشتی دەمەکێ كێم دێ ئەڤ جه‌ماوه‌ره ب تەمامی ببە ئالیگرێن مە «په‌كه‌كێ – ترکیێ». ئەڤه بوویەرەکا دیرۆکی یە، و ل گۆری من دڤێت ئەو «پلان» گه‌له‌ك ڤەشارتی بمینە. ل ڤێرێ ب پیچەکا پشتگرییا وە «ترک» دێ هەر تشت چارەسەر ببە، به‌رێ خوه بد‌نێ، ئەز نەبەحسا پاره و چەکان دکه‌م، تنێ ئالیکاریێن بچووك ژ وە دخوازم. نە هەوجەیە کو هوون «ترک» ڤان بارزانییان، تالەبانییان ب هێز بکه‌ن. هێزا بارزانی و تالەبانی بچووک نەبینن، هێزێن مەزن ل پشت وان هەنە. هوون باوەر نەکه‌ن کو ئەو ئالیگرێن ترکیێ نە. گاڤا ئەم ب هەڤ را ب پرەنسیپ كار بكه‌ین ئەم «په‌كه‌كه – ترک» دێ ب سەر بکەڤین. ئەم ناهێلین ئەو نەفەسێ بستینن و ئەم دێ وان ب ترکیێ ڤە گرێ بده‌ین. ژ بۆ ڤێ ژی من «پلانا هەولێرێ» پێشنیار کر. دەرفەتێ بده‌نه مە کو ئەم ل گه‌ل هندەک ترکمەنان كار بكه‌ین، دێ ئەو وەک کووچکان ب وە ڤە هێنه گرێدان».
ب کورتاسی، کەسێن ئۆجالان دپەژرینن نکارن نرخێن نەتەوی بپارێزن و دێ هەرتم ڤان نرخان دن بەر بازارێ، هەر وەک رێبەرێ خوە.
