گه‌نه‌رالێ چیایان، رێبه‌رێ رۆحی یێ نه‌ته‌وه‌یا كورد نه‌مر «مه‌لا مسته‌فا بارزانی» ژ بۆی ئازادی و مافێن گه‌لێ كورد ژیا، ل پێناڤێ ڤێ ئارمانجا پیرۆز ته‌ڤی وێ تێكۆشینا دژوارا كو مه‌شاندی، ئه‌و ب ساده‌هییه‌ك مه‌زن ل چیایێن وه‌لاتێ شێرین ژیا، ئارامه‌گه‌ها كو نها ئه‌و لێ یه، هێژان ژی رامانێن ساده‌هییا ژیانا ڤێ ئه‌فسانه‌یا مه‌زن یا كورد د ناڤا خوه ده د حه‌وینه.
سه‌رۆكێ نه‌مر «مسته‌فا بارزانی» هەموو ژیانا خوە ژ بۆ گەل و نشتیمانێ خوە تەرخان كربوو، لۆما ژی چ جاران گه‌لێ كورد ڤی رێبه‌رێ مه‌زن ژ بیر ناكه، به‌لكو ده‌وام هێزێ ژێ دستینه و تێكۆشینا خوه پێ ده‌وام دكه، «بارزانیێ نه‌مر» ئه‌و كه‌س بوو یێ كو د شه‌رت و مه‌رجێن هه‌ری زه‌حمه‌ت ده كاری گەلێ کوردێ بەلەنگاز و بندەست و دۆزا ره‌وا ب جیهانێ بده ناساندن.
«مه‌لا مستەفا بارزانی» کورێ شێخ محەمەد بارزانی یە، ئه‌و د 14ێ ئادارا سالا 1903ان ده ل گوندێ بارزان ژداییک ببوو، ئه‌و هێژان د 3 سالیێ ده بوو وه‌ختا كو زلم و سته‌ما دژمن ژیانكری، ل ده‌ما شكه‌ستنا شۆرشا شێخ عه‌بدولسه‌لام ئه‌و و دیا خوه ل باژارێ مووسلێ ژ هێلا ئۆسمانییان ڤه تێن زیندان كرن.
«بارزانیێ نه‌مر» پێتری 60 سالێن ژیانا خوه فه‌دایێ دۆزا گه‌لێ خوه و ئاخا پیرۆزا كوردستانێ كرن، یا راست ئه‌و كاری ڤێ ئه‌ركا پیرۆز ب لێزانی، قه‌هره‌مانی و دلسۆزی ئه‌نجام بده و كوردان بگه‌هینه كه‌نارێن ئارامیێ، ئێدی كورد ب سایا تێكۆشینا ڤی مرۆڤێ مه‌زن بوون خوه‌دی دۆز، به‌لكو بێهتر هه‌بوونا كوردان وه‌كه نه‌ته‌و د رۆژهلاتا ناڤین و جیهانێ ده ب سایا تێكۆشینا «بارزانیێ نه‌مر» هات فه‌رز كرن.
نه‌مر «مسته‌فا بارزانی» د 1ێ ئادارا 1979ێ دا ل ئامەریکا ژ بەر نەخوەشیێ کۆچا داویێ کر و د 5ێ گولانا 1979ان ده ل سەر وەسیەتا وی ل باژارێ شنۆ یێ رۆژھلاتا کوردستانێ ل سەر سینۆرێ باشوور و رۆژھلاتێ کوردستانێ ب خاکا پیرۆزا کوردستانێ ھات سپارتن.
«بارزانی» وه‌سیه‌ت كربوو كو وی وه‌كه هه‌ر پێشمه‌رگه‌هه‌كی كوردستانێ ب ئاخێ بسپێرن و ب هیچ ره‌نگی جێیاوازیا جیهێ ڤه‌شارتنا وی و ته‌ڤ پێشمه‌رگه‌هـ و جانگۆریێن كوردستانێ نه‌به.
لوما ژی هه‌م ئارمگه‌ها وی یا ئه‌ول ل باژارێ شنۆ و هه‌م ژی ئارامگه‌ها ل بارزان ب ره‌نگه‌كی هه‌ری ساده هاتن چێكرن، پشتی راپەرینا ئادارا 1991ێ، تەرمێ «مه‌لا مستەفا بارزانی و ئدریس بارزانی» بۆ باشوورێ کوردستانێ جیھێ ژدایکبوونا وان ھاتن ڤەگوھه‌ستن و ل ناڤچەیا بارزان ب خاکێ ھاتن سپارتن.
ئارامه‌گه‌ها بارزان كو ب «مه‌زارێ نه‌مران» تێ ناسكرن ژ رۆژا مێهڤانكرنا «سه‌رۆكێ نه‌مر مسته‌فا بارزانی» و هه‌یا رۆژا مه یا ئیرۆ بوویه جیهه‌ك پیرۆز و پڕ ب روومه‌ت ل جه‌م گه‌لێ كورد. مه‌زار ل ناڤه‌ندا گوندێ بارزانێ یه، هەموو سالان ل رۆژا وەفاتا «سه‌رۆكێ نه‌مر» دبه جیهێ ل خۆگرتنا ولاتپارێزێن کورد ژ هەموو ناڤچەیێن کوردستانێ، ئەڤ یەکه بوویە نه‌ریته‌كێ سالانە.
مه‌زارێ نه‌مران ب ساده‌هییا وێ ئه‌ندازه‌یا كو پێ هاتیه چێكرن، هێژان ژی رامانێن ساده‌هییا ژیانا ڤێ ئه‌فسانه‌یا مه‌زن بۆ زارۆك، جوان و وه‌لاتپارێزێن كوردان ڤه‌دبێژه، هێژان ژی كورد هێزێ ژ ڤان رامانێن رێبه‌رێ خوه یێ نه‌مر دستینن و تێكۆشینا خوه یا ژ بۆی به‌رده‌وامكرنا ئازادی و سه‌ربه‌ستیێ ده‌وام دكن.
بارزان دبستانا شۆرەش، بەرخوەدان، کوردایەتی یه و رێیا شێخ عەبدولسەلام بارزانی، شێخ ئەحمەد بارزانی و مستەفا بارزانی یە کو ژ بۆ ئازادی و رەدکرنا بندەستیێ و مافێن گەلێ کورد تێکۆشیانە.
