مەمەت مێردینی
ئارتێشا ئیسرائیلێ د 27ێ ئیلونێ دە کوشتنا سەکرەتەرێ گشتی یێ حزبوللاهێ حەسەن نەسروللاهـ ل بەیرووتێ ئەشکەرە کر. وەکە دهات پێشبینیکرن کوشتنا نەسروللاهـ باندۆرەکە گرینگ ل سەر رۆژهلاتا ناڤین و حەتتا ل سەر ئاستا جیهانێ ژی چێکر، هەر دەولەت و هێزەکی ل گۆری بەرژەوەندیێن خوە د ڤێ دەربارێ دە داخویانی دان، داخویانیا هەری بالکێش یا رێبەرێ کۆمارا ئیسلامی یا ئیرانێ عەلی خامەنەیی بوو، خامەنەیی د بەشەکە داخویانیا خوە دە راگهاند، “مافێ گەلێ فلستینێیە کو ل دژی دژمن سەری ھلدە. ھقووقا ناڤنەتەوەیی ئیرۆ پشتگریێ ددە وێ سەرھلدانێ.”
بەلێ، دژمن و داگیرکەرێن کوردستانێ ب مافێ هەر کەس و نەتەوەیەکا ل سەر ڤی ئەردی دزانن کو ل دژی دژمن سەری هلدن و خوە و ئاخا خوە بپارێزن، لێ ب ت ئاوا ڤی مافی ب گەلێ کورد نادن، نە ب تەنێ ڤی مافی ب کوردان نادن، بەلکو ب هن ئاخافتنێن خوەش هندەک ئالیێن کوردی ژی ژ خوە رە کرنە داردەست و ب رێیا وان هەیا کو دکارن رێگریێ ل سەرخوەبوونا کوردان دکن. ئا هەری پێشەنگ د ڤێ رێیی دە ژی بێی گومان ئیران ب خوە یە.
رەژێما ئیرانێ ژی وەکە داگیرکەرن دن یێن کوردستانێ هەرتم دخوازە خوە ووسا نیشان بدە کو ب گەلێن بن دەست و ستەملێکری رە یە، دخوازە ووسا بدە نیشاندان کو ئەو رەژیمەکە حەقخواز، ئازادیخواز و پارێزەرا مافێن مرۆڤە، ب تایبەتی د دەربارا پسگرێکا فەلستینێ دە، لێ بەلێ دەما باسی کوردان و ئازادیا کوردستانێ تێ کرن ئێدی هەر تشت دەشیفرە دبە و روویێ راستێ وان ئەشکەرە دبە، دەما کەس یان ئالیەکی کورد قالا ئازادی و سەرخوەبوونا کوردستانێ دکە، ئێدی دەولەتێن کۆلۆنیالیست هەر تشتی ژ بیر دکن، وەکە گایێن هار ئێریشی هەر تشتی دکن و دخوازن هەر تشتی ژ ناڤ ببن، پەیڤا ئازادی دەما ژ دەڤێ کوردەکی وەلاتپارێز دەردکەڤە مینا وێ دەسمالا سۆر دمینە دەما کەسەک ل همبەر گایەکی دگرە، چەوا گا ئێریشی وێ دەستمالێ دکە، داگیرکەرێن کوردستانێ ژی ووسا ئێریشی وی کەسی دکن.
ئەڤ یەک مە د سالا 2017ان دە دیت، دەما ل باشوورێ کوردستانێ پێنگاڤێن رەفەراندووما سەرخوەبوونا کوردستانێ هاتن ئاڤێتن، دەولەتێن کۆلۆنیالیستێن کوردستانێ راست و چەپ ل دژی ڤێ پێنگاڤا دەمۆکراسی سەکنین، هەر 4 وەلات د دەمەک کورت دە ژ بۆی ژ بن برنا ڤێ پێنگاڤا قانوونی و دەمۆکراسی یا کوردان کەتن تەڤگەرێ، جڤین پێک ئانین، گەف کرن و پشترە ژی ب ئالیکاریا هن ئالیێن خایین یێن کورد ئێریشی باشوور کرن و کەرکووک و مەخموور و شەنگال داگیر کرن و ژ دەست کوردان دەرئانین، گەر ژ بەر بەرخوەدانا پێشمەرگەیان ل ئەنیا پردێ، مەحموودیێ و سحیلا نەبا، بێی گومان نها ت تشتەک ب ناڤێ ستاتوویا هەرێما کوردستانێ نەدما، لێ بەلێ هەر چ قاس کوردێن خایین هەبن، ئەو قاس و زیدەتر ژی کوردێن وەلاتپارێز هەنە و دێ هەرتم ل دژی داگیرکەران ل بەر خوە بدن و بێی گومان دێ رۆژەک وەرە کو تەقەز کوردستانەکە سەربخوە ئاڤا بکن.
ئەم ڤەگەرن سەر داخویانیا رێبەرێ کۆمارا ئیسلامی یا ئیرانی دەما دبێژە، “مافێ گەلێ فلستینێیە کو ل دژی دژمن سەری ھلدە”، و ڤێ پرسێ بکین، گەلۆ چما مافێ فەلستینێ یە ل دژی دژمنێ خوە سەریهلدە و نە مافێ کوردانە ل دژی دژمنێن خوە سەری هلدە و خوە بپارێزە؟
خویا و ئەشکەرە یە تەڤی هەموو پرسگرێک و نەخوەشییێن تێن رێیا گەلێ فەلستینی دە، لێ هەیا نها ت کەس و ئالیەک فەلستینی نەکاریە و جورئەت ناکە ب پەیڤەکی ژی بە ب خەرابی باسی “حیزبوللاهێ یان حەماسێ” یان هەر ئالیەک دن بکە کو رۆژەکی فیشەکەک ل همبەر ئیسرائیلێ تەقاندبە، ت کەس جورئەت ناکە بێ حوورمەتێی ب ئالا فەلستینێ بکە، نە ب تەنێ ئەڤ حەتتا ت کەس جورئەت ناکە کو ب پەیڤەکێ ژی بە پەسنا ئیسرائیێ بدە. لێ بەلێ، ژ بەختێ رەشێ کوردان دو هێزێن سەرەکە یێن قاشۆ کوردینیێ ژی دکن ل کوردستانێ هەنە کو ب قاسی دکارن نە دژاتیێ بەلکو دژمناتیا کوردستانێ دکن، جارنا نەراستەراست و جارنا ژی راستەراست ل دژی سەرخوەبوونا کوردستانێ تەڤ دگەرن و شەرم ناکن، ئەڤ دو هێز ژی یەنەکە و پەکەکە نە کو د میحوەرێ مقاوەمێ یێ ئیرانێ دە جی دگرن.
ب درێژاهیا دیرۆکێ پەکەکە و یەنەکە ت جاران بێی پالپشتیا داگیرکەران نەمانە، ئەڤ دو ئالیێن خایین ب قاسی کو ل دژی پەدەکێ و ستاتوویا هەرێما کوردستانێ دسەکنن نیڤێ وێ ل دژی داگیرکەران نەسکنینە، خوە د بن درۆشمێن کوردایەتیێ دە دڤەشێرن و ئێریشی نرخێن کوردان دکن، ئالیگرێن خوە دخاپینن و وان هان ددن ل دژی پیرۆزیێن کوردان بسەکنن، ت نرخەکی جڤاکی، ئەخلاقی سیاسی و چاندی ل بەر چاڤ ناگرن، ب هەر ئاوایەکی کو دکارن دژاتیا کوردستانەکە سەربخوە دکن و پێشەنگیا خەتا خیانەتێ دکن، یا ژ هەر تشتی پیرۆزتر و ب نرختر ل جەم ڤان دو هێزێن خایین پاراستنا بەرژەوەندیێن وان یێن شەخسینە، ئەڤ یەک د کریارێن ڤان دو هێزێن خایین دە ب ئەشکەرەیی خویا دبە.
ب کورتاسی، گەر کورد دخوازن ل بەر خوە بدن و ل دژی داگیرکەران سەری هل بدن، گەرەک یەکەم جار ل دژی ڤان دو هیزێن خوە فرۆش، خەلک فرۆش و خاک فرۆش بسەکنن و وان روورەش و شەرمەزار بکن، ژ بەر کو ئەڤ هەڤپەیمانیا خاک فرۆش، خەلک فرۆش، خوە فرۆش نە ب تەنێ ب قەدەرا باشوور و باکور ب تەنێ دلیزە، بەلکو ب قەدەرا چار پارچەیێن کوردستانێ دلیزە.
