بافل تالەبانی، سەرۆکێ یەنەکێ یێ نیقاشبار، ل سلێمانیێ و کۆیێ دو متینگێن جودا ل دار خستن. د متینگێن خوە دە گەلەک گۆتنێن کو دێ تێکلیێن لگەل پەدەکێ ب دوماهی ئینیت بکار ئانین. ھەلبەت دەم دەما ھلبژارتنێیە، د دەما ھلبژارتنێ دە ھەر کەس گۆتنێن گران ژ ھەڤ رە دبێژە لێ د داویێ دە دیسا تێن گەل ھەڤ. لێ رەوشا بافل تالەبانی ژ خەباتێن پرۆپاگاندایا ھلبژارتنێ وێدەترە. ھەم ھێرسا وی ھەم ژی بێپەروائیا وی گەلەک بالکێشن و ھێژایی لێکۆلینێ نە.
چقاس ب پرۆپاگاندایێ ھەول بێ دایین کو بافل تالەبانی بهێت داگرتن ژی، لێ ئەو نە کەسایەتیەکی کوردستانی و سیاسییە، بەلکو کەسەکی ڤالایە. خوە نە مرۆڤەکی خوەدی ئارمانجە ژی. د دەھ سالێن داوی دە، د دەما نەخوەشیا بابێ خوە دە، ژ بلی ھاتنا کوردستانێ و تێکلیێن ب پارە، رانت و چاڤکانیێن ئیستیخباراتا ئیرانێ رە، چ تەجرووبەیەکا وی یا سیاسی نینە. ئەگەر بالا خوە بدنێ، د ناڤ ھلبژارتنێ دە چ پرۆژەیەکا جڤاکی، سیاسی، ئابۆری یا یەنەکێ پێشکێش ناکە. تەنێ تشتێ کو دبێژە ئەڤە: ئەم دێ پەدەکێ تێک ببن، ئەم دێ حکوومەتا وان ھلوەشینن. ئەم دێ پرسگرێکا مووچەیان د ناڤبەرا بەغدا و ھەولێرێ دە چارەسەر بکن وەکە کو بەغدا دخوازە و ئەم دێ زەڤییێن گازا کۆرمۆر کۆنترۆل بکن.
پرۆژەیا بافل تالەبانی ژ بۆ ھلبژارتنان چیە؟
دەما کو ئەم سێ ئارمانجێن بافل تالەبانی یێن ب سەرناڤێن پەدەکێ، داھاتێن ھەرێما کوردستانێ، دەولەمەندیێن بنەردی یێن کوردستانێ تینن جەم ھەڤ، تابلۆیا کو دەردکەڤە پێشبەری مە یەکسەر تینە بیرا مە کو ھێزێن دن ژی خوەدی ھەمان سێ ئارمانجانن: ئیران-ئیراق و حەشدا شەعبی.
ھەلبەت نە سورپرایزە کو ئارمانجێن سێ ئالی یێن بافل تالەبانی و یێن سازیێن شیعەیێن ئیرانی ھەمان تشتن. ل پشت سەدەمێن ئێریشێن بافل تالەبانی ل سەر بارزانیان و بێپەروائیا وی ئەڤ ھێزە ھەنە. چاوا کو د فیلمان دە لیستکڤانێن سەرەکی خوە ناخن خەتەرەیێ و دوبلۆرێن وان ب کار تینن، سیاسەتا ئیرانی ژی بافل تالەبانی وەک دوبلۆر (کەسێ کو ل شۆنا کەسەکی دن کارەکی دکە) ب کار تینە. بافل تالەبانی ئەڤ گۆتنە وەک ئەرکەک ژ بەر کرینە و دبێژە.
وەکە کو خەزوورێ بافل و کەسێ دویەمینێ یەنەکێ ئانکو مەلە بەختیار ژی گۆتی، “بافل تالەبانی کوردستانێ ناس ناکە و ھەتا کوردی ژی باش نزانیت”. نھا دخوازە وەھاب حەلەبچەیی، یێ کو د کارێن تاری دە ب کار تینە و ناڤێ وی کەتیە گەلەک دۆسیەیێن جینایەتان، بکە والیێ بارزانێ. دبێژە ئەز قەبوول ناکم مەسروور بارزانی ببە سەرۆکێ حکوومەتێ.
دەڤێ بافل تالەبانی ب شەربەتا خیانەتێ شێرین بوویە
د رەوشێن نۆرمال دە بافل تالەبانی کەسەکە کو نکارە قەیتانێن پێلاڤێن خوە ژی گرێ بدە. ھەکە ھوون ببێژن داعش ھاتیە و سەرێ ب دەھان کوردان ژێکریە، دێ وەک چیرۆکەکێ گوھداری بکە. ئەگەر گولەیەک بتەقە، بێیی کو ل پاش خوە بنێرە دێ برەڤە. سەدەما کو ئەڤ کەسێ بێخیرەت، بێ ھش و ترسۆنەک نھا ل سەر دەپێ شانۆیێ یە ئەڤە کو دەڤێ وی ب شەربەتا خیانەتێ شێرین بوویە.
دیسا وەک کو مەلە بەختیار گۆتیە، “بافل تالەبانی، یێ کو ژ بلی کورێ مام جەلال بوونێ چ سیفەتێن دی نینە، ب فرۆتنا کەرکووکێ بوویە سەرۆک”. ئەرێ، چ ھەولدان نینە، خەبات نینە، وەستیان نینە، ھشمەندی و رامانەکا وی نینە، رێیا کو ب لەز بوویە سەرۆک ژی ب خیانەتێ ڤەبوویە.
راستی ئەوقاس ھێسانە. ئەگەر حەشدا شەعبی ل پشت وی نەبە، بافل تالەبانی نەخوەدی وی دلی یە کو گۆتنان ببێژە بارزانیان.
ھەر وھا دڤێت ئەم زوو لێ زێدە بکن کو بافل تالەبانی پر باش دزانە کو یەنەکە د ھلبژارتنێ دە نابە پارتیا یەکەم. یەنەکە د چ ھلبژارتنێن کو ژ سالا 1992 و ڤر ڤە ھاتنە کرن دە نەبوویە پارتیا یەکەم. ھەتا پشتی سالا 2009 ھەرتم بوویە پارتیا سێیەمین. بافل تالەبانی دزانە کو ئەڤ ھەڤسەنگیا جڤاکی نەگوھەریە. وێ دەمێ ب چ ئەولەیە؟ بافل تالەبانی ب ئەفەندیێن خوە یێن ل بەغدایێ و ب حەشدا شەعبی، نژادپەرەستێن عەرەب و دادگەھا فەدەرالا ئیراقێ ئەولەیە. دزانە کو ئەنجاما ھلبژارتنێ چ دبە بلا ببە، ئیران دێ ب رێبازێن خاپاندنێ دەست ب تەڤگەرێ بکە.
بافل تالەبانی دێ پشتی ھلبژارتنێ ژی بێپەروائیا خوە بدۆمینە
بریارا ئیرانێ ئەڤە: ھەبوونا ھەرێما کوردستانێ ل ئیراقێ بچووک بکە، تەنگ بکە و پشترە ژی بینە رەوشا پارێزگەهەکا نۆرمال. یانی “ماف و شیانا خوەبرێڤەبرنا کوردان دەستەسەر بکە”. بافل تالەبانی دوبلۆرێ ڤێ ئەرکێ یە. بێپەروائیا کو د دەما ھلبژارتنێ دە نیشان ددە دێ پشتی ھلبژارتنێ ژی نیشان بدە. ئیرانێ ژ بۆ ڤان ھلبژارتنان ئەجیندایەک گرینگ چێکر. بەری سالەکێ ب رەوشەکە لەزووبەز قانوونا ھلبژارتنێ ئانی رەوشەکێ کو ئیراق و دادگەھا فەدەرال بکاربن تەڤلی پێڤاژۆیێ ببن. ژ بۆ کو دەستێ یەنەکێ خورت بکە، ل سلێمانیێ کو قەت ترکمەن لێ تونە نە کۆتایەک ترکمەنان یا یەک کەسی دا. هەر چەند مەسیحیێن ل دوھۆکێ ب دەهان جاران پێترن ژ مەسیحیێن ل سلێمانیێ لێ بەلێ کۆتایەک دا مەسیحییێن ل سلێمانیێ. ب ڤی ئاوایی خوەست یەنەکێ بکە خوەدیێ ھێزەکا کو تونەیە. ھەتا د مەدیایێ دە نووچەیێن کو حەشدا شەعبی 70 ھەزار دۆلار دانە ھندەک پەرلەمانتەرێن یەنەکێ و خوەستیە کو پێڤاژۆیا پرۆپاگاندایێ ب ھێز بمەشینن ژی جھ گرتن.
واتە ئیران و حەشدا شەعبی ھلبژارتنێن کوردستانێ ژ خوە رە ستراتەژیک دبینن. ئەو دێ سیاسەتا ئیراقێ ل گۆری ڤێ ئاڤا بکن. بافل تالەبانی نکارە د ھلبژارتنێ دە ببە پارتیا یەکەم. گاڤا پێشین یا کو دکارە بکە چیە، ئەو دێ ئاستەنگ بکە کو حکوومەتا ھەرێما کوردستانێ زوو ئاڤا نەبە. پشترە ژی ل گۆری رەوشان دبە کو سەناریۆیێن دن وەرن رۆژەڤێ. ب پشتگریا ئیراق و حەشدا شەعبی، دادگەھا فەدەرالا ئیراقێ ژی بخن ئالیێ خوە و بکارن بخەبتن کو رێڤەبەریەکا ب فێل و دوبەندی ئاڤا بکن. لێ د پراکتیکێ دە یا ھەری راستتر ئەوە کو ب ئاستەنگکرنا ئاڤاکرنا حکوومەتێ، ھەول بدن کو سلێمانیێ، کو دەمەکە درێژە وەک پرۆژەیەکێ د دەستێ وان دەیە، ژ کوردستانێ ڤەقەتینن.
وەکە کو تێ دیتن، ھلبژارتن نە ھلبژارتنەک د ناڤبەرا یەنەکێ و پەدەکێ دەیە، ھلبژارتن د ناڤبەرا پەدەکێ و دەولەتا داگیرکەرا ئیرانێ دە دەرباس دبە. واتە د راستیێ دە خەتا کوردستانی و خەتا داگیرکەر و خاینان ل ھەڤ دکەڤن. دژمناتیا بافل تالەبانی یا ل ھەمبەر بارزانی و بێپەروائیا وی ب ئەرکێ دیرۆکی یێ جاشایەتیێ ڤە گرێدایی یە. پاشڤەکەتنا بافل تالەبانی د ھلبژارتنێ دە پاشڤەکەتنا ئیرانێ یە. د ناڤ کەڤانەکێ دە دڤێت وەرە گۆتن کو پەکەکێ خوە وەک دۆستێ پرۆپاگاندایا ھلبژارتنێ یا یەنەکێ بکار ئانی. ھەموو دەزگەھێن راگەھاندنا پەکەکێ شەڤ و رۆژ پرۆپاگەندەیا یەنەکێ دکن کو د ھلبژارتنان دە سەربکەڤە.
دڤێت کورد دەما دچن سەر سندۆقان ب ڤێ ھشمەندیێ تەڤبگەرن و ل ھەمبەر داگیرکەریێ ببێژن بەسە.
