بووبێ ئەسەر
رۆژا 20/10/2024ێ ھلبژارتنەکا گرینگ و ب واتە ل پێشبەری کوردێن مە یێن باشوورێ کوردستانێ یە. ل گۆر من ئەڤ ھلبژارتن دێ ببە، فکر و رامانا خوەدی ل وەلاتێ خوە یێ ئازاد دەرکەتاندنێ. یان ژی دێ ببە ھەولدانا کو داگیرکەرێن مە ھەسپێن خوە ل مەیدانا ئازادیا کوردستانێ بدن بەزێ.
دڤێت کوردێن مە یێن باشوور ل گۆر ڤێ بیرەوەیێ ببن خوەدی ھەلوەست. ئەڤ ھەلوەست بریار و قەرارا وان یا رۆژا 20 مەھێ، دێ ب مە کوردان و جیھانێ بدە زانین کو ب راستی خوەدیێ کوردستانێ و پاراستنا مافێ کوردان کی نە؟ ئان کیژان پارتییە.
کورد و جیھان باش دزانن کو شەرێ بارزانیان یێ ژ بۆنا ئازادی و سەرخوەبوونا کوردستانێ ئەڤ سەد سالن کو بێ وەستان ھەر ھاتیە دۆماندن. بارزانی گەلەک جاران کەتنە، ھەر رابوونەکا وان ب ھێزتر و قاوەتتر بوویە کو شەرێ ئازادیا گەلێ خوە، ب ئارمانجا کوردستانەکا سەربخوە بەردەوام کرنە و دکن.
ھەگەر ئیرۆ، نە ژ وێ تەکۆشین و بەرخوەدانا بارزانیان و پەدەکێ با، ھوون باوەر بکن پشتی تێکچوونا کوردستانێ ل مەھابادێ کورد نەدمان. ھەگەر ئیرۆ ئەم کورد ل ھەر چار پارچێن کوردستانێ ل سەر لنگانین، ب سایا تەکۆشینا بارزانیان یا سەد سالانە.
د تەکۆشین و بەرخوەدانا بارزانیان دە، تم ھەر چار داگیرکەرێن مە ب ھەڤرە بوونە خوەدی ھەلوەستا کو دێ چاوا بارزانیان ژ ھۆلێ راکن دا کو تەکۆشینا کوردان ب داوی بینە. جھێ خوەشبنیێ یە کو ھەتا نھا ژی ئەو ب سەرنەکەتنە و دێ سەرنەکەڤن.
پشتی نەبسەرکەتنا داگیرکەران، وان خوەستن کو ئێدی ب رێ و رێبازێن خەراب، ل سەر دەستێ ھندەک کوردان تەڤگەرا بارزانیان و یا گەلێ کورد تێک ببن. ژ بەر کو وان باش زانیبوون کو ئێدی بارزانی بوونە کوردستان. ژ ھۆلێ راکرن یان تێکچوونا بارزانیان دا ببە وەنداکرنا گەلێ کورد.
ژ بەر ڤێ بوو کو داگیرکەر ب لەپێن خوە یێن تاری، کەتن ناڤا تەڤگەرا بارزانیان یا ئازادیخواز و ئەو ل سەردەستێ ھندەک کوردان پەرچەکرن. ب ڤێ ژی نەسەکنین. ب وێ پەرچەکرنێ شەرێ براکوژی یان کوردکوژیێ ژی د ناڤا کوردان دە مسۆگەر کرن. ئەو رەوش ھێ ژی بەردەوامە. ھەر چقاسی ھندەک دەمان خوەکوژی سەکنی بە ژی، لێ ئەم دبینن کو د ڤان سالێن داوی دە دێ فکرا کورد خوە ب خوە ببن دژمنێ ھەڤ، رۆژ ب رۆژ گەش و بەرفرەھ دبە.
ئیرۆ ئەڤ فکرا خوە کوشتن ئانکو براکوژیێ ب رەنگ و دەنگەکی دن د پرۆپاگاندا ھلبژارتنێ دە دیار و زەلال بوو کو ئەو ئاگرێ ئیبراھیم ئەحمەد ژ بۆنا بارزانیان بشەوتنە پێخستبوو، ژ نوو دا ل باشوورێ کوردستانێ ژ نەڤیێن وی سەری ھلدایە. کورد دبێژن: “تێشکێن ماران بێ ژەھر نابن.”
یەنەکەیا کو شەرێ براکوژیێ خستبوو ناڤا کوردان و ب سایا پەدەکێ ئەڤ دەمەک درێژە کو ل سەر داخواز و بریارا سەرۆک بارزانی ھاتبوو راوەستان، ئێدی ھات زانین، کو دێ ژ نوودە ئەو تۆڤێ خوە کوشتنێ یێ کو ئیبراھیم ئەحمەد د ناڤا کوردان دا چاندبوو، دێ ل سەر دەستێ نەڤیێ وی بەردەوام بکە. ژ بەر کو ئیرۆ نەڤیێن وی خوە رادەستی ئیرانێ و داگیرکەران کرنە کو وێ داخوازا وان یا تونەکرنا بارزانیان پێک بینە. لێ چ جاران ب سەرناکەڤن.
مالا بافلێ کو ئاقل و دەرسا خوە ژ داگیرکەران گرتیە ئاڤا بە کو وی بێ کو بزانبە، یەکرێزی و یەکتیا ناڤا پەدەکێ خورتتر کر. ژ بەر کو د ناڤا کار و خەباتێ دە جارنا مرۆڤ ل کێمانی و شاشیێن خوە ھای نابە. لێ بافلێ کو ئاقلێ وی نە ژ کیستێ وییە، پەدەکە ب ھێزتر و خورتر پێشکێشی گەلێ کوردستانێ کر.
ل گۆر گۆتنا مسلمانان، چاوا کو دەریا ب دەڤێ سەی حەرام نابە، ھەر وەھا ب گۆتنا کەسێن وەکە بافل ژی پەدەکە تێک ناچە، لاواز و بێ تاقەت نابە، پەدەکێ ب خەباتا خوە یا سەد سالان ب مە کوردان و جیھانێ دایە زانین کو ئەو ژ بۆنا کوردستانەکا ئازاد و سەربخوە راگھینە کار و خەباتێ دکە.
ب ڤێ دەستکەفتیا کو نھا ل باشوورێ کوردستانێ ب مە کوردان ددە زانین کو پەدەکە خزمەتکارێ گەلێ خوە، هەلگرا بارێ گران یێ کوردستانێیە. پەدەکێ ژ رۆژا راپەرینا 1991 و ھەتا ئیرۆ چ د ناڤ خوەدە، چ ژ بۆنا گەلێ خوە و چ ژی د قادا ناڤنەتەوەیی دە چ کار و خزمەت پێشکێشی گەلێ خوە و جیھانێ کرییە، تێ دیتن و زانین.
ھەلبەت د ھەر ھلبژارتنان دە مافێ ھەر پارتیەکێ ھەیە کو پرۆپاگاندا خوە بکە و پرۆژەیێن خوە باس بکە داکو گەل ژی دەنگێ خوە بدە وان.
ل شۆنا کو یەنەکە ڤێ بکە د پرۆپاگاندایا خوە دە دەست ب دەرەو و بۆختانان کر کو وەکە داگیرکەر دخوازن پەدەکێ لاواز و بێ قاوەت بکە. لێ پەدەکەیا کو سەد سالن د تەکۆشینا ئازادیا گەلێ خوە دە بوویە پسپۆر، دێ نەیێ لیستکا ھندەک سەرۆک و رێبەرێن کو داگیرکەر وان ب کار تینن.
ل گۆر من تشتا ھەری باش کو بافل کری ئەوە کو ئێدی پەدەکە پیچەکێ ل ناڤ خوە ڤەگەرە دۆست و دژمنێن خوە و ژ نوو دە بەرچاڤ بکە. ئالیکاری و پشتگریا ھەڤالبەند و دۆستێن خوە زێدەتر بکە. دڤێت پەدەکە ژ نھا و پێدە بێتر گرانیێ بدە ناڤا خوە. بێتر خوەدی ل نڤیسکار و رەوشەنبیرێن ھەرچار پارچان دەرکەڤە. ژ بەر کو پەدەکە ل سەر خەتا رێبازا پیرۆزە و نە پارتیا پەرچەیەکێ تەنێیە.
وەکە د خالێن رێبازا پیرۆز دە ژی ھاتیە دەستنیشانکرن کو ئەو خوەدی ل ھەر چار پارچێن کوردستانێ دەردکەڤە و سەرمایا سەرۆک مەسعوود بارزانی 40 ملیۆن کوردن. یێن خوەدی سەرمایەیەک وەھا مەزن زەحمەتە کو داگیرکەر و پێگرتێن وان، تێک ببە.
یا ھەری گرینگ ئەوە کو دڤێت خەلکێ مە، گەلێ کورد ل باشوورێ کوردستانێ ب بکارئانینا دەنگێ خوە یێ دەمۆکراتیک دەرسەکێ بدە داگیرکەر و پێگرتێن وان. دڤێت ئەو باش بزانبن کو ھەگەر نە ژ بارزانی و پەدەکێ بە، دێ ئەردێ کوردستانێ یێ ئازاد ببە جھێ بەزا ھەسپێن داگیرکەران.
لۆما دبێژم: کوردنۆ ھای ژ خوە و داگیرکەران ھەبن. ڤێ یەکێ باش بزانبن کو بھێزبوونا پەدەکێ بھێزبوونا گەلێ کوردە و دێ کوردستانێ بھێزتر و دەمۆکراتتر بکە. ھەگەر ھوون دخوازن ب ئازادی، سەربەستی، ئارام و دەمۆکرات بژین، ب دەنگێ خوە ھوون دکارن ڤێ ب دەستبخن.
ئەڤ ھلبژارتنە ئەزموونا کوردێن باشوورێ کوردستانێ یە.یان ھوونێ ب دەنگێ خوە، خوە د ناڤا دەولەتێن جیھانی دە ئازاد و سەربخوە ببینن کو ئەو ژی پەدەکەیە، یان ژی ھوونێ ب دەنگێن خوە، خوە تێک ببن. هەلبژارتن، داخواز و بریار یا وەیە.
