کێمتر ژ دو ھەفتەیان مانە ژ بۆ ھلبژارتنێن پارلامەنتۆیا کوردستانێ. ئەڤ ھلبژارتن ژ بۆ ھەرێما کوردستانێ گرینگە. کوردستان ھەر تم خوەدی رەوشەکە حەسساس و ئاوارتە بوو، لێ ڤێ جارێ رەوشا ھەرێمی و جیھانی گەلەک مەترسیدارە. جوگراگیا مە نە تەنێ د ناڤەندا شەرێ داگیرکەران دەیە، لێ د ھەمان دەمێ دە د ناڤەندا شەرێ جیھانێ دەیە ژی. ژ بەر ڤێ دەرازینکا دیرۆکێ، د ڤێ ھلبژارتنێ دە دڤێت دەنگدەر ڤێ پێڤاژۆیا ئالۆز و ھەستییار ل بەر چاڤ بگرن و دەنگێ خوە بدن.
ھەر کەسێ کو دچە سەر سندۆقێ، دڤێت ب تایبەتی ل سەر شەرێ کو تێ ئەنجامدان بفکرە و نەچارە کو دەنگێ خوە بدە پارتیا کو دکارە ھەری کێم زرارێ و ھەری زێدە دەستکەفتیێ ژ بۆ وەلاتی بینە، چ ژێ حەز بکە چ ژێ حەز نەکە. ئەو نەچارە کو ژ بۆ پاشەرۆژا خوە و زارۆکێن خوە دەنگێ خوە بدە یێ کو ب راستی دکارە کوردستانێ بپارێزە. پارتیێن وەک “نەوەی نووێ”یا شاسووار عەبدولواحد ژ وان پارتیانە کو شیانێن وان یێن پاراستنا کوردستانێ سفرن. شاسووار ب خوە کەسێ یەکەمە کو د رەوشەکا ئالۆز دە دێ وەلاتی شوون خوە ڤە بھێلە و برەڤە.
لێ بەلێ، ھەر کەسێ کو ل پاشەرۆژا گەلێ خوە، وەلاتێ خوە و زارۆکێن خوە دفکرە، مەجبوورە کو ببێژە نا ژ یەنەکێ و سەرۆکێ وێ یێ نیقاشبار بافل تالەبانی رە ژی. ژ بەر کو بافل تالەبانی د ڤێ ھلبژارتنێ دە ل سەر ناڤێ کوردان بەشدار نابە. د ڤێ ھلبژارتنێ دە، دروشم، بەرنامە و سۆزێن بافل تالەبانی بەشەک ژ بەرنامەیا ئیرانێ و حەشدا شەعبی نە.
بافل تالەبانی چ دبێژە: ئەز دێ بارزانیان ھلوەشینم، ئەز دێ قادا غازا کۆرمۆرێ رادەستی حکوومەتا ھەرێما کوردستانێ نەکم، د مەسەلەیا دارایی یا کوردستانێ دە ئەز دێ ل کێلەکا ئیراقێ جھ بگرم و ل دژی پرۆژەیا ھەژمارا من بسەکنم.
ئەڤ ھەر سێ پرۆژەیێن بافل تالەبانی پرۆژەیێن حەشدا شەعبی نە. بافل تالەبانی ل سەر ناڤێ حەشدا شەعبی، ل سەر ناڤێ ئیرانێ بەشداری ھلبژارتنێ دبە. گەلێ کوردستانێ دڤێت ب ئاوایەکی گەلەک ھەستییار ل نەخشەیا کوردستانێ بنێرە و بەرسڤ بدە: گەلۆ د رۆژھلاتا ناڤین دە جھەک ھەیە کو ل کێلەکا ئیرانێ جھ گرتبە و ئارامی دیتبە؟ یەمەن، لوبنان، سووریە، ئیرانێ ل کو دەرێ دەست ئاڤێتبە، ئەو دەر بوویە جھێ شەری، خوین و ئستسمارێ. بەیرووتا کو ستێرکا رۆژھلاتا ناڤین بوو، ژ سالێن درێژ ڤە د دەستێ ئیرانیان دە د ناڤا هەژاریێ دە دگەڤزی، نھا ژی بوویە بەشەک ژ شەری. گۆتنا نا ژ بۆی بافل تالەبانی، گۆتنا نایە ژ بۆی وێرانکاریا ئیرانێ یا ل سەر کوردستانێ.
ئیران و داگیرکەران بریار دانە کو ھەرێما کوردستانێ بچووک بکن. دخوازن ڤێ یەکێ ب بکارئانینا جەحشێن کو روویێ رەش و خەنجەرا رەشا دیرۆکا کوردن، ئەنجام بدن. ژ بۆ ڤێ یەکێ ژی ژ سالا 2012 ڤە سیاسەتەکە ئیرانێ ھەیە کو تێ مەشاندن. حکوومەتا ھەرێما کوردستانێ ژ وێ دەمێ ڤە ل ھەمبەری ڤێ پرۆژەیێ یا ئیرانێ بەرخوە ددە. ب تایبەتی ژی حکوومەتا 9ەمین، تەڤی کو ھەولێر ب مووشەکان ھات لێدان، پەترۆل ھات دەستەسەرکرن و مووچە ب ھەیڤا نەھات شاندن ژی، تەسلیمی حکوومەتا بەغدایێ نەبوو. پەدەکە تەسلیمی رەژیما شیعە یا بەغدایێ نەبوو، وان ژی بافل تالەبانی دەرخست قادا سییاسەتێ. باسکێن ئاقلێ شیعە یێ ئیرانێ ل بەغدایێ، حەشدا شەعبی و دادگەھا فەدەرالا ئیراقێ قانوونا ھلبژارتنێ ژ بۆ خورتکرنا یەنەکێ گوھەرتن. بافل تالەبانی پەردەیەکە کو تێ بکارئانین ژ بۆ بەغدا و تەھرانێ ل ھەولێرێ بکن دەستھلاتدار و مەشرووع بکن. گۆتنا نا ژ بافل تالەبانی رە، گۆتنا نایە ژ ئیراقیکرنا کوردستانێ رە.
ژ بەر ڤێ ئەم دبێژن د ڤێ ھلبژارتنێ دە دو خەت پێشبرکیێ دا نە: خەتا تەسلیمیەتێ یا کو ئیران و داگیرکەرێن ھەرێمی پشتگریێ ددنێ یەنەکە و خەتا بەرخوەدانێ یا کو پەدەکە پێشەنگیا وێ دکن. گۆتنا نا ژ بافل تالەبانی رە، گۆتنا نایە ژ وان کەسان رە کو دخوازن ستاتوویا ھەرێما کوردستانێ ھلوەشینن.
قەسە کرن ل سەر رۆلا بافل تالەبانی ل ھەمبەری دەولەتا ترک رەوشێ ناگوھەرینە. ژ بەر کو ئەڤ ژی تشتەکە کو ب هاندانا حەشدا شەعبی ڤە تێ کرن. بافل تالەبانی د ھەمبێزا ئیرانێ و حەشدا شەعبی دە نکارە ل ھەمبەری ترکیەیێ یان ژی ھێزەکا دن خوە بکە وەلاتپارێز. ئەو خوە ب سەد ئاڤا ژی بشووت ژ وێ قرێژێ پاقژ نابە.
بافل تالەبانی نە تەنێ نە سیاسەتمەدارەکی کوردستانییە، خوە نە کەسەکی کوردستانییە ژی. بافل تالەبانی ب خیانەتا 16 جۆتمەھا کەرکووکێ ئەڤ یەک فێم کر، “تشتێن کو ئەز ب کەسایەتی، شیان، ھەلوەست و خەباتا خوە ب دەست ناخم، ئەز دێ ب خیانەتێ ب دەست بخم”. و ئەو دکارە ژ بۆ بەرژەوەندیێن خوە یێن تاکەکەسی ھەر جورە چاڤسۆرییێ بکە. یێ کو د شەڤەکێ دە ژ کەرکووکێ ڤەکشیا و حەشدا شەعبی ئانی، دکارە د شەڤەکێ دە ھەمان تشتی ل ھەولێرێ ژی بکە.
ئەشکەرەیە کو بافل تالەبانی د ھلبژارتنان دە نابە پارتیا یەکەم، لێ ھەکە چەند کورسیێن زێدەتر ژی بگرە ل گۆری ھلبژارتنا بۆری، دێ زاندێ خوە ھلدە ژ بۆ کو رەوشێ ئالۆز بکە. بافل تالەبانی دێ د ڤێ رەوشا ئاژاوەگێریێ دە ھەر تشتی بکە ژ بۆ کو رێگریێ ل ئاڤاکرنا حکوومەتەکا زوو یا کوردان بکە. گەر پێویست بە دێ کوردان بکشینە شەرەکی ناڤخوەیی یان ژی ھەول بدە کو سلێمانیێ بکە ئیدارەیەکا جودا. ژ بەر ڤێ ئەم دبێژن کو گۆتنا نا یا خورت یا کوردان ژ بافل تالەبانی رە، گۆتنا نایە ژ شەرێ ناڤخوەیی یێ کوردان رە و رادەستکرنا سلێمانی ب سەر بەغدا ڤەیە.
گۆتنا نا ژ بافل تالەبانی رە، گۆتنا نایە ژ سازیێن دژمنێ کورد، نەتەوەپەرەستێن شیعە و پاشڤەروویێن حەشدا شەعبی رە.
بافل تالەبانی ب خوەزاییا خوەیا خوەحەز، بەرژەوەندیپەرەست و ئەگۆیست نە تەنێ سەرێ کوردستانێ، لێ سەرێ ھەڤالێن خوەیێن رێ ژی خوار. ژ بۆ کو ببە سەرۆکێ یەنەکێ مرۆڤ قوربانی کرن، خوین رژاند، ژ وان ناڤێن کو خیانەت ل وان کری و ژ وان کەسێن کو خوینا وان رشتی ژ خوە رە تەخت چێکر. ھەموو ناڤێن کەڤنێن یەنەکێ ھاتن دوورخستن. کەسێن وەک ھاوکار جاف ژ سلێمانیێ ژی دەرکەتن لێ ژ زلما وی خلاس نەبوون. ل بەر چاڤێن زارۆکێن وی ھاوکار کوشت. ئەڤ مرۆڤێ بێرەحم، ئەڤ مرۆڤێ زالم، ھەڤالکوژ، بێ رەوشت، بێ وەفا نھا وەک دیکتاتۆرەکی یەنەکێ دمەشینە و بەحسا دەمۆکراسیێ ژ بۆ کوردستانێ دکە.
کەسێن مینا مەلا بەختییارێ کو نیڤا ژیانا خوە بێھتر ب خزمەتکرنا یەنەکێ رە تەرخان کریە ژ ئالیێ بافل ڤە ئێریش ل سەر سازیێن وی هات کرن و ب دارێ زۆرێ رەخنەگرێن ناڤخوە بێدەنگ کرن. گۆتنا نا ژ بافل تالەبانی رە، گۆتنا نایە ژ دینەکی دەستھلاتداریێ یێ بێ رەوشت و بێ ئەخلاق رە.
نھا بافل تالەبانی ژ بلی درێژکرنا تەمەنێ رێخستنا خوە و بدەستخستنا ھێزا ماددی چ بەرنامە و پرۆژەیەک نینە. یەنەکێ چ جاران ل ھەمبەری چ داگیرکەران ھەلوەستەکا زەلال وەرنەگرتیە. ژ ڤر و پێ ڤە ژی تشتەک نینە کو ئەڤ سازیا سیاسی یا لەرزۆک و رەڤۆک بکە. گەلێ کوردستانێ نەچارە کو ببێژە نا ژ ڤێ پارتییا گەنی و دز رە، ژ ڤێ ھەلوەستا جاش رە نا-نا-نا.
گۆتنا نا ژ بافل تالەبانی رە، گۆتنا نایە ژ ستووخواریا ل ھەمبەری داگیرکەریێ رە.
سیاسەتا بافل تالەبانی ژ بۆ ھەر چار پارچەیێن کوردستانێ سیاسەتەکا مەترسیدارە. ل سەر فەرمانا دەولەتا ئیرانێ پارتیێن کوردستانا رۆژھلات ژ سلێمانیێ دەرخستن، خەباتکارێن وان رادەستی ئیرانێ کرن. ل سلێمانیێ ئاژانێن ترکیێ و ئیرانێ دگەرن لێ شۆرەشگەرێن رۆژھلاتی نکارن بگەرن. بافل تالەبانی یێ کو ژ بۆ بەرژەوەندیێن خوە ھەر جورە تێکلیێن قرێژ ب ھەر جورە داگیرکەریێ رە پێش دخە، زرارێ ددە تێکلیا کوردان یا د ناڤ خوە دە. ژ بەر ڤێ یەکێ ب دەنگەک بلند گۆتنا نا ژ بافل تالەبانی رە ئەرکەکی نەتەوی یە.
بافل ژ ئالیێ سیاسی ڤە لەرزۆکە، ژ ئالیێ ئیدەۆلۆژیک ڤە پراگماتیکە، ژ ئالیێ کەسایەتی ڤە گەنیە، ژ ئالیێ روحی ڤە ھلوەشیاییە، ژ ئالیێ کاراکتەری ڤە بێ عەسلە، ژ ئالییێ سییاسی ڤە جەحشە، خوە فرۆشە-خاک فرۆشە و خەلک فرۆشە ژی. بافل تالەبانی بەلایەکە کو داگیرکەر دخوازن بکن بەلایا سەرێ کوردان. گۆتنا نا ژ وی رە، گۆتنا نایە ژ ھەر جورە لیستکا داگیرکەران و ژ دەمارێ جەحشاتیێ د ناڤ کوردان دە. گۆتنا نا ژ بافل تالەبانی رە، خوەدی دەرکەتنا کوردان یا ل ئیرادە و کەرامەتا کوردایەتییێ یە. لۆما ژی ژ تریاککێشەکێ رە نە جارەک ھەزار جاران نااا.
