مەمەت مێردینی
ھەڤسەرۆکاتیا کۆنسەیا رێڤەبەرا کەجەکێ تێکلداری ھلبژارتنێن پارلامەنتۆیێ یا باشوورێ کوردستانێ کو وێ 20 جۆتمەھا 2024 بێ لدارخستن، داخویانیەک دا و دەستنیشان کر کو گەلێ کورد دڤێت ل دژی خەتا ھەڤکار و خیانەتێ ھەلوەست نیشان بدە، لەوما ئەڤ ھلبژارتن پر گرینگە. هەیانی ڤڕ ت پرسگرێک و شاشتیەک د داخویانیا کەجەکێ-پەکەکێ دە تونەیە، هەیانی ڤڕ ئەو راست دبێژن و ل سەر هەر کوردەکی ب روومەت و وەلاتپارێز پێویستە د هلبژارتنێن 20ی جۆتمەهێ دە دەنگ ب ئالی و نامزەدێن وەلاتپارێز بدن و ل دژی خایینان بسەکنن. لێ بەلێ دەما وەختا دیارکرنا نامزەد و ئالیێن وەلاتپارێز تێ، بێی گومان ژ بەر کو کەجەکە-پەکەکە ب خوە و سەرۆکێ خوە ڤە نوونەرتیا خەتا هەڤکار و خیانەتێ ل کورد و کوردستانێ دکن نابە مرۆڤ ب یا وان بکە، ژ بەر کو ئەوێ کەس و ئالیێن ولات پارێز رەش بکن و ئالیێن خایین یێن وەکە خوە ژی بکن وەلاتپاریز.
کەجەکێ د داخویانیا خوە دە گۆت: “گەلێ کوردستانێ یێ وەلاتپارێز دڤێت د ھلبژارتنێ دە پشتگریێ بدە ھێز و نامزەتێن وەلاتپارێز، دەمۆکراتیک و نەتەوەیی و ل سەر ڤی بنگەھی ھەلوەستا خوە نیشان بدە. دڤێت ل دژی پەدەکێ و بارزانیان کو نوونەریا خەتا ھەڤکار و خیانەتێ دکن، پشگری ب نامزەت و ھێزێن وەلاتپارێز بێ دایین. ئەنجامێن کو دەربکەڤن ژ بۆ رزگارکرنا باشوورێ کوردستانێ و تەڤاھیا کوردستانێ یا ژ پەنجێ داگیرکەری و قرکرنێ و ژ بۆ پێشخستنا سیستەمەکە دەمۆکراتیک و ئازادیخواز، دێ پر گرینگ بە.” هوون لێ بنێرن، د ڤڕ دە دو روویی یا کەجەکێ-پەکەکێ ب زەلالی خویا دبە، گەلۆ ئەم هن پرسان بکن، ما قەی ئەڤ پەدەکە و بارزانی بوون تەڤ باکور، گرێ سپی، سەرێ کانیێ و عەفرین، کەرکووک و مەخموور و هتد… رادەستی داگیرکەران کری و خیانەت کری، ما قەی ئەڤ بارزانی بوو داخوازا لێبۆرینێ ژ دایکێن لەشکەرێن ترک یێن هاتینە کوشتن کری؟ گەلۆ ما قەی ئەڤ پەدەکە و بارزانینە کو دبێژن ب سایا سەرێ مە نەبوویا نها رەژێما سووریەیێ نەدکاری خوە ل سەر لنگا بگرە؟ ما ئەڤ پەدەکەیی و بارزانی نە کو دبێژن مە ئالا ئیراقێ ل شەنگالێ بلند کریە؟ ئەڤ پەدەکەیی و بارزانی نە بوویە پارێزەرێن سینۆرێ ئیرانێ؟ گەلۆ ما ئەڤ پەدەکەیی و بارزانی نە ب حەشدا شەعبی و ئەنیا مقاوەمێ و دەولەتا کوور یا ترکیەیێ رە بوویە هەڤپەیمان و هەر کو دچە زێدەتر خاکا پیرۆزا کوردستانێ ددە دەست داگیرکەران؟
بەلێ راستە، هلبژارتنێن 20ی جۆتمەهێ یێن باشوورێ کوردستانێ ھەم ژ بۆ باشوورێ کوردستانێ ھەم ژ بۆ تەڤاھیا کوردستانێ گرینگە و دڤێت دەنگدێرێن باشوور بینن بەر چاڤێن خوە کا کیە هەولا پاراستنا دەستکەفتیێن گەلێ باشوور ددە و کیەژی هەول ددە ڤان دەستکەفتیان ژناڤ ببە و ل سەر سێنیەکا زێری تەسلیمی داگیرکەران بکە.
تەڤی کو د داخویانیا خوە دە ب تا ئاوا کەجەکێ دیار نەکریە کو پشتگریێ ددە کێ، لێ بەلێ ب زەلالی نە جارەکی ب دەهان جاران ئێماژە ب ناڤێ تاکە پارتیا وەلاتپارێز و نەتەوی یا هەر چار پەرچەیێن کوردستانێ کریە و وەکە پارتیەکە خایین دایە ناساندن و داخواز ژ دەنگدێرێن باشوور دکە پەدەکە نەبە وەکە دن دەنگ ب کێ بدن دروستە، لێ بەلێ گەلێ باشوور هشیارە و دبینە کییە هەول ددە باشوور ژناڤ ببە و کیەژی هەول ددە باشوور بێ پاراستن و بەر ب دەولەتبوونێ ڤە بچە.
بێ گومان مەبەستا کەجەکێ-پەکەکێ ژ پارتی و نامزەدێن وەلاتپارێز ئەو کەس و ئالینە یێن کو بوویە سەدەم سەدی 51 ژ خاکا باشوورێ کوردستانێ رادەستی حەشدا شەعبی و دەولەتا دگیرکەرا عیراقێ بێ کرن، و رۆژانە ل شۆنا ئێریشی سەر داگیرکەرێن کوردستانێ بکن، ئێریشی سەر پەدەکێ و بارزانیان دکن، ژ بەر کو کەجەکە-پەکەکە وسا دفکرن هەر کەس و ئالیێ ئێریشی پەدەکێ و بارزانیان بکە وەلاتپارێز و نەتەوییە.
بەلێ، یێن کو پێشەنگیێ ژ خەتا هەڤکار و خیانێ رە دکن، یێن کو نکارن یەک مەتر ژ کوردستانێ بپارێزن، یێن کو ل شەنگال و مەخموورێ ئالا ئیراقێ، ل رۆژئاڤا ئالا سووریەیێ و ل باکور ژی ئالا ترکیەیێ ددن دەستێ جوانێن کورد نە ب تەنێ نکارن ولاتپارێز و خایینان ژ هەڤ جودا بکن، بەلکو دێ زەرەرەک پڕ مەزن ل گەلێ کورد بدن، یێن کو ل هەموو پەرچەیێن کوردستانێ خیانەت پێش خستیە و بوونە داردەستێ دەولەتێن داگیرکەر پەکەکە ب خوەیە.
هەر کەس باسی وەلاتپاریزیێ و کوردایەتیێ بکە بلا بکە، لێ مافێ پەکەکێ تونەیە ڤێ یەکێ باس بکە، بلا پەکەکە و پەکەکەیی ژ کەرەما خوە ب تەنێ یەک دەستکەفتیێ نەتەوی یێ خوە و سەرۆکێ خوە باس بکن، ب درێژاهیا دامەزراندنا پارتیا خوە هەیانی نها کارینە چ ژ کوردان رە بکن؟ چەند باژار و گوندێن کوردان ئازاد کرنە؟ پەکەکێ ژ خەینی خیانەت و هەڤکاریا دوژمنان ت تشتەک دن نەکریە، ژ بۆی ڤەشارتنا ڤێ یەکێ ژی هەول ددە ب ئێریشکرنە سەر پەدەکێ و بارزانیان روویێن خوە یێن رەش سپی بکن، لێ بەلێ قرێژا ل سەر روویێ وان یێ رەش ب ئێریشا ل سەر پەدەکێ و بارزانیان پاقژ نابە، ئێدی گەلێ کورد باش دزانە کێ کوردایەتی و وەلاتپارێزیێ دکە و کی ژی بوویە داردەستێ دوژمنان.
د بەشەکە دن یا داخویانیا خوە دە کەجەکە-پەکەکە دبێژە، “پەدەکە و بارزانی ھێزەکە وسایە کو ھاتنە سەر تێکۆشینا گەلێ باشوورێ کوردستانێ و ژ بۆ بەرژەوەندیێن خوە بازرگانیا کوردایەتی و کوردستانێ ل گەل دژمن و ھێزێن دەرڤە کریە.” ئەم ل سەر ڤێ یەکێ ت تشتەکی نابێژن، ب تەنێ ئەڤ نەبە، گەلۆ ب راستی ژی ئەڤ پەدەکەیە کو هاتیە سەر تەکۆشینا گەلێ باشوورێ کوردستانێ و بازرگانیا کوردایەتێ دکە یان ژی پەکەکە؟ ژ خوە هەر کەس دزنە ب پێشەنگیا پەدەکێ و بارزانیان گەلێ باشوور کاری خوە ژ دەستێ دەولەتا داگیرکەرا ئیراقێ رزگار بکە و ستاتویەکا ئازاد ژ کوردان رە دامەزرینە کو ببە سەیوانەک ژ بۆی کوردێن هەر چار پەرچەیێن کوردستانی، یێن کو هاتیە سەر تەکۆشینا گەلێ باشوور ئەون یێن کو رێ نادن خەلک ڤەگەرە سەر گوند و وارێن خوە و ئاڤەدان بکن، ئەون یێن کو دبێژن رەژێما سەدام ئەڤ دەر فرۆتیە مە، ئەون یێن کو هەول ددن ب هەڤپەیمانێن خوە رە جارەکە دن باشوور بێخن بن دەستێ دەولەتا دگیرکەرا ئیراقێ و “پلانا هەولێرێ” یا کو سەرۆکێ وان پێشنیاری بەرپرسێن میتا ترکیەیێ کری ل باشوور جیبجی بکن.
پارتیەک ژ ئالیێ کەسەکی ڤە هاتبە دامەزراندن کو کرێگرتیێ میتێ بە، زەواجێ ب کەچا بەرپرسەکی میتێ رە پێک بینە، ببێژە مە ب ئالیکاریێن لۆجستیک یێن میتێ خوە ب رێخستن کریە، دەما تێ گرتن نەکارە یەک دەقە ل بەر خوە بدە، هێژان زلەهەک ل روویێ وی نەکەتبە و ل سەر هەر تشتی ئیتیرافێ بکە، ببێژە ل من نەخن دایکا من ترکە، ئەز ژ بۆی خزمەتا دەولەتا خوە “ترکیەیێ” ئامادەمە و هتد.. هەلبەت نکارە ولاتپارێزان ژ خایینان جودا بکە و دێ هەر تشتی بەرەڤاژی شیرۆڤە بکە، ئانکو پەکەکە ژ هەر تشتی رە ببێژە شاش بێی گومان ئەو تشت نە شاشە و ژ گەلێ کورد رە باشە، ژ هەر تشتی رە ژی ببێژە خەراب بێ گومان تشتەکی باشە و د بەرژەوەندیا گەلێ کورد و کوردستانێ دە یە.
لۆما دبێژم ڤێ جارێ کەجەکێ راست گۆت، لێ بەلێ ب تەنێ د یەک رستە دە کو ئەو ژی ئەڤە “دڤێت گەلێ باشوور دەنگ بدە نامزەد و ئالیێن ولاتپارێز”، بەلێ، گەلێ باشوور گەر دخوازە ژ دەست داگیرکەران رزگار ببە و ژیانەکە باشتر بژی، دڤێت دەنگ بدە هیزێن وەلاتپارێز، ت هێزەک ژی مینا پەدەکێ وەلاتپاریز ل باشوور تونەیە، دیرۆک شاهدی ڤێ یەکێ یە.
