سەرۆکێ کۆنسەیا رێڤەبەرا کەجەکێ جەمیل بایک، د 7ی جۆتمەهێ دە ب ئاژانسا ئانەفێ یا پەکەکێ رە ھەڤپەیڤینەک کر، د ڤێ هەڤپەیڤینێ دە بایک پارنی و باسی «کۆمپلۆیا ناڤدەولەتی یا ل دژی ئۆجالان» کر، و جارەکە دن وەکە ئەرکێ خوە یێ هەمیشەیی د بەشکە نرخاندنێن خوە یێن بێ نرخ دە باسی پەدەکێ و مالباتا وەلاتپارێزا بارزانی کر، ئێدی نەما تو بکاری گوهداری داخویانیەکە بەرپرسەکی/ێ پەکەکێ بکی و تێ دە ئێریشا ل سەر نرخێن کوردان و مالباتا بارزانی و پەدەکێ نەبینی، چەوا کو مرۆڤ نکارە بێی خوارن و ڤەخوارن بژی، ووسا ژی بەرپرسێن پەکەکێ نکارن بێی ئێریشا ل سەر مالباتا بارزانی و پەدەکێ داخویانیەکێ بدن و بژین.
بایک د هەڤپەیینا خوە دە باسی ڤەگەرا عەڤدللا ئۆجالان یا ژ بۆی ترکیەیێ کر و ئەڤ یەک ب «کۆمپلۆیا ناڤنەتەوەیی» ب ناڤ کر، لێ بەلێ ئێدی ژ هەر کوردەکی ولاتپارێز رە ئەشکەرە بوویە کو نە ب تەنێ ئەڤ ڤەگەر کۆمپلۆیەکە ناڤنەتەویی نەبوو، بەلکو ڤەگەرەکە ب کێفا دلێ ئۆجالان ب خوە بوو، ژ بەر کو ئێدی ژ ور پێدە دەولەتا کوورا ترکیەیێ ئەرکەکی نوو د هۆتەلا ل ئیمرالیێ ژ ئۆجالان رە دا، ئەرکا نوو ژی ئەڤ بوو کو وەکە شێورمەندەکی دەولەتا ترک، وەکە تاشەرۆنێ دەولەتێ بخەبتە، ئەڤ یەک ژی د ڤیدیۆیێن ئۆجالان یێن کو ب دەستێ یەک ژ کارمەندێن میتێ هاتیە کشاندن و پارڤەکرن ب زەلالی تێ دیتن.
بایک و پەکەکە باسی کیژان بەرخوەدان و تەکۆشینا ئۆجالان دکن؟!
ژ دەما کو ئۆجالان ڤەگەرایە ترکیەیێ هەیانی نها، پەکەکە باسی ئیشکەنجە و تەجریدا ل سەر ئۆجەلان دکە، لێ بەلێ گەر مرۆڤ ل وێنەیێن ئۆجالان بنێرە، ب تایبەتی وێنەیێن کو د دەما سەرەدانا دەمیرتاش و بەرپرسێن دن یێن هەدەپێ د مەدیایێ دە هاتن پارڤەکرن، مرۆڤ ب زەلالی دبینە نە ب تەنێ ت ئیشکەنجە و تەجرید ل سەر ئۆجالان تونە، بەلکو ئۆجالان د ژیانەکە پڕ خوەش دە ژی دژی، ئەم ڤێ یەکێ ب دەلیل ئیسبات دکین، ئەم ژ هەر کوردەکی دخوازن جارەکە ب تەنێ ژی بە وێنەیێن زیندانیێن زیندانا ئامەدێ ل بیرا خوە بینن، گەلۆ کیژان ژ وان ب قاسی ئۆجالان قەلەو بوو؟ زکێ کیژان ژ وان وەکە توورکێ ئاری شۆر ببوو؟ ما قەی گەر ئیشکەنجیەک ل سەر ئۆجالان هەبووییا دا ب وی قاسی عوورێ وی شۆر ببە؟!! دا ئەوقاسی روویێ وی گەش بە؟ گەلۆ دەولەتا ترک رێ ب زیندانیێن ئامەدێ ژی ددا پرتووکان بخوینن، د زیندانێ دە تێکلیێن سیاسی دەینن و پارتیەکێ ئاراستە بکن؟ بێ گومان نااا، لێ چما ڤێ یەكێ ژ ئۆجالان رە دکن؟ ژ بەر کو ئۆجالان تاشارۆنێ وانە، ژ بەر کو تشتا ژ ئۆجالان تێ خوەستن ژ دەولەتا ترک رە دکە، ڤا جەمیل بایک و پەکەکە باسی کیژان بەرخوەدان و تەکۆشینا ئۆجالان دکن؟!
ئۆجالان د ئیمرالیێ دە د شەرت و مەرجێن پڕ خوەش دە دژی
نە ب تەنێ ئاپۆ ل ئیمرالیێ د شەرتێن پر زۆر و زەھمەت دە، د ناڤ بێ دەرفەتیان دە ل دژی سیستەما ترکیەیێ نەسەکنیە، بەلکو ئاپۆ د ئیمرالیێ دە د شەرت و مەرجێن پڕ خوەش دە دژی، دەرفەتێن د دەست ئاپۆیێ پەکەکێ دە ت جاران، د چ دەم و دەورانان دە د دەستێ ت یەک ژ زیندانیێن کورد یێن کو ب راستی ژی ژ بۆی کوردستانەکە سەربخوە کەتنە زیندانێ دە نەبوونە و نابن ژی، ئیمکاناتێن ل ئیمرالیێ ب ئاپۆ هاتنە دایین، مینا ئیمکاناتێن د هۆتەلێن 5 ستێر دە نە، گەر مرۆڤ ب زیندانا ئامەدێ بەراورد بکە، ئەڤ دەرەو کو ئۆجالان د بن ئیشکەنجەیێ دە یە ئێدی نەما گەلێ کورد پێ وەرە خاپاندن، گەلێ کورد ئێدی هشیارە و دزانە چ دقەومە.
بایکێ کو مل ب ملێ رێبەرێ خوە بەرپرسیارێ ھەموو پێڤاژۆیێن ئیخانەتێ یێن د دیرۆکا پەکەکێ یا 45 سالان دە یە، د بەشکە هەڤپەیڤینا خوە دە دبێژە: «نھا راستیا رێبەر ئاپۆ، بەرخوەدانا کو ل ئیمرالیێ دمەشینە، ھەم راستیێن ھەموو کوردان دەرخستن ھۆلێ. د خەتا تەڤگەرا کورد دە، خەتا خیانەتێ چیە، خەتا ب دژمن رە ھەڤکاری چیە، خەتا وەلاتپارێزی، شۆرەشگەری چیە، ژ مرۆڤان چ دخوازە ئەڤ ژ ھەر ئالی ڤە نیشان دا، ب ھەر کەسی دا فێھمکرن. ژ بۆ ڤێ راستیا مالا بارزانی د ئالیێ کوردان دە ھات فێھمکرن». ئەم نزانن بایک ب ڤان نرخاندنێن وەکە خوە بێ نرخ دخوازە کێ بخاپینە، هەر کەس دزانە کەسێ کو هێژان زلەهەک ل روویێ وی نەکەتبە و دەست ب ئیتیراف و خوە زەلیلکرنێ بکە، هێژان دەما د بالەفرێ دە دەما دبێژە، «ل من نەخن، دایکا منژی ترکە، ئەز ژ بۆی خزمەتا دەولەتا خوە ‘ترکیێ’ ئامادەمە» نکار ببە لەهەنگ و تەمسیلا بەرخوەدێریا کوردان ناکە، ئەڤجا راستیا ئۆجالان ئەوە یا کو د ڤیدیۆیان دە دیار دبە، راستیا مالباتا بارزانی ژی کو ئەڤ زێدەتر ژ 130 سالانه ل بەر خوە ددن و کارینە ستاتویەکە ئازاد ژ باشوور رە چێکن و ببن ئیلهامبەخشێن تەڤ ولاتپارێزێن کورد ل بەر چاڤە و هەر کەس دزانە، ب چەند دەرەو و هەڤۆکێن سەختە یێن بایک و پارتیا وی ئەڤ مالباتا ب روومەت، ئەڤ مالباتا نرخێن کوردان دپارێزە ب ت ئاوا قرێژ نابە.
هەر کوردەکی ولاتپارێز دزانه مالباتا بارزانی ژ بۆی کوردان تەکۆشینێ دکە، ئەنجامێن بەرخوەدانا مالباتا بارزانی دیارن، تشتا نەدیار دەستکەفتیێن وەنە
بەلێ، هەر کوردەکی ب روومەت، هەر کوردەکی ولاتپارێز وسا فێهم دکە کو مالباتا بارزانی ژ بۆی کوردان تەکۆشینێ دکە، ئەڤ راستیەکە دیرۆکییە و نها ئەم ل باشوورێ کوردستانێ دەستکەفتیێن ب سەرکردایەتیا ڤێ مالباتا کوردان ب دەست خستی دبینن، لێ هوون ژ کەرەما خوە یا نەیی ژ مە رە ببێژن دەستکەفتیێن وە و سەرۆکێ وە یێ د هۆتەلا ئیمرالیێ دە دژی هەیا نها ژ بۆی کوردان چ بوونە؟ گەر مالباتا بارزانی پێویستیێن خوە ئەساس گرتبان دا ب رەژیما سەدام رە ل هەڤ بکە، دەما سەدام ژ بارزانیێ نەمر رە گۆتی، دەڤ ژ تەکۆشینا ژ بۆی کوردستانێ بەردن ب قاسی کو هوون دخوازن ئەمێ پەرە و ملک و مالێ ل بەغدایێ بدن وە، ژ خوە رە ببن تاشارۆن، بازرگان و کارساز، ئەمێ پەرەیەکی وسا بدن وە کو هەیانی 10 نەڤیێن وە ژی بخوەن نەکارن خەلاس بکن، لێ نەمر بارزانی چ ژ سەدام رە گۆ؟ گۆت نا ئەم پەرە ناخوازن، ئەم ژ بۆی مافێن کوردان دخەبتن، ئەم ژ بۆی ولاتەکی ئازاد دخەبتن و لبەر خوە ددن و ئەمێ هەیا داوی نەفەس ژی ل بەر خوە بدن و بەر ب چیایێن کوردستانێ ب رێ کەت، دو شۆرەشێن مەزن ل دار دخستن و هود… خوە ژ بۆی دژمن نەتەواند و ب سەر کەتن و نها ئەنجامێن بەرخوەدانا مالباتا بارزانی دیارن، تشتا نەدیار دەستکەفتیێن وەنە، هەیانی نها نە ب تەنێ هوون نەکارینە یەک مەتر ژ خاکا کوردستانێ رزگار بکن، بەلکو وە تەڤ باکور، بەشەک ژ رۆژئاڤا و بەشەک ژ باشوورێ کوردستانێ ژی رادەستی دەولەتا ترکیەیێ کریە.
ئێدی ژ هەر کەسی رە ئەشکەرە بوویە، گەر کورد ل هەر چار پەرچەیێن کوردستانێ دخوازن ژ دەست دەولەتێن کۆلۆنیالیست رزگار ببن دڤێ ڤەگەرن سەر رێبازا بارزانیێ نەمر، ژ بەر کو یەکانە رێبازا کو دکارە کوردان بەر ب کەنارێن ئارامیێ ڤە ببە و وان رزگار بکە، رێبازا بارزانی یە، ئەڤجا هوون چەند بقیرن ە هەوار بکن، دەرەوان رێز بکن و وەکە خوە بێ نرخ داخویانیان بدن ت فه‌یده تێ دە تونە، ژ بەر کو راستیا وە کو هوون تەمسیلا خەتا ئیخانتێ ل هەر چار پەرچەیێن کوردستانێ دکن، ژ هەر کوردەکی رە ئەشکەرە بوویە.
