بۆچی نا بۆ یه‌نه‌كێ و بافل تالەبانی
هه‌لبژارتنێن په‌رله‌مانێ کوردستانێ د دەمەکێ ئالۆز دا دهێنه کرن کو رۆژهلاتا ناڤین بوویە مه‌یدانا شەر. د ڤێ رەوشێ دا دەولەتێن کو کوردستان داگیرکرین، هەول دده‌ن کو ستاتوویا هەرێما کوردستانێ، یا هەره رەوا یا کوردان، ژ ناڤ ببه‌ن.
دەما کورد دەنگێ خوە دده‌ن، د ڤی شەرێ جیهانی و رۆژهلاتا ناڤین دا، دڤێت دەنگێ خوە بده‌نه کەسێن کو دشێن کورد و کوردستانێ بپارێزن.
پارتیێن وەک نەوەی نوێ یا شاسوار عه‌بدولواحد، پارتیێن کو شیانێن پاراستنا کوردستانێ نه‌یی، شاسوار ب خوە کەسەکە کو د رەوشا شه‌ری دا دێ یەکەم کەس بیت کو وەلاتی ب جهـ دهێلیت و د خۆله‌كا یەکەم دا تەسلیم ببیت.
رەوشا یه‌نه‌كێ هێژ خرابترە. ژ بەر کو ئەو ژ خوە تەسلیم بوویە. سێ سۆزێن كو بافل تالەبانی د بانگه‌شه‌یا هه‌لبژارتنێ دا داین، ڤێ چه‌ندێ نیشان ددەن.
سەرۆکێ نیقاشبارێ یه‌نه‌كێ، مستر. بافل دبێژە:
ئەز دێ بارزانییان هه‌لوەشینم، ئەز بیرێن گازا کۆرمۆر تەسلیمی حکوومەتا کوردستانێ ناکم، د پرسا داراییا کوردستانێ دا ئەز دێ ل ئالیێ ئیراقێ بم و ل دژی پرۆژەیا هەژماری من راوه‌ستم.
هەر سێ پرۆژەیێن بافل تالەبانی ژی پرۆژەیێن دژمنێ کوردان و پاشڤەروویێن حه‌شدا شه‌عبینه. و مستر. بافل ل سەر باسکێ ئیراقێ، حه‌شدا شەعبی و ئیرانێ بەشداری هه‌لبژارتنێ دبیت.
ئیران ژ بۆ کو كابینه‌یا 9ێ یا مەسروور بارزانی تەسلیم ببیت، دەست دانایه سەر پەترۆلا کوردستانێ، مووچه بڕینێ و ب مووشەکان ل هەولێرێ دا. لێ دڤیا د دیرۆکا کوردان دا خەنجەرا خیانەتێ یا ژەنگی ژی ب کار بینیت. بافل تالەبانی وەک سەرۆک پێشکێشی کوردان کر و ژ بۆ کو وی بهێز بکەت، ل گه‌ل دادگەها فیدرالا ئیراقێ قانوونا هه‌لبژارتنێ گوهارت.
واته بافل تالەبانی هەسپەکە ژ بۆ ئیراقیکرن، شیعه‌کرن و ئیرانیکرنا هەولێرێ دهێته بکارئینان. گەر ئەم بێژینه بافل تالەبانی نا، تێ واتەیا کو ئەم دبێژنه هەسپێ ترواده یێ ئیرانێ نا.
د ڤێ هه‌لبژارتنێ دا دو خەت دێ پێشبرکیێ كه‌ن: خەتا تەسلیمیەتێ یا کو ژ ئالیێ ئیران و داگیرکەران ڤە دهێته پشتگریکرن ئانکو یه‌نه‌كه و خەتا بەرخوەدانێ یا کو په‌ده‌كه پێشەنگیا وێ دکەت. گۆتنا نا ژ بافل تالەبانی را، نا گۆتنه بۆ کەسێن کو دخوازن ستاتوویا هەرێما کوردستانێ هه‌لوەشینن.
هەسپێ ترواده یێ ئیرانێ مستر. بافل نه‌شێت کوردان ژ تێکچوونێ د شەرێ رۆژهلاتا ناڤین دا رزگار بکەت، بەرۆڤاژی دێ کوردستانێ كه‌ته مه‌یدانا شەری یا ئیرانێ. به‌رێ خوه بده‌نه یەمەن، سووریە و لبنانێ، ل هەر وەلاته‌كێ کو ئیران ل وێرێ بوویە، مرن، مالوێرانی و کۆچبەری لێ هەیە.
ژ بەر ڤێ یەکێ، گۆتنا نا ژ بافل تالەبانی را، نا گۆتنه بۆ وێ کوردستانا دبیته مه‌یدانا شەرێ ئیرانێ.
گۆتنێن بافل تالەبانی ل دژی ترکیێ ژی نەنیشانا وەلاتپارێزیێ یە. ئەو ژی گۆتنێن ڤالا یێن د هەمبێزا ئیران و حه‌شدا شەعبی دا نە. یێن کو کەرکووک ل بەر چاڤێ گەلێ کورد فرۆتیه ئیراقێ، نه‌شێن یاریا وەلاتپارێزیێ ل سەر مە ده‌رباز بكه‌ن.
ئه‌وێ کەرکووکێ دفرۆشیت بێ گومان دێ هەولێرێ ژی فرۆشیت. ژ بەر ڤێ یەکێ، گۆتنا نا ژ بافل تالەبانی را، نا گۆتنە بۆ وەلاتپارێزێن سەختە و ئه‌وێن کو ئاخا وه‌لاتی دفرۆشن.
بافل تالەبانی نه‌شێت ببیته پارتیا یەکەم ئەو تنێ دخوازیت هندەک ده‌نگێن زێدەتر ببه‌ت و وێ بکەت کو کورد د فه‌وزایا رۆژهلاتا ناڤین دا بێ حکوومەت بمینن.
بافل تالەبانی دخوازیت پشتی هه‌لبژارتنێ سلێمانیێ ژ هەرێما کوردستانێ ڤەقەتینیت و کوردان بکێشیته شەرێ ناڤخوه‌یی. ژ بەر ڤێ یەکێ، نا گۆتن بۆ بافل تالەبانی، نا گۆتنە بۆ شەرێ ناڤخوەیی و وێرانکرنا کوردان.
نا گۆتن بۆ بافل تالەبانی، نا گۆتنە بۆ سازیێن دژمنێ کورد، نه‌ژادپەرەستێن شیعه و پاشڤەروویێن حه‌شدا شەعبی.
بافل تالەبانی ب کەساتیا خوە یا خۆپەرست، بەرژەوەندیخواز و خوەپەرەست خیانەت ل هەڤالێن خوە کر و سەرێ وان خوار. ل بەر چاڤێن زارۆکێن وی هاوکار جاف کوشت. مەلا بەختیارێ کو هەموو ژیانا خوە دایە یه‌نه‌كێ وه‌ك تشته‌كێ بێ نرخ هاڤێت ئالیەکی. ئەڤ مرۆڤێ بێرەحم، ئەڤ زۆردارێ کو د رێخستنا خوە دا دکتاتۆر، بەحسا ئینانا دیمۆکراسیێ بۆ کوردستانێ دکەت. نا گۆتن بۆ ڤی شیزۆفرینی، نا گۆتنە بۆ کوشتنێن سیاسی و بێروومەتکرنێ.
بافل تالەبانی یێ کو شۆرشگەرێن رۆژهلاتی ژ بۆ بەرژەوەندیێن خوە رادەستی ئیرانێ دکەت، دەستوورا ژیانێ نادەته پارتیێن کوردستانا رۆژهلات ل سنۆری بمینن، ژ بۆ هەر کورده‌كێ کو ژ پارچەیێن دی یێن کوردستانێ په‌نا ئینایه باشوورێ کوردستانێ ژی خەتەرناکە.
بافل تالەبانی یێ کو ژ بۆ بەرژەوەندیێن خوە ل گه‌ل هەر جورە داگیرکەرییه‌كێ هەر جوره په‌یوه‌ندییه‌كا قرێژ دروست دكه‌ت، زیانێ دگه‌هینیته ناڤبەرا کوردان ب خوە ژی. ژ بەر ڤێ چه‌ندێ، نا گۆتن بۆ بافل تالەبانی، نا گۆتنە بۆ کەسێن کو هەڤکارییا د ناڤبەرا پارچەیێن کوردستانێ دا خراب دکه‌ن.
بافل تالەبانی بەلایەکە کو به‌ره‌یێ دژه کوردستانی دخوازیت بکەته بەلایا سەرێ هەموو کوردان.
ژ بەر ڤێ چه‌ندێ، نا گۆتن بۆ بافل تالەبانی و پارتیا وی، نا گۆتنە بۆ هەر جورە یاریه‌كا داگیرکەریێ و بۆ روحا حه‌حشاتیا له‌عنه‌تی یا د ناڤ کوردان دا. نا گۆتن بۆ بافل تالەبانی، ل خوه‌دان دەرکەتنه ل ئیرادە، کەرامەت و پاشەرۆژا ئازاد یا کوردان ب خوە یە.
