بۆچی ئەرێ بۆ لیستا په‌ده‌كێ یا هەژمار 190 و مەسروور بارزانی؟
د 20ی جۆتمەهێ دە هلبژارتنێن پارلەمەنتۆیا کوردستانێ تێن لدارخستن، هەر کەسه‌كێ کو دچیتە سەر سندۆقێ، دڤێت بزانیت کو کوردستان نە وەلاتەکێ سكه‌نده‌نافی یه. ژ بەر کو کوردستان ل ناڤ ئالۆزیێن رۆژهلاتا ناڤین دا هەول ددەت ل سەر پێیان بمینیت و د ناڤ ئەردنیگاریەکێ دا یە کو ژ ئالیێ داگیرکەران ڤە هاتیە دۆرپێچکرن و شەر بەردەوامە. ژ بەر ڤێ یەکێ، د هه‌لبژارتنان دا نه ژ بۆ گۆتنێن خوه‌ش، سۆزێن رۆمانتیکی و کەساتیێن نه‌رازی، لێ پێدڤییه دەنگ ب هێزەکا ب ئه‌زموون، بهێز و باوه‌رپێكری بهێته دان کو ب راستی بشێت کوردان ژ ئاگرێ رۆژهلاتا ناڤین رزگار بکەت.
چ هوون ئالیگرێن په‌ده‌كێ بن یان ژی نه، هوون دێ بینن ئالیێ کو د ناڤبەرا كێلبێن بەغدا و تەهرانێ دا ناهێته پەرچقاندن، وەک دیپلۆماتەکی ل سەر مێزێ روودنیت، دانووستاندنێ دکەت و تەسلیم نابیت، ئەو لیستا په‌ده‌كێ یە کو مەسروور بارزانی سەرکێشییا وێ دکەت.
ئەرێ ژ بۆ لیستا هەژمار 190، ژ بەر کو ئەو لیستا تەڤگەرا بارزانی یە. ئەڤ لیستە، هەلوەستا کوردستانی و داخوازا ئازادیێ یە کو ژ ئەحمەدێ خانی هەتا شێخ عوبه‌یدوللایێ نەهری، و ژ وان دەرباسی بارزانیان بوویە. ژ بەر کو ئەڤ لیستە هەلوەست و ئه‌زموونا تەڤگەرەکا سیاسی یە کو ل دژی په‌یمانا لۆزانێ یا کو کورد پارچە کرین رابوویە و ئەو پەیمان رەد کریە. دەنگدانا ژ بۆ ڤێ لیستێ، دەنگدانه ژ بۆ کوردستانی بوونێ.
په‌ده‌كه د ڤێ هه‌لبژارتنێ دا نە تنێ ل گه‌ل پارتیێن سیاسی هەڤرکی دکەت. ئەو ل گه‌ل هێزێن داگیرکەرێن کو پشتگریا ڤان پارتیان دکه‌ن و هه‌روه‌ها ل گه‌ل پەیمانکارێن کو د به‌ره‌یا دژی کوردستانی دا نە، هەڤرکیێ دکەت. ئەو ل گه‌ل رژێما شیعه یا بەغدایێ یا کو دخوازیت ستاتوویا کوردستانێ به‌رته‌نگ بكه‌ت و هەتا وێ ژناڤ ببه‌ت و ل شوونا کوردستانیبوونێ ئیراقیبوونێ بسەپێنیت، هەڤرکیێ دکەت. ئەو ل گه‌ل بێعەدالەتیا دادگەها فەدەرالا ئیراقێ یا کو سیستەما هه‌لبژارتنێ گوهارتی داكو هێزا په‌ده‌كێ بشکێنیت هەڤرکیێ دکەت.
ئەو ل گه‌ل هەولدانێن دەولەتا ئیرانێ یا كو بافل تالەبانی د خەملینن و ل سەر کوردان دسەپینن هەڤریکیێ دکەت. ئەو ل گه‌ل مەدیایا په‌كه‌كێ یا كو ل ستەنبۆلێ دخوازیت ل گۆری ئه‌جێندایا دەولەتا کوور یا ترکیێ، کوردان بکەته دژمنێ بارزانییان هەڤرکیێ دکەت. ئەو ل گه‌ل پارتیێن ب ناڤێ ئیسلامی کو ب پشتگریا ئیران و ترکیێ ئاینی ئیستیسمار دکه‌ن دا کو ناسنامەیا نەتەوەیی یا کوردان لاواز بکه‌ن هەڤرکیێ دکەت. ئەو ل گه‌ل شاسوار و بافل یێن کو ژ ئالیێ لۆبیێن دژه-کورد یێن هەرێمی و رۆژئاڤایی ڤە دهێنه برقاندن هەڤرکیێ دکەت.
به‌رێ خوه بده‌نێ، ل پشت هەموویان هێزەک هەیە کو حه‌ز ژ کوردستانێ ناکەت. ئه‌گه‌رێن کو سەددام 8 هزار بارزانی ب ساخی بنئاخ کرین چ بوون، ئیرۆ ژی ئه‌گه‌رێن دژبەرییا داگیرکەران یا ل هەمبەری بارزانیاین هەمان تشته. ژ بەر کو د 150 سالێن دوماهیێ دا بێ ڤه‌قه‌تیان د تێکۆشینا سەرخوەبوونا کوردستانێ دا رۆل گێرایه و نها ژی د کوردستانێ دا ئالایێ سه‌رخوه‌بوون و ئازادیێ بارزانی هه‌لدگرن و وان هێز هەیە کو ڤی ئالای هێژ بلند بکه‌ن.
ئەگەر پارتیێن دی ئه‌ڤرۆ بەحسا کوردستانێ دکه‌ن، ئه‌گه‌را وێ هەبوونا په‌ده‌كێ یە. ئەگەر په‌ده‌كه نه‌بیت، ئەڤێ بێیی کو ببێژن کوردستان، خوە تەسلیمی بەغدایێ بکه‌ن. ژ بەر ڤێ یەکێ، هەر کەسێ کو ل دژی ئیراقیبوونا کوردستانێ یە و ئازادیخوازە، چ لایەنگرێ په‌ده‌كێ بیت چ نەبیت، پێدڤییه دەنگێ خوە بدەته لیستا 190.
چ هوون دلسۆزێن په‌ده‌كێ بن یان ژی نەبن، ئەگەر هوون دخوازن زارۆکێن وە د کوردستانەکا مۆدێرن، ئارامتر دا بژین، دڤێت هوون پشتگریا لیستا 190 ئانكو مەسروور بارزانی بکه‌ن. مەسروور بارزانی نوونەرێ مۆدێرنێ تەڤگەرا بارزانی یە کو دیرۆکا وێ ژ 130 سالان دەرباس دبیت.
حکوومەتا مەسروور بارزانی د مەرجێن دژوار دا هاته سەر کار. لێ ب ژیرییا خوە یا دیپلۆماتیک، پشتی داگیرکرنا کەرکووکێ، ئاخا مری یا ل سەر کوردستانێ راکر و کورد بەر ب پاشەرۆژەکا رۆناک ڤە برن.
د دەما سەرۆکوەزیریا وی دا، بەغدایێ وەک رێبازەکا شەرێ تایبەت مووچە بڕین و خواست ب بزاڤه‌كا ناڤخۆیی حکوومەت تەسلیم ببیت، لێ ب سەر نەکەت.
پارتییێن کرێگرتی وەک په‌كه‌كێ 9 پێشمەرگە شەهید کرن، بازارێن هەولێر و دهۆکێ سۆتن، لێ دیسا ب سەر نەکەتن.
یه‌نه‌كێ گەلەک جاران وەکە شانتاژ خوە ژ حکوومەتێ ڤەکێشا و هەول دا کارێن حکوومەتێ ئاستەنگ بکەت، لێ دیسا ژی ب سەر نەکەت.
ئیرانێ گەلەک جاران ب مووشەکان ل هەولێر دا، لێ دیسا ژی نه‌شیان مەسروور بارزانی بینن سەر خەتا خوە.
مەسروور بارزانی دۆرپێچکرنا ل سەر پارتیا خوە، حکوومەتا خوە و خوە دیت و د سه‌ر هەموو ئیستفزازان را، نێزیکاتیەکا هشمەند نیشان دا کو ئەو دەولەتمەدارەکێ جدییە و ناکەڤیتە داڤێن دژمنان. ب گاڤێن دیپلۆماتیک، حکوومەتا هەولێرێ ڤەژاند. وی دەست ب ئاڤاکرنا سیستەمەکی ل سەر بنگەهێ چاندنێ و هلبەرینا بەرهەمێن خوەجهی کر و ل کوردستانێ شۆرشا ئابۆری یا مللی کر. سیستەمەکێ بهێزا بنگەهین و سیسته‌ما ڤەگوهاستنا رێ و پران ئاڤا کر.
ژ کیژ ئالیی ڤە بخوازن به‌رێ خوه بده‌نێ، د پاشەرۆژا دژوار دا کەسێ کو دشیت بەرپرسیاریا ڤێ حکوومەتێ هه‌لگریت، مەسروور بارزانی یە.
و دهێته گۆتن کو دەما مرۆڤ د رووباری را دەرباس دبیت، نە هەوجەیە هەسپی ب گوهۆریت، د ڤێ رەوشا هێرش و شەری دا ژی حکوومەت ناهێته گوهارتن، ژ بەر ڤێ یەکێ هەر کەسێ کو هزرا وەلاتێ خوە و پاشەرۆژا خوە بكه‌ت، چ ئەندامێ په‌ده‌كێ بیت چ نه‌بیت، دڤێت دەنگێ خوە بدەته لیستا په‌ده‌ك یا هەژمار 190 کو مەسروور بارزانی پێشەنگییا وێ دکەت. لیستا ئاڤادانییێ، لیستا خوەراگرییێ، لیستا خوە نەچەماندنێ و لیستا پاشەرۆژەکا ئازاد بۆ خاک و نشتمانی.
