ل سەرۆک بارزانی خوەدی دەرکەتن
د هەموو تێکۆشینێن رزگارییا نەتەوەیی دا، کەسەک ب تێکۆشین و ئارمانجا خوه ب ناسنامەیا نەتەوەیی تێ پێناسەکرن؛ ئەڤ کەس جهەکی ل سەر پارتیان ب دەست دخە و باوەرییا هەڤپارا رێخستنێن جودا، رامانێن جودا و باوەریێن جودا ب دەست دخە. هەر چقاس ئەڤ کەس سەرۆکێ پارتیەکێ بە ژی، ب دەمێ رە گرێدانێن وی ب پارتیێ رە لاواز دبن؛ لێ بەرەڤاژی ڤێ یەکێ، گرێدانێن وی ب هەموو پارتیان، لایەن و گەل رە خورتتر دبن. پشتی ڤێ قۆناغێ، ئێدی نە مومكنه کو مرۆڤ ڤی کەسی ب پارتیەکێ ڤە گرێدە؛ ژ بەر کو ئەو ئێدی بوویە ناسنامەیا نەتەوەیێ. پرانی جاران بێی ناڤێ ڤی کەسی وەرە گۆتن، دیرۆکا تێکۆشینا نەتەوەیێ یان ژی پاشەرۆژا وێ ناهێ ڤەگۆتن. جاران ژ حەقێ وان زێدەتر، جاران ژی کێمتر قیمەت ب ڤان کەسان تێ دایین.
ئیرۆ، دەما کو ئەم بەحسا کورد-کوردستانێ دکن، دەما کو ئەم بەحسا مافێن نەتەوەیی یێن کوردان و دەولەتبوونا وان دکن، بێگومان کەسێ کو تێ بیرا هەر کەسی مەسعوود بارزانی یە. ژ بەر کو بارزانی ب کوردستانێ و ئارمانجا سەرخوەبوونێ رە هاتیە ناسین و ڤێ ناسکرنێ ژی ب جەسارەت، تێکۆشین، سەربۆرێ دیرۆکا خوە و بریاردارییا خوە یا د ئارمانجا دەولەتبوونێ دە ب دەست خستیە. کەسەک کو خوەدیێ ڤان تایبەتمەندیانە، هەر دەم دبە ئارمانجا سەردەستان؛ ژ بەر کو ئەو دزانن کو ب داویئانینا وی دێ نەتەو بێ سەمیان بمینە.
تام ژی ژ بەر ڤان تایبەتمەندیێن پێشمەرگە بارزانی، ئارمانجکرنا وی نە سورپرایز بوو/نابە ژی. ئەم ژی سالانە بالێ دکشینن سەر ڤێ خالێ و دبێژن: (سەدەما ل پشت ئێریشێن ل سەر بارزانی، ناسکرنا بارزانی ب فکرا سەرخوەبوونێ یە؛ ئێریشکرنا ل سەر بارزانی، ئێریشکرنا ل سەر ئارمانجا سەرخوەبوونێ یە).
بارزانی، یێ کو ل هەمبەر هەموو جیهانێ ژ رەفەراندووما سەرخوەبوونێ پاشڤە گاڤ نەئاڤێت، ب لیستکا کەرکووکێ رە روو ب روو ما، کو ئەو دەربەیا داوی یا سەردەستان و هەڤکارێن وان یێن هەرێمی بوو. بێگومان، د لیستکا خییانەتا کەرکووکێ دە ئارمانج سەرخوەبوونا کوردستانێ بوو. لێ د هەمان دەمێ دە ئارمانج بارزانی ژی بوو. ژ بەر کو هەردو ژی ب ئاوایەکی ژ هەڤ ناهێن جوداخستن و هەمان تشتن؛ دەما یەک تێ ئارمانجکرن، یێ دن ژی ب خوەزایی دبە ئارمانج.
د هەڤپەیمانا دژمنکارا کو بەریا رەفەراندوومێ هاتبوو ئاڤاکرن دە، هەڤپەیمانا ستراتەژیکا سالان ئیران/یه‌نه‌كه/په‌كه‌كه/کۆمەل/گۆران و دووڤەلانکێن وان، ب هەر جورە پرۆپاگاندایا بێئەخلاقی هەول دان کو بارزانی بچووک بکن و رەفەراندووما سەرخوەبوونێ ئاستەنگ بکن. لدارخستنا رەفەراندووما سەرخوەبوونێ، ل هەمبەر هەم دەولەتێن جیهانێ، هەم دەولەتێن داگیرکەرێن هەرێمی و هەم ژی جه‌حشان، ژ بۆ کوردان سەرکەفتنەکە دیرۆکی بوو. هەڤپەیمانا وێرانکارا کو دیت کو ئەڤ سەرکەفتنا دیرۆکی دێ ب سەرخوەبوونێ ب داوی ببە، ب ئەرێکرنا ئەمەریکایێ و ب تەڤلیبوونا ترکیێ دەست ب کار کر. روویێ خوە یێ قرێژ ل کەرکووکێ نیشان دان.
خیانەتا ئەشکەرە یا ئالیێ یه‌نه‌كێ، ئالیێ کوردستانی یێ یه‌نه‌كێ، ب تایبەتی کۆسرەت رەسوول، بەر ب هەلوەستەکە ئاشکەرە ڤە بر و خیانەت ژ ئالیێ دەنگێن کوردستانی یێن یه‌نه‌كێ ڤە هات بەرزکرن. تەڤی ڤێ راستیا تال، په‌كه‌كه، هەڤالبەندێ هەری قرێژێ هەڤپەیمانا دژمنکار، چاپەمەنیا خوە یا کو ژ ئالیێ ئیستخباراتا داگیرکەران ڤە تێ برێڤەبرن خست تەڤگەرێ؛ مینا کو د تراژیدییا شەنگالێ دە قەومی. دیارە کو مەدیایا په‌كه‌كێ د لیستکا کەرکووکێ دە ل بەندێ بوو. دەمەکی کو فایلێن خیانەتا ئەشکەرە ژی خوە ڤەشارتن، په‌كه‌كێ ب ئیسرار ئێریشی سەرۆک بارزانی کر و دکە. د شەخسێ سەرۆک بارزانی دە پێشمەرگە وەک “ترسۆنەک” هات نیشاندان. وەک کو ئالیێ یه‌نه‌كێ خیانەت نەکربە و پێشمەرگەیێن گرێدایی وی ئالیی ژ ئەنیێ ڤەنەکشیابن، ب ئیسرار و ب تایبەتی سەرۆک بارزانی ژ ئالیێ چاپەمەنیا په‌كه‌كێ ڤە هات ئارمانجکرن.
په‌كه‌كه، ل گۆری فەرمانا کو ژ خوەدییێ خوە وه‌رگرتیە، ئارمانج دکر کو ب پرۆپاگاندایا رەش بارزانی بچووک بکە؛ د وارێ لەشکەری دە ژی کۆمێن حەشدا شەعبی، رێخستنا تەرۆریست پاسداران و دەولەتێن ئیران/ئیراق دێ هەولێرێ داگیربکن… په‌كه‌كێ خیانەتا کو ل سەر ملێ وێ بوو زێدەتر کر؛ لێ خوەدییێن وێ نەگهیشتن ئارمانجا خوە و نکاریبوون سەرۆک بارزانی بێباندۆر بکن.
هەڤپەیمانا دژ-کورد یا کو هەتا نها نەگهیشتیە ئارمانجێن خوە، ڤێ جارێ ژی ب رێیا کەسەکی پرسگرێک وەک بافل تالەبانی، هەموو ئامرازێن خوە یێن قرێژ چالاک کرنە دا کو بارزانییان بێباندۆر بکن.
هەڤپەیمانا دژمنکار کو دزانە ب دوورخستنا کوردان ژ بارزانییان، وان ژ داخوازا دەولەتبوونێ دوور دخە؛ ب نووچەیێن دەرەو، رەشکرنێ و نیشاندانا تشتێن هەیی ب ئاوایەکی جودا هەول ددە کو بگهیژە ڤێ ئارمانجێ. وەک هەر دەم، ب زانینا کرێگرتییان دخن دەورەیێ، هەم بەریا هلبژارتنێ و هەم ژی دو رۆژ بەریا هلبژارتنێ ب دەرەو، حەقارەت، د شەخسێ بارزانییان دە ب بێئەدەبی ئێریشی مافێ بنگەهینێ هەبوونا کوردان دکن.
د ئەنجامێ دە بلا وەرە زانین کو؛ بنکەتنا بارزانییان و هەولێرێ، بنکەفتنا کوردستانێ یە!
ب ڤی ئاوایی:
ئیرۆ؛ رۆژ رۆژا شەرمەزارکرنا خیانەتا یه‌نه‌كێ-بافل و هەڤالبەندێن وانە.
ئیرۆ؛ رۆژ رۆژا پووچکرنا ئێریشێن کۆمێن خیانەتێ یێن ل دژی بارزانییانە.
ئیرۆ؛ رۆژ رۆژا تفکرنا ل روویێ جه‌حشێن کو ئێریشی بارزانیان دکنە.
ئیرۆ؛ رۆژ رۆژا خوەدی دەرکەتنا رێبازا بارزانییانە.
ئیرۆ؛ رۆژ رۆژا هەلوەست وه‌رگرتنێ یه ل هەمبەر هەموو خیانەتکاران و ب درووشما سەرخوەبوونێ خوەدی دەرکەتنا ل بارزانییان و کوردستانێ یە.
خوەدی دەرکەتنا ل بارزانیان، خوەدی دەرکەتنا ل سەرخوەبوونا کوردستانێ یە…
یێن کو ئێریشی بارزانییان دکن، د راستیێ دە ئێریشی ئارمانجا سەرخوەبوونا کوردستانێ دکن…
نە تەنێ یه‌نه‌كه-بافل، لێ په‌كه‌كه و پێکهاتەیێن وێ یێن کو هەڤالبەندییا وان دکن ژی دڤێ حەساب بدن کوردان!
نەتەوەیێن کو خیانەتێ بێجەزا دهێلن نکارن ببن خوەدی دەولەت…
بمرە کۆلۆنیالیزیم،داگیرکەری و جەحشێن وان یێن ناڤخوەیی.
بژی کوردستانا سەربخوە و ئازاد
بژی پێشمەرگە…
