مەمەت مێردینی

دوهـ 20ی جۆتمەهێ هەڤدەم لگەل سالڤەگەرا داستانا پردێ یا کو تێ دە پۆزا دژمن ل ئەردێ هاتی خستن، هلبژارتنێن پارلەمانتۆیا کوردستانێ هاتن ئەنجامدایین، د ڤێ هەلبژارتنێ دە نە ب تەنێ پۆزا دوژمن، پۆزا کرێگرتیێن وان ژی کو تەمسیلا خەتا خیانەتێ د ناڤا کوردان دە دکن ل ئەردێ هات خستن و گەلێ کورد ژ خەتا کو تەمسیلا خیانەتێ دکە رە گۆت، نا.

تەڤ دژبەر و دژمنێن گەلێ کورد ل بەندێ بوون د هلبژارتنێن پارلەمەنتۆیا کوردستانی دە پەدەکەیا کو خوەدی دیرۆکەک رەنگینە و تەمسیلا خەتا وەلاتپاریزی، کوردپەروەری، نەتەوی و دەولەتبوونا کوردان دکە دەنگێن پێویست بدەست نەخە و پارلەمەنتۆ و حکوومەتا هەرێما کوردستانێ بکەڤن دەست وان، ب ڤێ یەکێ ژی داویێ ب ستاتویا فەرمی یا هەرێما کوردستانێ بینن و کوردان جارەکە دن ڤەگەرینن خالا سفرێ، لێ بەلێ گەلێ کورد ل باشوور ئەڤ یەک دیت و جارەکە دن ژ خایین و دژمنان رە گۆت، نا.

ژ بۆی بنخستنا پەدەکێ د هلبژارتنێن پارلامەنتۆیا کوردستانێ دە، هەڤپەیمانیەک هاتبوو پێکئانین، لێ بەلێ هەڤپەیمانیا کو ژ بۆی بنخستنا پەدەکێ د ڤان هلبژارتنان دە هاتیە پێکئانین ب خوە بنکەت، ئەڤ هەڤپەیمانی کو ژ ئیران، حەشدی شەعبی، پەکەکێ-پەیەدێ و یەنەکێ پێک دهات، ت رێ نەمان دەست بوو نەبری ژ بۆی کو پەدەکێ و بارزانیان رەش بکن. بێ ئەخلاقی کرن، ئێریشێن سیاسی و لەشکەری پێک ئانین، دەرەوێن مەزن پارڤە کرن، خوەست خایینان وەکە وەلاتپارێز بدن نیشاندان و وەلاتپارێزان ژی مینا خایینان ب گەلێ کورد بدن نیشاندان، پارتیەکە وەکە پەکەکێ رۆژ نەبوو کو بێ ئەخلاقی و دەرەوەکە مەزن ل دژی پەدەکێ د مەدیایا خوە د پارڤە نەکە، لێ بەلێ دیسا ژی یا کو د هلبژارتنان دە ب سەر کەتی پەدەکە بوو.

پەدەکە ب سەر کەت ژ بەر کو کوردستانیان دیت ب تەنێ ئەوە باسی، ئارامی، ئاڤەدانی و خوەراگریێ دکە، ژ بەر کو ب تەنێ ئەوە تەمسیلا خواستەکا گەلێ کورد یا سەرخوەبوونا کوردستانێ دکە، ژ بەر کو ب تەنێ ئەوە د تەڤ نەخوەشی و دەردەسەریان دە سینگێ خوە دکە مەرتال ژ بۆی پاراستنا سەر و مال و حالێ ولاتیان، ژ بەر کو بەرێ تیرێن دوژمن و خایینێن گەلێ کورد ب تەنێ ل پەدەکێ یە، لۆما ژی کوردستانیان پەدەکە هەلبژارت و دەرسەکە دیرۆکی ب پەکەکێ و یەنەکێ کو تەمسیلا خەتا خیانەتێ دکن، دا.

بەلێ، گەلێ کورد ل باشوورێ کوردستانێ پەدەکە هلبژارت، ژ بەر کو وان ب زەلالی دیت ل پشت هەموو پارتیێن دن یێن دژبەریا پەدەکێ دکن هێزەکە هەرێمی هەیە کو حه‌ز ژ کوردستانێ ناکە و دخوازە کورد و کوردستانیان بەر ب فەلاکەتەکە مەزن ببە.

کوردستانیان جارەکە دن ب هلبژارتنا پەدەکێ مۆهرا خوە ل دیرۆکێ دا و رەوشا ل کوردستانێ تێ ژیان کرن پڕ باشتر ب تەڤ جیهانێ دا ناسکرن و فێمکرن، کوردستانیان ب تەڤ جیهانی دا فێمکرن، دژبەری، دەرەو و بێ ئەخلاقیێن رۆژانە د مەدیایا دژە کورد دە ب تایبەتی مەدیایا پەکەکێ و یەنەکێ دە د دەرحەق پەدەکێ تێن کرن ت باندۆرێ ل وان ناکە، ئەو پڕ هشیارن و دکارن خایین و وەلاتپاریزان ب هێسانی ژ هەڤ جودا بکن، لۆما ژی جارەکە دن باوەری ب پەدەکێ دا.