بووبێ ئەسەر
ھلبژارتنا کو د رۆژا 20/10/2024 دە ل باشوورێ کوردستانێ پێک ھاتی، نە ھلبژارتنا کوردان خوە ب خوە بوو. ئەڤە ھلبژاراتنا پەدەکێ یا ل دژ خوەفرۆشیێ و داگیرکەران بوو.
وەکە ئەم ھەمی دزانین کو تەکۆشینا پەدەکەییان یا ل ھەمبەر چار داگیرکەران نە کێمی سەد سالانە. د ڤێ تەکۆشینا خوەیا درێژ دە، گەلەک جاران وان وەندا کرنە لێ چ جاران خوە نەقەداندنە و ھەر رابوونەکا وان ژ نوو دە، ب ھێزتر پێک ھاتیە. ھەر جارا ب سەر ژی کەتنە، سەرخوەش نەکەتنە. یاسایێن جڤاتا خوە پێک ئانینە. ژ قاعیدە و نیزاما جڤاتێ دەرنەکەتنە.
ئەڤ ھلبژارتن ژی ھلبژارتنا پەدەکێ و بارزانیان یا ل ھەمبەر داگیرکەر و کرێگرتیێن وان بوو. لێ دیسا پەدەکێ وەکە ھەر جار ڤێ جارێ ژی داگیرکەر و کرێگرتیێن وان تێک برن. ئەڤە ژ بۆنا ھەمی کوردان سەرکەتنەکا مەزن و پاراستنا کوردستانا کو بەرێ وێ بەر ب سەرخوەبوونێ ڤەیە، بوو.
مە کوردان دیت و بوونە شاھدێ وێ یەکێ کو ئەڤ ھلبژارتنە چقاسی زەحمەت بوو. دبە کو ھلبژارتنەکە دن ژ ڤێ ژی زەحمەتر بە. ژ بەر ڤێ من خوەست چەند نەرین و دیتنێن خوە پێشکێشی بارزانیان بکم.
ھێڤیدارم ئاخافتنێن من شاش نەیێم فێم کرن. لۆما من خوەست دیار بکم کو ژ سالا 1975ێ و ھەتا ئیرۆ ژی، ل گۆر رێبازا پیرۆز من سیاسەت ل باکورێ کوردستانێ دکر و نھا ژی ب کارێ نڤیسینێ ڤە مژوولم کو ڤێ ژی وەکە ئەرکەکی خوە دبینم و دکم. ب بەرھەم و نڤیسێن خوە دخوازم ڤێ رێبازا پیرۆز ل باکورێ کوردستانێ بدم ناسکرن. ژ بەر کو کوردێن باکورێ کوردستانێ پتری وان ل سەر دەستێ پەکەکێ بوونە دژمنێ بارزانیان. ئەز باوەرم کو نفشێ نوو رێبازێ ناس بکن، دێ یەکسەر دەرەوێن پەکەکێ ئەشکەرە بن. لۆما پترین خەباتێن من یێن نڤیسکی ل سەر رێبازێ نە کو وێ ب بەرفرەھی بدم ناساندنێ کو کوردێن باکورێن کوردستانێ و نفشێن نوو وێ ژ نێزدە ناس بکن، دنڤیسینم.
ئەز چاوا ب ڤێ رێبازا پیرۆز باوەرم، د بەرھەمێن من دە دیارە. ئەز وەکە ھندەکان ب دەڤکی نە بارزانی مە و د بنی رە ژی نە دژمنێ وانم. نھا د ڤێ جڤاتا مە دە کەسێن وەھا پرن. کەسێن وەھا دەما پەدەکە و بارزانی خورت بن، ژ وان پەدەکەیی تر و بارزانیتر کەس تونە نە. دەما پەدەکە لاواز دبە یان ھن خەتەر ھەبە بێ دەنگن. و دەما پەدەکە وەندا دکە، دبن دۆستێن دژبەرێ وان.
مە د ڤێ ھلبژارتنێ دە ژی ئەڤ دیت. ھندەکان باوەر دکرن کو دێ پەدەکە وەندا بکە، لۆما ھەتا دەما ھلبژارتن قەدیا ژی گەلەک بێ دەنگ بوون. رەنگ و دەنگێ وان نە دیار بوو. لێ پشتی ب سەرکەتنێ دیسا وان ژ ھەر کەسێ پتر دەست ب پەسنا پەدەکێ و خوەدی ل وان دەرکەتاندنێ کرن و دێ ھێژ ژی بکن. لێ نە ژ دلن. ژ بەر بەرژەوەندیێن خوە ڤێ دکن.
گەلەک جانک و جامێران ب سالان دژمناتیا پەدەکێ و بارزانیان کربوون، لێ ئیرۆ ھندەک ژ وان ب پەرەیێن بارزانیان زکێ خوە مەزن و بەریکێن خوە تژی دکن. ئەڤ ئەو کەسن کو ئیرۆ مەدیایا پەدەکێ داگیرکرنە. ب شنەکی و شەلافتیێن خوە گەلەک سەرکانی کەتیە دەستێ وان. ڤێ ژی وەکە فرسەتەکێ ب کار تینن و ھن جاران ب ھۆستایی پەسنێ پەکەکێ و دەمێ ددن.
کەسێن وەھا د مەدیا پەدەکێ دە بەرپرسیاریێن خوە ب کار تینن دا کو ئەو کەسێن ژ دل پەدەکەیی نە و ب رێبازا پیرۆز باوەرن، ب دەرەو و شەلافتیێن خوە وان ژ ھەڤ دوور بخە. ئەڤ ژی دبە سەرسەدەمەکە گرینگ کو دلێ گەلەک دۆست و ھەڤالبەندێن بارزانیان دمینە.
پرانیا مەدیا باشوورێ کوردستانێ کەتیە دەستێ کەسێن کو بەرێ دژمناتیا بارزانیان دکرن و ڤێ ھێ ژی ژ بۆنا بەرژەوەندیێن خوە ب کار تینن. ھن ژ وان د مەدیا ئانگۆ تەلەڤزیۆنێن بارزانیان دە بوونە وەکە ئیمپاراتۆر کو ئەو بەرێ دژمنێن بارزانیان یێن ھەری خەراب بوون. د ڤێ دەربارێ دە مرۆڤ دکارە گەلەک تشتان بێژە لێ باوەرم تێ زانین…
یا گرینگ دڤێت پەدەکە و بارزانی ژ نھا و پێدە چ بکن؟
ل گۆر من دڤێت پەدەکە و بارزانی ژ نوودە ل خوە ڤەگەرن. شرۆڤەیەکا خوەش، ب رێک و پێک بکە کو دێ ل گەلەک کێمانیێن ناڤ خوە راست بێن. دێ گەلەک کەسێن ل با وانن لێ ژ دل نە ب وان رە نە ژی ناس بکە.
دڤێت ژ نوودە رەوشا ھەمی ئەندام، ھەڤال و دۆستان بەرچاڤ بکن. نێزیکیەک گەرم و دەستێ ئالیکاریەکا ژ دل درێژی کەس و رەوشەنبیرێن ھەتا نھا ھاتبوون ژ بیرکرنێ بکە.
قیمەت و روومەتا رەوشەنبیر و نڤیسکارێن کورد ژ بەرێ پتر بگرن. ژ بەر کو یێن جڤاتان دگوھەرن ئەو ب خوە نە. لۆما ژی ب پشتگریەکا وەکە ھەڤ و خورتیا رەوشەنبیرێن ھەر چار پەرچێن کوردستانێ دێ بارزانی ب ھێزتر و خورتتر ببە.
دڤێت پەدەکە و بارزانی مەدیا خوە ژ نوو دە بەرچاڤ بکن. رەفۆرمەکا نوو د مەدیا خوە دە بکن، ئانکو سەر راست بکن کو کەسێن تێدە کار دکن، رەوشا وان، ھەلوەستا وان ژ رۆژا ئەول دە و ھەتا نھا بەرچاڤ بکن.
دڤێت مەدیا خوە ژ کەسێن بەرێ دژمناتیا وان دکرن پاقژ و تەمیز بکن. کەسێن ب دژمناتیا بارزانیان ھاتبن پەروەردەکرن چ جاران نابن جھێ باوەریێ.
پەدەکە و بارزانی ژ نوو دە ل ناڤا خوە ڤەگەرن کێمانیێن ھاتبوون کرن سەر راست بکن. دلێ ژ وان مابن ژ نوو دە بگرن. ب ستراتەژیەکا ھەڤدەم دێ کوردستانەکا سەربخوە پێشکێشی گەلێ خوە بکن. ژ بەر کو ھاتیە و تێ زانین کو بێ بارزانیان زەحمەتە کوردستان ببە سەربخوە…
گەلەکێن بەرێ د مەدیا پەکەکێ یا کو ل سەر ئەساسێ دژمناتیا بارزانیان دھاتە ب کار ئانین، خەبتیبوون. لێ ئیرۆ پر ب زەلالی تێ دیتن کو کەسێن وەھا د مەدیا بارزانیان دە پرۆپاگاندا دەمێ دکن وەکە بێژن ئەڤ و پەکەکە نە یەکن.
ھن ژ کەسێن وەھا د ناڤبەرا رەوشەبیرێن باکور و رۆژئاڤا دە برینێن مەزن ڤەدکن. مەدیا بارزانیان ژ بۆنا ڤێ ب کار تینن. دلێ وان چاوا دخوازە وەھا تەڤدگەرن. قەت رۆژەکێ کەسێن وەھا بەحسا بەرھەمەکە نڤیسکارەکی باکورێ کوردستانێ یێن پەیوەندیا وان ب پەکەکێ ڤە تونە و نەبوویە، ناکن.
ئیمکانێن کەتنە دەستێن کەسێن وەھا ژ بۆنا ناس و دۆستێن خوە یێن نێزیک ب کار تینن. ب ڤێ بەرپرسیاریێ ژی رۆلەکە خەراب دلیزین. ھندەک نڤیسکارێن دۆستێن خوە پر مەزن دکن و قەت بەحسا ھندەک نڤیسکارێن کو پرانیا خەباتێن وان د بەر رێبازا پیرۆز دە ھاتیە کرنێ، ناکن. یا راستی کەسێن وەھا د ناڤبەرا رەوشەنبیرێن کوردان دە برینێن مەزن ڤەدکن. ب سایا تەڤگەرا کەسێن وەھا گەلەک رەوشەنبیر و نڤیسکارێن باکور دلێ وان دمینە و بێ دەنگ دبن.
وەکە تێ زانین کو ئیرۆ گارانتیا کوردستانێ بارزانی نە. ھەبوونا وان ھەبوونا کوردان و کوردستانەکا سەربخوەیە. ژ بەر کو ئێدی بارزانی فەلسەفەیەکە و ئەڤ ژی ژ بۆنا کوردستانەکە سەربخوە ل سەر کارە.
ئەڤ سەرکەتنا نوو یا پەدەکێ و بارزانیان سەرکەتنەکا ل ھەمبەر داگیرکەر و پێگرتێن وان بوو. ب ڤێ سەرکەتنێ دژمنێ خوە تێک برن. دۆست و ئالیگرێن پەدەکێ و بارزانیان ژی شاد بوون. لۆما ئەڤ سەرکەتن دبە مسۆگەرکرنا کوردستانەکا سەربخوە. دڤێت دۆست و دژمن باش فێر ببن کو بێی بارزانیان کوردستان ئازاد و سەربخوە نابە. ژ بەر کو ئێدی بارزانی و کوردستان بوونە یەک.
د ڤان شەرتێن زەحمەت دا کو ھەرکەسێ دژمناتیا بارزانیان دکر. دیسا دەنگەکی باش ئانین. ل گۆر من تێر ناکە. ژ بۆنا زێدەتر دەنگان رەفۆرمێن نوو، دەستوور و بەرنامەیێن خەباتێ یێن ھەڤدەم دڤێت پێک بێن. پەدەکە ئێدی نە حزبە ئەو دەولەتە. لۆما دڤێت ل گۆر یاسایێن دەولەتێ تەڤبگەرن. ھەمی سازیێن خوە ژ نوو دە بەرچاڤ بکن و ھندەک ریفۆرمێن نوو د وان دە پێک بینە.
ئەز ژ بۆنا ڤێ سەرکەتنێ پەدەکێ و بارزانیان و ب گشتی ملەتێ کورد پیرۆز دکم کو وان دیسا خوە ھلبژارتن. ژ بۆنا ھلبژارتنەکا دن و پترین دەنگان دڤێت ھەمی کورد ژ بارزانیان رە ببن ئالیکار. ژ بەر کو ئەو گاراناتیا کوردستانەکا سەربخوە نە…
