ئەڤ 2 سالن مەدیایا پەکەکێ رادگھینە کو پەدەکێ د رەڤا عەڤدللا ئۆجالان یا ژ ئیتالیایێ دە رۆل لیستیە و دبێژن، “پەدەکە پارچەیەک ژ کۆمپلۆیا ناڤنەتەوەیی یە.” ئەڤ یەک ژ بەر کو پەکەکە بوویەران نە ل گۆری راستیان، ل گۆری سیاسەتا خوە ڤەدبێژە، تێ فێمکرن. نھا ژی ئیدیحا دکن کو ھەموو خرابیێن ل جیھانێ و کوردستانێ ب دەستێ پەدەکێ تێن کرن. ل گۆری وان پەدەکە سەدەما تسونامی، شەرێن جیھانێ، ئەردھەژ، کونبوونا تەبەقەیا ئۆزۆن، کوشتنا ئەندامێن پەکەکێ و کریزا ئابۆری یا جیھانێ یە. ئەڤ دەمەکە دبێژن “پەدەکێ نەھشت کو سەرۆکێ مە ل ئیتالیایێ بمینە.” ب ئیحتیمالەکا مەزن ئەو دێ ڤێ دەرەوێ بفرۆشن و پشتی دەمەکێ ببێژن، “ھێزێن پەدەکێ سەرۆکێ مە ل کینیایێ گرتن و برن ترکیێ.”
زووبەیر ئایدار سەرێ خوە ژ ناڤا جڤاتا ژنان و سێنیکا خوارنێ دەرخست و ئاخڤی.
زووبەییر ئایدار یەکەم جار دەرەوا “پەدەکێ نەھشت ئۆجالان ل ئیتالیایێ بمینە و دۆسیا دا ئیتالیایێ” کر. زووبەیر ئایدار نە ئەندازیارێ ڤی کارییە، رێڤەبریا پەکەکێ گۆتە وی وھا ببێژە. ب راستی، ئەو نە ئەو کەسە کو ھشێ خوە ژ ژنان و خوارنێ بگرە و ل سەر تشتێن پر سیاسی بفکرە. یێن وی ناسدکن دزانن. لێ ئەو ھاتە ئەرکدارکرن بۆ ڤان گۆتنان و پەکەکەییان ژی بێشەرم و بێحەیا ڤێ دەرەوێ دوبارە دکن.
ژ بەر کو ئۆجالان د سالا 1998 دە ژ شامێ دەرکەت و وەک ئیرۆ ئینتەرنەت تونەبوو، ب ئیحتیمالەکە مەزن ئەندامێن پەدەکێ ژی وەک ھەر کەسی ژ رادیۆیێ مژارا وی بھیستن. پەدەکێ چ جاران ھەول نەدایە کو پەکەکێ ژ چ دەران دەرخینە. د راستیێ دە، بەرۆڤاژی ڤێ، پەکەکێ ھەر تم ب خێرا خوە وەک دۆستێ پەدەکێ دەستنیشان کرنێ گھاندیە جھەکی. نھا ژی ب ئیخانەتەکا مەزنا و بێوەفایی بەرسڤا پەدەکێ ددە.
بارزانییان کامپانیایێن ژ بۆ ئۆجالان ئیمزە کرن
بەریا ھەر تشتی ژ سالا 1990 ھەتا ئیرۆ پەدەکە چ جاران نەبوو پارتیا کو دەسپێکێ ئێریشی پەکەکێ کربە. یێ کو ھەر تم ئێریشی پەدەکێ دکە و گولەیا یەکەم داڤێژە پەکەکەیە. ھەروھا سەرۆک بارزانی ژ یەکەم دەقەیا گرتنا ئۆجالان دە پەیامەک بەلاڤ کر و تێ دە گۆت: “چقاس خەمگین بووم کو کوردەک ب ڤی ئاوایی ھات گرتن. ھەتا ئۆجالان ھاتە گرتن ژی د ناڤبەرا پەکەکێ و پەدەکێ دە شەر و پەڤچوون ھەبوو. پشتی کو ئۆجالان ھات گرتن، پەدەکێ ب خەمخووری خوەست شەرێ د ناڤبەرا وان و پەکەکێ دە بسەکنە. د شەرێ سالا 2000 دە د ناڤبەرا یەنەکێ و پەکەکێ دە ھەکە پەدەکە نەبا ئەندامێن پەکەکێ دا د ناڤبەرا ئیران و یەنەکێ دە فەتسن.
ژ بۆ کامپانیایا “ئۆجالان ئیرادەیا من یا سیاسییە” کو د سالێن 2005-2008 دە ژ بۆ ئۆجالان ھاتبوو دەستپێکرن، ل ھەولێرێ و دھۆکێ ب دەستوورا پەدەکێ ستاند ھاتن دانان و ب ھەزاران ئیمزە ھاتن کۆمکرن. د کامپانیایا ئیمزەیان یا ژ بۆ ئۆجالان د گولانا 2013 دە ھاتی دەستپێکرن دە، ل سەر ناڤێ پەدەکێ نێچیرڤان بارزانی و وەزیرێن پەدەکێ ئیمزەکرن. سەرۆک بارزانی ب خوە ژی دیار کر کو ئەو ژ رەوشا ئۆجالان گەلەک ب باندۆر بوویە و گۆت،”ئەز ناخوازم کوردەکی د گرتیگەھێ دە ببینم.” بارزانییان ئەڤ 40 سالن ل دژی پەکەکێ چ رێکەفتن پێک نەئانینە، تەنێ بەرسڤا ئێریشێن ل سەر خوە ددن.
پەکەکە، ئەفسانەیا بێوەفاتی و خیانەتێ یە
وەکە کەسەکی کو ئەڤ 45 سالن پەکەکێ دشۆپینم و دیرۆکا وێ باش دزانم، ئەز ژ وە رە ببێژم کو ھوون چ ل پەکەکێ بکن بلا بکن، د داویێ دە ب قاسی قەنجیا کو وە کریە ھوونێ ببن ئارمانجا ئیخانەتا پەکەکێ. پەکەکێ چ پرەنسیبێن ئەخلاقی و وەفاداریێ نینن. یەکانە پرەنسیب بەرژەوەندییە، دۆست و ھەڤال تەنێ د گۆتنان دەیە. ئۆجالان تێ گرتن، رێخستنا خوە دفرۆشە، گەریلایێن خوە دفرۆشە، گاڤا رێخستنا وی پێدڤی بوو ھەڤالێن خوە دفرۆشە، پەکەکە سەرووبنێ خوە بێوەفایی و بێبەختییە. خیانەتا پەکەکێ ئەفسانەیە…
کێ ئۆجالان رادەست کر؟ تەنێ یێ نە سووچدار دەولەتا ترکە…
بەلێ، نھا پەکەکە دژمناتیا پەدەکێ دکە لۆما ژی ھەر تشتێ کو وەرە سەرێ ئاپۆ راستەراست پەدەکێ وەکە گوونەھبار دبینە. جارەکێ د گۆتن “پەدەکە ژ سیستەما ئیمرالیێ بەرپرسیارە.”
وەکە مە گۆت، 25 سال دەرباس بوونە و ھینا ژی لێکۆلینان دکن کا کێ ئۆجالان تەسلیم کریە. بەسێ ھۆزات ئیسال دەرکەت سەر دکێ و گۆت، “یەونانستان، مسر، فرانسا، ئیسرایل و ئەمەریکا ل دژی رێبەرێ مە کۆمپلۆ پێک ئانین، تەنێ ئیرانێ چ رۆل نەبوو.” بەسێ ھۆزات ژ بەرکو د بن سێبەرا ئیرانێ دژیت بێگومان وان وەکە دۆست پێناسە دکە. و ژ بەر ھن سەدەمان پەکەکە و ئۆجالان کو ئەڤ 25 سالن ھەر کەسی تاوانبار دکن، تەنێ دەولەتا ترک تاوانبار ناکن. لێ بەلێ دو تاوانبار و پلاندارێژەرێن سەرەکە ھەبوون: ئۆجالان و دەولەتا ترک.
چ بەلگەیێن دیرۆکی نینن کو ئەندامێن پەکەکێ پەدەکێ ب پرسگرێکا ئۆجالان تاوانبار بکن. ھەزار تشتێن باشێن کو پەدەکێ ژ بۆ ئۆجالان کرنە ھەنە، لێ بەلێ یەک خەرابی ژی ل گەل پەکەکێ نەکرییە. لێ گەلەک بەلگە ھەنە کو ئۆجالان ب سەر داخوازییا خوە چوویە ترکیێ. بەلگە ھەنە کو د سانیەیا ئەول دە گۆتیە “دایکا من ترکە، ئەز دخوازم خزمەتا دەولەتا ترک بکم”. زووبەیر ئایدار یەک ژ وان کەسانە کو ڤێ یەکێ ھەری باش دزانە…
