رێخستنا چەتە یا ب ناڤێ “جوانێن شۆرەشگەر” یا گرێدایی پارتیا کارکەرێن کوردستانێ (پەکەکێ)، ل دەڤەرا شەھبایا حەلەبێ، کەچەکە تەمەن بچووکا کورد ب ئارمانجا تەڤلیکرنا وێ د ناڤا رەفێن پارتیێ دە رەڤاند.
ل گۆری ئاگاهیان، رێخستنا جوانێن شۆرەشگەر د 7ێ مژدارا 2024 دە زارۆکا ب ناڤێ “گولنار حوسێن سالح” یا 16 سالی ژ باژارێ تل رەفعەت ل دەڤەرا شەھبا ل گوندەوارێ حەلەبێ رەڤاند و بەر ب کامپێن پەروەردەیا لەشکەری ڤە بر، حەتا نها ژی چارەنڤیسا وێ نەدیارە.
گولنار ژ گوندێ مامالا یێ ناڤچەیا راجۆیا باژارێ عەفرینێ یا کوردستانا سووریێ یە و ژ سالا 2018 ڤە ژ باژارێ عەفرینێ کۆچبەری دەڤەرا شەھبا بوویە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
