بووبێ ئەسەر
ل گۆر من ئەڤ پر ڤەکری و ئەشکەرەیە کو دێ لۆزانا دویەم ژی ل سەر دەستێ ھندەک کوردێن کو نە ژ بۆنا کوردان کار و خەباتێ دکن پێک بێ. سیگنال و پێڤاژۆیا کو قاشۆ ل سەر ناڤێ باخچەلی دەستپێکرییە، ب مە ددە زانین کو لیستکەک پر گەمار ل سەر سەرێ کوردان تێ لیستن.
ھەتا نھا کوردان تم ژ بەر نە یەکرێزیا ناڤا خوە و نە ل ھەڤکرنا عەشیر و پارتیێن سیاسی، وەنداکرنە. لێ مخابن سیاسەتا باکورێ کوردستانێ ڤێ نابینە و نکارە ڤێ بخوینن کو د لۆزانا ئەول دە چ ھات سەرێ کوردان، دێ د لۆزانا دویەم دە، ژ وێ خەرابتر بێ سەرێ وان.
ھەر ئەم بەحسا لۆزانا دویەم دکن. لێ ئەڤ د ڤێ دەما مە دە دکارە ب ناڤەکی دن ژی دەرکەڤە پێشپەری مە کوردان. ژ بەر کو پرۆژەیا لۆزانا دویەم ل سەر دەستێ بارزانیان کو باشوورێ کوردستانێ ئازاد کرن، تێک چوو. لۆما نھا ھندەک لیستکێن ژ بۆنا تێکبرنا پەرچێن دن تێ لیستن.
ل رۆژھلات و ل رۆژئاڤا رەوش نەدیارە. ور دێ چ ببە ھێژ ژی ب زەلالی ئەم نزانین. گەلەک سیناریۆ ھەنە و گەلەک ئاکتۆرێن سیاسی جار جارن لیستکێن خوە ل سەر دەپێ شانۆیا سیاسەتا رۆژھلاتا ناڤین دلیزین.
وەکە تێ زانین کو د پەیمانا لۆزانا ئەول دە، ب نھنێ دھاتە زانین کو ھەگەر د سەد سالان دە داگیرکەرێن کوردان، کوردێن ناڤا خوە نەکن وەکە خوە، دێ چ بێ سەرێ وان دیار بوو. لێ داگیرکەرێن مە ب ڤێ ب سەرنەکەتن. وان ژی نھا رەنگ و دەنگ گوھەرین کو پاریەکێ نانی بدن کوردان دا کو خوە ژ سەرخوەبوونا کوردستانێ رزگار بکن.
ژ بۆنا وی پاریێ نانێ ترسی ژی، ئاکتۆرێ ل ھۆلێ قاشۆ ل سەر ناڤێ کوردان تەنھا پەکەکە و پارتیا وان یا ئەشکەرە دەم ھەنە. ژ خوە پەکەکێ چ جاران کوردستانەکا سەربخوە نەخوەستیە و ناخوازە. ھەتا فەدەراسیۆن و ئۆتۆنۆمیێ ژی ناخوازن. تەکۆشین و مالوێرانیا د کوردان دە کری ژ بۆنا ب ھێزکرنا کۆمارا ترکیێ بوو.
لێ د دەمێ خوە دە ھندەک کوردان ئەڤ یەک فێم نەکرن. یێن فێمکربوون ژی ژ گۆتن و نڤیسێن کەسان باوەر نەکرن. لۆما ژی ئیرۆ ئەو پرۆژەیا کو کورد و ترک برانە دکەڤە رۆژەڤێ و ل گۆر باوەریا من دێ ئەڤ پرۆژە ل سەر دەستێ دەمێ پێک بێ.
چما؟؟؟
ژ بەر کو ئیرۆ ئەم بخوازن و نەخوازن د قادا نەڤنەتەوەیی دە وەکە ھێزەکە کوردان یا دەمۆکراتیک دەم ھەیە. ھەگەر رونشتن یان دانووستەندنەک ھەبە دێ لگەل وان هێت کرن. ژ خوە ئەو ژی کوردستانێ ناخوازن. ئارمانج و ھەدەفا وان کۆمارەکا ب ھێز و قاوەتە کو ئەو ژی کۆمارا ترکییێ یە.
ھەگەر کوردێن باکورێ کوردستانێ لھەڤبانا، یەکیتی و ھەڤکاریەکا خورت د ناڤا وان دە ھەبا، دبوو کو ھندەک ھەڤدیتن لگەل وان ژی هاتبان کرن. لێ ژ بەر کو تەرابەرا نە، دەولەتێن مەزن کو دخوازن گوھەراندنەکێ بکن ئانگۆ وەکە لۆزانا یەکەم، لێ ب جوورەکی دن.
ھەزار مخابن نە لھەڤبوون و نەیەکرێزیا ناڤا پارتیێن باکورێ کوردستانێ سەدەمەکە سەرەکە یە کو نکارن ئەنیەکا نەتەوەیی دامەزرینن و ببن دەنگ و رەنگێ کوردێن نە پەکەکەیی. لێ کو ئەڤ نەبە دەولەتێن مەزن سەرێ خوە ب کوردان رە نەێشینن و دێ دەمێ وەک مخاتەبێ کوردان بگرن.
روونشتن دانوستاندن ل گۆر قاوەت و ھێزێیە. ئەڤ نھا ل باکورێ کوردستانێ تەنھا پەکەکە و رێخستنا وێ یا ئەشکەرە دەمە. وێ ب دەستێ پەکەکێ وەکە لۆزانا ئەول پێک بێ. د ڤێ پێکانینێ دە ژی دێ دیسا کورد وەندا بکن. ئەڤ وەندا کرن کو ل گۆر من وێ ببە وەنداکرنا ملەتێ کورد کو ئێدی چ سەد سال ژی نەما دکارە مە ژ ڤێ مالوێرانیێ ئازاد بکە.
دەولەتێن داگیرکەر و یێن جیھانێ ئیدارە دکن یان ب رێڤە دبن. نھا د ناڤا کارێ گوھەراندنەکا نوو یا رۆژھلاتا ناڤێن دە نە. داگیرکەرێن مە ژی ب ھەر ئاوایی د ناڤا کارێ کو کوردستانەکا سەربخوە پێک نەیێ دخەبتن. ھا کی دێ ب سەرکەڤە؟ ل گۆر من سەرکەتن دێ ببە پارا داگیرکەران و وەنداکرنا ڤێ جارێ ژی ژ یا ھەرجار خەرابتر دێ ببە یا کوردان.
لێ ب حەملەیێن نوو و د خولەکێن (دەقە) درێژکرنێ دە کورد نەبن ھێز و قاوەتەکا نەتەوەیی، نەبن خوەدییێ ھێزەکا نشتیمانپەروەر و خوە د بن کۆنەکی نەتەوەیی دە نەکن یەک. دێ باکورێ کوردستانێ ب تەمامی تێک ھەرە. باشوورێ کوردستانێ دێ لاواز بە. قەدەرا رۆژئاڤا و رۆژھلات ژی دێ چ بە ھێژ ئەم ب زەلالی نزانین.
وەھا خویایە کو پارتی و رێخستنێن مە یێن ھەیی، ژ ڤێ رەوشێ خوەشحالن. ئەگەر نە، دێ ھێزێن خوە کن یەک و ب ڤێ ژی دێ ببن دەنگ و رەنگێ وەلاتێ خوە. دڤێت کورد سبێ لۆمان ژ دەولەتێن مەزن نەکن کو وان چ ماف نەدانە مە. یا راستی ژ بۆنا نە ب دەستخستنا مافان ئەم ب خوە سەدەمین…
