سەرۆکێ حکوومەتا هەرێما کوردستانێ و سەرۆکوەزیرێ ترکیەیێ یێ بەرێ دانوستاندنان ل سەر پەیوەندیێن ناڤبەرا ترکیە و هەرێما کوردستانێ و رەوشا گشتی یا ڤێ داویێ ل ئیراق و دەڤەرێ دکن.
سەرۆکێ حکوومەتا هەرێما کوردستانێ مەسروور بارزانی ئیرۆ (یەکشەم، 24.11.2024) پێشوازیا سەرۆکێ پارتیا پاشەرۆژێ و سەرۆکوەزیرێ ترکیەیێ یێ بەرێ ئه‌حمه‌د داودئۆغلو کر.
د وێ جڤینێ دە کو کۆنسولێ گشتی یێ ترکیەیێ ئەرمان تۆپچو ژی تێ دە ئامادە ببوو، دانوستاندن ل سەر پێشخستنا پەیوەندیێن ترکیە و هەرێما کوردستانێ و رەوشا گشتی یا ڤێ داویێ ل ئیراق و دەڤەرێ هاتن کرن.
سەرۆکێ پارتیا پاشەرۆژێ ئاماژە دا پێگەها گرنگا هەرێما کوردستانێ و تەکەز ل سەر بهێزترکرنا پەیوەندیێن ترکیەیێ ب هەرێما کوردستانێ رە کر.
سەرۆکێ حکوومەتا هەرێما کوردستانێ ژی ژ ئالیێ خوە ڤە حەزا هەرێما کوردستانێ ژ بۆ پێشڤەبرنا پەیوەندیان ب کۆمارا ترکیێ رە د وارێن جودا جودا دە تەکەز کر.
