ئەحمەد بەیان
گەلەک جاران یان مرۆڤ ب خوە حەسابێ شاش دکە، یان ژی حەسابا مالێ و سووکێ ل ھەڤ دەرناکەڤە. و جارنا ژی ھندەک سەختەچی و خێرنەخواز حەسابا مرۆڤی سەرووبنێ ھەڤ دکن و دھێلن کو مرۆڤ پێ بگرە.
ھەڤالێن مە دژمناتی و نەیارتییا بارزانییان ژ خوە رە کریە ئارمانجەکا سەرەکی. رادبن و روودنێن نەیارتییا بارزانییان دکن، دخون و ڤەدخون بارزانی، رازێن نەرازێن بارزانی، خەونێن وان بارزانی، خەیالێن وان بارزانی. بارزانی ژ بۆی خوە کرینە کابووس و ئەو کابووس ژی دەروونییا وان دکە شۆربا نیسکێ. وەکە کو چ دەردەکی کوردان تونەبە، چ پرسگرێکەکا کوردان تونەبە، ئەنەرژییا کوردان ب نەیارتییا بارزانییان ڤە سەرف و تونە دکن. لێ ڤێ جارێ سەرۆکێ مەھەپا نیژادپەرەست و دژمنێ رکنێ ملەتێ کورد دەولەت باخچەلی پلانا ھەڤالان بەرئاڤێتی کر و حەسابا وان و سووکێ ل ھەڤ دەرنەخست.
رۆژنامەیا یەنی یاشام گازەتەسی د مەھا تیرمەھێ (تەمووز) دە ب مانشەتا “ھەڤکارییا باخچەلی و بارزانی” دەرکەت و ب شەش تەلاقێن ژنبەردانێ سووند خوار کو بارزانی ھەڤکار و شریکێ بەلقتی یێ باخچەلی یە. لێ هەڤالێن مە نزانیبوون کو دێ سەرشوونکێ باخچەلی پشتی سێ چار مەھان وان دەرەوین دەرخە و دەستێ براتی و ھەڤکارییێ درێژی سەرۆکێ وان ئۆجالان بکە.
ئاخفتنا باخچەلی کۆمپلۆیەک ناڤنەتەوی ل شۆپینەرێن یەنی یاشام گازەتەسی کر و تفا وان د قرکان وان دە ھشت. باخچەلییێ کو ئەو ژی وەک ھەڤالێن مە نەیارێ بارزانییانە، ھەڤکارییا بارزانییان رەد کر و ل شوونا بارزانی ئۆجالان کر ھەڤکار و دەستەبراکێ سیاسەتا خوە یا پێشەرۆژێ.
ئەز سەرێ وە نەێشینم، ئەڤ مەھەکە رۆژەڤا ترک و کوردان ب باخچەلی و ئۆجالان ڤە گرێداییە. لێ چ حکمەت بیت خەباتکارێن یەنی یاشام گازەتەسی چاپەکا رۆژنامەیا خوە ب مانشێتا “ھەڤکارییا باخچەلی و ئۆجالان” دەرناخن، ھەڤکارییا باخچەلی و ئۆجالان شەرمەزار ناکن و لێبۆرینا خوە ژ بارزانییان ناخوازن.
ئەرێێێێ، ئەرێ!
خوەدێ کەسی شاش نەکە، کو شاش کر ژی فەحش نەکە، کو فەحش کر ژی ھاش نەکە و ھوون ساخ…
یا ب خێر چ بە بلا خوەدێ وێ بکە و ھەو….
ئەنقەرە
